Lea-Artibai eta Mutrikuko Hitza

27. Zapato Azulak urdinez tindatu du Ondarroa

Lea-Artibai eta Mutrikuko Hitza — 2026-06-27 16:22:15

Azken egunetako bero sargoririk barik esnatu da gaur [ekainak 27] Euskal Herria, eta gustura hartu dute hori Ondarroara joan direnek. Kamiseta urdinak armairutik atera, eta Alde Zaharra goitik-behera eta ezker-eskubi bete dituzte bertaratu direnek. Herritarrak, inguruko herrietakoak nahiz Euskal Herriko hamaika txokotatik bertaratutakoak elkartu ditu gaur Radixu Irratiak antolatzen duen 27. Zapato Azulak Ondarroan. Hala, aurtengo kartelean keinu egin dioten Felix Beristainen koadro baten antzera, urdinez tindatu dira herriko txoko guztiak.

11:00etarako prest zeuden Radixu Irratiako kideak zuzeneko emisioagaz batera jaiari ekiteko, eta egunaren nondik norakoak azaldu ostean, Koldo Azpiazuk hartu du mikroa. Hain zuzen ere, iaz hartu zuen Azpiazuk Nekane Akarregiren erreleboa, eta aurtengoan ere berea izan da jaiari hasiera emateko ardura. Hala, urtero bezala, Alai Tabernako balkoiak bereganatu ditu begirada guztiak, eta bertan zeudenek adi jarraitu dituzte Azpiazuk esandakoak. Nola ez, Manuel Eluren bolanderek ere ez dute hutsik egin, eta 12:00etan egin du eztanda jaiak, bolandera eta bolandera artean.

Bolandera ugari bota ostean jaiak ez du etenik izan, eta urteroko osagaiekin osatu dute goiza. Txistulariak, Kresalako bandaren eta Artelango erraldoien kalejira nahiz falta direnak gogoan hartzeko tartea hartu dute herritarrek, eta Txalainak taldearen kontzertuak biribildu du goizeko jarduna. Abanikoak dantzan eta gorputzak ere bai, Hertzainak taldearen abesti ezagunenak abesteko tartea hartu dute Kalekutz inguruan batu direnek.

Zapato Azule berezia bada, Dinamartxaren ailegaera are bereziagoa da herritar askorentzat. Dina Bilbao Barruetabeñaren omenez Tolosa eta Ondarroa elkartzen dituzte martxalariek oinez nahiz bizikletan, eta irrintzi, txalo, oihu eta musika artean egiten diete harrera ondarrutarrek. Oinez egin duten 77 martxalarientzat bart 01:00etan hasi ziren Zapato Azuleko ekintzak, eta gaur 09:00etan, ostera, bizikletaz etorri diren 223 partaideentzat. Iazko parte hartze kopurua gaindituta (iaz 259 partaide eduki zituen), poztasunez nahiz emozioz betetako malko eta irribarreen artean sartu dira herrira 300 martxalariak.

Martxalariak, Alde Zaharrera heltzen.

Dinamartxako kide denak heldu ostean, aurtengo pregoia irakurri dute Radixuko kideek balkoitik. Besteren artean, Palestina, Saharan, Iran Libano eta Kubagaz gogoratu dira, eta zelan ez, baita Venezuelako herriagaz ere. Jarraian, denborarik galdu barik, aurtengo omendua izendatu dute. “Omendu guztiak dira bereziak, baina aurtengoa, Zapato Azule antolatzen dugun guztiontzat, bereziena da. Zorionak Nekane Akarregi Amutxastegi, zeu zara aurtengo omendua!”. Hala, Akarregi ezustean harrapatu du omenaldiak, baina irribarrez jaso du Radixukoen aipamena.

Ostean, 11:00etan zabaldu duten Euskal Herriko Kamiseta Azoka eta Artisau Azoka itxi, eta aurtengo kamisetarik eta erakusleihorik onenak izendatu dituzte. Kamiseta Azokan Ondarroako hiru postu eta Euskal Herriko beste hamahiru egon dira, eta Torontilek (Artea) irabazi du Euskal Herriko kamisetarik onenaren saria. Ondarroako kamisetarik onenaren saria, aldiz, Saturrarango Haitzak irabazi du, eta erakusleiho onenarena, Lorak Estherrek.

[ARGAZKI GALERIA]

Txo! Antzerki Kolektiboak omenduari egindako sketchagaz amaitu dute eguerdiko jarduna, baina jai luzea geratzen da oraindik Ondarroan. Arratsaldean mota eta gustu guztietako musika entzuteko aukera egongo da herriko txoko guztietan, eta jaiak ez du etenik izango goizeko ordu txikiak arte.

"Begirunez egindako esperientzia sentikor bat" dauka gordeta Arretxinagako ermitak

Lea-Artibai eta Mutrikuko Hitza — 2026-06-26 15:37:21

Ereinotz bat Arretxinagako ermitari. Prozesu luze baten ostean, Markina-Xemeingo balio handiko gunearen zaharberritze lanak amaitu dituzte, hala, San Migel ermita eraberrituta ikusteko hainbat herritar batu ziren atzo arratsaldean. Herritarrez gain, Zerutxu Dantza Taldeak eman zion ongietorria gune berrituari.

