Lea-Artibai eta Mutrikuko Hitza

27. Zapato Azulak urdinez tindatu du Ondarroa

Lea-Artibai eta Mutrikuko Hitza — 2026-06-27 16:22:15

Azken egunetako bero sargoririk barik esnatu da gaur [ekainak 27] Euskal Herria, eta gustura hartu dute hori Ondarroara joan direnek. Kamiseta urdinak armairutik atera, eta Alde Zaharra goitik-behera eta ezker-eskubi bete dituzte bertaratu direnek. Herritarrak, inguruko herrietakoak nahiz Euskal Herriko hamaika txokotatik bertaratutakoak elkartu ditu gaur Radixu Irratiak antolatzen duen 27. Zapato Azulak Ondarroan. Hala, aurtengo kartelean keinu egin dioten Felix Beristainen koadro baten antzera, urdinez tindatu dira herriko txoko guztiak.

11:00etarako prest zeuden Radixu Irratiako kideak zuzeneko emisioagaz batera jaiari ekiteko, eta egunaren nondik norakoak azaldu ostean, Koldo Azpiazuk hartu du mikroa. Hain zuzen ere, iaz hartu zuen Azpiazuk Nekane Akarregiren erreleboa, eta aurtengoan ere berea izan da jaiari hasiera emateko ardura. Hala, urtero bezala, Alai Tabernako balkoiak bereganatu ditu begirada guztiak, eta bertan zeudenek adi jarraitu dituzte Azpiazuk esandakoak. Nola ez, Manuel Eluren bolanderek ere ez dute hutsik egin, eta 12:00etan egin du eztanda jaiak, bolandera eta bolandera artean.

Bolandera ugari bota ostean jaiak ez du etenik izan, eta urteroko osagaiekin osatu dute goiza. Txistulariak, Kresalako bandaren eta Artelango erraldoien kalejira nahiz falta direnak gogoan hartzeko tartea hartu dute herritarrek, eta Txalainak taldearen kontzertuak biribildu du goizeko jarduna. Abanikoak dantzan eta gorputzak ere bai, Hertzainak taldearen abesti ezagunenak abesteko tartea hartu dute Kalekutz inguruan batu direnek.

Zapato Azule berezia bada, Dinamartxaren ailegaera are bereziagoa da herritar askorentzat. Dina Bilbao Barruetabeñaren omenez Tolosa eta Ondarroa elkartzen dituzte martxalariek oinez nahiz bizikletan, eta irrintzi, txalo, oihu eta musika artean egiten diete harrera ondarrutarrek. Oinez egin duten 77 martxalarientzat bart 01:00etan hasi ziren Zapato Azuleko ekintzak, eta gaur 09:00etan, ostera, bizikletaz etorri diren 223 partaideentzat. Iazko parte hartze kopurua gaindituta (iaz 259 partaide eduki zituen), poztasunez nahiz emozioz betetako malko eta irribarreen artean sartu dira herrira 300 martxalariak.

Martxalariak, Alde Zaharrera heltzen.

Dinamartxako kide denak heldu ostean, aurtengo pregoia irakurri dute Radixuko kideek balkoitik. Besteren artean, Palestina, Saharan, Iran Libano eta Kubagaz gogoratu dira, eta zelan ez, baita Venezuelako herriagaz ere. Jarraian, denborarik galdu barik, aurtengo omendua izendatu dute. “Omendu guztiak dira bereziak, baina aurtengoa, Zapato Azule antolatzen dugun guztiontzat, bereziena da. Zorionak Nekane Akarregi Amutxastegi, zeu zara aurtengo omendua!”. Hala, Akarregi ezustean harrapatu du omenaldiak, baina irribarrez jaso du Radixukoen aipamena.

Ostean, 11:00etan zabaldu duten Euskal Herriko Kamiseta Azoka eta Artisau Azoka itxi, eta aurtengo kamisetarik eta erakusleihorik onenak izendatu dituzte. Kamiseta Azokan Ondarroako hiru postu eta Euskal Herriko beste hamahiru egon dira, eta Torontilek (Artea) irabazi du Euskal Herriko kamisetarik onenaren saria. Ondarroako kamisetarik onenaren saria, aldiz, Saturrarango Haitzak irabazi du, eta erakusleiho onenarena, Lorak Estherrek.

[ARGAZKI GALERIA]

Txo! Antzerki Kolektiboak omenduari egindako sketchagaz amaitu dute eguerdiko jarduna, baina jai luzea geratzen da oraindik Ondarroan. Arratsaldean mota eta gustu guztietako musika entzuteko aukera egongo da herriko txoko guztietan, eta jaiak ez du etenik izango goizeko ordu txikiak arte.

"Begirunez egindako esperientzia sentikor bat" dauka gordeta Arretxinagako ermitak

Lea-Artibai eta Mutrikuko Hitza — 2026-06-26 15:37:21

Ereinotz bat Arretxinagako ermitari. Prozesu luze baten ostean, Markina-Xemeingo balio handiko gunearen zaharberritze lanak amaitu dituzte, hala, San Migel ermita eraberrituta ikusteko hainbat herritar batu ziren atzo arratsaldean. Herritarrez gain, Zerutxu Dantza Taldeak eman zion ongietorria gune berrituari.

Begibistakoak dira ermitaren kanpoaldean egin dituzten lanak. Ermitaren kanpoko hormak kareorez berritu dituzte, kolore eta ehundura bereizgarriak emanez. Eraikina bakarrik ez, alboan dagoen probalekua ere berritu dute eta ikusleentzako armailak jarri dituzte. Lanak amaituta daudela adierazteko, Alde Zaharrean egin zuten era berean lotu zioten ereinotza ermitari.

