Lea-Artibai eta Mutrikuko Hitza

27. Zapato Azulak urdinez tindatu du Ondarroa

Lea-Artibai eta Mutrikuko Hitza — 2026-06-27 16:22:15

Azken egunetako bero sargoririk barik esnatu da gaur [ekainak 27] Euskal Herria, eta gustura hartu dute hori Ondarroara joan direnek. Kamiseta urdinak armairutik atera, eta Alde Zaharra goitik-behera eta ezker-eskubi bete dituzte bertaratu direnek. Herritarrak, inguruko herrietakoak nahiz Euskal Herriko hamaika txokotatik bertaratutakoak elkartu ditu gaur Radixu Irratiak antolatzen duen 27. Zapato Azulak Ondarroan. Hala, aurtengo kartelean keinu egin dioten Felix Beristainen koadro baten antzera, urdinez tindatu dira herriko txoko guztiak.

11:00etarako prest zeuden Radixu Irratiako kideak zuzeneko emisioagaz batera jaiari ekiteko, eta egunaren nondik norakoak azaldu ostean, Koldo Azpiazuk hartu du mikroa. Hain zuzen ere, iaz hartu zuen Azpiazuk Nekane Akarregiren erreleboa, eta aurtengoan ere berea izan da jaiari hasiera emateko ardura. Hala, urtero bezala, Alai Tabernako balkoiak bereganatu ditu begirada guztiak, eta bertan zeudenek adi jarraitu dituzte Azpiazuk esandakoak. Nola ez, Manuel Eluren bolanderek ere ez dute hutsik egin, eta 12:00etan egin du eztanda jaiak, bolandera eta bolandera artean.

Bolandera ugari bota ostean jaiak ez du etenik izan, eta urteroko osagaiekin osatu dute goiza. Txistulariak, Kresalako bandaren eta Artelango erraldoien kalejira nahiz falta direnak gogoan hartzeko tartea hartu dute herritarrek, eta Txalainak taldearen kontzertuak biribildu du goizeko jarduna. Abanikoak dantzan eta gorputzak ere bai, Hertzainak taldearen abesti ezagunenak abesteko tartea hartu dute Kalekutz inguruan batu direnek.

Zapato Azule berezia bada, Dinamartxaren ailegaera are bereziagoa da herritar askorentzat. Dina Bilbao Barruetabeñaren omenez Tolosa eta Ondarroa elkartzen dituzte martxalariek oinez nahiz bizikletan, eta irrintzi, txalo, oihu eta musika artean egiten diete harrera ondarrutarrek. Oinez egin duten 77 martxalarientzat bart 01:00etan hasi ziren Zapato Azuleko ekintzak, eta gaur 09:00etan, ostera, bizikletaz etorri diren 223 partaideentzat. Iazko parte hartze kopurua gaindituta (iaz 259 partaide eduki zituen), poztasunez nahiz emozioz betetako malko eta irribarreen artean sartu dira herrira 300 martxalariak.

Martxalariak, Alde Zaharrera heltzen.

Dinamartxako kide denak heldu ostean, aurtengo pregoia irakurri dute Radixuko kideek balkoitik. Besteren artean, Palestina, Saharan, Iran Libano eta Kubagaz gogoratu dira, eta zelan ez, baita Venezuelako herriagaz ere. Jarraian, denborarik galdu barik, aurtengo omendua izendatu dute. “Omendu guztiak dira bereziak, baina aurtengoa, Zapato Azule antolatzen dugun guztiontzat, bereziena da. Zorionak Nekane Akarregi Amutxastegi, zeu zara aurtengo omendua!”. Hala, Akarregi ezustean harrapatu du omenaldiak, baina irribarrez jaso du Radixukoen aipamena.

Ostean, 11:00etan zabaldu duten Euskal Herriko Kamiseta Azoka eta Artisau Azoka itxi, eta aurtengo kamisetarik eta erakusleihorik onenak izendatu dituzte. Kamiseta Azokan Ondarroako hiru postu eta Euskal Herriko beste hamahiru egon dira, eta Torontilek (Artea) irabazi du Euskal Herriko kamisetarik onenaren saria. Ondarroako kamisetarik onenaren saria, aldiz, Saturrarango Haitzak irabazi du, eta erakusleiho onenarena, Lorak Estherrek.

[ARGAZKI GALERIA]

Txo! Antzerki Kolektiboak omenduari egindako sketchagaz amaitu dute eguerdiko jarduna, baina jai luzea geratzen da oraindik Ondarroan. Arratsaldean mota eta gustu guztietako musika entzuteko aukera egongo da herriko txoko guztietan, eta jaiak ez du etenik izango goizeko ordu txikiak arte.

"Begirunez egindako esperientzia sentikor bat" dauka gordeta Arretxinagako ermitak

Lea-Artibai eta Mutrikuko Hitza — 2026-06-26 15:37:21

Ereinotz bat Arretxinagako ermitari. Prozesu luze baten ostean, Markina-Xemeingo balio handiko gunearen zaharberritze lanak amaitu dituzte, hala, San Migel ermita eraberrituta ikusteko hainbat herritar batu ziren atzo arratsaldean. Herritarrez gain, Zerutxu Dantza Taldeak eman zion ongietorria gune berrituari.

Begibistakoak dira ermitaren kanpoaldean egin dituzten lanak. Ermitaren kanpoko hormak kareorez berritu dituzte, kolore eta ehundura bereizgarriak emanez. Eraikina bakarrik ez, alboan dagoen probalekua ere berritu dute eta ikusleentzako armailak jarri dituzte. Lanak amaituta daudela adierazteko, Alde Zaharrean egin zuten era berean lotu zioten ereinotza ermitari.

Kanpoaldekoaldekoak ikusita, barrualdean jarri zuten begirada. Honetarako, ermitara sartu baino lehen, Jon Astorkiza eta Joseba Beristain artistek hartu zuten hitza, erakinaren barnealdean egindako arte proiektu berritzaileari buruzko nondik norakoak azaltzeko. Astorkiza izan da proiektuaren grafiko zuzendaria, eta Arretxinagan egon zen lehen aldian sentitu zuen “konexio handia” aitortu zuen bere berbaldian. Horregatik, toki honetarako “begirunez egindako esperientzia sentikor bat” sortu du. Azalpenekin jarraitzeko, Beristainek hartu zuen hitza. “Tokiko natura elementuen soinuekin eta sintetizadoreekin jolastuz”, sortu du esperientzia bisualari balio gehigarri bat emango dion soinu paisaia. Sei bozgoragailuk osatutako instalazio bat sortu du, eta hala, “txikia den espazio bat handitu egiten du”.

Instalazioaz gain, ikus-entzunezko pieza bat eskaintzen digu San Migel ermitak. Bertaratzen direnek QR bat aurkitu eta horren bitartez helduko dira piezara. Eneritz Artetxe aktore gernika-lumotarrak gidatuko du ikuslea lau hizkuntzatan (euskeraz, gazteleraz, frantsesez eta ingelesez) entzun daitekeen piezan. Ermitari eta hau inguratzen duen artearen historiari buruz ari da Artetxe ikus-entzunezko horretan, “bisitaria leku honen magiarkein, unibertsoarekin, naturarekin eta bizitzarekin lotzeko”.

