Lea-Artibai eta Mutrikuko Hitza

27. Zapato Azulak urdinez tindatu du Ondarroa

Lea-Artibai eta Mutrikuko Hitza — 2026-06-27 16:22:15

Azken egunetako bero sargoririk barik esnatu da gaur [ekainak 27] Euskal Herria, eta gustura hartu dute hori Ondarroara joan direnek. Kamiseta urdinak armairutik atera, eta Alde Zaharra goitik-behera eta ezker-eskubi bete dituzte bertaratu direnek. Herritarrak, inguruko herrietakoak nahiz Euskal Herriko hamaika txokotatik bertaratutakoak elkartu ditu gaur Radixu Irratiak antolatzen duen 27. Zapato Azulak Ondarroan. Hala, aurtengo kartelean keinu egin dioten Felix Beristainen koadro baten antzera, urdinez tindatu dira herriko txoko guztiak.

11:00etarako prest zeuden Radixu Irratiako kideak zuzeneko emisioagaz batera jaiari ekiteko, eta egunaren nondik norakoak azaldu ostean, Koldo Azpiazuk hartu du mikroa. Hain zuzen ere, iaz hartu zuen Azpiazuk Nekane Akarregiren erreleboa, eta aurtengoan ere berea izan da jaiari hasiera emateko ardura. Hala, urtero bezala, Alai Tabernako balkoiak bereganatu ditu begirada guztiak, eta bertan zeudenek adi jarraitu dituzte Azpiazuk esandakoak. Nola ez, Manuel Eluren bolanderek ere ez dute hutsik egin, eta 12:00etan egin du eztanda jaiak, bolandera eta bolandera artean.

Bolandera ugari bota ostean jaiak ez du etenik izan, eta urteroko osagaiekin osatu dute goiza. Txistulariak, Kresalako bandaren eta Artelango erraldoien kalejira nahiz falta direnak gogoan hartzeko tartea hartu dute herritarrek, eta Txalainak taldearen kontzertuak biribildu du goizeko jarduna. Abanikoak dantzan eta gorputzak ere bai, Hertzainak taldearen abesti ezagunenak abesteko tartea hartu dute Kalekutz inguruan batu direnek.

Zapato Azule berezia bada, Dinamartxaren ailegaera are bereziagoa da herritar askorentzat. Dina Bilbao Barruetabeñaren omenez Tolosa eta Ondarroa elkartzen dituzte martxalariek oinez nahiz bizikletan, eta irrintzi, txalo, oihu eta musika artean egiten diete harrera ondarrutarrek. Oinez egin duten 77 martxalarientzat bart 01:00etan hasi ziren Zapato Azuleko ekintzak, eta gaur 09:00etan, ostera, bizikletaz etorri diren 223 partaideentzat. Iazko parte hartze kopurua gaindituta (iaz 259 partaide eduki zituen), poztasunez nahiz emozioz betetako malko eta irribarreen artean sartu dira herrira 300 martxalariak.

Martxalariak, Alde Zaharrera heltzen.

Dinamartxako kide denak heldu ostean, aurtengo pregoia irakurri dute Radixuko kideek balkoitik. Besteren artean, Palestina, Saharan, Iran Libano eta Kubagaz gogoratu dira, eta zelan ez, baita Venezuelako herriagaz ere. Jarraian, denborarik galdu barik, aurtengo omendua izendatu dute. “Omendu guztiak dira bereziak, baina aurtengoa, Zapato Azule antolatzen dugun guztiontzat, bereziena da. Zorionak Nekane Akarregi Amutxastegi, zeu zara aurtengo omendua!”. Hala, Akarregi ezustean harrapatu du omenaldiak, baina irribarrez jaso du Radixukoen aipamena.

Ostean, 11:00etan zabaldu duten Euskal Herriko Kamiseta Azoka eta Artisau Azoka itxi, eta aurtengo kamisetarik eta erakusleihorik onenak izendatu dituzte. Kamiseta Azokan Ondarroako hiru postu eta Euskal Herriko beste hamahiru egon dira, eta Torontilek (Artea) irabazi du Euskal Herriko kamisetarik onenaren saria. Ondarroako kamisetarik onenaren saria, aldiz, Saturrarango Haitzak irabazi du, eta erakusleiho onenarena, Lorak Estherrek.

[ARGAZKI GALERIA]

Txo! Antzerki Kolektiboak omenduari egindako sketchagaz amaitu dute eguerdiko jarduna, baina jai luzea geratzen da oraindik Ondarroan. Arratsaldean mota eta gustu guztietako musika entzuteko aukera egongo da herriko txoko guztietan, eta jaiak ez du etenik izango goizeko ordu txikiak arte.

"Begirunez egindako esperientzia sentikor bat" dauka gordeta Arretxinagako ermitak

Lea-Artibai eta Mutrikuko Hitza — 2026-06-26 15:37:21

Ereinotz bat Arretxinagako ermitari. Prozesu luze baten ostean, Markina-Xemeingo balio handiko gunearen zaharberritze lanak amaitu dituzte, hala, San Migel ermita eraberrituta ikusteko hainbat herritar batu ziren atzo arratsaldean. Herritarrez gain, Zerutxu Dantza Taldeak eman zion ongietorria gune berrituari.

Begibistakoak dira ermitaren kanpoaldean egin dituzten lanak. Ermitaren kanpoko hormak kareorez berritu dituzte, kolore eta ehundura bereizgarriak emanez. Eraikina bakarrik ez, alboan dagoen probalekua ere berritu dute eta ikusleentzako armailak jarri dituzte. Lanak amaituta daudela adierazteko, Alde Zaharrean egin zuten era berean lotu zioten ereinotza ermitari.