Kanpoaldekoaldekoak ikusita, barrualdean jarri zuten begirada. Honetarako, ermitara sartu baino lehen, Jon Astorkiza eta Joseba Beristain artistek hartu zuten hitza, erakinaren barnealdean egindako arte proiektu berritzaileari buruzko nondik norakoak azaltzeko. Astorkiza izan da proiektuaren grafiko zuzendaria, eta Arretxinagan egon zen lehen aldian sentitu zuen “konexio handia” aitortu zuen bere berbaldian. Horregatik, toki honetarako “begirunez egindako esperientzia sentikor bat” sortu du. Azalpenekin jarraitzeko, Beristainek hartu zuen hitza. “Tokiko natura elementuen soinuekin eta sintetizadoreekin jolastuz”, sortu du esperientzia bisualari balio gehigarri bat emango dion soinu paisaia. Sei bozgoragailuk osatutako instalazio bat sortu du, eta hala, “txikia den espazio bat handitu egiten du”.

Instalazioaz gain, ikus-entzunezko pieza bat eskaintzen digu San Migel ermitak. Bertaratzen direnek QR bat aurkitu eta horren bitartez helduko dira piezara. Eneritz Artetxe aktore gernika-lumotarrak gidatuko du ikuslea lau hizkuntzatan (euskeraz, gazteleraz, frantsesez eta ingelesez) entzun daitekeen piezan. Ermitari eta hau inguratzen duen artearen historiari buruz ari da Artetxe ikus-entzunezko horretan, “bisitaria leku honen magiarkein, unibertsoarekin, naturarekin eta bizitzarekin lotzeko”.

Aurkezpena amaituta, ermitako ateak zabaldu zitzaizkien herritarrei, eta orduan izan zuten instalazioa ezagutu eta tokiarekin konektatzeko aukera. Bertaratzen direnek ermita zabalik dagoen artean izango dute esperientzia bizitzeko aukera.

Oriok bi banderak irabazi ditu Lekeition

Lea-Artibai eta Mutrikuko Hitza — 2026-06-08 14:55:06

Arraun lehiaketaz betetako asteburua izan da. Getarian jokatutako Euskadiko Traineru Txapelketaz gain, Lekeition ere goi mailako lehia egon zen zapatuan [ekainak 6]: Lekeitioko Bandera lehiatu zuten. Orio izan zen nagusi, hurrenez hurren, emakumezkoen eta gizonezkoen estropadetan.

Gizonezko absolutuen estropadan, Lea-Artibaiko traineruek ezin izan zuten oriotarren ekina gainditu. Gizonezkoetan, 21.43,27ko denbora behar izan zuten gipuzkoarrek lanak burutu eta Lekeitioko 47. Bandera eskuratzeko. Oriok 9 segundo atera zizkion San Juani eta 11 Zarautzi. Lekeitiok laugarren postua lortu zuen; 21.58,51ko denbora egin zuen etxeko taldeak. Ondarroak, aldiz, 22.08,78ko denbora eginda, bosgarren postua eskuratu zuen. Azken postuan sailkatu zen Mutriku, estropada 25 minutu, 53 segundo eta 55 ehunenekotan egin ondoren.

Emakumezkoen 15. banderan Oriok 11.58,97ko denboran osatu zuen estropada, eta haren atzetik, Hibaika eta Zumaia sailkatu ziren. Talde horiak 14 segundo atera zizkion Hibaikari eta 23 Zumaiari. Lekeitiok bederatzigarren postua lortu zuen, 13 minutu 29 segundo eta 55 ehunenekotan.

Mutrikuarrak, Lekeitioko Bandera irabazteko lehian. Argazkia: Bermeo Arraun Argazkiak.

Argazkia: Iñaki Beitia

Bertoko basoa berreskuratzen jarraitzen dute Ziortza-Bolibarren

Lea-Artibai eta Mutrikuko Hitza — 2026-05-30 20:22:16

Sergio Gallego Mazarias Lurgaia Fundazioko kidearen gidaritzapean, landare inbaditzaileak zelan kendu ikasteko tailerrean batu dira gaur [maiatzak 30], Ziortza-Bolibarren. 09:30ak puntu-puntuan plazan elkartuta, Urasandira lehenengo eta Landadi basora joan dira ondoren.

Errekaren bestaldean geldialdia eginda, lehen panpa belarra kentzeari ekin diote. Zauririk ez egiteko eskularruak jantzita, aitzurra eta pala baliatu dituzte Euskal Herrian urterik urte gehitzen doan Amerikako espezie inbaditzailea kentzeko. Ezin izan dute guztia kendu, eta, horrenbestez, hemendik aurrera mozten jarraitu beharko dute. “Txikiagoa izan balitz, lortuko genuen indarrez kentzea, lurrari oso errotuta egoten den espeziea da-eta panpa belarra”.

Panpa belarra kentzen aritu dira Urasandin.

Autoz Landadira joan dira ondoren, Ziortza-Bolibarko Udala eta Lurgaia elkarlanean berreskuratzen ari diren basora. Pinudiaren bestaldean, Arimen Gaztañadia, orain dela hogei urte Bizkaiko Foru Aldundiagaz batera udalak berreskuratu zuen zoru publikoa. “Guk daukagu plana Markola erreka babesteko korridore ekologiko bat osatzen joatea, bertoko zuhaitzekin. Dinamika horretan sartzea gurako genuke jabe pribatuak ere”, azaldu du Andoni Lariz udalerriko alkateak.

Gallegok, bide beretik, beharrezkotzat jo du erakundeen inplikazioa basoak bertokotzen joateko. Eta Ziortza-Bolibarko Udalagaz egindako elkarlana eskertu du. “Lauzpabost urte daramatzagu elkarlanean. Honetan sinisten duten pertsonak aurkitzea garrantzitsua da”. Ildo beretik, “ezinbestekotzat” jo du bide horretan ingurumenarekiko sentsibilitatea daukaten politikariak eta teknikariak aurkitzea.