Begibistakoak dira ermitaren kanpoaldean egin dituzten lanak. Ermitaren kanpoko hormak kareorez berritu dituzte, kolore eta ehundura bereizgarriak emanez. Eraikina bakarrik ez, alboan dagoen probalekua ere berritu dute eta ikusleentzako armailak jarri dituzte. Lanak amaituta daudela adierazteko, Alde Zaharrean egin zuten era berean lotu zioten ereinotza ermitari.

Kanpoaldekoaldekoak ikusita, barrualdean jarri zuten begirada. Honetarako, ermitara sartu baino lehen, Jon Astorkiza eta Joseba Beristain artistek hartu zuten hitza, erakinaren barnealdean egindako arte proiektu berritzaileari buruzko nondik norakoak azaltzeko. Astorkiza izan da proiektuaren grafiko zuzendaria, eta Arretxinagan egon zen lehen aldian sentitu zuen “konexio handia” aitortu zuen bere berbaldian. Horregatik, toki honetarako “begirunez egindako esperientzia sentikor bat” sortu du. Azalpenekin jarraitzeko, Beristainek hartu zuen hitza. “Tokiko natura elementuen soinuekin eta sintetizadoreekin jolastuz”, sortu du esperientzia bisualari balio gehigarri bat emango dion soinu paisaia. Sei bozgoragailuk osatutako instalazio bat sortu du, eta hala, “txikia den espazio bat handitu egiten du”.

Instalazioaz gain, ikus-entzunezko pieza bat eskaintzen digu San Migel ermitak. Bertaratzen direnek QR bat aurkitu eta horren bitartez helduko dira piezara. Eneritz Artetxe aktore gernika-lumotarrak gidatuko du ikuslea lau hizkuntzatan (euskeraz, gazteleraz, frantsesez eta ingelesez) entzun daitekeen piezan. Ermitari eta hau inguratzen duen artearen historiari buruz ari da Artetxe ikus-entzunezko horretan, “bisitaria leku honen magiarkein, unibertsoarekin, naturarekin eta bizitzarekin lotzeko”.

Aurkezpena amaituta, ermitako ateak zabaldu zitzaizkien herritarrei, eta orduan izan zuten instalazioa ezagutu eta tokiarekin konektatzeko aukera. Bertaratzen direnek ermita zabalik dagoen artean izango dute esperientzia bizitzeko aukera.

Inoizko jairik jendetsuenak hartu ditu Oletak

Lea-Artibai eta Mutrikuko Hitza — 2026-06-16 16:35:50

«Inoiz baino jende gehien» batu dute joan den asteburuan Oletako jaiek. Zapatuan hasi eta astelehenera arteko egitarauak bizi-bizirik eta jendez gainezka mantendu du auzoa. Eguraldiak ere lagundu du aurten, eta bertaratu diren jai, musika eta herri kirol zaleek aurreikuspen guztiak gainditu dituzte.

Gaztetxoenen arratsaldea izan zen astelehenekoa. Bat, Bi, Hiru Festa! -k girotuta, puzgarriak eta umeen jolasak izan zituzten Amoroto eta inguruko herrietako haurrek. Gauean, Akerbeltz erromeriak jai giroko kanta ezagunenak abestu zituen, eta euren ostean DJ Arenek izan zuen gaua girotzeko ardura.

Zapatuan tortilla txapelketagaz eman zioten hasiera jaiari. Bost talde aritu ziren sukaldari lanetan, eta Amorotoko Ziortza Ikaran eta Arkaitz Madarieta izan ziren euren trebetasunak erakutsi eta tortilla onenaren saria jaso zutenak. Eguzkia ezkutatzen hasi eta gau giroan bete-betean sartu ziren herritarrak. Kittu txarangak «arin batu zuen jendea plazan», eta gaua girotzen aritu ziren Bengo abeslariaren kontzertua hasi arte. Jonkassek ere goi-goian mantendu zuen inoizko plazarik beteena, eta hala jarraitu zuten DJ Aitxek eskainitako musikagaz. Orduen jarioa ere ahaztu zuten askok, jai ona zenaren seinale: «Goizeko zortzi eta erdietan zarratu genuen txosna domeka goizean, eta bokatak eman genituen goizera arte. Asko gosaria janda joan ziren etxera».

Domekan meza eguna izan zuten Oletako zelaian, eta ostean, Naiara eta Izarra trikitilariek hauspotu zuten eguerdiko giro ona. Arratsaldean Urtza Herri Kirol Taldea izan zen jaiaren erdigune. Sei proba egin zituzten guztira: aizkora, trontza, ingude jasotzea, beruna jasotzea, harri jasotzea, eta ardi moztaileen proba. Horiek guztiak elkartuz eta parte hartzaileen artean txapelketa bat osatu zuten: talde baten Ipar Arrinda, Unai Goitia, Irati Astondoa, Txutxi Larrazabal, Olga Artiñano eta Sara Asenjo aritu ziren. Bestean, aldiz, Joseba Attard, Iraiz Idoeta, Julen Iturraspe, Ainize Perez, Mailu, Aritz Irazabal eta Goizeder Abendibar. Norgehiagoka aritu ostean, lehenengo taldeak eskuratu zuen txapela. Hala, txapeldunek bezain pozik amaitu zuten eguna antolatzaileek: «eguraldiak lagunduta eta publikoaren berotasunarekin giro atseginean egon ginen igande arratsaldean».