Aurkezpena amaituta, ermitako ateak zabaldu zitzaizkien herritarrei, eta orduan izan zuten instalazioa ezagutu eta tokiarekin konektatzeko aukera. Bertaratzen direnek ermita zabalik dagoen artean izango dute esperientzia bizitzeko aukera.

Gizon ba atxilotu dute Ondarroan, lapurreta egitea egotzita

Lea-Artibai eta Mutrikuko Hitza — 2026-06-26 15:49:45

Gizon bat atxilotu du Udaltzaingoak Ondarroan, Arrigorri hondartzan lapurreta egiten ahalegintzeagatik. Ondarroako Udalak jakinarazi duenez, herritarrek eman die abisua udaltzainei, eta Ondarroa eta Mutriku arteko mugan atxilotu dute gizona.

Herrian harro bizitzeko aldarrikapena zabaltzen

Lea-Artibai eta Mutrikuko Hitza — 2026-06-26 11:54:11

Sexu Askapenaren Nazioarteko Eguna edo LGTBI Komunitatearen Nazioarteko Eguna da ekainaren 28a, Lea-Artibai eta Mutrikuko Desbiauek irakurketa kaleratu, eta inguruko herri zein hiriburuetako mobilizazioetara hurbiltzeko dei egin dute.

Gogoratu dute kaleak hartzeko eta sexu eta genero disidenteen borrokak aldarrikatzeko eguna dela ekainaren 28a, egunaren konfrontazio eta iraultza izaera nabarmenduz. Borroka transfeminista aldarrikatu dute: «Guk ez dugu nahi normaltasunean integratu, normaltasunarekin apurtu nahi dugu. Jaietan, eta batez ere, udako jai heteromasiboen aurrean, disidentzia transfeminista aldarrikatu beharra daukagu. Ez gara heterosexualekin batera dantzan egingo dugun lesbiana, gay eta lagunak; bollera, marika eta trans anti-heterosexualak gara. Zuen ortzadarra ez da gure borroka. Gainera, egungo testuinguru erreakzionarioan, hetero, zuri eta aberatsak ez garen denon kontrako erasoen gorakada ematen dela salatzen dugu. Horien inpunitatea salatzen jarraituko dugu, eta aurrean izango gaituzte». Batik bat udako jai giroan kaleak hartu eta hemen daudela aldarrikatzea ezinbestekotzat dute; izan ere, eurek esan bezala, horrelako egunetan jasaten dituzten zabalkuntzak agerian geratzen dira, baita eurenganako erasoak biderkatu ere. Horrenbestez, erasoen aurrean auzodefentsa transfeminista aldarrikatu dute.

Sexilioa aipatuz, euren udalerrietan bizi nahi dutela ozen diote. Herri txikiak nahiz ez hain txikiak leku bizigarri eta seguruak izatea nahi dute, dinamika heterosexualetik kanpo: “Heterosexualitatean kokatzen direnen erantzukizuna seinalatu nahi dugu”.

Uztailaren 11n Desbiauk Summer Edition ospatuko dute Ondarroan, eta jaian parte hartzera animatu dituzte herritarrak, herri txikietan ere espazioak hartzea ezinbestekoa dutela gogoratuz.

Ondarroa kolore urdinez janztera dator 27. Zapato Azule

Lea-Artibai eta Mutrikuko Hitza — 2026-06-26 10:16:04

Ondarroako Bolo-Bolo aldizkariak eman zion hasiera 1998an hain ezaguna den Zapato Azulari. Hasierako urteetan herriko kuadrillak batzen baziren ere, urteek aurrera egin ahala “sekulako” dimentsioa hartu duen jaia bihurtu da. Aurtengoa, 27. aldia izango da, eta herritarrak “gogotsu” daude goizean goizetik jai giroan murgiltzeko.

Eta biztuxun Radixu, pasako dou, geu bixok Auiminyulinblu dio Esne Beltzak Zapato Azulerako 2012an egin zuten abestiak. Jende askok Auiminyulinblu leloa ahozkatzen ez badaki ere, ondarrutar guztien artean ezaguna da Nakarrak hainbeste erabiltzen zuen esaldia: Auiminyulinblu, lo bailau, bailau esta! Hala, Zapato Azuleko ereserkia bozgorailuetatik entzuten den bitartean, 11:00etarako Radixu Irratiaren zuzenekoa (105.0 FM / Radixu.info) hasiko da, eta egunaren nondik-norakoen berri emango dute irratiko kideek.

Ordu berean irekiko ditu ateak 27. Euskal Herriko kamiseta azokak, Latxanbre enparantzan, eta 15:00ak arte egongo da zabalik. Aurten, 16 postu egongo dira, eta horiez gain, Turismo Bulegoak ere bertan jarriko du bere postua: “Turismo Bulegoaren aurrean txosna muntatzen dugunez, kamiseta azokan postu bat jartzen dugu horretarako. Gainera, bertan jasoko dira Cantabrico jatetxeak oparitutako zozketan parte hartzeko paperak”. Ondarroako hiru postu eta Euskal Herri mailako beste hamahiru egongo dira: Radixu Irratia, Andrak Erramutan, Saturrarango haitza, Artea soinean (Elorrio), Mugimendu Sozialista (Euskal Herria), Tallerra Tatto (Mutriku), Euskaralogikoada (Donostia), Euskal Herrian Euskaraz (Euskal Herria), Maitia (Arrasate), Katxalote (Deba), Iparlur (Atarrabia), Itzal diseinua (Hernani), Xipiroi (Orereta), Hazi (Abadiño), Torontile (Artea), Arnasa (Gipuzkoa). Ordu berean, Artisau azoka egongo da Kantoipe Errebueltan.

12.00etan lehertuko da jaia. Manuelen bolanderagaz batera emango diote hasiera ofiziala egunari, Alde Zaharreko Alai tabernako balkoitik. Horregaz batera irekiko da Alde Zaharreko txosna, eta herriko txistulariak kalerik kale ibiliko dira bazter guztiak alaitzen. “Joan den urtean Koldo Azpiazuk hartu zuen balkoian egoteko Nekane Akarregiren lekukoa, eta aurten ere, bera izango da Alaiko balkoitik hitz egin eta pregoia botako duena”.

Ondoren, 12:30ean, Txalainak taldearen kontzertua egongo da Kalekutzeko eskaileretan, eta ondoren, 13:30ean, euskal preso, iheslari eta deportatuen aldeko elkarretaratzea egongo da, abestiak dioen legez: Faltaten dizenak gogun hartute kalin barrena. “Aurten Txalainak taldea egongo da Kalekutzeko eskaileretan. Ahalegintzen gara giroa sortu ahal duen taldeak ekartzen, bertokoak direnak, eta euskaraz abesten dutenak. Aurten ere hainbat aukeren artean ibili gara, baina azkenean Txalainak taldea aukeratu dugu”. Elkarretaratzearen ondoren, Kresalako banda eta Artelango erraldoiak ere Kalekurutzera ailegatuko dira.