Begirada konplizeak eta alaitasuna, Mutrikuko Erromeri Egunean

Lea-Artibai eta Mutrikuko Hitza — 2026-05-30 18:19:24

Hankak astinduz eta begirada konplizez gainezka. Horrela joan da gaurko [maiatzak 30] Erromeri Eguna Mutrikun. 12:00etarako zeukaten hitzordua jarrita Beheko Plazan dantzari eta txistulariek, Gure Ametsa dantza taldearen ekimenez.

Hasiberriek eta beteranoek, guztiek bat eginda hartu dute dantza eremua. Lehenengoz plazara atera direnek edo aspaldi atera gabeek hasierako urduritasunari aurre egin behar izan diote, baina Beheko Plazaren testuinguruan ondo baino hobeto moldatu dira, inguruan zituzten ikus-entzuleen babesean.

Goiko Plaza izan da erromeriaren hurrengo testigua, “errespetu handiagoa” ematen duen agertokia, hasiberriek aitortu dutenez. Arin-arina, fandangoa, jauziak edota Larrain dantza egin dituzte bazkaltzera joan aurretik, ikus-entzulez inguratuta eta txalo artean.

Larrain dantza egin dute Goiko Plazan.

Bazkaritan jarraitu du Erromeri Egunak. 90 lagun inguru bildu dira Egañaneko frontoian; eta egunak aurrera egin ahala, ohi bezala, herritar gehiago batu dira ekimenera. Arratsaldeak Kittu taldeaen doinuak ekarri ditu.

Balorazio ona. Gure Ametsa dantza taldeko partaideak pozik agertu dira hitzorduak izan duen erantzunagaz: “Urtero sortzen da hasiberrien taldea. aurten, 20 bat laguneko taldea aritu da Erromeri Egun aurreko entseguetan. Kopuru polita da”.

Loratzen jarraitzen du Ondarroak

Lea-Artibai eta Mutrikuko Hitza — 2026-05-02 16:18:59

Udaberriari ongietorria eman dio Pla-Pla jaiak bigarren urtez. Loratzen jarraitu du, saretzen, Mamarratxosni talde antolatzailearen helburu nagusia betez. Saretzen sexu genero disidenteentzako espazioak, saretzen elkar ezagutuz, elkarri emanez. Elkartuz.

Atzoko [maiatzak 1] ekimenei gaurkoek [maiatzak 2] eman diete jarraipena. Herriko frontoia bilgune, zumba saioaren eta bazkariaren bueltan elkartu dira herritarrak goiz partean. 12.30ak inguruan hasi dira gorputzak astintzen doinu dantzagarriei segituta. Enetz Ximeno gidari, libre mugitu dira, saioak aurrera egin ahala lotsak gero eta gehiago alboratuz.

Udaletxeko sarrera parean, bazkaria prestatzen zebiltzan bien bitartean. 11:00etan ekin diete prestaketei. Entsalada, arroza barazkiekin, kafea eta gailetak. Menu hori dastatu ahal izan dute bazkaritan bildu diren 60 lagun inguruk. Palestina gogoan, produktu ez sionistekin bete dute hitzordurako otzara.

Ondorengo orduak bertso, bingo musikatu eta performance eta Katiuskak eta Lumatzak MJren saioek girotuko dituzte. Gaztetxean agurtuko dute aurtengo Pla-Pla.

Zumba saioan ederto pasa dute.Larraitz Ibaibarriaga Etxaburu

Bi eguneko hitzordua. Atzo hasi zen Pla-Pla, Klase borroka transfeminismotik. Herrietan zer? erresistentziak eta bizirauteko estrategiak mahai inguruagaz. Mijo Lizarzaburuk eta Txutxik parte hartu zuten, eta erantzun oso ona jaso zuen. “50 lagun inguru elkartu giren ordu eta laurdeneko saioan. Jendea gustura egon zen”. Minutuek aurrera egin ahala, parte hartzea handitu egin zen: “Bizi sintetikoak emanaldira jende gehiago batu zen, eta gauerdira arte ibili zen jende gehien”, azaldu dute Mamarratxosnako kideek.

Bi ekimenen artean, pintxoak dastatu ahal izan zituzten. Antxoak eta penkak, zelan ez, pla-pla eginda eta patata tortilla egon ziren aukeran. “Lehenengo jaian ere eman genituen, eta arrakasta izan zutela ikusita, aurten ere pintxoak eduki ditugu”.

Bi urte barru egingo dute hurrengo Pla-Pla, “desbiauei”, sexu genero disidenteei, adina edozein delarik ere espazio segurua ematen jarraitzeko helburuagaz: “Belaunaldiarteko jaia izatea nahi dugu”.

Libertimendutik dibertimendura, norbanakotik herrira

Lea-Artibai eta Mutrikuko Hitza — 2026-02-28 17:54:38

Goikoportalaren bueltan kokoxak, musikariak eta bertsolariak. Abarka Antzerki Taldea eta Zerutxu Dantza Taldea. Umeak, gazteak eta nagusiak. Eserita nahiz zutunik; aterkipenak nahiz euritan blai bustitzen. Zer distantzia dago ni-tik gu-ra, norbanakotik herrira? abestu du Nerea Ibarzabalek bere azken bertsoan. Eta horixe egin dute Abarkakoek eta Zerutxukoek gaur [otsailak 28]: norbanakoaren eta herriaren arteko horma eraitsi.