Kanpoaldekoaldekoak ikusita, barrualdean jarri zuten begirada. Honetarako, ermitara sartu baino lehen, Jon Astorkiza eta Joseba Beristain artistek hartu zuten hitza, erakinaren barnealdean egindako arte proiektu berritzaileari buruzko nondik norakoak azaltzeko. Astorkiza izan da proiektuaren grafiko zuzendaria, eta Arretxinagan egon zen lehen aldian sentitu zuen “konexio handia” aitortu zuen bere berbaldian. Horregatik, toki honetarako “begirunez egindako esperientzia sentikor bat” sortu du. Azalpenekin jarraitzeko, Beristainek hartu zuen hitza. “Tokiko natura elementuen soinuekin eta sintetizadoreekin jolastuz”, sortu du esperientzia bisualari balio gehigarri bat emango dion soinu paisaia. Sei bozgoragailuk osatutako instalazio bat sortu du, eta hala, “txikia den espazio bat handitu egiten du”.

Instalazioaz gain, ikus-entzunezko pieza bat eskaintzen digu San Migel ermitak. Bertaratzen direnek QR bat aurkitu eta horren bitartez helduko dira piezara. Eneritz Artetxe aktore gernika-lumotarrak gidatuko du ikuslea lau hizkuntzatan (euskeraz, gazteleraz, frantsesez eta ingelesez) entzun daitekeen piezan. Ermitari eta hau inguratzen duen artearen historiari buruz ari da Artetxe ikus-entzunezko horretan, “bisitaria leku honen magiarkein, unibertsoarekin, naturarekin eta bizitzarekin lotzeko”.

Aurkezpena amaituta, ermitako ateak zabaldu zitzaizkien herritarrei, eta orduan izan zuten instalazioa ezagutu eta tokiarekin konektatzeko aukera. Bertaratzen direnek ermita zabalik dagoen artean izango dute esperientzia bizitzeko aukera.

San Joan jaiak, termometroa lehertzeko zorian

Lea-Artibai eta Mutrikuko Hitza — 2026-06-24 17:45:26

San Joan jaiek Lea-Artibaiko herri zein auzoetako bazterrak berotu dituzte aurten ere. Aulestin, Ziortza-Bolibarren, Gorozikan eta Amallon jaiekin batera eman diote hasiera udari, gainera, jaiak goi-goitik ospatu dituzten bezala, tenperaturak ere maila berean ibili dira. Izan ere, beroak arreta bereganatu du aurten, azken egunotan erregistratutako tenperatura altuek udako giro bete-betea ekarri dute eskualdera, eta San Joan jaiak ohikoak baino beroagoak izan dira.

Aulestin egun garrantzitsua izan dute gaurkoan [ekainak 24]. 26. Sobra sariketa izan dute gaur, eta tenperatura altuengatik frontoira lekualdatu dute goizeko egitaraua. Hala, 12:15erako aurkeztu dituzte herritarrek sobrak, eta epaimahaiak irabazleak aukeratzeko tarte bat hartu bitartean, herritarren arteko herri kirol desafioa egin dute: “Giro oso ederra sortu du desafioak. Aulestiko lau talde elkarren kontra aritu dira, eta normalean baino jende gehiago etorri da sortu duen ikusminagatik. Horrez gain, Euskal Ardi Moztaileek ere hartu dute parte”. Hala, Unai Gorostola, Olatz Malatsetxebarria eta Iraiz Idoietak osatutako taldeak lortu du garaipena, 11.05eko denboragaz; bigarren postua lortu dute Nora Urizar, Itziar Salegi eta Iñaki Urberuagak [12.07]; Hirugarrena Ziara Kareaga, Onintza Galdos eta Xabi Malatsetxebariak eskuratu dute [12.40]; eta laugarrena Aitor Atxurra, Aimar Irigoien eta Irati Goitiak [12.25]. Hasierako ideia sobra sariketa egin bitartean herri kirol talde baten erakustaldia egitea bazen ere, herriko gazte talde batek euren arteko desafioa egiteko ideia izan zuen: “Herri giro polita sortu da”.

Ondoren, 26. Sobra sariketaren txanda izan da, eta antolatzaileek zehaztu dutenez 60 lagunek parte hartu dute aurten. “Parte hartze handia egon da aurten, eta gainera, jarritako helburuetako bat betetzen ari da: belaunaldi berriek parte hartzea. Oso pozik gaude”. Mertxe Gerenabarrena, Izar Uriarte eta Izaro Aranburu izan dira lehen saria irabazi dutenak, eta Noelia Arakistain, Nieves Unamuno eta Izei Arriagak lortu dute bigarren saria. Horrez gain, Eneko Willis izan da sari berezia jaso duena.

Leiho eta balkoietako III. Lore lehiaketari dagokionez, Leiho eta balkoirik onenaren lehen saria Aitor Ansotegik irabazi zuen; Iñaki Araunguenak bigarrena; eta Rosario Unamuno hirugarrena. Etxaurreetan Mertxe Gerenabarrena izan da lehena; Enkarna Anitua bigarrena; eta Ziortza Jaio hirugarrena. Arratsaldean pilota partidak egongo dira, eta pintxopotea egongo da herriko tabernetan.

Antolatzaileek jaien balorazio “oso ona” egin dute: “Dena ondo atera da eta giro ederra egon da herrian, barikutik hasi eta gaur arte”. Hala, bihar [ekainak 25] emango diote amaiera jaiei eta adin nagusiko herritarrak izango dira protagonista. 12:00etan mezagaz emango diote hasiera eguari, Murlan. Ondoren, Roberto eta Idoia trikitilariek alaituko dute herria, eta 14:30ean bazkaritan batuko dira Ilunzarren.

Ondarroako Gorozika auzoan ere gaur emango diote amaiera jaiei. Mezagaz hasi dute eguna, eta lore sorten bedeinkapenaren ostean, Xuhare eta Araia trikitilariek alaitu dituzte auzoko bazterrak. Domekan [ekainak 21] hasi zituzten San Joan jaiak Nerea Ibarzabal eta Angel Mari Peñagarikanoren bertso saioagaz. Arratsaldean, herri kirolek bete zuten auzoko plazan, aizkolari, harri jasotzaile eta ingude zein trontzako erakustaldia eginez. Umeek ere eduki zuten zertaz gozatu; izan ere, txokolatada egon zen guztientzat, eta baita umeei zuzendutako herri kirolak ere. Arratsaldea alaitzen ibili ziren Mirari eta Izarra trikitilariak.

