Udalerriaren norabidea zehazteko egitasmoa aurkeztu du udalak
'Zeuaz' egitasmoagaz munitibartarren parte hartzea modu antolatuan gauzatuko dute. Horregaz batera, udalaren eguneroko jarduna hobetzeko asmoa agertu duteMunitibarko herriaren norabidea zehazteko zereginean, gai garrantzitsuei buruzko beharrezkoak dire...
‘Zeuaz’ egitasmoagaz munitibartarren parte hartzea modu antolatuan gauzatuko dute. Horregaz batera, udalaren eguneroko jarduna hobetzeko asmoa agertu dute
Munitibarko herriaren norabidea zehazteko zereginean, gai garrantzitsuei buruzko beharrezkoak diren erabakiak hartzeko Zeuaz egitasmoa aurkeztu du Munitibarko Udalak.Munitibartarren parte hartzea «era antolatuan» abiarazi dutela azaldu dute udal ordezkariek, eta azpimarratu dutenez, udalerriaren norabidea zehazteko herritar denen «gurariak eta nahiak» kontuan hartzea ezinbestekoa da.
Horregatik, abiarazitako egitasmoak ondorengo lau ardatz nagusi dituela zehaztu dute: gardentasuna, herritarren parte hartze aktiboa, munitibartarren gurari eta nahi bateratuak eta denen erabakiak.
Gainera, aurkeztu berri duten prozesuaren barruan udalaren eguneroko funtzionamendua hobetzeko lan egiteko konpromisoa hartu dute.
Parte hartze prozesuak
Zeuaz egitasmoaren barruan, hainbat parte hartze prozesu egongo dira. Prozesu horiek metodologia eta lan ordu propioak edukiko dituztenez, datak hurbildu ahala emango dituzte jakitera.
Horrela, herritarren parte hartze zuzenaren bitartez, 2017 urterako udalak aurreikusi dituen lehentasunei buruzko erabakiak guztien artean hartzea da aipatu parte hartze prozesuen helburua. Hain zuzen ere, hauek dira bizilagunekin landuko dituzten gaiak: 2017ko zein 2018ko aurrekontuak, espazio berdeak janztea, espazio estali baten beharra, umeen parkea berritzea eta auzo batzarrak.
Udalerriko gune berdeetan altzariak jartzeko duten diru laguntza bideratuko du udalak, eta hilaren 18tik aurrera ekarpenak jasotzen hasiko dira.
Aurrekontuak
Apirilaren 1ean, 2016ko aurrekontuen laburpena azaldu eta 2017ko aurrekontuak aurkeztuko dituzte.
Maiatzean, berriz, espazio estaliari eta umeen parkea berritzeari buruzko ekarpenak jasoko dituzte. Horrela, herrian espazio estali baten beharra dagoen ala ez erabakiko dute denen artean, eta era berean, parkea berritu ala ez adostuko dute; eta berritzekotan umeek zelako parkea nahi duten ikusiko dute. Maiatzaren 19tik aurrera, herritarrek iritzi eta proposamenak helarazi ahalko dituzte.
Beste alde batetik, herritarren beharrizanak eta kezkak ezagutu asmoz, azken bi urteetan egin legez, 2017an ere auzo batzarrak egingo dituzte. Jakinarazi dutenez, irailaren 16tik aurrera bilduko dira auzotarrekin haien ekarpenak jasotzeko.
2018ra begira, berriz, abenduaren 16an aurrekontuak osatzeko ekarpenak jasoko dituzte, eta horregaz batera, datorren urterako helburuak zehaztuko dituzte herritarrekin.