Bizkaiko lehenengo libertimendua izan omen da markina-xemeindarrek Dibertimendue izendatu dutena. 11:00etan hasi dute eguna Xemeingo elizan, eta ordurako jende ugari egon da gaurko protagonisten zain. Heldu dira kalejiran dantzariak, kokoxak, hartza nahiz bertsolari eta txistulariak, eta batu zaizkie herritarrak nahiz ingurutik bertaratu diren ikusleak. Gaurko egunetik zer espero jakin barik, Zelai ingururako bidea hartu dute denek, eta lehenengo geldialdia bertan egin ostean, udal arraindegiaren parean Abarka Antzerki Taldeko gaztetxoen txanda izan da. Hor hasi da, hain zuzen ere, norbanakotik herrira dagoen distantzia gutxitzen. Herritar askori ezagun egin zaizkien poz, amorru, kezka nahiz eskaerak azaleratu dituzte kokox gaztetxoek, eta barre algara eta txalo zaparrada artean erantzun dute herritarrek.

Hormaren lehenengo adreiluak eraitsita, Goikoportalera kalejiran heldu dira denak. Han, herriko dantzen aberastasuna ikusteko aukera eman dute Zerutxuko dantzariek. Guztira bost dantza egin dituzte, bat edo beste, ikutu bereziekin: Xemeingo dantza, Mahai-gainekoa, Zaragi-dantza eta aurreskua alde batetik, eta Iruñeko Duguna Dantza Taldeko Aritz Ibañezekin sortu duten makil-joko berri baten dantza, bestetik. Dantza eta dantza artean, Ibarzabalen eta Unai Iturriagaren bertsoez gozatu dute ikusleek, eta baita Abarkakoen hamaika esketx desberdinez ere; libertimenduen oinarrian dagoen satira, parodia eta kritika sozial zorrotz eta gogorra mahaigaineratu dute kokoxek, umore dosi egokiarekin nahastuta, eta barrura begira jartzeko uneak eskaini dituzte bertsolariek. Ez dute zalantzarako tarterik utzi: ume, gazte nahiz nagusi, denek eduki dute zer hausnartua gaur.

Hala, txalo zaparrada artean, elkarri eskutik heldu eta denek elkarrekin dantzatzeko gonbidapena luzatu du Ibarzabaek azken bertsoan, eta halaxe amaitu dute Dibertimendue: bi ordu eta erdiko jardunaren ostean, fandangoa, arin-arina eta kalejira dantzatu dute kokox, dantzari nahiz ikusleek, eta norbanako izatetik herri izatera dagoen distatzia desgarrerarazi dute une batez.

Espiritua, bizirik. Emanaldia amaitu den arren, Dibertimenduaren esentzia plazan, gorputzetan eta memorian geratuko da. Herri lanaren emaitza izan da gaurkoa, eta antolatzaileak pozik geratu dira lortutakoagaz. Ander Lipusek adierazi duenez, badute gehiagorako gogoa ere: “Uste dut libertimenduen espiritua hor dagoela, eta jakin izan dugula Iparraldetik hona, Markina-Xemeinera, ekartzen, elizako kanpai eta guzti, zeruko laino eta euri eta guzti. Oso pozik gaude: herriak erantzun du, eta parte hartu dugun denok oso-oso pozik egoteko moduan gaudela uste dut. Lehenengoa izan da, eta espero dugu azkena ez izatea“.

Arrillaga-Argoitia eta Gogenola-Aldazabal bikoteak elitekoak dira

Lea-Artibai eta Mutrikuko Hitza — 2025-11-17 14:47:03

Euskal Pilota Federakuntzak antolatzen duen Elite Txapelketak baditu txapeldun berriak. Aurten lehen aldiz Mutrikuko Danok Bat elkarteak neskena zein mutilena batera antolatzeko ardura hartu du eta barikuan [azaroak 14] jokatu zituzten Miruaitzen finalak.

Emakumezkoetan, Elaia Gogenola eta Maialen Aldazabal ziren hautagai nagusiak, eta pronostikoak bete egin zituzten. Lehen setean erabateko nagusitasuna erakutsi zuten, 4-1 eta 8-3 aurreratu ziren. Maite Ortiz de Mendibil jokoz kanpo utzi nahi izan zuten eta jokoa Oaia Otañorengan bideratu. Gasteiztarra saiatu zen mutrikuar gazteari laguntzen, baina jokoaren amaieran ezin izan zuen: 15-5. bigarren jokoan bai gehiago sartu zen jokoan eta 0-4 aurreratzea lortu zuten. Pixkanaka berriatuarrak berriro partidari neurria hartu zioten eta hutsegiteak sahiestu zituzten. Partida berdindu egin zen bigarrenean, tanto luzeagoak ikusi ziren eta testuinguru horretan Gogenolak bere kalitatea erakutsi zuen tantoak amaitzerakoan: 15-11.

Gizonezkoetan ere goitik beherako partida ikusi ahal izan zuten zaleek. Bi partida partida berearen barruan. Lehen jokoan oso nagusi izan ziren Urko Lekerikabeaskoa eta Unai Uranga. Zuhaitz Arrillaga eta Ortzi Aldazabal Argoitia ezinean aritu ziren, aurkariek beti pilota bat gehiago sartzen zuten. Gainera, aurrelariak izan zituen errematatzeko aukerak ez zituen baliatu. 10-4koarekin lehen seta apurtu zuten Lekerika gazteak eta Urangak, azkenean 15-9 gailendu arte. Atsedenaldian, berriz, Arrillagak eta Argoitik bestelako partida jokatu zuten, hutsegite gutxiago egin zituzten eta aurrean gehiago asmatu zuten. Hasieratik hartu zuten aurrea (1-4 eta 3-9) eta bolada ona baliatu zuten finala hirugarren setera bidaltzeko: 8-15.