Amallo. Auzolanean egindako “lan handiari” esker, aurten ere lau eguneko egitaraua atera dute aurrera auzotarrek. Hala, gaur [ekainak 24] San Joan egunagaz batera eman diote amaiera jaiei; goizean meza baino lehen tortilla txapelketa egin dute, eta 15 tortilla aurkeztu dira lehiaketara.

Irabazlea Olazar beheko baserriko Amets Arrizabalaga izan da, eta antolatzaileek tortilla patataren itxura, patataren egoera eta gustua saritu dituzte. Mezaren ostean, “giro ederrean” elkartu dira auzoko trikitilariak. 12:30ean, ostera, eguneko punturik gorena heldu da: Amalloko gazteek Ibekohondoren zaldi gaztearen kontra neurtu dituzte indarrak.

Bertan, auzoko zazpi gazte hiru urteko zaldi baten aurka lehiatu dira. Amalloko gazteek 28 metroko ibilbidea osatu behar izan dute–joan eta etorrian–, 440 kilogramoko harria arrastatuz, eta 20 minutuko denbora tarteagaz. Ondoren, Pipa zaldiaren txanda izan da: denbora tarte beragaz, gazteek egindako buelta kopurua 1,75 aldiz gehiago egin behar izan du, 650 kilogramoko harria arrastatuz. Gazteak hasi dira, eta 29 buelta eman dituzte. Halaber, Pipa zaldiak irabazteko gutxienez 51 buelta egin behar zituen, eta 52 buelta osatuta, lehia irabazi du.

Horrela, giro “ona eta ederra” nagusitu da jaien azken egunean, eta antolakuntzatik adierazi dute “oso pozik” daudela hainbeste auzokide bertaratzeagatik. Eskerrak eman diete gazteei izan duten parte hartzagatik, batez ere, sekulako bero egin duen arren lehiaketan parte hartu dutelako.

Ziortza-Bolibarren. Surik ez piztea erabaki zuten herrietako bat izan zen atzo. Surik barik bazen ere, egitarauak bere horretan jarritu zuen herrian. Sorginen eta pertsonaia mitologikoen etorrera eta antzezpenak beste urte batez mantendu du egun horretan herria batzeko ohitura. Jan eta edana ere izan zuten bertaratu zirenek; Idoia eta Roberto Etxebarria trikitilariek girotuta, urdaia, txistorra, gazta eta irasagarra izan zituzten. Gauari amaiera emateko, suaren inguruan izan ez bazen ere, sorgin dantza ikusteko aukera izan zuten ziortza-bolibartarrek.

Tenperatura altuei aurre egiteko babesleku izan dute eliza gaur. Ohiturak agintzen duen modura, San Joan eguneko mezarako hitzordua izan dute herritarrek, eta bertan bedeinkatu dituzte aurten egindako sobrak. Meza amaitu denerako, herriko umeek prest izan dute sobren erakusketa eutsi duen egurrezko mahaia. Herriko andrak, sobrak eskuan, erakusketa osatzen joan dira elizatik irten ahala, eta haur eta helduen begiradapean, erakusketa lore eta kolorez bete da.

Lokaletan, plazan eta frontoian bizi dituze San Joan jaiak

Lea-Artibai eta Mutrikuko Hitza — 2026-06-20 17:51:55

San Joan jaietan murgilduta daude gaur [ekainak 20] Aulestin eta Ziortza-Bolibarren. San Joan bezperako suak biztu baino lehen, hainbat dira herritarrek astebururako antolatu dituzten ekintzak, eta horien artean, bazkari herrikoiak izan dira gaurkoan, herritarrak batzeko aitzakia.

Herriko plaza bezain bizirik egon dira Aulestin lokalen barrualdeak. Suaren inguruan eta errezetaren sekreturik argitaratu barik, paella prestaketan aritu dira kuadrillako adituenak. Lasaitasun osoz aritu dira batzuk, presaka beste batzuk, izan ere, 14:30erako aurkeztu behar izan dute euren paella, epaimahaiak dastatu ahal izateko. 23 paella aurkeztu dituzte orotara, eta bazkaldu baino lehen banatu dituzte sariak. Pozez hartu du Elena Guenetxeak laugarren saria, Alerta Gorria izeneko paella izan da hirugarrena eta Haize Boladi, bigarrena. Lehen sariduna ezagutzeko jakinmin handia izan du plazak, hala, segituan iragarri dute Bielsa paella izan dela aurtengo sanjoanetako onena. Bazkaria amaituta, zozketa eta jolasak izango dituzte plazan. Gau giroan sartuta, Jaire taldeak girotuko du festa. Aulestiarrek beste lau egun dituzte aurretik ospatzeko, eta San Joan sua, sobra sariketa, herri kirolak edo esku pilota partiduak antolatu dituzte horietarako.

Bigarren saridunak.

‘Bielsa’, irabazle.

Elena Guenetxea laugarren sariagaz.

Hirugarren saridunak.

Hi! Bizirik. Aulesti hikaz aritzeko plaza bihurtu da gaurkoan. Hika indartzeko bidea zabaldu nahi du Aulestiko Euskara Taldeak, eta hala aritzeko erronka hori proposatu die herritarrei; herri txikiek bizirik dirauten bezala, hikak ere bizirik iraun dezan.

Ziortza-Bolibarren ere, San Joanak elakarregaz batzeko festak izan ohi dira. Giro herrikoi, alai eta koloretsu baten, frontoia bete dute bazkalorduan, eta Aulestin egin duten bezala, herriko taldeek prestatutako paella jateko batu dira mahai inguruetan ziortza-bolibartarrak. Txupinazo eguna izan da gaurkoa, eta goizean bezala, festa giroa izango dute arratsaldean Txerokiak taldearen eskutik. Umeen eguna dute bihar [ekainak 21], Zeargoi Dantza Taldearen emanaldiagaz; Sorgin Gaba martitzenean [ekainak 21], sorgin eta pertsonaia mitologikoen antzezpenagaz eta San Juan suagaz; eta San Juan eguna eguaztenean [ekainak 24], sobre erakusketagaz.

