Ondarroako Aringaingan taldearen aurkezpena, eguenean
Etxelila Ondarroako emakumeen topalekuak abian dauka ikasturteko programazioa. Eta ikasturterako prestatutako programazioa laster etxez etxe banatuko badute ere, ekintzetako bat aurreratu dute: Aringaingan taldearen aurkezpena. Aringa-aringa egin nahi duten emakume guztiek daukate taldeko ateak zabalik, maila eta adina edozelakoa izanda ere. Eta horren berri emateko eta ze dinamika edukiko duten azaltzeko, aurkezpena eguenean [urriak 7] egingo dute, 19:00etan, Etxelilan.
Ondarroako Jabekuntza Eskolaren eta udalaren ekimenez sortu zen Aringaingan taldea 2016. urte bukeran. Eta hasiera-hasieratik Arantza Burgoa kirol hezitzaile ondarrutarra izan da taldearen dinamizatzailea. Parte hartzaileek diote hezitzaile fisiko baten gidaritza edukitzea, entrenamendu pauta batzuk edukitzea, «luxu bat» dela. Aringa-aringa egiteaz gainera, teknika ikasten joaten dira: zelan hartu arnasa, zelan eman zankada, zelan zapaldu….