Bide gorabeheratsuaren ostean, ikusi beharra zegoen zer nolako bidetik joko zuen hirugarren joko laburrak. Berdintasuna izan zen nagusi hasieran, baina Lekerikabeaskoak eta Urangak bazirudien bideratuta zeukatela 4-2koarekin. Ezta gutxiago ere, gernikarraren sake faltarekin tarteko, Arrillagak errebotean egin zuen azken tantoa 4-4nako berdinketarekin.

Antolatzaileek txapelketa guztian zehar bertaratutako jendetza nabarmendu dute, batez ere finalean. Orokorrean, lehiaketaren mailari dagokionez, puntista gazteagoak parte hartu dutela azpimarratu dute. Hain zuzen ere, horietako asko Daniara joango dira hurrengo hilabeteetan: Txanika, Argoitia, Mandiola edota Zelaia, besteak beste. “Jende asko elkartu da partida guztietan, eta finalean are gehiago. Pilotari gazteagoak izan ditugu aurten, baina erakutsi dute harrobian lan ona egiten dela eta puntista onak ateratzen ari garela eskoletatik”.

Elaia Gogenolak eta Maia Goikoetxeak koroagatik borrokatu dute

Lea-Artibai eta Mutrikuko Hitza — 2025-09-23 12:13:03

Donostiako Lauko Finalak Jai Alai Ligako puntistarik onenak hartzen ditu, lau aurrelari eta atzelari onenak. Baina denboraldi osoan zehar aurretik egoteak ez du emaitzik ziurtatzen. Atzo [irailak 22] adibiderik onena ikusi ahal izan zen. Aritz Erkiaga eta Gorka Sorozabal, esate baterako, puntu gehien bildu dituztenak izan dira beraien postuetan. Xabi Barandika eta Imanol Lopez, ordea, laugarrenak izan dira. Berez, lorpenak ikusita, lehendabizikoak ziren hautagaiak, baina iaz ere gernikarrak eta zumaiarrak laugarren postutik lortu zuten Jai Alai Ligako koroa. Gainera, ispastertarra zalantzekin heldu zen azken asteetan besoko minagaz egon ostean.

Barandikak eta Lopezek hasieratik erakutsi zuten zer nolako bikote sendoa osatzen duten. Zumaiarrak erakustaldia eskaini zuen atzeko koadroetan, pilota nahieran mugituz. Aurrelariak bere aukerak baliatu zituen eta errebotean min egin zuen. Bien helburua argia zen, Erkiaga sahiestu eta pilota asko atzeratu. 1-5 aurreratu ziren, baina Barandikak dagoeneko hiru pasa egin zituen, eta ispastertarra aurrean izanda, hori bereziki arriskutsua da. 6-8 hurbildu baziren ere, errebotea bilatuz min ikaragarria egin zuten: 7-15.

Bigarren jokoan, Erkiaga jokoan gehiago sartzen saiatu bazen ere, Barandikak eta Lopezek sendo jarraitu zuten. Gernikarrak 20 tanto amaitu zituen, erakutsiz tantoak ez direla bakarrik aurrean amaitzen, baita atzean edo errebotean ere. Azkenerako, 8-15 eta finalerako txartela, zain dituzte Eñaut Urreisti eta Thibault Basque. Barandikak nabarmendu zuen “bikote langilea” osatzen duela

Erkiaga, Lauko Finaletik kanpoEraman Jai Alai

Lopezegaz eta “tantorik tanto” lan egiten dutela: “Partida borobila jokatu dugu eta finalean ere bikote oso gogorra izango dugu aurrean, maila oso potentea dute, baina gu lan egiteko prest etorriko gara”.

Lehena, beti berezia
Nesketan ere iraultza eman zen, eta hemen ere atzeko koadroetan ezarri zen legea. Bertan, nagusi izan zen Maia Goikoetxea gaztea. Elaia Gogenolak aurrean duen ausardiagaz, hauek ere bikote sendoa osatzen dute. Maite Ortiz de Mendibil eta Maialen Aldazabal 0-2 aurreratu ziren, baina Goikoetxeak erakustaldia eman zuen eta atsedenaldirako 8-5 zeuden aurretik eta lehen setaren amaieran 15-12. Eskumaz eta errebesez dominatu egin zuen gazteak, eta bere aurrelariari aukerako pilotak eskaini. Aldazabal eusten saiatu zen eta Ortiz de Mendibil aurretik jokoaren ekimena aldatzen. Baina aldatzen ez zena markagailuko tartea zen, 11-5etik 15-9ra joan ziren.

Irailaren 29ko finalean Oihana Sorozabal biarriztarra eta Arai Lejardi markina-xemeindarra izango dituzte aurrean. Emakumezkoen Jai Alai Ligako lehen txapeldunak erabakiko dira, horregatik “pozik eta ilusio handiz” agertu ziren bi berriatuarrak: “Ohore bat da finalean egotea, gure plana ezin hobeto egin dugu, atzean dominatu eta aurrean errematatu. Finalean, bikote gogorra izango dugu aurrean, Lejardik pilota asko sartzen du eta Sorozabalek amaitzeko gaitasuna erakutsi zuen, baina guk gure estiloagaz jarraituko dugu”.

"Primeran" joan dira Beheko Arrabaleko jaiak

Lea-Artibai eta Mutrikuko Hitza — 2023-10-24 13:52:27

Zapatuan [urriak 21] ospatu zituzten Markina-Xemeingo Beheko Arrabaleko jaiak, eta “primerako eguna” pasa zutela adierazi dute antolatzaileek.

Umeak izan ziren protagonistak egun guztian. Goizean margo lehiaketagaz hasi zuten eguna, eta guztira 38 lan aurkeztu ziren. Lan guztiak ikusgai daude Bikale tabernan, hilabetez.