14:00etan, herritarrek hainbeste espero duten momentua helduko da: Dinamartxari ongietorria ematea. Irrintzi eta musika artean sartuko dira Alde Zaharrean 291 lagun; 77 oinez eta 214 bizikletaz. Urtero momentu “hunkigarria” izaten da Dina Bilbao Barruetabeñaren omenez egiten den Dinamartxaren ailegaera, eta parte hartzaileek zein ikusleek ere horrela bizi dute.

[EGITARAUA]

Dinamartxa herrian sartu ondoren, Radixu Irratiaren pregoia entzuteko ordua izango da, eta aurtengo omendua zein den emango dute jakitera. Horrez gain, Euskal Herriko eta Ondarroako kamiseta onenaren eta erakusleiho onenaren sariak banatuko dira, baita zozketako irabazleak ere. Horregaz batera, TXO! Antzerki Kolektiboak antzerkia egingo dio omenduari.

Lan handia. Radixu Irratiko kideek “arduraz” bizi dute jaiak hartu duen dimentsioa: “Ardura handia suposatzen du Zapato Azule antolatzeak, batez ere, ikusi dugulako zelako dimentsioa hartu duen jaiak. Ardura eta kezka ere sortzen digu, eta horren aurrean, buelta asko eman izan diogu antolatzaile moduan zelan jokatu behar dugun”. Horregatik, herritarrei zein kanpotik datozenei “errespetuz” jokatzeko deia egin diete: “Jaia ondo pasatzeko da, baina beti ere alboan daukaguna errespetatzen badugu. Errespetuzko jarrera edukitzen ez dakiena, ez dadila etorri. Horrez gain, garbi jokatzeko eskatu nahi dugu: erabili edalontzi berrerabilgarriak, zamar gutxi sortu, eta kontsumitu txosnetan. Errespetatu lanean dabilen jendea: txosnetan, tabernetan, garbiketa lanetan… guztiak”.

Aurten, gainera, Zapato Azularen parte diren eragile guztiek —antolatzaileak, udalak, txosna jarriko duten eragileak zein ekimenak antolatuko dituztenak—bat egin dute eraso matxista, arrazista, homofobo zein transfoboen aurkako mezua zabaltzeko. Horretarako, argazkia atera dute, herritarrei jai seguruen aldeko mezua helarazteko.

Aurreko urteetan bezala, Ondarroako Udalak eraso matxisten kontrako arreta zerbitzua jarriko du martxan Zapato Azulean. Zerbitzua 18:00etatik 08:00etara bitartean egongo da, presentzialki Etxelilan (Artibai, 3) eta telefonoz, hurrengo zenbakian: 688 77 27 72.

Udalak neurri “bereziak” hartu ditu zapaturako. Hainbat gai barnebiltzen dituzte neurriek, eta adierazi dutenez, aurreko urteetako balorazioen eta udaleko sailen arteko lanketaren ondorio dira; besteak beste, garbitasuna eta hondakinen kudeaketa, segurtasuna, eraso matxisten kontrako protokoloa, komunak, aparkalekuak, garraioa eta azpiegiturak. Beraz, udalak plan bat jarri du martxan herria “ahal bezain arinen lehengoratzeko”. Hala, aurten, udalaren esanetan, “esfortzu berezia” egin dute larrialdi zerbitzuak indartzeko eta hondakinen kudeaketa hobetzeko. Esaterako, jai guneari estaldura emango dion mediku eta anbulantzia zerbitzu propioa kontratatu du udalak: “Zaldupe futbol zelaiko aldagelen eraikin berria erabiliko dute, larrialdiak kudeatzeko. Anbulategia ohiko zerbitzuetarako ahalik eta libreen mantentzea da helburua, gainerako herritarrek dituzten beharrizanetarako”.

Gaur, ekainak 26.
- 22:30. Mendiz mendiko Dinamartxara doazenen irteera autobusez Itsasaurreko geltokitik Tolosarantz.
Bihar, ekainak 17.
- 01:00. Tolosatik mendirik mendi Dinamartxa oinez.
- 07:00. Dinamartxan bizikletan doazenen irteera autobusean Itsasaurretik Tolosarantz.
- 09:00. Tolosatik Dinamartxa bizikletaz, Ondarroarantz.
- 11:00. Radixu Irratiaren kaleko zuzeneko emisioa.
- 11:00. EHko Kamiseta Azoka, Latxanbre plazan.
- 11:00. Artisau Azoka, Kantoipe Errebueltan.
- 12:00. Alaiko balkoitik jaiaren hasiera eta Alde Zaharreko txosnaren irekiera.
- 12:10. Ondarroako Txistulariak kalerik kale.
- 12:30. Txalainak taldea, Kalekutzeko eskaileretan.
- 13:30. Faltaten dizenak gogun hartute elkarretaratzea, Kalekutzeko eskaileretan.
- 13:30. San Pedro iturritik Kresalako banda eta Artelango erraldoiak.
- 14:00. Dinamartxaren ailegaera.
- Ondoren. Radixu Irratiaren pregoia eta omendua.
- 14:45. Sari banaketa Alaiko balkoitik: kamiseta onenak eta erakusleiho onena.
- 15:00. Euskal Herriko Kamiseta Azokaren itxiera.
- 15:00. Txo! Antzerki Kolektiboaren sketch-a omenduari.
- 17:00. Itsasaurren, Altxa Porru erromeria.
- 17:00. Frontoiko gunea zabalik.
- 18:00. Kalekutzeko eskaileretan, DJ Kol.
- 18:00. Kafeatzean, umeen jolasak (Txirrimorraski).
- 18:00. Frontoian, Zerotan.
- 18:30. Itsasaurren, Zumba.
- 19:00. Itsasaurren, Altxa Porru.
- 20:00. Kafeko Atzean, Euskal Erromeria.
- 20:00. Frontoian, DJ Lyma.
- 20:30. Itsasaurren, DJ Mali.
- 21:00. Kafekoatzean, Musutruk erromeria eta DJ Jotatxo.
- 22:30. Frontoian, IranJaise kolektive.
- 22:30. Itsasaurren, Kumbialari.
- 00:00. Itsasaurren, DJ Tintz.
- 00:30. Frontoian, DJ Puntx.
- 02:30. Frontoian, Pan con txitxarron.
- 03:00. Itsasaurren, DJ Txustiyas.
- 04:30. Frontoian, DJ Enabil.

Munitibar, kolorez eta musikaz beteta

Lea-Artibai eta Mutrikuko Hitza — 2026-06-26 10:08:05

Herritik eta herriarentzat sortutako San Pedro jaiak hasiko dira gaur [ekainak 26] Munitibarren. Gaurtik astelehenera bitartean, udalak eta herriko eragileek antolatutako ekintzek herritarrak plazan zein frontoian batuko dituzte. Aurten, San Pedro jaiei egun bat gehiago eman, eta astelehenera luzatuko dute jaia.

Pregoia eta txupinazoagaz emango die hasiera lau eguneko egitarauari. Plazako karpan batuko dira munitibartarrak gaur, 19:00etan, pregoilarien berbak entzun eta jaien hasiera elkarregaz ospatzeko. “Pregoilaria aurkitzea kostatzen zaigu askotan, beraz, eskolako haurren esku uzteko erabakia hartu dugu”; hala, sanbizenteetan Lehen Hezkuntzako seigarren mailako gaztetxoek bota zuten bezala, lehen mailako haurrak izango dira sanpedroetan pregoilari lanak egingo dituztenak. “Irakurketa eta idazketa prozesuan hasiberriak” direla eta eureri “protagonismoa emateko modua” dela adierazi du antolakuntzak. Pregoiaren muinari buruz ez dute asko aurreratu, baina “ondo pasatzeko eta elkar errespetatzeko” mezua aurreikusten dute herritarrek.