Herritarren arteko herri kirol desafioa dakarte Aulestiko San Joan jaiek

Lea-Artibai eta Mutrikuko Hitza — 2026-06-19 13:01:07

Udaren etorreragaz batera datoz San Joan jaiak Aulestira; “herritarrak batu eta ondo pasatzeko egunak”, antolakuntzaren hitzetan. Umeak izango dira, beste urte batez, jaiez gozatzen lehenak. Gaur, ikasturteko azken egunean, Eskolako Jaia ospatuko dute. 09:00etan hasiko da festa, eta puzgarriak egongo dira umeentzat. Gainera, seigarren mailako ikasleei agurra egingo diete. Horrez gain, Aulestiko Hirugarren Adineko eta Pentsiodunen San Blas Elkarteak antolatuta, sobra tailerra egingo dute. Eskolako jaialdiaren baitan, gainera, 38. Ipuin Topaketako sari banaketa egongo da, Urzabal Guraso elkarteak antolatuta. HH2tik LH6ra arteko 52 umek parte hartuko dute. Ondoren, txokolate jana egingo dute eta, 20:00etan, saiheski janean batuko dira ume, gazte zein heldu. 22:00etan, txupinak emango die hasiera jaiei.

Aldi berean, Gazte Asanbladak ere hasiera emango die jaiei, Gazte Egunagaz. 15:00etan herriko plazan batuko dira gazteak bazkaltzeko. Ostean, Pasapalabra jokoak egingo dituzte eta, arratsaldean, poteoa. 23:30ean hasita, kontzertuez gozatu ahalko da: Zauria eta DJ Guzurterak.

Paella txapelketa izango da biharko protagonistetako bat. Hamazazpi kuadrillek eman dute izena; 291 lagunek. 14:30erako aurkeztu beharko dira paellak, eta kanpaiak jo ondoren aurkezten duen taldeak zigorra jasoko du. Lau sari banatuko dira: 110 euro paellarik onenarentzat, 90 euro bigarrenarentzat, 60 euro hirugarrenarentzat eta 25 euro laugarrenarentzat. Sariak banatuta, herri bazkariak batuko dira. Otzara feministaren zozketa eta jolasak egingo dituzte ondoren, plazan. Gaua helduta, 21:30etik aurrera, Jaire erromeriak girotuko du plaza.

Etzi, dantzek eta danborradak hartuko du Aulesti. 13:00etan, herriko dantzarien erakustaldia egongo da plazan, eta 18:00etan bi urtetik behin egiten den danborradaren txanda izango da. Herriko umeen eskutik eta Aittita Makurra fanfarreagaz egingo da.

San Joan bezperan eta San Joan egunean ere festa giroa izango da nagusi udalerrian. Goizean II. Mahai Jolas Txapelketa egingo da plazan. Ez da izenik eman behar, eta interesdunak bertaratzera animatu dituzte antolatzaileek. Gauean, kalejiragaz batera, plazatik parkera lekualdatuko dira, eta ondoren, suaren bueltan dantzatuko dute, txar guztiak uxatzeko. Arratsaldea eta gaua Taixuz musika taldeak girotuko ditu.

Eguaztenean, San Joan egunari urteroko mezagaz hasiera eman ondoren, 26. Sobra Sariketan parte hartu nahi duenak 12:15era arte izango du sobra aurkezteko aukera. “Eskolako jaian egingo diren sobrak, seguruenik, sariketan ikusteko aukera izango dugu. Helburua da herrian daukagun ohitura ez galtzea. Horregatik, umeak, helduak eta nagusiak animatu nahi ditugu parte hartzera”. Ostean, leiho, balkoi eta etxaurreen hirugarren lore lehiaketako sariak banatuko dituzte: “Aurten gutxi gorabehera zazpi lagunek eman dute izena, eta pasaden astean epaileak herriko leihoak, balkoiak eta etxaurreak ikustera joan ziren”.

Herri kirolek ere lekua. Aurten, herri kirolei lekua egin diote programazioan, eta lehenego aldiz Desafioa antolatuko dute. Guztira hamabi herritarrek hartuko dute parte, hiru laguneko lau taldetan banatuta. Lehiaketa zirkuitu moduan egingo da: bi talde elkarren aurka arituko dira lehenengo, eta beste bi taldeak ondoren; denborarik onenak lortzen dituztenek finala jokatuko dute. Probetan hainbat herri kirol izango dira protagonista, besteak beste trontza, txinga eramatea, txokor biltzea eta ingudea. Parte-hartzaileen artean adin guztietako herritarrak daude, gazteenak 16 urte ingurukoak izanik eta helduenak 50 urte ingurura iritsiz.

Ekimenaren helburua “herri kirolak herritarrengana hurbiltzea eta jai giroari indar berezia ematea” da. Antolatzaileetako batzuk herri kiroletan federatuta dauden arren, parte-hartzaile gehienak ez dira espezialistak; batzuk beste kirol batzuetatik datoz, hala nola crossfitetik edo bestelako kiroletatik. Ideia entrenatzaileen eta herri kirol taldearen eskutik sortu zen, herriko jendeak berak protagonismoa hartuko zuen erronka antolatzeko asmoz.

Azken hilabetean aritu dira prestatzen, batez ere teknika eskatzen duten probak lantzen, eta taldean ilusio handia dago desafioari aurre egiteko eta Aulestiko jaietan tradizio berri bat hasiera emateko.

Horren ondoren, sobra sariketa egingo dute. Guztira, zazpi sari banatuko dira, eta parte hartzaile guztiek lorea jasoko dute. Lehenengo eta bigarren sarietako bakoitzak hiru saridun izango dituzte, eta hauez gain, sari berezi bat ere egongo da.

“Lehenengo eta bigarren sarietan betiko belar, ortuari, fruta, labore eta lorak edukitzea baloratuko da. Dotoreziak eta lotzeko erak ere garrantzia izango dute. Izan ere, plastikozko soka edota zilarrezko papara duten sobrak sariketatik kanpo geldituko dira. Sari berezian sobraren edertasuna, usaina, aniztasuna, kolorea eta konposizioa baloratuko dira, besteak beste”. 17:00etan esku pilota partiduak antolatu dituzte frontoian, eta ondoren, pintxo poteoa egongo da arratsaldea girotzeko.