Arratsaldean ere giro aparta egon zen: “Jende mordoa ibili zen, eguna oso ondo joan zen eta gainera eguraldia ere mundiala egin zuen”. 17:00etan txokolatadagaz hasi zuten arratsaldea, eta baita buruhandien kalejiragaz ere. Giroa alaitzeko, Rakel Pujanak eta bere ikasleek trikiti doinuz alaitu zuten kalea. Egunagaz ezin hobeto amaitzeko, Gazte dantza ikuskizuna eskaini zuten Hika Teatroko eta Oinkari Dantza Taldeko kideek: “Dantzariak harrituta geratu ziren egon zen giroagaz, herriko jaiak ematen zutela esan zuten. Sekulakoa izan zela esan zuten, hunkituta egon ziren”.

Kaxilda eta Hondarribiko gaztetxeen husteak salatu dituzte Ondarroako gaztetxeen topaketan

Lea-Artibai eta Mutrikuko Hitza — 2020-03-07 22:25:06

Ondarroako, Mutrikuko eta Debako gazte asanbladetako 50 kide inguru batu dira gaur goizean [martxoak 7) Ondarroan. Aspaldi zeuden elkartu barik, eta horregatik, ezagutzak partekatzeko, ideiak eta esperientziak trukatzeko eta harremanak sendotzeko baliatu dute eguna.

Mahai inguruan batu dira goizean.

Gaztetxean bat egin dute goizean, eta, bazkal aurrean, Gaztetxin momentuko egoeri mahai ingurua egin dute borobilean jesarrita. Gaztetxeko ateak beti zabalik daudela gogorarazi, batak besteen esperientzietatik ikasi eta etorkizunerako erronkez aritu dira. Bazkaltzera joan aurretik, talde argazkiak atera dituzte Gaztetxe aurreko moila txikian; azken egunetan Ertzaintzak Zizurkilko Kaxilda eta Hondarribiko gaztetxeen husteen eta futboleko Eurokopa Bilbon jokatzearen kontrako pankartak zabaldu dituzte, euren desadostasuna erakusteko.

Karropoteoa eta Mutrikuko Dawaneko taldearen kontzertuaz gozatu dute arratsaldean. Dena talde talde ondarrutarraren kontzertuagaz eta karaokeagaz agurtuko dituzte topaketak gaueko ordu txikietan.

Ondarroako Ariman Gabak beldurrez eta irriz bete ditu San Ignazio eta Ibaiondo inguruak

Lea-Artibai eta Mutrikuko Hitza — 2019-11-01 16:51:23

Ilunetan, eskuan kandelak eta argiak hartuta eta inork ez ezagutzeko moduko mozorroak soinean ospatu dute
II. Arimen Gaba Ondarroan, Zubi Zahar herri ikastolaren eta Zaldupe eskolaren ekimenez.

19:45 orduko, ume eta guraso asko eta asko zeuden bilduta atzo [urriak 31] Ibaiondoko biribilgune parean. Eta 20:00etan, iragarri legez, Zaldupeko Zubitik Kamiñazpiko parkerainoko argi guztiak itzali zituzten, eta turrunak ekimenaren hasiera iragarri zuen. Ilunetan eta oihu artean hasi zuten umeek ibilbidea. Etxerik etxe joan ziren, gozoki eskean, urduri, ze aurkiko zuten ez zekitela.

Umeak, etxebizitza batera sartzeko prest.

Aurten, euskal ohitura paganoa ospatzen den bigarren urtea izanik, herritar askok prest izan dituzte umeei eman beharrekoak. Gehiago izan dira atean kandelak ipini dituzten bizilagunak. Datorren urtean ere, xanduli manduli kikirriki… zeoze emon guri! esanez umeak agertzeko zain egongo dira. Apaindutako kalabazek jantziko dituzte berriro Ondarroako kaleak.

Kalabaza beldurgarriek apaindu dituzte kaleak.

150 motatako perretxikoak bildu eta sailkatu dituzte Mendexako Asteburu Mikologikoan

Lea-Artibai eta Mutrikuko Hitza — 2019-10-28 14:04:24

Oso arrakastatsua izan da Mendexako Asteburu Mikologikoa. Zapatuan [urriak 26] perretxiko bilketagaz hasi zuten egitaraua. 08:00etan txokoan elkartu, eta irteeraren inguruko oharrak partekatu ondoren, plazatik atera ziren perretxiko bila. Garau asko hartu zituzten, eta 12:00ak orduko udaletxeko ganbarara joan ziren, bertan sailkapena egiteko. Jose Mari Ibarbia mikologia adituaren laguntzagaz sailkatu zituzten; 150 motatakoak guztira.

Hitzaldian batu ziren domekan.

Perretxiko horiek –eta herritar batzuek euren kabuz eroandakoak– erakusgai jarri zituzten domekan [urriak 27], 11:00etatik 13:00etara bitartean. Ikusi ez bakarrik, horiek dastatzeko aukera ere egon zen, eta jende askok parte hartu zuen ekimenean. Antolatzaileak pozik daude emaitzagaz.

Lekeitioko Trinketeko Beteranoen Esku Pilota Txapelketako finalistak erabakita daude

Lea-Artibai eta Mutrikuko Hitza — 2019-02-11 13:49:25

Beteranoen Lekeitioko Trinketeko Esku Pilota Txapelketa finalaurrekoetara hurreratzen ari da, eta jadanik, bertan egongo diren bikote guztiak erabaki dira. Astigarragak eta Gandiaga II.ak oraingoan ere ez dute hutsik egin, eta txapelketa osoan partidarik galdu barik igaro dira azken txanpara. Joko handia erakusten ari dira bai eta Pradera eta Gandiaga I. ere. Partida bakarra galdu dute, Astigarraga eta Gandiaga II.aren kontrakoa, eta finalaurrekoetan egoteko aukera irabazi dute.