Txupina botata, herriko gaztetxoek euskal dantzen emanaldia egingo dute plazan. Barikuro izaten dituzte entseguak, eta “ikasturte honetan ikasi dutena erakutsiko digute herritar guztioi”. Jaiari eten barik, aurten berreskuratu duten Pizza fest!-az gozatzeko aukera izango dute. Duela urte batzuk pare bat aldiz egin eta “ondo atera” zen ekintza da, urte batzuk beranduago berriro antolatu dutena: “Etxebarriko Antsotegi jatetxetik ekarriko dituzte pizzak, eta musikagaz girotuta, horiek dastatuko dira”.

Munitibarko Rookies Series final handira heldu da, eta bihar 21:30ean frontoian batuko dira herritarrak, lehiaren lekuko izateko. Ekainaren 6an eta 13an jokatu zituzten final-laurdenak, eta ekainaren 20ko finalerdietan erabaki zituzten gaurko finalistak. Txomin Landaluze markina-xemeindarra eta Xuban Galdos berriatuarra lehiatuko dira Haritz Egaña zumaiarraren eta Oinatz Agirregomezkortaren mutrikuarraren aurka. Txapelketak jardunaldi guztietan jaso duen “harrera ona” azpimarratu dute, eta ikuskizun handia ematera dator final handia.

Heldu zein gaztetxoentzako jaiak dira sanpedroak. Gaueko eskaintza helduei zuzenduta badago ere, zapatu eguerdia haurrentzako eskaintzagaz dator. 12:00etatik aurrera, zirku tailerra egongo da frontoian, Txitatokiren eskutik. Haurrei zuzenduta badago ere, “adin guztietako herritarrek” izango dute parte hartzeko aukera.

Herriko jendearentzako jaiak dira sanpedroak. “Herriko jendea elkartzeko” helburuagaz egiten dute lan Munitibarko Udalak eta eragileek, eta zapatuko herri bazkaria izango da elkartze horren isla. 210 lagun batuko dira bazkarian, eta, horren ostean, bingo musikatuagaz emango diote jarraipena jaiari. 19:00etan musika jarriko dute kalean, 21:00ean Iratzar erromeria hasi arte.

“Herriko talde askoren topaleku” da Habixi Elkargunea, eta, herriko “ekimen eta ekintza guztietan” parte hartzen duen bezala, aurtengo jaietako antolakuntzan buru-belarri murgilduta egon da. Asteburuan zabalik egongo da, eta zapatu gauean DJ Zatzaz egongo da Habixi girotzen, bertan bilduko direnen gozamenerako.

Urdaibai Kantagunea izango da domekan 13:00etan hasiko duten kopauari musika jarriko diona. Arratsaldean San Pedro txapelketako esku pilota finalak izango dituzte frontoian, 17:00etan. Astelehenean amaituko dute jaia, eta bazkari berezia antolatu dute azken egunerako. Adineko herritarrak elkartzeko helburua du bazkariak, eta aurreko urteetan batu izan dituen bezala, ohituragaz jarraitzeko.

Jendearen parte hartzearen garrantzia azpimarratu du udalak: “Herriko kuadrilla guztiak inplikatzen dira, bai aurretik egin beharreko lanetan, bai jaiek dirauten artean”. Horien garrantziaz eta beharraz ere aritu dira: “Kuadrillaka edo banaka apuntatzen dira herritarrak ardura banaketa egiten dugunean, eta esan beharra dago boluntario eta pertsona konprometitu asko agertzen direla”.

Hala, Munitibarrek urtero sortzen den “giro ederra” espero dute gaur arratsaldean hasiko dituzten sanpedroetan.

Gaur, ekainak 26
- 19:00. Pregoia eta txupinazoa, plazako karpan.
- Ostean. Herriko gazteen eskutik, euskal dantzak plazan.
- 20:30. Pizza fest! musikagaz girotuta, plazako karpan.
- 21:30. Rookies Series zesta-punta txapelketako finala, frontoian.
Bihar, ekainak 27
- 12:00. Zirku tailerra, Txitatokiren eskutik, frontoian.
- 14:30. Bazkari herrikoia, frontoian.
- Ostean. Bazkalostea girotzeko bingo musikatua.
- 19:00. Kale musika, herriko plazatik.
- 21:00. Iratzar erromeria, plazako karpan.
- 00:30. DJ Zatzaz, Habixi elkargunean.
Etzi, ekainak 28
- 13:00. Kopaua, plazako karpan.
- Bitartean. Urdaibai Kantaguneak girotuko du kopaua.
- 17:00. San Pedro txapelketako esku pilotako finalak.
Ekainak 29, astelehena.
- 14:00. Adineko herritarren bazkaria, Lea tabernan.

Auzo eta herriak alaitzera datoz San Pedro jaiak

Lea-Artibai eta Mutrikuko Hitza — 2026-06-25 16:27:24

San Joan jaiak igaro ondoren, San Pedroen txanda izango da datorren asteburuan, eta Berriatuan, Mutrikun, Artan (Ziortza-Bolibar) eta Barinagan (Markina-Xemein) ospatuko dituzte.

Berriatuko San Pedroak ekainaren 23an hasi baziren ere, gaurtik [eguena] martitzenera arte ere edukiko dute zer ospatu herritarrek; batez ere, kirola eta kultura uztartuko dituzte. Izan ere, gaur [eguena] Euskal Herri mailako gazteen bertso sariketa egongo da bideogelan: Berritxu saria. Bertan parte hartuko dute Kattin Madariaga Apaolaza, Adei Urbitarte Aiestaran, Kattalin Arabolaza Palono, Maia Ortiz De Zarate Idiakez, Iradi Barrenetxea Akesolo, Naroa Iturrioz Lauzirika, Jon Abasolo Sarralde eta Amaiur Betanzos Caminosek. Bihar [barikua] Euskal Herriko mutilen banakako zesra finalak jokatuko dira.

Zapatuan ere kirolak protagonismo berezia izango du. 09:30ean Triatloi herrikoia hasiko da herriko plazatik, eta eguerdian, entsalada eta tortilla lehiaketa egingo dute. Bihar izango da izena emateko azkenengo eguna. Ondoren, Bola joko txapelketagaz jarraituko dute, eta azkenik, Kaletrik musika emanaldia egongo da herriko plazan. Domekan [ekainak 28] Zerbait sartu zait begian antzezlana egongo da bideogelan.

San Pedro egunean [ ekainak 29] eta San Pedro txiki [ekainak 30] egunean ere egun guztiko egitaraua izango dute. Lehenengoan, goizean, Open Bizkaia esku pilota partidak egongo dira, eta arratsaldean, Mus eta Briska txapelketak. Martitzenean umeak izango dira protagonista. Umeen parkea egongo da goiz zein arratsaldez, eta gero, bazkaltzeko batuk dira ume guztiak. Apar festagaz eta txokolateagaz emango diote amaiera egunari.