Ekainaren 25ean amaituko dira jaiak, baina ekintzak ez dira faltako. Meza egingo dute Murlan, eta Roberto eta Idoia trikitilariak ibiliko dira kalez-kale. Ostean, Hirugarren adinekoen eta pentsiodunen bazkaria egongo da Ilunzar tabernan.

Ekainak 19, barikua

09:00-12:30: Eskolako jaia. Puzgarriak, tailerrak, sobra ikastaroa eskolan, 6. mailako ikasleei agurra.
15:00: Irakasle, ikasle eta gurasoenrzako “kopaue” eta DJ Arene.
15:00: Gazte bazkaria, Arkupean.
Ostean: bingo musikatua.
18:00: 38. Ipuin topaketako sari banaketa.
Gero: Txokolatada.
20:00: Saiheski jana plazan.
22:00: Txupinazoa jaiei hasiera emateko.
23:300: Kontzertuak Gaztetxean: Zauria eta DJ Guzurterak.

Ekainak 20, zapatua

11:00: Plazako mahaiak antolatzea. Kuadrilla bakoitzeko bi ordezkari agertu beharko dira.
14:30: 24. Paella txapelketa.
Ostean: Herri bazkaria.
Bazkalostean: Zozketa eta jolasak, plazan.
21:30: Jaire taldea, plazan.

Ekainak 21, domeka

13:00: Herriko dantzarien erakustaldia, plazan.
18:00: danborrada, Aittita Makurra fanfarriarekin.

Ekainak 23, martitzena

17:00: II. mahai jolas txapelketa, plazan. 12 urtetik gorakoentzat.
21:00: Taixuz Erromeria, plazan.
22:30: Kalejira plazatik parkera, musika eta buruhandiekin alaituta.
Ondoren: San Joan sua eta dantzak.

Ekainak 24, eguaztena

11:00: Meza.
12:15: 26. Sobra sariketako sobrak entregatzeko ordua.
12:30: Herri kirol desafioa, Urtza herri kieol taldearen eta ardi mjoztaileen erakustaldia.
13:30: Sobra sariketa.
Ostean: Leiho, balkoi eta etxe aurreetako III. lore lehiaketako sari banaketa.
17:00: Esku pilota partiduak, frontoian.
19:00: Pintxo potea.

Ekainak 25, eguena

12:00: Meza Murlan eta kopaua.
Ondoren: Roberto eta Idoia trikitilariak.
14:30: Hirugarren adineko eta pentsiodunen bazkaria, Ilunzar tabernan.

Euskaraz ahalduntzeko ikastaroa egongo da Aulestin

Lea-Artibai eta Mutrikuko Hitza — 2026-05-28 17:55:27

Zer egin dezakegun euskararen alde? izenburupean euskaraz ahalduntzeko ikastaroa egongo da Aulestin, Euskal Herrian Euskaraz taldeak, UEMAk eta Aulestiko Udalak antolatuta. Bi hitzordu eskainiko dituzte, biak 18:00etatik 20:00etara, Aulestiko parkean: ekainaren 4an [eguena] eta ekainaren 11n [eguena]. Parte hartzeko izena eman beharko da antolatzaileek zabaldutako galdetegiaren bitartez, maiatzaren 31 [domeka] baino lehen.

Bertsolaritzaren harrobiaren plaza bihurtuko da Aulesti

Lea-Artibai eta Mutrikuko Hitza — 2026-05-27 13:47:36

Bizkaiko eskolarteko txapelketa apirilaren 27an hasi zuten Bilbon, eta Aulestiko frontoian jokatuko dituzte finalak, barikuan eta zapatuan [maiatzak 29 eta 30].

Barikuan, 18:00etatik aurrera lehiatuko dute Lehen Hezkuntzako 5. eta 6. mailakoen idatzizko finala, eta ostean, gazteentzako bertso saioa edukiko dute. Zapatuan, berriz, 18 urtera artekoen idatzizkoen finala jokatuko dute 10:00etan hasita, eta 11:30etik aurrera izango da bat-bateko finala. Azken horretan egongo da Jon Abasolo Sarralde munitibartarra; berarekin batera ariko dira Eider Fernandez Aranburu eta Helene Yerga Bollegui bermeotarrak, Izaro Pagalday Aburto, Maddi Aurtenetxe Bustinza eta Naroa Iturrioz Lauzirika zornotzarrak, Amaiur Betanzos Caminos bilbotarra eta Iradi Barrenetxea Akesolo artearra.

Lau kanporaketa jokatu dituzte; saio bakoitzeko irabazlea zuzenean sailkatu da, eta gainontzeko laurak puntuazioz. Iturriozek irabazi zuen maiatzaren 6an Igorren jokatutako laugarren eta azkenengo kanporaketa; Fernandez nagusitu zen hirugarrenean, Barrenetxea bigarrenean eta Betanzos lehenengoan.

Xabier Abasolo, Jon Abasolo eta Aner Goikoetxea munitibartarrek Muxikako kanporaketa lehiatu zuten.Bizkaiko Bertsozale Elkartea

Euskal Herrikoa. Martxotik ekainera bitartean, herrialde guztietan jokatuko dituzte eskolartekoak, eta herrialde bakoitzetik sailkatutako gazteek Euskal Herriko finala jokatuko dute ekainaren 13an, Arantzan (Nafarroa).

Bertsozale Elkarteak eta Ikastolen Elkarteak elkarlanean antolatzen dituzte eskolarteko txapelketak, “gaztetxoei jendaurrean bat-batean jarduteko aukera” emateko helburuarekin: “Gainera, harremanak egiteko, hurbilekoak bertsozaletzeko eta antolakuntza lanetan ardurak hartzen hasteko ere balio dute”.