Urtza Herri Kirol Taldeko kideak Oletan.Urtza Herri Kirol Taldea

Plaza goraino bete ostean, balorazio «oso ona» egin dute herrian, eta oso eskertuta agertu dira antolakuntzan aritu diren herritarrekin eta jaietara bertaratu diren pertsona guztiekin: «Zapatuan, domekan eta astelehenean, jendea beharrerako prest egon da».

Oletako jaiak Amoroto eta inguruko herritarrak gozaraztera datoz

Lea-Artibai eta Mutrikuko Hitza — 2026-06-11 15:56:27

Udako denboraldiari hasiera ematera datoz Oletako jaiak; izan ere, Amoroto zein inguruko herritarrek egutegian biribildutako egunak dira datozenak. Hala, zapatutik [ekainak 13] astelehenera [ekainak 15] arte iraungo du jai giroak auzoan. “Duela urte batzuk Oletako Pazkoak ziren auzoko jaiak, hau da, gaur egun ospatzen ditugunak baino hiru aste lehenago ospatzen genituen. Hala ere, 2010 bueltan ikusi genuen jaiak beheranzko joeran zihoazela; beraz, ekainaren bigarren astera aldatu genituen. Izan ere, maiatzaren amaieran gazteak azterketekin eta selektibitateko probak prestatzen ibiltzen dira, eta ez dakigu horregatik izango zen edo ez, baina aldatu genuenetik gorantz egin dute, nabarmen gainera. Ordutik jendetza batzen da auzoan”, azaldu dute antolatzaileek.

Beraz, zapatuko Tortilla Txapelketagaz emango diote hasiera festa giroari. Antolatzaileek azpimarratu dutenez, 20:30erako aurkeztu beharko dira tortillak: “Ez dago izenik eman beharrik, nahi duenak aurkeztu dezake zapatuan bere tortilla. Hori bai, bertan egin beharko dute, eta bakoitzak bere materiala ekarri beharko du”. Normalean hamar talde inguru aurkezten direla azpimarratu dute: “Jendeak afaltzeko aprobetxatzen du, parranda egin aurretik tripa betetzeko”. Ondoren, 21:00etan Kittu txarangak girotuko ditu auzoko izkina guztiak, eta 23:30ean hasiko dira kontzertuak: Bengo, Jonkass eta Dj Aitxe. “Daukagun aurrekontuaren arabera aukeratzen ditugu kontzertuak, baina normalean ez gara oso estu ibiltzen. Horrez gain, herriko gazteei ere galdetzen diegu beren interesen berri. Izan ere, gazteak erakarriko dituen kontzertuak lotzen ditugu normalean”.

Domekan [ekainak 14] urteroko mezagaz emango diote hasiera egunari, Oletako zelaian, eta ondoren, Naiara eta Izarra trikitilariek alaituko dute auzoa. Egunari amaiera emateko Urtza herri kirol taldekoek ikuskizuna eskainiko dute.

Astelehenean ere [ekainak 15] jai giroa bermatuta egongo da Oletan. Arratsaldean txikienen txanda izango da, umeentzako puzgarriek eta jolasek hartuko baitute plaza, BAT, BI ETA HIRU FESTA! taldearen eskutik. Gauean Akerbeltz erromeria taldea igoko da oholtzara, eta ondoren, DJ Arenek emango dio amaiera egunari.

Antolatzaileak azken ordura arte lanean dabiltzan arren, “gogotsu” daude astebururako: “Jaien bezperan pila bat gauza izaten ditugu egiteko, betiko legez. Hala ere, jendearen erantzuna ikusten dugunean gogotsu hartzen ditugu jaiak, baita jaietako egunetan egin beharreko lana ere. Gainera, Oletan Jai Batzorde propioa daukagu, baina Amorotoko Jai Batzordeak asko laguntzen digu, eta biok batera ateratzen ditugu jaiak aurrera; batak bestea barik ez du funtzionatzen. Oletako Jai Batzordea aurretiko antolakuntzaz arduratzen bada ere, Amorotoko asko etortzen dira muntaketa lanetara eta barrako txandak egitera”.

Protokoloa. Iazko jaietarako eraso matxisten kontrako protokoloa indartu zuten antolatzaileek, eta aurten ere, horretan berretsi dira. Hala, puntu morea egongo da erasoak salatzeko eta prebentziorako, baina ardura kolektiboa dela azpimarratu dute: “Erasoen kudeaketa ezin da lau pertsonen arduran gelditu. Ardura kolektiboa da eta denok izan behar gara horren parte”. Jai Batzordeko kideek mezu argia bidali dute: “Datorrena etorri dadila ondo pasatzeko eta parrandarako gogoagaz, baina beti ere, lasai eta jarrera egokiagaz”.

Autobusak. Urtero legez, aurten ere, zapatuan Gababusa egongo da Lea-Artibaiko herrietatik. Horrez gain, Oletako Jai Batzordeak autobusak jarriko ditu zapatuan eta astelehenean. Zapatuan 22:00etatik 06:00etara bitartean autobusak egongo dira Oletatik Lekeitiora, gau guztian. Astelehenean, berriz, 22:30etik 01:00etara eta 02:30etik 05:00etara bitartean egongo da zerbitzua.