Mutrikun, ohi legez, omenaldi “xume bezain politarekin” ospatuko dute San Pedro eguna. Itsasoan desagertutako arrantzaleak omenduko dituzte, 12:00etan, Kofradia Zaharrean. “Udalak hartuko du hitza lehenengo, eta ondoren, abadearen txanda izango da. Dantzariek agurra dantzatuko dute, eta korua eta eskaintza egingo dira. Ondoren, bertsolariek bertsoak botako dituzte, eta udalaren agurra egin ondoren, jan-edana egongo da”. Horrez gain, Xabier Basterretxea Esnaola Txordori omenaldia egingo zaio.

Auzoetan ere, San Pedoen gosez daude. Barinaga auzoan bihar [ekainak 26] emango diote hasiera, eta gaztetxoen pilota partiden ondoren, hasiera ofiziala emango diote txupinagoagaz, 20:00etan. Ondoren, txikiteoa egingo dute auzoan, eta iluntzean, su artifizialak egongo dira. Zapatuan [ekainak 27] arratsaldean hasiko da jai giroa: zaldi probak, parrillada eta bolo txapelketa egongo dira. Domekan umeak izango dira protagonista Briska txapelketa eta jolasen artean, eta astelehenean, nagusiagoen txanda izango da. Mezaren ostean, jubilatuen bazkaria egongo da tabernan.

Ziortza-Bolibarko Arta auzoan ere asteburuan ospatuko dituzte San Pedro jaiak. Zapatuan, 17:00etan, XIII. Briska txapelketa egongo da. Antolatzaileek azaldu dutenez, momentuan bertan eman beharko da izena: “Gutxi gorabehera, 22 bikote inguruk ematen dute izena. Auzokoak eta herritarrak etortzen dira, baina baita inguruko jendea ere”.

Domekan [ekainak 28] egun guztiko jaia izango dute. “Eguerdi aldera batzen gara jende gehien, eta Zerutxu dantza taldeko dantzariek ere jendea erakartzen dute. Horrez gain, umeekin ere etortzen da jendea, eta bazkaritara bakoitza norbere etxera joaten da, antzinako erara”. Hala ere, bazkaldu aurretik Onintza Enbeita eta Miren Amuriza ariko dira bertsotan.

Bazkalostean, umeen jolasak egongo dira, eta Imanol Intxausti eta Iñaki Larrañaga trikitilariek alaituko dute auzoa: “Trikitilariak egun guztian egongo dira, eta umeen jolasak ere girotuko dituzte. Umeen jolasetan betikoak egiten ditugu: aulki jolasa, puxikak puskatu… Jolas bereziena patata dantza izaten da: patata bat begian jarri eta dantza egin patata erori gabe”.

Hamabost lagun inguru dabiltza antolakuntzan, eta “dena denen artean” egiten dutela zehaztu dute: “Bilerak egiten ditugu eta bakoitzak bere ardurak hartzen ditu. Gu momentuz jaiak mantentzen saiatzen gara, eta nahiko indartsu daudela esango nuke. Gogotsu gaude aurtengorako ere”.

EGITARAUA

BERRIATUA

Bihar, barikua
- 19:00. Euskal Herriko mutilen banakako zesta txapelketako finalak.
Etzi, zapatua
- 09:30. Triatloi herrikoia, herriko plazan.
- 14:30. Entsalada eta tortilla lehaiketa, herriko plazan.
- 17:00. Bola joko txapelketa.
- 18:00. Kaletrik musika emanaldia, herriko plazan.
Ekainak 28, domeka
- 19:00. Zerbait sartu zait begian, antzezlana, bideogelan.
Ekainak 29, San Pedro eguna
- 12:00. Meza San Pedro elizan.
- 12:30. Open BIzkaia esku pilota partidak emakumezko eta gizonezkoak. Kanpoko frontoian (euriagaz, barruko frontoian).
- 17:00. Mus eta Briska txapelketak.
Ekainak 30, San Pedrotxiki
- 11:00-13:00/15:00-17:00. Umeen parkea, herriko plazan.
- 13:30. Umeen bazkaria herriko plazan.
- 17:00. Apar festa herriko plazan.
- Ondoren. Txokolatea herriko plazan.
Uztailak 5 eta 12
- Zesta: Jai Alai League B, Mendibarren frontoian.

MUTRIKU

Ekainak 29, San Pedro eguna:
- 12:00. Itsasoan desagertutako arrantzaleei omenaldia, Kofradia Zaharrean.

BARINAGA AUZOA (MARKINA-XEMEIN)

Bihar, barikua
- 17:00. Gaztetxoen arteko pilota partidak.
- 20:00. Txupinazoa eta txikiteoa.
- Iluntzean. Su artifizialak.
Etzi, zapatua
- 18:00. Zaldi probak.
- Ostean. Parrillada.
- 21:00. Bolo txapelketa.
Ekainak 28, domeka
- 16:00. Umeen briska txapelketa.
- 17:00. Umeen jolasak.
Astelehena, ekainak 29
- 12:15. Meza.
- Ostean. Mezaostekoa.
- 14:00. Jubilatuen bazkaria tabernan.

ARTA AUZOA (ZIORTZA-BOLIBAR)

Etzi, zapatua
- 17:00. Artako XIII. Briska txapelketa.
Ekainak 28, domeka
- 11:00. Meza santua.
- 12:00. Zerutxu dantza taldea.
- Ondoren. Bertsolariak: Onintza Enbeita eta Miren Amuriza.
- 18:00. Umeen jolasak. Imanol Intxausti eta Iñaki Larrañaga.
- Trikitilariak egun guztian.

Lekeitiok udari hasiera emango dio sanpedroekin

Lea-Artibai eta Mutrikuko Hitza — 2026-06-25 15:23:24

Ekaina amaitzear dago, eta “udari hasiera emateko jaiak” dira San Pedro jaiak. Lekeitiarrek eta herrira etorriko direnek bost eguneko egitarau kulturala, musikala eta tradizioz beterikoa dastatuko dute.

Aurten zapatuan [ekainaik 27] emango diote hasiera San Pedro jaiari, Danok BatELA ekimen solidarioa ardatz delarik. Egun berean ospatuko dute Salazoi Eguna ere. Aeroplano Bi elkarteak hamabi urte daramatza eguna antolatzen, eta aurtengoan ere, arrain gazitua zelan egiten zen azalduko dute. Aldi berean, Kilin-kala abesbatza kantuz kalejiran egongo da, Musikaia Udal Musika Eskolaren eskutik. Arratsaldeari begira, Lekeitioko 37. Kilin-Kala igeriketa zeharkaldia ospatuko da abadeen moilan, Garraitz Kirol taldeak antolatuta. Aipatutako ekintza guztiak bat egingo dute Danok BatELA ekimenagaz –adibidez, igerilarien kasuan, txanoetan ELAren sinboloa eramango dute–.