Datorren domekan [otsailak 17] jokatuko den ligaxkako azken partidan Jaunarena-Foster eta Beraza-Telleria bikoteak neurtuko dira. Biak daude finalaurrekoetarako sailkatuta, hala ere, 3. eta 4. postua izango dute jokoan, eta beraz, partida interesgarria izango dela aurreikusten dute antolatzaileek. Bikote biek bi partida irabazi dituzte ligaxkan eta sailkapenean berdinduta daude. “Jaunarena nafarra bere jokoa egiten saiatuko da, naiz eta Beraza elgoibartarra ofizio handiko jokalaria izan. Atzean, Telleria txapelduna, bere nagusitasuna erakusten saiatuko da, baina Foster txapelketa oso ona egiten ari da, eta eusten badio, partidua zaildu ahal dio faboritoari”. 10:30ean jarriko dira bikoteak aurrez aurre.

Gandiaga I, Pradera, Izarra epailea, Egaña eta Moral. Argazkia: Beteranoen Txapelketa

Txapelketatik kanpora. Partida politak ikusi ahal izan ziren atzo [otsailak 10] ere, Lekeitioko trinketean. Astigarraga-Gandiaga II eta Bastida-Conde bikoteen arteko neurketan, bigarrenek zeukaten garaipenaren premia handiagoa. Bastidak eta Condek partida irabazi beharra zeukaten, finalaurrekoetan egoteko aukera izateko. Momentu batzuetan aurretik ere ibili ziren, baina 7-7ko berdinketaren ostean, Astigarragak eta Gandiaga II.ak aurrea hartu eta nagusitasunez heldu ziren 30-15 eko emaitzara. “Astigarraga naiz eta ondoezik egon, gehiago izan da aurrean, eta Bastidak ezin izan du tantorik egin”. Gainera, galtzaileek pilota biziagaz jokatzea erabaki zuten, eta erabaki hori mesedegarri izan zen irabazleentzako.

Atzoko bigarren partidua, Pradera-Gandiaga I eta Moral-Egaña bikoteen artekoa, ere orekatua izan zen hasieran. Tanto politak egin zituen Moralek, eta norgehiagoka itzela eduki zuten atzean Gandiaga I.ak eta Egañak. Hala, 13 tantotara berdindu zuten markagailua. Hortik aurrera, baina, Pradera jokoan sartu eta pilotak maisutasunez sarera bideratuz, partida euren alde jarri zuen 30-18 irabaziz.

Partida orekatuak Lekeitioko Beteranoen Txapelketako bigarren jardunaldian

Lea-Artibai eta Mutrikuko Hitza — 2019-01-21 12:55:02

Ligaxkaren hasieratik ikuskizuna eskaintzen ari dira Lekeitioko trinketean Beteranoen Eskupilota Txapelketako bikoteak. Hiru partida jokatu ziren atzo [urtarrilak 20] goizean, eta hasieratik dena emateko prest daudela erakusten ari dira pilotariak.

Astigarraga-Gandiaga II eta Beraza-Telleria bikoteen arteko norgehiagoka izan zen atzoko lehenengoa. Antolatzaileek adierazi dutenez, ikusmin handia eragin zuen partiduak zeren eta ligaxka hasi berri badute ere, bikote bi horiek dira aurtengo faboritoak.

Iazko txapeldun Mallabiko Telleriak motel zamar hasi zuen partida, eta Debako Astigarragak eta Berriatuko Gandiaga II.enak abantaila handia hartu zuten markagailuan. “Asti maisu sakeagaz eta Gandiaga II. atzean jaun eta jabe 18-11ra ailegatu ziren erresistentzia barik. Telleriak naiz eta atzean jokatu, sakeak ateratzen hasi da, eta jokaldi horri esker markagailuari buelta eman zion 18-18 berdinduz”, azaldu dute antolatzaileek.

Astigarragak eta Gandiaga IIk, aurrean tanto bikainak eginez eta atzeko teilatuaz baliatuz, 30-22 gainditu zituzten azkenean, Beraza eta Telleria. “Galtzaileek huts asko egin zituzten, baina hurrengoan partidua oso orekatua izan daitekela esan dezakegu”.

Pradera-Gandiaga eta Bastida-Conde bikoteak izan ziren kantxara ateratzen hurrengoak. 30-22 irabazi zuen lehenengo bikoteak, markagailuari buelta emanda. Izan ere, Bastida eta Conde hasi ziren markagailuan agintzen 8-1 eta bazirudien partidua Elgoibar eta Debako bikotearentzat izango zela. Hala ere, Praderak eta Gandiagak lanean jarraitu zuten eta apurka-apurka 14ra berdintzea lortu. Pilota bizia hartuta errez heldu ziren gero, 30. tantora.

Aurrez aurre jartzen azkenak Jaunarena-Foster eta Moral-Egaña izan ziren. 30-21 nagusitu ziren Jaunarena eta Foster. Jaunarena ondo aritu zen aurrean, aginduz eta pilota nahi zuen lekura mugituz, Fosterrek, berriz, zentzu handiz aritu zen atzean, eta bien lanagaz aurrera atera zuten partida, azken aurrekoetara sailkatzeko kontrario zuzen bat gaindituz. “Egaña hobetzen ari da baina oraindik iazko sasoi onetik urrun dago. Moralek partidu gehiago behar ditu bere ohiko joko guztia erakusteko”.

