Lea-Artibai eta Mutrikuko Hitza

27. Zapato Azulak urdinez tindatu du Ondarroa

Lea-Artibai eta Mutrikuko Hitza — 2026-06-27 16:22:15

Azken egunetako bero sargoririk barik esnatu da gaur [ekainak 27] Euskal Herria, eta gustura hartu dute hori Ondarroara joan direnek. Kamiseta urdinak armairutik atera, eta Alde Zaharra goitik-behera eta ezker-eskubi bete dituzte bertaratu direnek. Herritarrak, inguruko herrietakoak nahiz Euskal Herriko hamaika txokotatik bertaratutakoak elkartu ditu gaur Radixu Irratiak antolatzen duen 27. Zapato Azulak Ondarroan. Hala, aurtengo kartelean keinu egin dioten Felix Beristainen koadro baten antzera, urdinez tindatu dira herriko txoko guztiak.

11:00etarako prest zeuden Radixu Irratiako kideak zuzeneko emisioagaz batera jaiari ekiteko, eta egunaren nondik norakoak azaldu ostean, Koldo Azpiazuk hartu du mikroa. Hain zuzen ere, iaz hartu zuen Azpiazuk Nekane Akarregiren erreleboa, eta aurtengoan ere berea izan da jaiari hasiera emateko ardura. Hala, urtero bezala, Alai Tabernako balkoiak bereganatu ditu begirada guztiak, eta bertan zeudenek adi jarraitu dituzte Azpiazuk esandakoak. Nola ez, Manuel Eluren bolanderek ere ez dute hutsik egin, eta 12:00etan egin du eztanda jaiak, bolandera eta bolandera artean.

Bolandera ugari bota ostean jaiak ez du etenik izan, eta urteroko osagaiekin osatu dute goiza. Txistulariak, Kresalako bandaren eta Artelango erraldoien kalejira nahiz falta direnak gogoan hartzeko tartea hartu dute herritarrek, eta Txalainak taldearen kontzertuak biribildu du goizeko jarduna. Abanikoak dantzan eta gorputzak ere bai, Hertzainak taldearen abesti ezagunenak abesteko tartea hartu dute Kalekutz inguruan batu direnek.

Zapato Azule berezia bada, Dinamartxaren ailegaera are bereziagoa da herritar askorentzat. Dina Bilbao Barruetabeñaren omenez Tolosa eta Ondarroa elkartzen dituzte martxalariek oinez nahiz bizikletan, eta irrintzi, txalo, oihu eta musika artean egiten diete harrera ondarrutarrek. Oinez egin duten 77 martxalarientzat bart 01:00etan hasi ziren Zapato Azuleko ekintzak, eta gaur 09:00etan, ostera, bizikletaz etorri diren 223 partaideentzat. Iazko parte hartze kopurua gaindituta (iaz 259 partaide eduki zituen), poztasunez nahiz emozioz betetako malko eta irribarreen artean sartu dira herrira 300 martxalariak.

Martxalariak, Alde Zaharrera heltzen.

Dinamartxako kide denak heldu ostean, aurtengo pregoia irakurri dute Radixuko kideek balkoitik. Besteren artean, Palestina, Saharan, Iran Libano eta Kubagaz gogoratu dira, eta zelan ez, baita Venezuelako herriagaz ere. Jarraian, denborarik galdu barik, aurtengo omendua izendatu dute. “Omendu guztiak dira bereziak, baina aurtengoa, Zapato Azule antolatzen dugun guztiontzat, bereziena da. Zorionak Nekane Akarregi Amutxastegi, zeu zara aurtengo omendua!”. Hala, Akarregi ezustean harrapatu du omenaldiak, baina irribarrez jaso du Radixukoen aipamena.

Ostean, 11:00etan zabaldu duten Euskal Herriko Kamiseta Azoka eta Artisau Azoka itxi, eta aurtengo kamisetarik eta erakusleihorik onenak izendatu dituzte. Kamiseta Azokan Ondarroako hiru postu eta Euskal Herriko beste hamahiru egon dira, eta Torontilek (Artea) irabazi du Euskal Herriko kamisetarik onenaren saria. Ondarroako kamisetarik onenaren saria, aldiz, Saturrarango Haitzak irabazi du, eta erakusleiho onenarena, Lorak Estherrek.