EGITARAUA

Ekainak 13, Zapatua

20:30: Tortilla txapelketa.
21:00: Kittu txaranga.
23:30: Bengo.
Ostean: Jonkass.
Gero: DJ Aitxe

Ekainak 14, Domeka

12:30: Meza Oletako zelaian.
Ondoren: Naiara eta Izarra trikitilariak.
18:30: Urtza herri kirol taldearen ikuskizuna.

Ekainak 15, Astelehena

17:30: Puzgarriak eta umeen jolasak Bat, Bi, Hiru Festa!-k girotua.
22:00: AKERBELTZ erromeria.
Ondoren: DJ Arene.

Turtziozek hartuko du barikuan Bizkaiko Eskola Txikien Topaketa

Lea-Artibai eta Mutrikuko Hitza — 2026-05-26 15:12:38

Bizkaiko Eskola Txikien Topaketa antolatu dute barikurako [maiatzak 29] hirugarren urtez. Herri txikietako eskolen bilkura Turtziozen izango da aurten, eta lau eta zortzi urte arteko 450 haur baino gehiago batuko dira bertan. Hala, “egun osoko jai eta elkarbizitza egitarau” handia antolatu du Turtziozko Eskolako Guraso Elkarteak. Bertan izango dira Lea-Artibaiko haurrak, Amoroto, Ispaster, Aulesti, Munitibar, Berriatua eta Etxebarriko eskoletatik joango direnak.

Turtziozko Eskolak adierazi duen bezala, barikuko topaketarako egun osoko egitarau “erakargarria” antolatu dute: Goizean goizetik, euskal abereen azoka egongo da ikusgai, eta haurrek “gertutik ezagutu ahal izango dituzte bertako animaliak”. Jolasteko eta ondo pasatzeko momentua ere izango dute, “elkar ezagutzeko eta lagun berrian egiteko” helburuarekin antolatutako jolasen bidez.

Bazkalordurako, “giro hurbil eta polita” sortzeko eta jolasen ostean indarberritzeko asmoarekin bazkaria antolatu du Turtziozeko Eskolak. Gainera, jaiari amaiera emateko ikuskizun “berezia” antolatu dute. Hori amaitutakon, haur bakoitza bere herrira bueltatuko da aurrez antolatutako autobusetan.

“Landa eremuko ikastetxeen arteko loturak sendotzeko” helburuarekin antolatu dute Eskola Txikien Topaketa; beste urte batez, haurrei elkarrekin egoteko eta “errealitate bereko kideekin ondo pasatzeko aukera emanez”. Honetaz gain, “landa-eremuko eskolak bizirik daudela eta hezkuntzaren parte garrantzitsua dela ” adieraztea dute helburu.

Lea Ibarreko Mankomunazgoak bigarren berdintasun plana diseinatzeko prozesua jarri du martxan

Lea-Artibai eta Mutrikuko Hitza — 2026-05-26 10:56:43

Lea Ibarrako Udal Mankomunazgoak bigarren berdintasun plana diseinatzeko parte hartze prozesua abiarazi du. Prozesuaren helburua, herrien beharrizanei erantzuten dien bideorria marraztea dela azaldu dute Mankomunazgotik. Hala, irailean egingo dute herritar guztiei zuzendutako lehenengo saioa, “guztien iritziak eta beharrak jaso ahal izateko”.

“Azken urteotan egindako bideari jarraituz, orain, Berdintasunerako Bigarren Plana diseinatzeko prozesua jarri dugu martxan, eskualdeko emakumeen eta gizonen benetako berdintasun eraginkorra bermatzeko asmoz”, azaldu dute mankomunazgotik. Gainera, bigarren prozesu honekin, Lea Ibarreko Mankomunazgoak eta bera osatzen duten bost udalerriek (Amoroto, Aulesti, Gizaburuaga, Mendexa eta Munitibar) azkenengo urteetan egindako lana aztertu nahi dute, zer lortu den ikusi, eta oraindik egiteko dauden erronkak identifikatzeko: “Hausnarketa kolektibo honen helburua herri bakoitzaren berezitasunak eta Mankomunazgoaren beharrak kontuan hartuko dituen tresna errealista eta praktikoa osatzea izango da”.

Herritarrei zuzendutako saioa irailean egingo duten arren, udal idazkari eta ordezkariekin lan saioak eta elkarrizketak egiten hasi dira maiatzean, administrazioaren barne funtzionamendua aztertzeko. Hala ere, Mankomunazgotik zehaztu dute prozesuaren bizkarrezurra bizilagunen ahotsa izango dela: “Zentzu horretan, Mankomunazgoak herritarren parte hartzearen garrantzia azpimarratu nahi du”. Horregatik iragarri dute irailean egingo dela lehen saioa. Bertan, Lea Ibarrako emakume, elkarte eta interesa duten pertsonen kezkak, beharrak eta proposamenak partekatzeko aukera egongo da; izan ere, plan berriaren helburua Lea Ibarreko errealitatea ondo jasotzea da.

Horrez gain, egitasmoaren beste helburuetako bat Lea Ibarreko Berdintasun Kontseilu Herritarra indartzea eta aktibatzea ere bada: “2025ean sortutako organo hau prozesuaren parte aktibo eta berdintasun politikak sustatzeko ezinbesteko aliatu bihurtzea da helburua. Plan berria une egokian dator kontseiluaren jarduna edukiz betetzeko eta bere hurrengo urteetako egitekoak egituratu eta gidatzeko”.