San Pedro bezperari dagokionez, domekan [ekainak 28], buruhandiak eta erraldoiak ariko dira kalerik kale, Lekittoko Itxaropena txistulari elkarteak eta dultzaineroek animatuta. Gainera, aldi berean, sanpedroetako eskuz binakako finalak egingo dira Trinketeko frontoian eta 11:30ean Zinga txapelketa portuan. “Pasaden urtean, Lekeitiok 700 urte bete zituenean berreskuratu genuen txapelketa. Aurtengo sanpedroetan mantentzea pentsatu dugu”. Egunagaz jarraituz, sardina dastaketa, mus txapelketa eta Gauargi erromeria egongo dira plazan. “Mus txapelketan espero dugu gutxienez hogei bikotek parte hartzea”, adierazi dute udalak.

Astelehena [ekainak 29] da, zalantzarik gabe, tradizioa gehien mantentzen duen eguna: dei eittekuak kalez kale, Kaxarranka, emakumeen aurreskua… Hala, goizean agintarien prozesioa eta San Pedroren omenezko prozesioa egingo dituzte herritarrek, eta horren ostean, Etorkizuna Dantza Taldeak Kaxarranka dantzatuko du San Pedro irudiaren aurrean, Kofradia aurrean eta plazan. 2022an Ane Maruri Basterrika izan zen Kaxarranka dantzatu zuen lehenengo emakumea, eta aurten Naia Rojo Ikazuriagagoitia izango da protagonista. “Emakumeen aurreskua bada zerbait oso oso gurea, eta niretzako hori sekulakoa da. Euskal Herrian egiten den bakarra da, eta niretzako horrek badauka balio sinboliko handia”, azaldu du Lekeitioko Udalak. Beste hainbat ekintzaren artean, danborrada herrikoiagaz amaituko dute egunak, Zaletxuak taldearen ekimenez.

San Pedro Txiki eta San Pedro Baltza [ekainak 30 eta uztailak 1] ospatuko dituzte jarraian. Eguzkilore jubilatuen abesbatza Eskolapean eta udaletxeko eskaileretan, buruhandiak eta erraldoiak kalerik kale eta talatik udaletxeraino kalejira Lekitto Txirrist txarangaren eskutik izango dira San Pedro Txiki osatuko duten ekintzak. Gauean, Lekittoko Deabrutxuek Correfoca egingo dute.

Eguaztenerako [uztailak 1] umeentzako jolasak antolatu dituzte, eta 12:30ean meza egingo da San Pedro baltzaren aurrean, Tortola kalean. Gainera, lore eskaintza ere egingo diote San Pedrori. Arratsaldean, aldiz, jaiari amaiera emateko, Lagun Zarrak elkartearen ekimenez, Tunantiak eta Txernobil taldeen kontzertuak egongo dira.

Udaletik aipatu dute, betiko legez, Kaxarranka izango dela unerik esperoena eta jendetsuena. Gainera, aipatu dute Danok BatELA sanpedroetan egiteak elkartasuna gehitu diola jaiari: “Herri guztiak bat egin du ekimenagaz. Herritarrek, tabernek eta herriko elkarteek, denek bat egin dute. Hori txalotxekoa da”.

Zapatua [ekainak 27]
- Egunean. Danok BatELA eguna.
- 12:00-15:00. XII. Salazoi Eguna, plazan. Aeroplano Bi elkarteak antolatuta.
- 12:00. Kilin-kala abesbatza kantuz kalejiran, Musikaia Udal Musika Eskolak antolatuta.
- 16:00. 27. Kilin Kala igeriketa lehiaketa, Garraitz Kirol Taldeak antolatuta.
Domeka [ekainak 28], San Pedro bezpera
- 11:00. Buruhandi eta erraldoiak, kalerik kale.
- 11:00. San Pedroetako eskuz binakako txapelketako finalak, Trinketeko frontoian.
- 11:30. Zinga txapelketa portuan.
- 13:00. 44. Irrintzi Txapelketa, San Pedropean. Izen ematea, 12:30etik 13:00etara.
- 13:30. Sardina dastaketa herrikoia, San Pedropean.
- 17:00. Mus txapelketa, Sociedad Recreativan. Izen ematea, 16:30ean.
- 20:00. Gauargi erromeria, plazan.
Astelehena [ekainak 29], San Pedro Eguna
- 07:00. Dei eittekuak, kalez kale.
- 10:15. Lekeitioko Udaleko alkate eta zinegotzi jaun-andreen eta Kofradiako lehendakari eta arduradunen prozesioa udaletxetik elizara, Txirrist Txarangagaz.
- 10:30. Meza Nagusia, herriko abesbatzak abestuta.
- Jarraian. San Pedroren omenezko prozesioa. Amaieran, antzinako ohitura zaharrari jarraituz, San Pedroren irudiagaz, Kilin-Kalakoa, portuko santuaren irudi aurrean. Lea Itsas Ondarea taldeko batelek uretatik harrera egingo diote santuari.
- 12:45. Lekeitioko Etorkizuna Dantza taldearen eskutik, Kaxarranka. San Pedropean dantzatu ostean, Kofradia aurrean dantzatuko da.
- 12:50. Kaxarranka, San Pedropean dantzatu ostean, Kofradia aurrean dantzatuko da.
- 13:00. Lekeitioko Etorkizuna dantza taldeak Eguzki dantza edo Lekeitioko andren aurreskua dantzatuko du, plazan.
- 13:30. Kaxarranka, plazan.
- 20:00. Danborrada herrikoia Aittitta Makurra txarangagaz, ikastola aurretik hasita, Zaletxuak taldeak antolatuta.
- Ondoren. Suzko zezena, plazan.
- 21:30. Aittitta Makurra txarangaren kalejira, plazatik hasita.
Martitzena [ekainak 30], San Pedro Txiki
- 12:30. Eguzkilore jubilatuen abesbatza, Baserri tabernan, Eskolapean eta udaletxeko eskaileretan.
- 19:00. Buruhandiak eta erraldoiak, kalez kale, Itxaropena txistulari taldeagaz.
- 21:00. Lekittoko Deabrutxoen Correfoca.
- 23:00. Talatik udaletxerainoko kalejira, Lekitto Txirrist txarangagaz.
Eguaztena [uztailak 1], San Pedro Baltza
- 11:00-12:30. Umeentzako jolasak, Rufo Atxurra plazan.
- 12:30. Meza, San Pedro baltzaren aurrean (Tortola kalean).
- 12:30. Lore eskaintza, San Pedro Baltzaren aurrean.
- 19:00. Tunantiak eta Txernobil taldeen kontzertua, Rufo Atxurra plazan, Lagun Zarrak elkartearen eskutik.

Alazne Solabarrieta zendu da Venezuelako lurrikaretan, Jose Maria Solabarrieta Ondarroako alkate ohiaren biloba

Lea-Artibai eta Mutrikuko Hitza — 2026-06-25 12:35:16

Delcy Rodriguez Venezuelako presidenteak jakitera eman dutenez, gutxienez 188 pertsona hil dira eta 1.000 zauritutik gora daude [ekainak 25eko 23:50] Venezuelan bart — Euskal Herrian gauerdia zenean, Venezuelako 18:00etan — izandako lurrikara bikoitzaren ondorioz. Richter eskalari dagokionez, 7,2 eta 7,5 graduko lurrikarak izan dira, eta ohartarazi dute, aipatutako zifrek ez dutela barnebiltzen La Guaira estatuko biktima kopurua; izan ere, bertan jo dute gogorren lurrikarek. Hildakoen artean Alazne Solabarrieta dago, desagertu eta ordu batzuetara bere senideek jakinarazti dutenez. Antza denez, Solabarrieta zegoen eraikina egoera “oso txarrean” zegoen eta behera etorri da. Bere bikotekidea zaurituta dago, baina etxetik irteteko aukera eduki du.