Turtziozek hartuko du barikuan Bizkaiko Eskola Txikien Topaketa

Lea-Artibai eta Mutrikuko Hitza — 2026-05-26 15:12:38

Bizkaiko Eskola Txikien Topaketa antolatu dute barikurako [maiatzak 29] hirugarren urtez. Herri txikietako eskolen bilkura Turtziozen izango da aurten, eta lau eta zortzi urte arteko 450 haur baino gehiago batuko dira bertan. Hala, “egun osoko jai eta elkarbizitza egitarau” handia antolatu du Turtziozko Eskolako Guraso Elkarteak. Bertan izango dira Lea-Artibaiko haurrak, Amoroto, Ispaster, Aulesti, Munitibar, Berriatua eta Etxebarriko eskoletatik joango direnak.

Turtziozko Eskolak adierazi duen bezala, barikuko topaketarako egun osoko egitarau “erakargarria” antolatu dute: Goizean goizetik, euskal abereen azoka egongo da ikusgai, eta haurrek “gertutik ezagutu ahal izango dituzte bertako animaliak”. Jolasteko eta ondo pasatzeko momentua ere izango dute, “elkar ezagutzeko eta lagun berrian egiteko” helburuarekin antolatutako jolasen bidez.

Bazkalordurako, “giro hurbil eta polita” sortzeko eta jolasen ostean indarberritzeko asmoarekin bazkaria antolatu du Turtziozeko Eskolak. Gainera, jaiari amaiera emateko ikuskizun “berezia” antolatu dute. Hori amaitutakon, haur bakoitza bere herrira bueltatuko da aurrez antolatutako autobusetan.

“Landa eremuko ikastetxeen arteko loturak sendotzeko” helburuarekin antolatu dute Eskola Txikien Topaketa; beste urte batez, haurrei elkarrekin egoteko eta “errealitate bereko kideekin ondo pasatzeko aukera emanez”. Honetaz gain, “landa-eremuko eskolak bizirik daudela eta hezkuntzaren parte garrantzitsua dela ” adieraztea dute helburu.

Lea Ibarreko Mankomunazgoak bigarren berdintasun plana diseinatzeko prozesua jarri du martxan

Lea-Artibai eta Mutrikuko Hitza — 2026-05-26 10:56:43

Lea Ibarrako Udal Mankomunazgoak bigarren berdintasun plana diseinatzeko parte hartze prozesua abiarazi du. Prozesuaren helburua, herrien beharrizanei erantzuten dien bideorria marraztea dela azaldu dute Mankomunazgotik. Hala, irailean egingo dute herritar guztiei zuzendutako lehenengo saioa, “guztien iritziak eta beharrak jaso ahal izateko”.

“Azken urteotan egindako bideari jarraituz, orain, Berdintasunerako Bigarren Plana diseinatzeko prozesua jarri dugu martxan, eskualdeko emakumeen eta gizonen benetako berdintasun eraginkorra bermatzeko asmoz”, azaldu dute mankomunazgotik. Gainera, bigarren prozesu honekin, Lea Ibarreko Mankomunazgoak eta bera osatzen duten bost udalerriek (Amoroto, Aulesti, Gizaburuaga, Mendexa eta Munitibar) azkenengo urteetan egindako lana aztertu nahi dute, zer lortu den ikusi, eta oraindik egiteko dauden erronkak identifikatzeko: “Hausnarketa kolektibo honen helburua herri bakoitzaren berezitasunak eta Mankomunazgoaren beharrak kontuan hartuko dituen tresna errealista eta praktikoa osatzea izango da”.

Herritarrei zuzendutako saioa irailean egingo duten arren, udal idazkari eta ordezkariekin lan saioak eta elkarrizketak egiten hasi dira maiatzean, administrazioaren barne funtzionamendua aztertzeko. Hala ere, Mankomunazgotik zehaztu dute prozesuaren bizkarrezurra bizilagunen ahotsa izango dela: “Zentzu horretan, Mankomunazgoak herritarren parte hartzearen garrantzia azpimarratu nahi du”. Horregatik iragarri dute irailean egingo dela lehen saioa. Bertan, Lea Ibarrako emakume, elkarte eta interesa duten pertsonen kezkak, beharrak eta proposamenak partekatzeko aukera egongo da; izan ere, plan berriaren helburua Lea Ibarreko errealitatea ondo jasotzea da.

Horrez gain, egitasmoaren beste helburuetako bat Lea Ibarreko Berdintasun Kontseilu Herritarra indartzea eta aktibatzea ere bada: “2025ean sortutako organo hau prozesuaren parte aktibo eta berdintasun politikak sustatzeko ezinbesteko aliatu bihurtzea da helburua. Plan berria une egokian dator kontseiluaren jarduna edukiz betetzeko eta bere hurrengo urteetako egitekoak egituratu eta gidatzeko”.

Gainera, Mankomunazgotik nabarmendu bezala, plan berria landa eremuko beharrei erantzutera dator. Izan ere, egitasmoak “arreta berezia” jarriko du herri txikietako egunerako bizitzan: “Zaintza lanak, emakumeen ahalduntzea edota indarkeriarik gabeko bizitzak sustatzea izango dira ardatz nagusienetako batzuk”.

Horretarako, Lea Ibarreko Mankomunazgoak Elhuyar aholkularitzaren laguntza teknikoa izango du, eta aurreikuspenen arabera, emaitzak prest egongo dira urte amaierarako.

‘Mi pequeño gran samurai’ dokumentala Aulestira helduko da

Lea-Artibai eta Mutrikuko Hitza — 2026-05-20 13:57:19

Ekai Lersundi ondarrutarrari buruzko Mi pequeño gran samurai dokumentala Aulestin egongo da ikusgai barikuan [maiatzak 22], 18:30ean, Udal Areto Nagusian. Dokumentala ikusi ondoren, solasaldia egongo da Elaxar Lersundi eta Ana Martinez Ekai Lersundiren gurasoekin.

Arantza Ibarra ondarrutarrak egindako Mi pequeño gran samurai dokumentalak Ekai Lersundi gazte transak bere buruaz beste egin aurreko bi urteetako bizipenak batzen ditu. 2020an Zinegoak Jaialdian estreinatu zen lana, eta Ekai Lersundiren istorioa 21 minututan laburtu du Ibarrak zuzendutako film laburrak. Estreinatu zenetik Euskal Herriko zein kanpoko herri eta auzoak zeharkatu ditu dokumentalak, eta gainera, 2024an, gainera, Primeran plataforman jarri zuten ikusgai.

