Egurrezko jolasekin eta uragaz gozatu dute umeek Lekeitioko sanantolinetan

2016/09/06

Antzar eguneko mugimendu handia albo batera utzita, askoz lasaiago ibili dira gaur [irailak 6], lekeitiarrak. Umeek hartu dute plaza; eurena izan da, batez ere, gaurko eguna.

Umeak pilota barruan sartuta ibili dira.

Etenik gabeko gozamena izan dute gaurkoa. Egurrezko jolasak izan dituzte goizean, eta uraren eta bitsaren jaia arratsaldean. Bainujantzia eta uretako oinetakoak jantzita, txirristan behera, pilota barruan eta xaboizko burbuilak egiten ibili dira. Idi dema Plaza umeen txokoa izan bada, idiena bihurtu da eliza aurrea. Idi dema egon da eliza aurreko galtzadarrian Karmelo Bikandi eta Enrike Artolaren animalien artean.

Eneko Artola bere idi bikotea gidatzen gaurko idi deman.

Bikandi atera da lehenengo plazara eta ondoren Artola aita semeak. 20 minutuko lana egin dute idiek 2.000 kiloko harriagaz.