Gainera, Mankomunazgotik nabarmendu bezala, plan berria landa eremuko beharrei erantzutera dator. Izan ere, egitasmoak “arreta berezia” jarriko du herri txikietako egunerako bizitzan: “Zaintza lanak, emakumeen ahalduntzea edota indarkeriarik gabeko bizitzak sustatzea izango dira ardatz nagusienetako batzuk”.

Horretarako, Lea Ibarreko Mankomunazgoak Elhuyar aholkularitzaren laguntza teknikoa izango du, eta aurreikuspenen arabera, emaitzak prest egongo dira urte amaierarako.

Iban-Liher eta Remen-Baltza nagusi Amorotoko 34. Pala Txapelketan

Lea-Artibai eta Mutrikuko Hitza — 2026-05-25 11:23:38

Asteburu honetan amaitu da Amorotoko 34. Pala Txapelketa, parte-hartze handiarekin eta giro apartarekin. Guztira 28 bikotek hartu dute parte aurtengo edizioan: zortzi bikotek lehen mailan eta hogei bikotek bigarren mailan. Final handiak zapatuan [maiatzak 23] jokatu ziren, Udabirra Festaren barruan antolatutako egitarauaren baitan.

Lehen mailako finalean, Ibanek eta Liherrek txapela eskuratu zuten Jonpu eta Epermendiren aurka 30-26 irabazita. Bigarren mailan, berriz, Remen eta Baltza izan ziren garaile, Iriondo eta Ormazabal mendean hartuta, markagailu berdinarekin: 30-26. Afizionatuen partidan, aldiz, Okamika-Arrizabalaga irabazi zuten, Albizu-Garmendiaren kontra, 22-19 tantorekin.

Txapelketak herriko eta eskualdeko pilotarien parte-hartze zabala izan du aurten ere. Lehen mailan lau palista amorotar aritu dira, eta bigarren mailan Ondarroako bi pilotari izan dira finalean, Bedaruko eta Ispasterreko ordezkarien aurka lehian.

Antolatzaileek oso balorazio positiboa egin dute txapelketaren eta final egunaren inguruan. Goizetik hasi zen festa giroa, pintxo eta zerbitzuekin, eta arratsaldean frontoia izan zen protagonistetako bat. Lehenik bigarren mailako finala jokatu zen; ostean afizionatuen esku pilota partida hartu zuen kantxak, eta azkenik iritsi zen lehen mailako pala final handia.

Martxoan abiatu zen txapelketa, eta ordutik eguen eta barikuetan jokatu dituzte partidak Amorotoko frontoian. Antolatzaileen arabera, txapelketak “giro oso ona” sortu du herrian aste hauetan guztietan, eta finalerdietan zein finaletan ikusle ugari batu dira frontoira.

Kirol jardunaldiaren ostean, jai giroak jarraipena izan zuen herrian. Pintxoak, erromeria eta Kittu taldearen emanaldia izan ziren gauera arteko osagai nagusiak, eta herritar askok Udaberri Festaz gozatzen jarraitu zuten.

Txapelketaren amaierarekin batera, antolatzaileek eskerrak eman dizkiete frontoira hurbildutako ikusle guztiei eta finalistetako bikoteak animatu dituztenei. Horrela, beste urte batez, Amorotoko pala txapelketak agur esan dio edizio arrakastatsu bati, datorren urtera arte.

100 kilo txerriki ari dira prestatzen Udabirra Fest jaian

Lea-Artibai eta Mutrikuko Hitza — 2026-05-23 16:01:34

Herritarren artean errotu da jada urtez urte Amoroton ospatzen duten Udabirra Fest jaia. Herrian bertan egindako garagardoak dastatzeko aitzakiagaz, frontoian elkartu, txerri pintxoak jan eta lagunarteko giroan igarotzen dute eguna. Hala, aurtengoa ere ez da gutxiagorako izan: gaur [maiatzak 23] berton egindako garagardorik egon ez den arren, 13:00etan hasi dira lehenengo pintxoak saltzen, eta giroa pixkana berotuz joan da.

Antolatzaileek adierazi dutenez, 100 kilo txerriki ekarri dituzte pintxoak prestatzeko. Eguerdian giroa lasai egon da, eta bertaratu direnek txerri pintxoak lasaitasunez dastatzeko aukera eduki dute. Gainera, goizean ikusgai egon da Geuretik Sortuaken erakusketa ere. Arratsalderako, ostera, jende nahikotxo espero dute: “Arratsaldean pala txapelketako finalak jokatuko dira, eta urtero jende ugari biltzen gara frontoian”.

Hori horrela, 16:00etan ekingo diete frontoiko partidei. Amorotoko Pala Txapelketako finalak jokatuko dituzte lehenengo zein bigarren mailako pala jokalariek; guztira 28 bikotek parte hartu dute aurtengo txapelketan. Partidekin hasteko, Pala Txapelketako bigarren mailakoen txanda izango da: Remen eta Baltza ariko dira Iriondo eta Ormazabalen aurka. Ostean, afizionatuak kantxaratuko dira: Okamika eta Arrizabalagak kolore gorria defendatuko dute, eta Albizuk eta Garmendiak, ostera, urdina. Frontoiko jardunagaz amaitzeko, Pala Txapelketako lehenengo mailako finala jokatuko dute Jonpuk eta Epermendik Ibanen eta Liherren aurka.