[ARGAZKI GALERIA]

Txo! Antzerki Kolektiboak omenduari egindako sketchagaz amaitu dute eguerdiko jarduna, baina jai luzea geratzen da oraindik Ondarroan. Arratsaldean mota eta gustu guztietako musika entzuteko aukera egongo da herriko txoko guztietan, eta jaiak ez du etenik izango goizeko ordu txikiak arte.

"Begirunez egindako esperientzia sentikor bat" dauka gordeta Arretxinagako ermitak

Lea-Artibai eta Mutrikuko Hitza — 2026-06-26 15:37:21

Ereinotz bat Arretxinagako ermitari. Prozesu luze baten ostean, Markina-Xemeingo balio handiko gunearen zaharberritze lanak amaitu dituzte, hala, San Migel ermita eraberrituta ikusteko hainbat herritar batu ziren atzo arratsaldean. Herritarrez gain, Zerutxu Dantza Taldeak eman zion ongietorria gune berrituari.

Begibistakoak dira ermitaren kanpoaldean egin dituzten lanak. Ermitaren kanpoko hormak kareorez berritu dituzte, kolore eta ehundura bereizgarriak emanez. Eraikina bakarrik ez, alboan dagoen probalekua ere berritu dute eta ikusleentzako armailak jarri dituzte. Lanak amaituta daudela adierazteko, Alde Zaharrean egin zuten era berean lotu zioten ereinotza ermitari.

Kanpoaldekoaldekoak ikusita, barrualdean jarri zuten begirada. Honetarako, ermitara sartu baino lehen, Jon Astorkiza eta Joseba Beristain artistek hartu zuten hitza, erakinaren barnealdean egindako arte proiektu berritzaileari buruzko nondik norakoak azaltzeko. Astorkiza izan da proiektuaren grafiko zuzendaria, eta Arretxinagan egon zen lehen aldian sentitu zuen “konexio handia” aitortu zuen bere berbaldian. Horregatik, toki honetarako “begirunez egindako esperientzia sentikor bat” sortu du. Azalpenekin jarraitzeko, Beristainek hartu zuen hitza. “Tokiko natura elementuen soinuekin eta sintetizadoreekin jolastuz”, sortu du esperientzia bisualari balio gehigarri bat emango dion soinu paisaia. Sei bozgoragailuk osatutako instalazio bat sortu du, eta hala, “txikia den espazio bat handitu egiten du”.

Instalazioaz gain, ikus-entzunezko pieza bat eskaintzen digu San Migel ermitak. Bertaratzen direnek QR bat aurkitu eta horren bitartez helduko dira piezara. Eneritz Artetxe aktore gernika-lumotarrak gidatuko du ikuslea lau hizkuntzatan (euskeraz, gazteleraz, frantsesez eta ingelesez) entzun daitekeen piezan. Ermitari eta hau inguratzen duen artearen historiari buruz ari da Artetxe ikus-entzunezko horretan, “bisitaria leku honen magiarkein, unibertsoarekin, naturarekin eta bizitzarekin lotzeko”.

Aurkezpena amaituta, ermitako ateak zabaldu zitzaizkien herritarrei, eta orduan izan zuten instalazioa ezagutu eta tokiarekin konektatzeko aukera. Bertaratzen direnek ermita zabalik dagoen artean izango dute esperientzia bizitzeko aukera.

Auzo eta herriak alaitzera datoz San Pedro jaiak

Lea-Artibai eta Mutrikuko Hitza — 2026-06-25 16:27:24

San Joan jaiak igaro ondoren, San Pedroen txanda izango da datorren asteburuan, eta Berriatuan, Mutrikun, Artan (Ziortza-Bolibar) eta Barinagan (Markina-Xemein) ospatuko dituzte.

Berriatuko San Pedroak ekainaren 23an hasi baziren ere, gaurtik [eguena] martitzenera arte ere edukiko dute zer ospatu herritarrek; batez ere, kirola eta kultura uztartuko dituzte. Izan ere, gaur [eguena] Euskal Herri mailako gazteen bertso sariketa egongo da bideogelan: Berritxu saria. Bertan parte hartuko dute Kattin Madariaga Apaolaza, Adei Urbitarte Aiestaran, Kattalin Arabolaza Palono, Maia Ortiz De Zarate Idiakez, Iradi Barrenetxea Akesolo, Naroa Iturrioz Lauzirika, Jon Abasolo Sarralde eta Amaiur Betanzos Caminosek. Bihar [barikua] Euskal Herriko mutilen banakako zesra finalak jokatuko dira.