Ibarrak zuzendutako filma Izar Filmsek ekoitzi zuen, eta Izaskun Arandia da ekoizlea. Bertan agertzen diren elkarrizketen artean Elaxar Lersundi eta Ana Martinez gaztearen gurasoak daude, baita, Naizen Elkarteko ordezkariak ere.

Lea Ibarreko udalekuetan izena emateko epea zabaldu dute

Lea-Artibai eta Mutrikuko Hitza — 2026-05-19 12:53:31

Lea Ibarreko udalekuetan parte hartu nahi dutenek maiatzaren 22ra arte edukiko dute izena emateko aukera Kubike Aisialdi taldeak zabaldutako estekaren bitartez, edo baita ere, Lea Ibarra osatzen duten herrietako udaletxeetan.

Behin izena emanda, antolatzaileek umearen Osakidetzako Osasun Txartelaren zenbakia hurrengo telefonora bidaltzeko eskatu dute: 673 45 87 51.

Aulesti eta Markina-Xemein arteko Bizkaibus zerbitzua egokitzeko sinadura bilketa abiarazi du Herri Txikiak Bizirik! plataformak

Lea-Artibai eta Mutrikuko Hitza — 2026-05-12 14:04:55

Aulestiko Herri Txikiak Bizirik! plataformak alegazioa aurkeztu du Bizkaiko Foru Aldundiaren aurrean, Aulesti eta Markina-Xemein arteko Bizkaibus zerbitzua maiztasun egokiagaz jartzeko, eta landa eremuko herritarrek inguruko herri handiagoetako zerbitzu berdinak edukitzeko. Izan ere, plataformaren esanetan, Busturialdea eta Lea-Artibai eskualdeko garraio publiko erregular eta iraunkorreko eta erabilera orokorreko zerbitzuaren aurreproiektuan ez da aurreikusten Aulesti eta Markina-Xemeinen arteko autobus zerbitzurik. Alegazioa 2026ko maiatzaren 11n aurkeztu zuten Aulestin, eta orain, sinadura bilketa jarri dute martxan Bizkaiko Foru Aldundira aurkezteko.

Alegazioan bi eskaera nagusi egin dituzte: alde batetik, Aulesti eta Markina-Xemein arteko Bizkaibus zerbitzua maiztasun egokiarekin ezartzea, herritarren eguneroko beharretara egokituta; eta bestetik, landa eremuko herritarrek hiri handiagoetako biztanleen zerbitzu berdinak izatea. Plataformatik nabarmendu dute autobus zerbitzu berriak hezkuntza, administrazio eta osasun zerbitzuetarako sarbidea erraztuko lukeela, baita ingurumenari ere mesede egingo liokeela auto pribatuaren erabilera murriztuta.

Alegazioan azaltzen denez, Aulestiko biztanle askok egunero jo behar izaten dute Markina-Xemeinera hainbat arrazoirengatik: “Derrigorrezko Bigarren Hezkuntza egiteko, batxilergoa edo Lanbide Heziketa ikasteko, administrazio zerbitzuetara jotzeko edota kirol eta aisialdiko jardueretan parte hartzeko”. Gainera, Markina-Xemein inguruko herrietara edo Ondarroa, Durango, Ermua eta Eibarrera joateko garraio lotura nagusietako bat dela azpimarratu dute. Herritarren arabera, gaur egun garraio publiko egokirik ez dagoenez, auto pribatuaren menpe bizi dira. Horrek gastu ekonomiko handiagoa eta kutsadura gehiago eragiten dituela salatu dute, baita landa eremuko herritarren mugikortasuna mugatu ere.

Aulestiko familia kaltetuek "irmoki" salatu dute taxi zerbitzua kentzeko aukera

Lea-Artibai eta Mutrikuko Hitza — 2026-05-11 16:36:49

Herri txikietako nahiz landa eremuetako hainbat familiek egiten dute Eusko Jaurlaritzako Hezkuntza Sailak eskaintzen duen taxi zerbitzuaren erabilera, eta 2026-2027 ikasturterako zerbitzu hori kentzeko hartu dezakeen erabakia dela eta, Aulestiko hainbat familia kaltetutako kidek agerraldia egin zuten joan den barikuan [maiatzak 8]. Erabakia arduragabetzat jo zuten aulestiarrek, eta “irmoki” salatu zuten neurri horrek zuzenean arriskuan jartzen dituela euren seme-alaben segurtasuna eta herrien etorkizuna.

Familia kaltetuen esanetan, “onartezina da 164/2023 Dekretuak ezartzen dituen ibilbideen segurtasun baldintzak alde batera utzi izana”. Azaldu zutenez, euren seme-alabek eskolara oinez joan beharko balute “arrisku objektibo eta saihestezinak izango lituzkete bidean, besteak beste, “zirkulazio handiko bideak, espaloirik, pasabiderik eta argirik gabeko tarteak eta babes neurri eskasak”. Horren aurrean administrazioari eskatu diote egoeraren aurrean “begiak ez ixteko”, umeen segurtasuna eta ongizatea jokoan daudela azpimarratuta.

Gaineratu dutenez, neurriak enpleguan ere eragina izango luke. Izan ere, garraio zerbitzuari lotutako zaintzaile lanpostua desagerraraztea “beste kolpe bat” izango litzateke landa eremuarentzat: “Landa eremuan aukera laboralak gero eta urriagoak dira, eta erabaki honek lana galtzen duten pertsonen bizimodua kaltetzen du zuzenean”.

Era berean, familia kaltetuek ohartarazi dute herri txikietatik zerbitzu publikoak kentzea “politika oker eta suntsitzailea” dela. Uste dute horrelako neurriek landa eremuen hustutzea haunditzen dutela: “Horrelako neurriak dira jendea hirietara alde egitera bultzatzen dutenak, despopulazioa eta zahartzea bizkortuz. Ezin dugu erabakia onartu gure herrien etorkizuna arriskuan jartzen duelako”.