Lehia beroa espero dute jokalari nahiz ikusleek, eta txapelketari amaiera ezin hobea ematea espero dute: “Txapelketa martxoan hasi zenetik, eguen eta barikuetan jokatu dituzte partidak frontoian. Asko igartzen da herrian txapelketak jartzen duen giro ona, ze, jende ugari elkartzen da frontoian. Finalerdietan, esaterako, frontoi erdi bete zuten ikusleek. Gaur ere, giro ederra espero dugu”. Eguna goi-goitik amaitzeko, gainera, Kittu taldea ariko da herria girotzen, 20:00etatik aurrera.

Amorotoko frontoia beteko du Udabirra Festek

Lea-Artibai eta Mutrikuko Hitza — 2026-05-20 16:22:20

Maiatzaren amaiera hurbiltzen ari den honetan, Amoroton dena dute prest Udabirra Fest ospatzeko. Zapatuan, 13:00etan emango diote hasiera zerbeza, pintxo eta pilota partiden jaiari. Hala, gauera arte luzatuko da Amorotoko Kultur Taldeak Amorotoko Udalagaz, Amorotoko Pilotazaleak taldeagaz eta herritarrekin elkarlanean antolatu duten egun handia.

Urteroko bideari jarraituz prestatu dute amorotarrek aurtengo egitaraua. Frontoian batu eta txarri-pintxo eta zerbeza eskaintza zabalarekin hasiko dute eguna 13:00etan. Antolatzaileek adierazi dutenez, aurten ez da herritarrek egindako zerbeza eskaintzarik egongo, baina ohikoa den bezala, zerbeza desberdinen eskaintza zabala egongo da frontoian jarritako txosnan, txarri-pintxoekin batera dastatu ahal izateko. Jan eta edanagaz batera, 13:00etatik 15:00etara Gurekin Sortuak ekimenaren erakusketa prestatu dute antolatzaileek: “Aurtengo uzta ikusteko aukera egongo da, panel handi batzuetan aurtengo lanen azalpenak batuko ditugu”.

Ordu horretarako frontoia goraino betetzen da urtero. Herritarrek, beraz, bertan geratzeko aitzakia izango dute, bertan jokatuko baitira Amorotoko Pelotazaleen taldeak antolatutako XXXIV. Pala Txapelketaren finalak. Martxoan hasi ziren bikoteak pala partidak jokatzen lehen mailako zortzi bikote eta bigarren mailako hogei. Hori horrela, zapatu honetan jokatuko dira Udabirra Festerako programatutako lehen eta bigarren mailako finalak handiak.

Bigarren mailako finalarekin emango diote hasiera pala jardunaldiari, eta 16:00etan hasiko da lehen lehia. Joan den astean jokatutako final erdietan Iriondok eta Ormazabalek Amoros eta Casais garaitu zituzten, finalean euren lekua lortuz. Hala, aurreko jardunaldian Yassin G eta Xabi A kanporatu zituzten Remen eta Baltzaren aurka arituko dira txapela eskuratzeko lehian. Lehen mailari dagokionez, Pala Txapelketaren finala ikusteko hitzordua dute bertaratzen direnek. Ilusio handiz hartuko dute herritarrek partida, izan ere, lau jokalariak amorotarrak dira. Jonpuk eta Epermendik Okamika eta Zugadi kanporatu zituzten final erdietan, final handirako sailkapena lortuz. Ibanek eta Liherrek indarrak batu zituzten Belarri eta Seoane garaitzeko, zapatuko partidara bidea zabalduz. Hala, lehen mailako lehia handiko finala eskainiko dute Jonpuk eta Epermendik Iban eta Liherren aurka.

Palari etenaldia emateko, bigarren eta lehen mailako finalen artean Lea-Artibaiko afizionatuen esku pilotako partida hartuko du Amorotoko frontoiak. Bertan, Okamikak eta Arrizabalagak osatutako bikotea Albizu eta Garmendiaren aurka arituko dira afizionatuen bikote onenaren txapela jantzi ahal izateko.

Iluntzera begira ere badute zeregina amorotarrek. 20:00etan Kittu taldea ariko da frontoia eta inguruak musikaz girotzen, eta ospakizunen artean, egunari amaiera borobila ematen.

Maiatzak 23, zapatua.

13:00etatik aurrera. Txerri pintxoak eta garagardo eskaintza zabala, baita Amorotoko artisau garagardoa ere.
16:00. Amorotoko XXXIV. Pala Txapelketako bigarren mailako finala.
Ondoren. Lea-Artibaiko Afizionatuen esku pilota partida.
Ostean. Amorotoko Pala Txapelketako lehenengo mailako finala.
20:oo. Kittu musika taldea.

Lea Ibarreko udalekuetan izena emateko epea zabaldu dute

Lea-Artibai eta Mutrikuko Hitza — 2026-05-19 12:53:31

Lea Ibarreko udalekuetan parte hartu nahi dutenek maiatzaren 22ra arte edukiko dute izena emateko aukera Kubike Aisialdi taldeak zabaldutako estekaren bitartez, edo baita ere, Lea Ibarra osatzen duten herrietako udaletxeetan.

Behin izena emanda, antolatzaileek umearen Osakidetzako Osasun Txartelaren zenbakia hurrengo telefonora bidaltzeko eskatu dute: 673 45 87 51.