Zapatuan ere kirolak protagonismo berezia izango du. 09:30ean Triatloi herrikoia hasiko da herriko plazatik, eta eguerdian, entsalada eta tortilla lehiaketa egingo dute. Bihar izango da izena emateko azkenengo eguna. Ondoren, Bola joko txapelketagaz jarraituko dute, eta azkenik, Kaletrik musika emanaldia egongo da herriko plazan. Domekan [ekainak 28] Zerbait sartu zait begian antzezlana egongo da bideogelan.

San Pedro egunean [ ekainak 29] eta San Pedro txiki [ekainak 30] egunean ere egun guztiko egitaraua izango dute. Lehenengoan, goizean, Open Bizkaia esku pilota partidak egongo dira, eta arratsaldean, Mus eta Briska txapelketak. Martitzenean umeak izango dira protagonista. Umeen parkea egongo da goiz zein arratsaldez, eta gero, bazkaltzeko batuk dira ume guztiak. Apar festagaz eta txokolateagaz emango diote amaiera egunari.

Mutrikun, ohi legez, omenaldi “xume bezain politarekin” ospatuko dute San Pedro eguna. Itsasoan desagertutako arrantzaleak omenduko dituzte, 12:00etan, Kofradia Zaharrean. “Udalak hartuko du hitza lehenengo, eta ondoren, abadearen txanda izango da. Dantzariek agurra dantzatuko dute, eta korua eta eskaintza egingo dira. Ondoren, bertsolariek bertsoak botako dituzte, eta udalaren agurra egin ondoren, jan-edana egongo da”. Horrez gain, Xabier Basterretxea Esnaola Txordori omenaldia egingo zaio.

Auzoetan ere, San Pedoen gosez daude. Barinaga auzoan bihar [ekainak 26] emango diote hasiera, eta gaztetxoen pilota partiden ondoren, hasiera ofiziala emango diote txupinagoagaz, 20:00etan. Ondoren, txikiteoa egingo dute auzoan, eta iluntzean, su artifizialak egongo dira. Zapatuan [ekainak 27] arratsaldean hasiko da jai giroa: zaldi probak, parrillada eta bolo txapelketa egongo dira. Domekan umeak izango dira protagonista Briska txapelketa eta jolasen artean, eta astelehenean, nagusiagoen txanda izango da. Mezaren ostean, jubilatuen bazkaria egongo da tabernan.

Ziortza-Bolibarko Arta auzoan ere asteburuan ospatuko dituzte San Pedro jaiak. Zapatuan, 17:00etan, XIII. Briska txapelketa egongo da. Antolatzaileek azaldu dutenez, momentuan bertan eman beharko da izena: “Gutxi gorabehera, 22 bikote inguruk ematen dute izena. Auzokoak eta herritarrak etortzen dira, baina baita inguruko jendea ere”.

Domekan [ekainak 28] egun guztiko jaia izango dute. “Eguerdi aldera batzen gara jende gehien, eta Zerutxu dantza taldeko dantzariek ere jendea erakartzen dute. Horrez gain, umeekin ere etortzen da jendea, eta bazkaritara bakoitza norbere etxera joaten da, antzinako erara”. Hala ere, bazkaldu aurretik Onintza Enbeita eta Miren Amuriza ariko dira bertsotan.

Bazkalostean, umeen jolasak egongo dira, eta Imanol Intxausti eta Iñaki Larrañaga trikitilariek alaituko dute auzoa: “Trikitilariak egun guztian egongo dira, eta umeen jolasak ere girotuko dituzte. Umeen jolasetan betikoak egiten ditugu: aulki jolasa, puxikak puskatu… Jolas bereziena patata dantza izaten da: patata bat begian jarri eta dantza egin patata erori gabe”.

Hamabost lagun inguru dabiltza antolakuntzan, eta “dena denen artean” egiten dutela zehaztu dute: “Bilerak egiten ditugu eta bakoitzak bere ardurak hartzen ditu. Gu momentuz jaiak mantentzen saiatzen gara, eta nahiko indartsu daudela esango nuke. Gogotsu gaude aurtengorako ere”.