Datorren domekan [urtarrilak 27] jarraituko du txapelketak. Hauek izango dira partiduak:

09:30etan : Asti-Gandiaga II/Pradera-Gandiaga I
10:15etan : Beraza-Telleria/Moral-Egaña
11:00etan : Jaunarena-Foster/Bastida-Conde

Gandiaga anaien arteko partidua eta ligaxkako sailkapenean postua ziurtatzeko Bastida-Conde eta Jaunarena-Foster bikoteen arteko dema nabarmendu dituzte antolatzaileek.

Hirugarren puntuak ihes egin die Aretxabaletari eta Lasori

Lea-Artibai eta Mutrikuko Hitza — 2019-01-19 18:26:42

Atzo [urtarrilak 18], berriz ere, Binakako Txapelketako ligaxkako puntuak ihes egin zien Aretxabaleta eta Urrutikoetxearen ordez aritu zen Lasori. Partida garrantzitsua jokatu zuten atzo Mungian sailkapeneko azken bikote biek, eta Ezkurdia-Ladis Galarza bikoteak eskuratu zuen hirugarren puntua. 22-18 irabazi zieten Laso eta Andoni Aretxabaletari.

Urdinak jarri ziren aurretik partidaren lehen zatian 4-11, eta markagailuan aurrera joan ziren txukun jokatuta. Baina partidaren erditik aurrera gauzak aldatu egin ziren Laso eta Aretxabaletarentzat. Urdinak huts egiten hasi ziren eta gorriek aukerak aprobetxatu eta parean jarri ziren. Hamazazpira berdindu zuten bikoteek, baina gorriak zuzenean joan ziren 22-18ra.

Markina-Xemeinen. Hurrengo jardunaldian Markina-Xemeinen jokatuko dute Aretxabaletak eta Urrutikoetxeak. Artola eta Mariezkurrena II izango dituzte aurkari. Sarrerak 15 euro, 20 euro eta 25 eurotan egongo direla aurreratu dute antolatzaileek, eta dagoeneko eskuratu daitezke Asegarceko webgunean.

Posta elektronikoz eta Whatsappez ere erosi ahal dira sarrerak, markinaeskupilota@gmail.com helbidean eta 606 60 20 84 zenbakian. Era berean, hurrengo barikuan (urtarrilak 25) zein partiduaren egunean, 16:30etik aurrera leihatilan erosi ahalko dira.

17:45ean hasiko da pilota jaialdia, eta Eskuz Binakako Txapelketaren aurretik, Binakako Promozio Txapelketaren final laurdenetako partidua lehiatuko da: Agirre-Salaverri eta P.Etxeberria-Garmendia.

Indartsu hasi dute Lekeition Beteranoen Esku Pilota Txapelketa

Lea-Artibai eta Mutrikuko Hitza — 2019-01-14 18:28:48

Astigarraga eta Gandiaga II, Beraza eta Telleria eta Pradera eta Gandiaga I nagusitu dira Beteranoan Esku Pilota Txapelketako lehen jardunaldian. Domekan [urtarrilak 13] hasi zen jokoan 14. txapelketa Lekeitioko trinketean, eta indartsu hasi dute ligaxka bikoteek.

Pilotakadak ematen lehen bikoteak Astigarraga eta Gandiaga II eta Moral eta Egaña izan ziren. 30 eta 11 irabazi zuten lehenengoek. Peloteo luze eta orekatuekin hasi zuten partida, hala ere, laster hartu zuten abantaila irabazleek. Astigarraga, 65 urtegaz txapelketako nagusiena, maisutasunez aritu zen aurreko koadroetan. Hainbat dejada sartu zituen eta sakez ere min handia egin zuen. «Ondo lagunduta egon zen Gandiaga II txapelketako gazteenagaz. Bikote haundia osatzen dute, eta zer esana emango dute», adierazi dute txapelketaren antolatzaileek.
Bigarren partida 30-13 irabazi zuten Berazak eta Telleriak. Abantaila handia atera zieten hasieratik Bastida eta Conderi, eta horiek ezinezkoa izan zuten markagailuan gehiago hurreratu. Telleriak sarea oso ondo babestu zuen, eta Berazak agintea hartu zuen aurrean Bastidaren hutsuneak ondo aprobetxatuz. «Bastida oraindik bere forma onenetik urruti dago eta Condek ere agindu eta aurrelarien hutsuneak ondo babestea falta zaio».

Alde txikiagoa egon zen azken bikote bien artean. Hala ere, 30-19 irabazi zietan Praderak eta Gandiaga I-k Jaunarenari eta Fosterri. Jaunarena nagusi izan zen eta bere eskumako jokaldiek estualdi nahikotan jarri zutenPradera. 17ko berdinketaren ondoren sakeaz baliatuz eta jokoa atzean kargatuta abantaila atera zuten Praderak eta Gandiagak. «Gandiaga Iak, bere betiko maila ona erakutsi zuen ondo aginduz eta hainbat aldiz aurreko eskumako txokoa babestuz».

Domekan, bigarrena. Datorren domekan [urtarrilak 20] jokatu dute bigarren jardunaldia. Beti bezala hiru partida jokatuko dira 09:30ean hasita. Lehen asteburuko garaile bi aurkituko dira aurrez aurre hasteko: Beraza eta Telleria eta Astigarraga eta Gandiaga. «Hau izango eguneko partida eta finalean egoteko bikote faborito nagusiak alkar ikusiko dira».

10:15ean, berriz, Bastidak eta Condek eta Praderak eta Gandiaga Ik jokatuko dute. «Gazteak tantoak luzatzen eta Bastidaren nekea bilatzen ahaleginduko dira».

11:00etan jokatuko da azken partida Moral-Egaña eta Jaunarena-Foster bikoteen artean. Partida orekatuena izango dela aurreikusten dute antolatzaileek.