Azaldu dutenez, joan den martitzenean [maiatzak 5] elkartu ziren Hezkuntzako Bizkaiko Delegaritzako arduradunekin. Bertan jakinarazi zuten moduan, barikuko [maiatzak 8] agerraldian ere taxi zerbitzua orain arte bezala mantentzea eskatu zioten Hezkuntza Sailari, “indarrean dagoen araudia errespetatuz eta herri txikietako herritarren segurtasuna eta duintasuna lehenetsiz”.

Aulestik Geuretik Sortuak egitasmoko komiki aurkezpen berezia hartu du

Lea-Artibai eta Mutrikuko Hitza — 2026-05-11 11:06:47

Aulestik barikuan [maiatzak 8] Geuretik Sortuak egitasmoaren barruko kultur hitzordu berezia hartu du. Usue Egia komikigileak Zeruaren erdian lana aurkeztu zuen, Zazpikiak bat bildumaren parte den komikia. Euskara hutsean sortutako lan honek emozioak, dolua eta aniztasuna lantzen ditu, eta euskal sorkuntza eta kulturaren hedapena sustatzeko aukera aparta izan da.

Hezkuntza Sailak ikasleentzako garraio zerbitzua kenduko duela salatu dute

Lea-Artibai eta Mutrikuko Hitza — 2026-05-07 16:00:06

Aulestiko gurasoek Hezkuntza Sailak garraio zerbitzuaren zati handi bat kenduko dutela salatu dute. Herriko adingabeen segurtasunarekin kezkatuta agertu dira gurasoak, eta datorren ikasturtean garraio publikoa ezabatzeko erabakiaren aurrean, agerraldia egingo dute bihar [maiatzak 8] 19:30ean, Aulestiko Urregarai eskolaren kanpoaldean. Gurasoek, argazkiarekin batera, alegazio bat egingo dute Eusko Jaurlaritza eta Bizkaiko Hezkuntza Lurralde Ordezkaritzari zerbitzu hori manetentzeko eskakizuna eginez.

Gurasoek adierazi dutenez, “ikastetxe publikoetako eskola garraio zerbitzua arautzen duen dekretuak dio garraio zerbitzu hau izateko, adingabearen etxea eskolatik bi kilometroko distantziara egon behar dela. Distantziaz gain, ibilbidearen segurtasun-baldintzak ere kontutan hartzen dira zerbitzua ezartzeko orduan”. Orain arte, adingabekoak eskolara joan ahal izateko beharrezkoa izan da zerbitzua: “Gure auzo batzuk ez dira distantziaren irizpideak arautzen dituen bi kilometroetara heltzen, hala ere, bideak dituen espaloien egoerak eta argiztapenak ez dute herriko adingabeen segurtasuna bermatzen”.

Herri txikien alde. Aulestiko herriari horrelako zerbitzu bat eskaintzea herri txikien aldeko apustua egitea dela adierazi dute gurasoek, Horrelako erabaki txiki askok familiak herri handietara joan behar izatea eragiten duela diote, eta honekin batera, herri txikietako auzoak biztanle gabe geratzea. Gainera, garraio publiko hau izateak sortzen duen lanpostu baten galera ekarriko du, langile horren egoera ekonomikoan modu zuzen baten eraginez.

'Txepeldunak' antzezlana Aulestira helduko da

Lea-Artibai eta Mutrikuko Hitza — 2026-04-23 15:28:23

Umeei zuzendutako Txepeldunak antzezlana hartuko du bihar [apirilak 24] Aulestiko Udal Areto Nagusiak, 18:30ean. Iraitz Lizarragak idatzi eta zuzendu duen lanak antzerkia eta bertsolaritza uztartzen ditu, inprobisazioan oinarritutako proposamen dinamikoa eskainiz.

Lehiaren ideia ardatz hartuta, bertso jarri batzuetatik sortu du Lizarragak antzezlana; izan ere, antzezlanaren muinean, lehiaren kontzeptuari buruzko gogoeta dago: “Etorkizuneko gizarte solidarioagoa eta konprometituagoa eraikitzeko nahia lantzen da, indibidualismotik kolektibora jauzia eginez: irabazi-galdu, ona-txarra, lehia-jolasa, erori-altxa, norbera-bestea, laguntasuna, taldea, bestearekiko errespetua, zaintza…”.

Uxue Alkorta bertsolaria eta Maren Basterretxea antzezlea igoko dira oholtzara: “Antzezlan bat entseatzeko geldituko dira Uxue eta Maren. Errealitatean bezala, antzezlanean ere bata bertsolaria da, eta bestea antzezlea. Uxue, zurrunagoa da, eta Marenek jolasteko gogo handia dauka”. Beraz, bi protagonistek lehiari buruz hausnartuko dute, jolasean, “bertsoa, koplak eta beste hainbat baliabide eszeniko tartekatuz”.

Geuretik Sortuak egitasmoak bi hitzordu eskainiko ditu Lea-Artibain

Lea-Artibai eta Mutrikuko Hitza — 2026-04-16 13:24:26

Asteburuan kultur eskaintzaz bustiko da Lea-Artibai; izan ere, Geuretik Sortuak egitasmoaren baitan bi ekitaldi egongo dira Aulestin eta Ziortza-Bolibarren.

Alde batetik, Ziortza-Bolibarren Bi baso bat ur antzezlana eskainiko du Metrokoadroka Sormen Lantegiak bihar [apirilak 17], 20:00etan, frontoian. Piezak tratu txarren eta traumaren ondorengo pozean jartzen du arreta. Antzezlanean lau aktore ageri dira oholtza gainera, geldi baina dantzan, bakoitzak eskuan ur baso bana dutela, eta mina gainditzeari buruzko ikuspegi sakona, errespetuzkoa eta alaia eskainiz.

Bestalde, Aulestin Lau haizetara izeneko film laburren proiekzioa egongo da domekan [apirilak 19], 18:30ean, udal areto nagusian. Euskaraz sortutako lau film laburren bilduma da, lau zinegileren lanek osatutakoa: Aitor eta Izaro Arruti, Alba Lozano, Olatz Overejo eta Raul Barreras.