Agur beroa eman diote Pablo Berasaluzeri, Markina-Xemeingo Uni frontoian

2016/07/02

Emozioak hartu du gaur [uztailak 2] Uni pilotalekuko kantxa. Pablo Berasaluzeri ondo merezitako omenaldia eskaini nahi izan diote. Eta halakoetan gertatzen den modura, emaitza gutxienekoa izan da. Gorriz kantxaratu dira Berasaluze eta Beroiz. Urdinez Elezkano eta Galarza. Urdinak aritu dira markagailuan aurretik, eta beraiek eskuratu dute garaipena (15-22). Edonola ere, txalo beroenak Berrizko pilotariarentzat izan dira. Markina-Xemeingo esku pilota eta zesta-punta eskoletako umeek pasilloa egin diote aldageletatik bueltan, eta opariak jaso ditu udal ordezkarien eskutik, pilotazale guztien izenean. Txaloak bueltatu dizkie Asegarceko pilotariak harmailak betetzen zeudenei.

Aimar Olaizola eta MIkel Urrutikoetxea

Olaizola-Urruti, bikoteka San Fermin torneoaren finalerdia ez –Olaizolak uko egin dio txapelketa hori jokatzeari, ezker sorbaldan min hartuta dagoelako–, baina partida nagusiak lehen mailako norgehiagoka ekarri du. Aurrez aurre, Nafarroako torneoa jokatzekoak zirenak: Aimar Olaizola eta Mikel Urrutikoetxea; ondoan izan dituzte, bikotea osatzen, Andoni Aretxabaleta eta Mikel Larunbe, hurrenez hurren. Partida nagusia ere urdinen aldekoa izan da. Baina lehen partida ez bezala, oso orekatua eta oso lehiatua izan da, hasieratik amaiera arte. Ondo jokatu dute laurek, eta herriko pilotariak hiru tanto bikain ere egin ditu, atzetik aurrera etorrita pilota inor ailegatu ezin zitekeen lekura bidaliz. Hamabina, hamalauna, hamabosna, hamaseina, hamazazpina… Berdinketaz berdinketa, azken minutuetan Urrutikoetxea zertxobait biziago aritu da, eta 20. tantoa igo du markagailura, ezker paretan dejada ederra eginez. 18-22 amaitu da pilota jaialdia itxi duen partida.