Solabarrieta Caracasen jaio zen, baina jatorri ondarrutarra dauka. Jose Maria Solabarrietaren biloba da. Azken hori Ondarroako alkatea izan zen Bigarren Errepublikan eta Venezuelan erbesteratua 36ko gerraren ostean. Eusko Jaurlaritzako Uren zuzendari ohia eta Bizkaiko Lurralde Ekintzako eta Ingurumeneko foru diputatu ohi María Esther Solabarrietaren lehengusina da.

Itsaskorda enpresako kaleratzeen aurrean, “gizatasun falta kezkagarria” salatu du LABek

Lea-Artibai eta Mutrikuko Hitza — 2026-06-24 18:35:58

LAB sindikatuak erabateko “gaitzespena eta desadostasuna” agertu du Itsaskorda enpresako zuzendaritzak egindako kaleratzeen aurrean. Sindikatuak jakinarazi duenez, Itsaskorda enpresako zuzendaritzak bost langile kaleratu ditu aurretik ezer jakinarazi barik. Horren aurrean, langileak antolatu eta enpresaren aurrean mobilizazioa egin dute gaur, “lanpostuak defendatzeko eta errespetua eta duintasuna eskatzeko”.

Enpresak hartutako erabakia “traumatiko” bezala deskribatu du LABek, eta zalantzan jarri ditu enpresak emandako “arrazoi ekonomiko eta produktiboak”. Horretaz gain, sindikatuak eta langileek enpresaren “modu onartezinak” salatu dituzte: “Itsaskordako zuzendaritzak erabateko opakotasunez jokatu du, langileen oinarrizko eskubideak urratuz”.

“Aldez aurretik pentsatutako informazioa ezkutatzea” leporatu diote enpresari, izan ere, adierazi dute langileei eta haien legezko ordezkariei ez dietela enpresaren benetako egoeraren berri eman. Sindikatuak adierazitakoaren arabera, enpresak ez du inolako alternatibarik mahaigaineratu, eta ez du kaleratzeak saihesteko proposamenak jasotzeko aukerarik zabaldu. Kaleratzeak bideratzeko “onartezinak diren moduak” ere salatu dituzte, kaleratzeak “langileen lan txandaren erdian eta inolako aurreabisurik barik” jakinarazi omen zituztelako.

LABen ustetan, Itsaskordako zuzendaritzak hartutako erabakiek “langileekiko erabateko enpatia falta” erakusten dute, izan ere, langileak “produkzio-zenbaki” huts modura tratatu dituztela salatu dute, “gizagabeko enpresa kudeaketa” bat agerian utziz.

Ispasterrek Marije Uranga omenduko du domekan

Lea-Artibai eta Mutrikuko Hitza — 2026-06-24 17:24:30

Ispasterrek omenaldia egingo dio Marije Uranga auzokideari domekan [ekainak 28], herritarrek zioten maitasunaren erakusle. Ekitaldia 12:15ean izango da, mezaren ostean, haritz zaharraren azpian, eta haren oroimena eta urte luzez egindako lana aitortzea izango du helburu. Uranga bereziki ezaguna zen haritz zaharraren inguruko lorategia zaintzeagatik. Urteetan, bertako loreak, landareak eta ingurunea “mimo handiz” zaindu zituen, ureztatze lanak eta mantentze lanak eginez. “Haren dedikazioari esker, herriko txoko hori zainduta eta edertuta egon da denbora luzez”.

Omenaldiaren barruan, lore berriak eramango dituzte, eta ekitaldian bertan landatuko dira auzokidearen omenez. Horrez gain, musika ere izango da protagonista. Ispasterko gitarra irakasleak hainbat abesti eskainiko ditu, tartean Benito Lertxundiren kantu ezagun batzuk. Ekitaldian hitz batzuk ere eskainiko dituzte senideek, lagunek eta herritarrek. Gainera, Urangaren “oroimena betiko gordetzeko asmoz”, Marijeren Txokoa izeneko gune berezia aurkeztuko dute. Horretarako, egurrezko kartel edo plaka bat jarriko dute, bere izena eta herriarentzat izan duen garrantzia gogorarazteko.

Antolatzaileen arabera, 50 bat lagun biltzea espero da. Senideez eta lagunez gain, herriko bizilagun ugari ere bertaratzea aurreikusten da, Uranga oso pertsona estimatua baitzen Ispasterren.

Herri Eskolako zirkuko ikasleek emanaldi "zoragarria" eskaini dute

Lea-Artibai eta Mutrikuko Hitza — 2026-06-23 16:14:43

Barikuan [ekainak 19] Lekeitioko Herri eskolako jolastokian zirkuko ikasleen ikuskizuna egin zen. 50 lagun inguru batu zituen ekitaldi “zoragarriak” eta Guraso Elkartetik ikasleak animatu dituzte hurrengo urtean izena emateko.

Mutriku Sokatira Taldekoak, laugarren eta hirugarren Euskadiko Lur Gaineko Sokatira Txapelketan

Lea-Artibai eta Mutrikuko Hitza — 2026-06-23 16:07:58

Mutrikun lehiatu zuten zapatuan [ekainak 20] Euskadiko Lur Gaineko Sokatira Txapelketa.

Bertan, emakumezkoek bigarren jardunaldia eduki zuten, 540 kilotan. Mutrikuko taldeak laugarren postua lortu zuen, 2,5 punturekin. Goiherri Ak eskuratu zuen lehenengo postua, 5,5 punturkin eta atzetik jarraitu zion Gaztedi Ak, puntuazio berarekin. Akelarre gelditu zen hirugarren, 4 punturekin.

Gizonezkoak 600 kilotan lehiatu ziren. Mutrikuarrak hirugarren geratu ziren, 2,5 punturekin. Lehenengoak Gaztedi A taldekoak izan ziren, 5 punturekin eta bigarrenak Goiherrikoak, 4 punturekin.

Hurrengo jardunaldia zapatuan [ekainak 27] izango da, Laukizen.

Andra Mari jaietako kartel lehiaketa martxan jarri du Ondarroako Udalak

Lea-Artibai eta Mutrikuko Hitza — 2026-06-23 15:27:35

Joan den urtean Ondarroako jaietako kartela aukeratzeko formatuak izandako “arrakasta” ikusita, aurten ere kartelaren aukeraketa modu berean egitea pentsatu du udalak. Hala, 2026ko Andra Mari jaietako kartela herritarrek aukeratuko dute bigarrenez.