Bazkari musikatuak batu ditu Lea Ibarreko herritarrak

Lea-Artibai eta Mutrikuko Hitza — 2026-03-23 15:01:59

Lea Ibarreko herritarrek hitzordu “berezia” izan zuten zapatuan [martxoak 21]. Lea Ibarreko Udal Mankomunazgoak antolatuta, musika eta abesti inguruan elkartu ziren. Bazkari herrikoia EinGo taldeak girotu zuen, herritarrak dantza egitera erakarriz eta aparteko giroa sortuz.

Martxoaren 21ean egingo dute Lea Ibarreko kantu bazkaria

Lea-Artibai eta Mutrikuko Hitza — 2026-03-13 11:40:51

Lea Ibarreko herritarrek hitzordu “berezia” izango dute martxoaren 21ean [zapatua], 14:30ean, Epermendi jatetxean, Lea Ibarreko Udal Mankomunazgoak antolatuta. Bazkariko tiketak salgai daude Munitibar, Aulesti, Gizaburuaga, Amoroto eta Mendexako udaletxeetan, martxoaren 16ra [astelehena] arte.

Abestien bueltan batuko dira Lea Ibarreko herritarrak, eta EinGO taldea ere egongo da giroa berotzeko. Menuari dagokionez, hurrengoa izango da: Bakailao entsalada, askotariko frijituak, otarrainxka egosiak, legatza plantxan gulekin, txerri-masailak, tarta eta izozkia, kafea eta txupitoa, eta urteko ardoa, sagardoa eta ura. Antolatzaileek jakinarazi dutenez, bazkariak 40 euro balioko ditu.

Dena prest Amorotoko XXXIV. Pala Txapelketa hasteko

Lea-Artibai eta Mutrikuko Hitza — 2026-03-11 14:20:06

Amorotoko Pelotazaleek anolatuta, martxoaren 19an hasiko da Amorotoko XXXIV. Pala Txapelketa. Federatuen eta federatu dabekoen partidak izango dira herriko frontoian, 30 tantora jokatuko dituztenak. Urtero legez, jokalariek lehen edo bigarren mailan arituko diren zehaztu beharko dute, eta eguenetan hasi eta domekara arte jokatuko dituzte partidak, maiatzaren 23an jokatuko den finalera arte.

Lea Ibarrako sare feminista ehuntzen

Lea-Artibai eta Mutrikuko Hitza — 2026-03-06 11:12:06

Lea Ibarra eskualdeak badu tresna berri bat feminismotik eragiteko: Lea Ibarrako Berdintasun Kontseilu Herritarra. Parte hartzean oinarritutako organo horrek mankomunitateko ordezkariak ez ezik Amorotoko, Aulestiko, Gizaburuagako, Mendexako eta Munitibarko mugimendu feministako zein herriko beste esparruetako eragileak batzen ditu, baita norbanakoak ere.

Nahiz eta herri bakoitzean mugimendu feminista edo feminismoa lantzen duten eragileak egon, orain arte ez zegoen eskualde mailako egitura bateraturik. Beraz, hutsune hori betetzeko sortu da Lea Ibarrako Berdintasun Kontseilu Herritarra.

Prozesuaren xehetasunak. Proiektuaren hazia 2024an erein zuten, eskualde mailako lanketa bateratua proposatu, eta herriak banaka aritu beharrean, indarrak batu zituzten: “Gaur egun kontseiluan gauden bi kideren ideiatik abiarazi zen proiektua, eta Lea Ibarrako Mankomunazgoak Bizkaiko Foru Aldundiko diru laguntza batera aurkeztu zuen proiektua. Aldi berean, Lea Ibarrak bazuen jada berdintasun plan garatu bat, eta bi ildo horiek uztartuz sortu zen kontseilua eratzeko aukera”.

Diru laguntza onartu ondoren, kontseiluak Elhuyarren laguntza izan zuen metodologia eta dinamizazio lanetarako; finean, kontseiluaren sorreran bultzada eman eta eragileei laguntzeko. Bost bilera egin zituzten, horietako bi irekiak, herritarrei eta elkarteei ekarpenak egiteko aukera emanez. Iazko irailerako arautegia adostuta zuten, eta urriaren 3an aurkeztu zuten ofizialki kontseilua Gizaburuagan egindako ekitaldian. “Kontseilua izaera mistokoa da: udal ordezkariak, teknikariak, elkarteetako kideak eta norbanakoak biltzen ditu. Gaur gaurkoz, emakumeak gara denok, baina genero aniztasuna ere bilatzen dugu”, adierazi dute kontseiluko kideek.

Saretzea eta eragitea. Datozen hilabeteetako erronka nagusietako bat eskualde mailako erasoei aurre egiteko protokolo bateratua osatzea izango da. Herri bakoitzak baditu jaietako protokoloak, baina asmoa da urte osoan “aktibo egongo den tresna komun bat” sortzea, arreta eta orientazioa “parametro berdinetan eskaintzeko”. Horretarako, erreferentziazko udal protokoloak aztertzen ari dira, eta egokitzapen bateratua landu nahi dute, herri txikien errealitatera egokituta.

