Tolosako Ugarein Xistera Zirkuitua irabazi dute Antxon etxebarritarrak eta Manzi mutrikuarrak
Antxon Alberdi etxebarritarra eta Mikel Manzisidor mutrikuarra nagusitu ziren zapatuan [abenduak 8] Tolosako Beotibar pilotalekuan jokatu zen Ugarein Xistera Zirkuituko azken torneo puntuagarrian. 2 eta 0 irabazi zuten nagusien mailako finala.
Tolosako torneoa jokatu aurretik ere Xistera Ugarein Zirkuituko finala zuzenean jokatzeko txartela eskuan zeukaten mutrikuarrak eta etxebarritarrak. Hala ere, Tolosan ere bistaratu zuen bikoteak zirkuitu osoan erakutsitako maila handia. Antxon eta Manzi nagusi izan ziren hasieratik eta kontrolpean eduki zituzten lehen jokoa zein bigarrena. 15-12 eta 15-11 irabazi zituzten biak.
Tolosako txapelketa amaituta, Xistera Zirkuituko finalerdiak eta finala geratzen dira jokatzeko bai mutileten zein nesketan ere. Finalerdiak zapatu arratsaldean [abenduak 15] jokatuko dira Mutrikun, eta abenduaren 22an finalak Markina-Xemeinen.
Finalistak. Nesken zirkuituko finaletarako sailkatuta daude Maialen Aldazabal (Berriatua Zesta Eskola) eta Izaro Arbe (Markina-Xemein), eta beste hiru aurrelari eta atzelariek finalaurrekoak jokatu beharko dituzte aurretik finalerako txartela lortzeko. Finalerdietarako sailkatu dira alde batetik, Maddi Jauregi (Beotibar, Tolosa), Ziortza Landa (Ereño Jai Alai) eta Maite Ortiz de Mendibil (Hondarribia) aurrelariak, eta bestetik, Eneritz Lizardi (Danok Bat, Mutriku), Naia Calvo (Berriatua Zesta Eskola) eta Esti Arriola (Berriatua Zesta Eskola) atzelariak.
Mutilei dagokienez, nagusien mailan Antxon Alberdi (Berriatua Zesta Eskola) eta Mikel Manzisidor (Danok Bat Mutriku) zuzenean sailkatu dira finalera, eta finalerdietan egongo dira Aaron Gonzalez De Matauko (Gasteiz), Ekaitz Goixerri (Danok Bat Mutriku) eta Gaizka Barinagarrementeria (Markina-Xemein) aurrelariak eta Jon Ibarluzea (Markina-Xemein), Mikel Elkorobarrutia (Markina-Xemein) eta Aitor Elkorobarrutia (Markina-Xemein) atzelariak.
Gazteen mailan Aitzol Galletebeitiak (Lekeitio) eta Aize Iturraldek (BAC Biarritz) lortu dute zuzeneko pasea, eta finalaurrekoetan lehiatuko dute Eduardo Agirre (Zumaia), Iñaki Perez (Cabanillas) eta Clement Berge (Kostakoak Bidart) aurrelariek eta Danel Mandiola (Markina-Xemein), Ekaitz Mendizabal (Danok Bat, Mutriku) eta Lucas Olasagasti atzelariek.
Xisterak aurreratu duenez, kiniela erara jokatuko dira finalaren atariko norgehiagokak.
Tolosako Xistera Ugarein Zirkuituko irabazleak, finalistak eta antolatzaileak. Argazkia: Xistera