EGITARAUA

BERRIATUA

Bihar, barikua
- 19:00. Euskal Herriko mutilen banakako zesta txapelketako finalak.
Etzi, zapatua
- 09:30. Triatloi herrikoia, herriko plazan.
- 14:30. Entsalada eta tortilla lehaiketa, herriko plazan.
- 17:00. Bola joko txapelketa.
- 18:00. Kaletrik musika emanaldia, herriko plazan.
Ekainak 28, domeka
- 19:00. Zerbait sartu zait begian, antzezlana, bideogelan.
Ekainak 29, San Pedro eguna
- 12:00. Meza San Pedro elizan.
- 12:30. Open BIzkaia esku pilota partidak emakumezko eta gizonezkoak. Kanpoko frontoian (euriagaz, barruko frontoian).
- 17:00. Mus eta Briska txapelketak.
Ekainak 30, San Pedrotxiki
- 11:00-13:00/15:00-17:00. Umeen parkea, herriko plazan.
- 13:30. Umeen bazkaria herriko plazan.
- 17:00. Apar festa herriko plazan.
- Ondoren. Txokolatea herriko plazan.
Uztailak 5 eta 12
- Zesta: Jai Alai League B, Mendibarren frontoian.

MUTRIKU

Ekainak 29, San Pedro eguna:
- 12:00. Itsasoan desagertutako arrantzaleei omenaldia, Kofradia Zaharrean.

BARINAGA AUZOA (MARKINA-XEMEIN)

Bihar, barikua
- 17:00. Gaztetxoen arteko pilota partidak.
- 20:00. Txupinazoa eta txikiteoa.
- Iluntzean. Su artifizialak.
Etzi, zapatua
- 18:00. Zaldi probak.
- Ostean. Parrillada.
- 21:00. Bolo txapelketa.
Ekainak 28, domeka
- 16:00. Umeen briska txapelketa.
- 17:00. Umeen jolasak.
Astelehena, ekainak 29
- 12:15. Meza.
- Ostean. Mezaostekoa.
- 14:00. Jubilatuen bazkaria tabernan.

ARTA AUZOA (ZIORTZA-BOLIBAR)

Etzi, zapatua
- 17:00. Artako XIII. Briska txapelketa.
Ekainak 28, domeka
- 11:00. Meza santua.
- 12:00. Zerutxu dantza taldea.
- Ondoren. Bertsolariak: Onintza Enbeita eta Miren Amuriza.
- 18:00. Umeen jolasak. Imanol Intxausti eta Iñaki Larrañaga.
- Trikitilariak egun guztian.

"Giro onean" ospatu da senegaldar berriatuarren jaia

Lea-Artibai eta Mutrikuko Hitza — 2026-06-23 13:41:17

Zapatuan [ekainak 20] senegaldar berrituarren eguna ospatu zuten Berriatuan. Elkartasun jaia izan da aurtengoa ere, eta zapatukoan 200 lagun inguru batu ziren. Herri kirolak, bazkaria, askaria eta senegalgo dantza tradizionalek osatu zuten egun guztiko egitarauagaz, “egun ederra” igaro zuten elkarrekin. Guztia musikak girotuta ospatu zuten.

Berriatuar senegaldarrek elkartasunez beteko dute herria

Lea-Artibai eta Mutrikuko Hitza — 2026-06-17 18:20:49

Berriatuak herriko senegaldarrek antolatutako eguna hartuko du bihar. Elkartasun jaia izango da aurtengoa ere, urtez urte egin duten bezala, Berriatuko eta inguruko herritar senegaldarrek ospatzen dutena eta 200 lagun inguru batzen dituena. Herri kirolak, bazkaria, askaria eta senegalgo dantza tradizionalek osatuko dute egun guztiko egitaraua. Herriaren harrera ona eta lankidetza azpimarratu dute herritar eta udal ordezkariek: «Berriatuko herri hezitzaileen talde bat batzen gara udaletxean, eta kulturartekotasunaren barruan lantzen ditugu honelako ekintzak».
Berriatua osatzen duen kultur aniztasun hori oinarri, antolatzaileek herritar guztiei egin die ekintzen parte hartzeko deia. Hala, bazkarira batzeko aukera ere badago, eta bihar arte egongo da izena emateko aukera, Udaletxean bertan.

Zapatuko egitaraua:

12:30ean. Herri kirolak.
15:00etan. Bazkaria.
17:00etan. Askaria.
Ondoren. Senegalgo dantza tradizionalak.

Agustin Unamunzaga omenduko dute XI. Kinttopeko Zaldi Proben txapelketan

Lea-Artibai eta Mutrikuko Hitza — 2026-06-11 15:19:29

Berriatuak XI. Kinttopeko Zaldi Proben txapelketa izango du zapatuan [ekainak 13] 21:00etan eta domekan [ekainak 14] 18:00etan, herriko plazan. Antolakuntzatik adierazi dute asteburuko proba Bizkaiko txapelketarako puntuagarria izango dela.