Bestalde, kontseiluaren helburuen artean daude emakumeen parte-hartze soziopolitikoa sustatzea, eskualdeko elkarte eta norbanakoen arteko sareak sortzea, bost udalerrien arteko elkarlana indartzea eta kultura feminista hedatzea.

Lehenengo urratsa barne-saretzea izan da: komunikazio kanal propioak sortu dituzte eta herrietako ekitaldien berri ematen diote bertatik elkarri. Ekimen bateratuak antolatzea da hurrengo pausoa. Jaietarako lelo eta irudi komunarekin, zapiak ateratzea da mahai gainean duten proposamenetako bat.

Gainera, Martxoaren 8a ate joka dagoen honetan, kontseiluak bere nortasun bisuala sortzeko urratsa eman du. Izan ere, kontseiluak izena badauka ere, irudia falta zaioa azpimarratu dute bertako kideek. Horretarako, logo lehiaketa abiatu dute, herritarrek beren proposamenak bidal ditzaten. Lanak apirilaren 10era arte aurkeztu ahalko dira posta elektronikoz, eta baldintzen artean daude, besteak beste, inoiz argitaratu gabekoak izatea eta pertsonako gehienez bi lan aurkeztea. Onartutako formatuen artean daude argazkiak, marrazkiak eta ordenagailuz egindako konposaketak.

Ekimen horren bidez, kontseiluak herritarrak inplikatu nahi ditu bere identitate kolektiboa eraikitzera, eta aldi berean, berdintasunaren aldeko proiektua ikusgarri bihurtu nahi dute.

Herritarrentzako gonbita. Izenak berak adierazten duen bezala, kontseiluak izaera herritarra izatea du helburu. Udal ordezkarien eta teknikarien presentzia garrantzitsua bada ere, “funtsezkotzat” jotzen dute kultur elkarteetako kideek, jai batzordeetakoek, hezkuntza arloko eragileek eta interesa duen edozein herritarrek parte hartzea.

Urtean lau bilera egitea eta bertan helburuak zehaztu eta lehentasunak adostea aurreikusi dute. Parte hartu nahi duenak bere herriko talde feministako kideekin edota berdintasun zinegotziarekin harremanetan jartzea besterik ez dauka.

Beraz, Lea Ibarrako Berdintasun Kontseilu Herritarrak eskualdean “betaurreko moreak” jantzita jardungo duen sare bat ehuntzea du helburu: elkarri lagunduz, koordinatuz eta feminismoa eguneroko jardunean txertatuz.

Zoru pelbikoa lantzeko tailerra egingo da Amoroton

Lea-Artibai eta Mutrikuko Hitza — 2026-02-17 14:18:06

Zoru pelbikoa lantzeko tailerra antolatu dute Amoroton. Lau saio izango dira guztira, martxoaren 3an, 10ean, 17an eta 24an. Kultur etxean batuko dira saioetara bertaratu nahi eta aurretik izena eman dutenak. Saioen kostuari dagokionez, 50 euro ordaindu beharko dira. Taldeak ez dira oso handiak izango, izan ere, gehienez 18-20 pertsonako taldea izatea aurreikusten dute. Udalak jendea izena ematera animatzen du, zoru pelbikoa lantzeak dituen onurak oinarri izanik. Amoroton erroldatutakoen lehentasuna izango dutela adierazi dute izena ematerako orduan. Plaza lortu duten horiekin harremanetan jarriko da udaletxeko eragile bat, plaza gordeko zaiela jakinarazteko.

Izen-ematea hemen egin daiteke.

Informazio gehiagorako edo izena emateko arazorik izanez gero, udaletxera deitzeko aukera ere badago, 946 842 549 zenbakira.

Amorotoko Udalak Whatsapp kanala zabaldu du

Lea-Artibai eta Mutrikuko Hitza — 2026-01-29 11:37:10

Amorotoko Udalak abisuak nahiz informazioa zabaltzeko asmoz, Whatsapp kanala ipini du martxan. Jakitera eman dutenez, herriko “jarduerak, prestakuntzak nahiz bestelako komunikatu interesgarriak” partekatuko dituzte kanaletik.

Oraintsura arte udalak kudeatzen zuen Whatsapp talde baten bidez zabaltzen zuten informazioa, baina datu-babesarengatik kanala sortu dute: “Kanala jarraitzera gonbidatzen zaituztegu, eta beste herritar batzuekin partekatu ezazue, aldaketa hau guztiengana iristeko”.

[KANALERA BATZEKO]

65 lagun elkartu ditu 'Basques in Australia' erakusketaren hitzaldiak

Lea-Artibai eta Mutrikuko Hitza — 2026-01-12 15:46:13

Basques in Australia erakusketak Lea-Artibaiko herri ugari igaro ditu dagoeneko, eta Amoroton ari da egiten geldialdia orain. Abenduaren 20an zabaldu zituen ateak, eta barikura arte [urtarrilak 15] egongo da martxan. Itxi aurretik, baina, Esther Kortaren hitzaldia entzuteko aukera izan dute herritar nahiz inguruko bizilagunek, eta gustura hartu dituzte Kortaren hitzak: “Guztira 65 lagun inguru elkartu ginen hitzaldian, eta oso interesgarria izan zen”. Erakusketa Amoroton egongo den azken egunetan norbaitek ikusi nahiko balu, udaletxera deitzeko eskatu dute.

Esther Kortak eman zuen hitzaldia.Amorotoko Udala