Karmen jaietako balorazioa kaleratu dute Markina-Xemeingo Udalak eta Jai Batzordeak

Aurtengo Karmen jaietako balorazioa jaso dute Markina-Xemeingo Udalak eta Jai Batzordeak eskuorri baten, eta antolaketan egon ziren gastu guztien balantze ekonomikoa ere gehitu dute. Etxez etxe banatuko dituzte eskuorriak, eta jakitera eman dutenez, herriko hainbat puntutan ere utziko dituzte: udaletxeko harreran, Herri Bibliotekan eta Uhagon kulturgunean, besteak beste.

Jai Batzordeak egindako jaien osteko azterketaren arabera, Karmen jaien balantzea oso ona izan da orokorean. Ikuskizun handiek jende ugari erakarri dutela esan dute, besteak beste Unian egin diren emanaldiek. “Kaleko ekintza asko egotea ere ondo baloratu da”, azaldu dute.

Markina-Xemein Karmen jaiak kuadrilla egun

Herri Bazkariak eta barrakak ere balorazio ona eduki dute. Guztira 2.750 pertsonak bazkaldu zuten Zelaian. Bero handiegia egin zuela adierazi dute herritarrek eta eguzkitik babesteko neurriren bat hartzea aztertu duten arren, karpa bat jartzearen aukera baztertu egin dute erabat. “Bestelako alternatibaren bat lantzeko aukera mahai gainean dago”. Bestalde, hobetu daitezkeen arloen artean organikoa batzen hastea nabarmendu dute eta bazkalostean kuadrillek Goiko Portaleko iturrian egiten duten garbiketa kontrolatu beharra ikusi dute, “ur hori errekara doalako zuzenean”.

Barraken eremuaren alderdi bat obretan egon den arren, barrakentzako nahiko espazio egon dela azaldu dute, eta erabiltzaileek balorazio ona eman diote. Hala ere, badago zer hobetu, musika bateratua lortzea adibidez. “Beste urte batzutan baino euskal musika gehiago entzun da eta hori oso modu positiboan baloratu da”.

Berritasunekin ere gustura. Aurtengo berritasunetako bat Uhagon kulturgune osteko bolatokia izan da. “Erantzun bikaina eta parte hartze handia egon zen jaietan egin ziren tiraldietan. Batez ere helduak aritu dira, baina gazte jendea ere animatu da eta emakumeen parte hartzea ere nabarmentzekoa izan da”.

Herri kirolak egunez aldatzea ere ontzat jo dute herritarrek eta umeen jolasak ere egokiak behitandu zaizkie. “Egurrezko parkeak eduki du batez ere arrakasta”. Bai danborradako bandaren bai eta Karmen Eguneko emanaldia eskaini zuen Euskadi Brass taldearen balorazio ona egin dute markina-xemeindarrek, eta jaietan udaltzaingo gehiago egotea ere positiboki baloratu dute. Beste behin eraso sexistarik gabeko jai parekideen alde egin dela azpimarratu dute udalak eta Jai Batzordeak.

Bestalde, su artifizialen ikuskizunean suek hartzen duten perimetroa berraztertuko dute, “aurten bi lagunek min hartu dutelako”.

Jaietako balantzeari dagokionez, ekintza, sari, publizitate, hornidura eta antolaketako beste arlo guztiak batuta jaiek 120.714 euroko kostua eduki duela jakitera eman dute. Den-dena ageri da zehatz eskuorrian.

Ez dago iruzkinik

Egin iruzkin bat

*

*

CAPTCHA Image

*

Send this to friend