Udaletik azaldu dutenez, lehiaketak bi fase izango ditu: kartelak egitekoa eta herritarren bozketa. Lehenengo fasea zabalik dago ekainaren 30eko 13:00etara arte, eta udal erregistro orokorrean edo Ondarroako Egoitza Elektronikoan aurkeztu beharko da, postaz aurkezteko hurrengo helbidera: Ondarroako Udala-Jaietako kartel-lehiaketa 2026- 48700 Ondarroa. “Aldi honetan kartelak aurkezteko aukera izango dute nahi duten guztiek, beti ere, jarritako baldintzak betetzen badituzte”. Behin kartelak aurkeztuta, eta baldintzak betetzen dituztela bermatuta, bozketa faseari emango diote hasiera, “oraindik data zehaztu gabe dago. Iazko egiturari jarraituz, udal erakusketa aretoan jarriko dira ikusgarri lehiaketara aurkeztutako kartel guztiak eta herritar bakoitzak bozka bat eman beharko du, presentzialki.

Gaia librea izango da, eta egile bakoitzak lan bakarra aurkeztu ahalko du, edozein teknika erabilita. A-3 edo proportzionala izan beharko da neurria, eta euskarria gogorra edo papera izan daiteke. Kartelaren tituluak ondorengo informazioa jaso beharko du: 2026ko Ondarroako Jaiak eta letra txikiagoan, Andra Maixak, abuztuaren 11tik 17ra. “Ezinbestekoa izango da aipatutako datuak zehatz mehatz jasotzea”.

Kartelek ez dute jasoko egilearen izenik, eta kartazal zarratuan sartuta aurkeztu beharko dira. Kartazalean soilik leloa edo goitizena jarri beharko da. Aipatutako kartazalaren barruan beste kartazal bat sartuko du parte hartzaileak, eta kanpoan leloa edo goitizena jarriko du, eta barruan, egilearen izen abizenak, telefonoa, helbidea, posta elektronikoa eta nortasun agiriaren kopia. Udaletik jakinarazi dute irabazleak 600 euro irabaziko dituela.

Bozketa prozesua. Aurkeztutako lanak udal erakusketa aretoan jarriko dira ikusgai uztailaren 2tik 12ra bitartean, aurkeztutako formatu berdinean. Bertan, kutxa bat jarriko da botoa emateko, eta pertsona bakoitzak gustukoen duen kartela bozkatu ahal izango du; bakarrik bozka bakarra emanez. Pertsona berdinak bozka bat baino gehiago emanez gero, emandako bozka guztiak baliogabetuko dira. Gainera, bozka presentzialki egin beharko da. Irabazlea, bozka gehien jasotzen duen kartela izango da, eta bi kartelek puntu berdinak jaso izanez gero, Ondarroako Kultura Saila izango da irabazlea nor den aukeratuko duena. Era berean, aurkeztutako kartelek ez badaukate behar besteko kalitaterik, kultura sailak saririk ez banatzeko erabakia hartu dezake.

Behin bozketa prozesua amaitzean, udalak saritutako kartelaren jabetza eskuratuko du, eta argitaratzeko eta zabaltzeko eskubidea izango du. “Horrez gain, udalak eskumena izango du, beharrezkoa ikusiz gero, QR edo antzeko elementuak kartelean txertatzeko, beti ere kartelaren konposizioa aldatu gabe. Kartelean erabilitako irudiak egilearen originalak, egileak baimenduak edo erabilpen libreko irudiak izan beharko dira”.

"Giro onean" ospatu da senegaldar berriatuarren jaia

Lea-Artibai eta Mutrikuko Hitza — 2026-06-23 13:41:17

Zapatuan [ekainak 20] senegaldar berrituarren eguna ospatu zuten Berriatuan. Elkartasun jaia izan da aurtengoa ere, eta zapatukoan 200 lagun inguru batu ziren. Herri kirolak, bazkaria, askaria eta senegalgo dantza tradizionalek osatu zuten egun guztiko egitarauagaz, “egun ederra” igaro zuten elkarrekin. Guztia musikak girotuta ospatu zuten.

Herri txikiei aukera handiak emateko programa abiatu dute

Lea-Artibai eta Mutrikuko Hitza — 2026-06-23 13:34:45

Bizkaiko Foru Aldundiak Herri Txiki, Aukera Handi programa abiatu du Lea-Artibain. Programaren baitan, Lea-Artibaiko udalerrietan eskaintzen diren zerbitzu publikoen diagnostikoa martxan jarri dute. Tokiko eragile publikoen eta pribatuen eskariak kontuan hartuta, eskualdeko udal-zerbitzu publikoen behar eta gabeziak identifikatuko ditu programak. Hortik abiatuta, herrien eta herritarren beharrak betetzeko proiektuak abiaraziko dituztela adierazi du aldundiak.

Programaren baitan abiatu duten diagnostikoa egiteko, Lea-Artibaiko herritarrei galdetegi bat zabaldu die, udal zerbitzuen egoerari, beharrei eta hobekuntza aukerei buruzko euren iritzia eman dezaten. Herritarren ekarpena “funtsezkoa” dela azaldu dute udalek, “udal mailako zerbitzuak egokitu, indartu eta etorkizunerako planifikatzeko”.

Baloratuko dituzten zerbitzuen artean, mugikortasuna eta garraioa, kultura, gizarte zerbitzuak, azpiegiturak eta bide publikoak, ingurumena eta natur guneak, ura eta saneamenduak, herritarren arreta, garapen ekonomikoa eta enplegua, hondakinen kudeaketa, euskara eta bere sustapena, kirola eta honen eskaintza, etxebizitza, gazteria eta berdintasuna izango dira. Gainera, norberak bere herrian ikusten duen gabeziei edo hobekuntzei buruzko iritzia eman ahalko du.

Galdetegia esteka honen bitartez bete daiteke.

Urreisti-Sorozabal eta Erkiaga-Atain finalerdietan daude

Lea-Artibai eta Mutrikuko Hitza — 2026-06-22 16:51:21

Urreisti-Sorozabal eta Erkiaga-Atain dira Markina-Xemeingo Grand Slameko bigarren jardunaldiko irabazleak.

Javier-Zabala bikotea eduki zuten aurrez aurre Urreistik eta Sorozabal. Bi setak irabazita lortu zuten garaipena mutrikurrak eta biarriztarrak (6-15 eta 8-15). Garaipenagaz, zortzi puntu irabazi dituzte guztira.

Bigarren partidan, Julen Basterra Txanika eta Eñaut Salegi estreinatu ziren, atariko neurketak irabazi ostean. Aurreko asteko irabazle Aritz Erkiaga eta Gorka Mugartegi Atain-en kontra jokatu zuten, eta ispastertarra eta markina-xemeindarra 13-15 eta 10-15 markagailuagaz nagusitu ziren.

A multzoan, Erkiaga-Atain bikoteak 7 puntu ditu; Barandikak eta Ibarzuleak bigarren postua dute momentuz, puntu bakarragaz; eta Txanika eta Salegi azken postuan daude 0 puntugaz. B multzoari dagokionez, Urreisti-Sorozabalek 8 puntu dauzkate. Goitia eta Basque bigarren postuan daude -5 puntugaz. Azken lekuan Urrutia-Zabalan daude, -16 puntugaz.

Hurrengo jardunaldia barikuan [ekainak 26] jokatuko dute, eta irabazleek finalerdiak osatuko dituzte, Erkiaga-Atain eta Urreisti-Sorozabal bikoteekin batera.