Zapatuan Alegria bermeotarrak, La Herrera elkarte zallatarrak eta Egurrola etxebarritarrak parte hartuko dute. Domekan, aldiz, Olazar markina-xemeindarren eta Zornotzak anaiak zallatarren txanda izango da. Ondoren, gerri-tira erakustaldia egingo da Olazar eta Adorrixaren eskutik. Ez hori soilik, domekan omenaldia egingo diote Agustin Unamunzaga Agustin haundixa probalari ospetsu zendu berriari.

Bi eguneko txapelketak dantzak, bertsoak, giza probak eta abar izango ditu. Antolatzaileek gonbidapena luzatu diete eskualdeko herritarrei.

Helmugak Bizipoza Jaia eskertza ekitaldiagaz amaitu da Berriatuan

Lea-Artibai eta Mutrikuko Hitza — 2026-06-09 16:07:19

Berriatuko bideo gela bete egin zen atzo [ekainak 8] Helmugak Bizipoza Jaiaren eskertza ekitaldia ospatzeko. Maiatzaren 22tik 24ra bitartean herrian sortu zen giro ederra oraindik gogoan, jaia posible egin duten guztien lana txalotzeko ekitaldia izan zen. Gainera, bertaratutakoak ekitaldiaren momenturik onenak jasotzen dituen bideoa ikusi ahal izan zuten, primizian.

“Herritarren eta orohar Lea-Artibaiko bizilagunen elkarlanak egin du posible bizipoza eta deitzaileen mezua gizartean zabaltzea”, adierazi zuten antolatzaileek. Ez hori soilik, antolatzaileak berretsi zuten lanean jarraituko dutela “denona eta denontzat beharko genukeen” Euskal Herri “inklusiboagoa” lortzeko, “euskaratik eta euskaraz”.

Bizipoza elkartea. Gaur egun Bizipoza elkartea Euskal Herri mailako egitasmoa da, eta 39 elkartek osatzen dute. Haur eta familiak dira hango partaide, eta izaera bereziko gaiak lantzen dituzte. Behar bereziak dituen jendea da, eta oraindik ere hainbat eskubide betetzeko dauzkate.

Berriatuak irabazi du Bizkaiko Eskolarren Herriarteko txapelketa

Lea-Artibai eta Mutrikuko Hitza — 2026-06-08 14:37:34

Hamaika zesta-punta ikasleren topagune izan da asteburuan Berriatuko Mendibarren pilotalekua; barikuan [ekainak 5] Bizkaiko Eskola mailako Herriarteko finalak jokatu ziren bertan. Berriatuko Zesta Eskolak antolatutako partidan, Markina-Xemeingo zesta-punta eskolako ikasleak aritu ziren etxekoen aurka. Berriatua izan zen klub txapelduna. Giro herrikoia, alaia eta jendetsua nagusitu zen finalean.

“Fashion”, Maribel Aiertzaren thriller berria

Lea-Artibai eta Mutrikuko Hitza — 2026-06-03 11:28:26

Maribel Aiertza idazleak bere lan berria kaleratu du: Fashion, gazte-literaturako eleberria, suspensea, sare sozialen eragina eta moda-industriaren itzalak uztartzen dituena.

Eleberriaren protagonista Maddi da, ikastetxeko irteera batean desagertzen den nerabea. Hasiera batean desagerpena misteriotsua dirudien arren, laster argituko da ihes egin duela sarean ezagututako gazte batekin. Maddik uste du haren alboan bere amets handiena beteko duela: jantzi-diseinatzaile bihurtzea. Hala ere, amets hori laster bihurtuko da amesgaizto, jantzi faltsuak ekoizten dituzten lantegi batean harrapatuta geratuko baita beste emakume batzuekin batera.

Fashion eleberriak gaurkotasun handiko gaiak jartzen ditu mahai gainean: sare sozialen bidezko manipulazioa, gazteen zaurgarritasuna, identitatearen bilaketa eta moda-industriaren inguruan ezkutatzen diren esplotazio egoerak. Istorioak thriller kutsua du, baina aldi berean hausnarketarako gonbidapena egiten die irakurle gazteei.

Maribel Aiertzak urteak daramatza haur eta gazte literaturan lanean, eta euskarazko irakurleen artean erreferente bihurtu da bere kontakizun erakargarriei eta gizarte-gaiei heltzeko duen moduari esker. Bere lan berriarekin, egungo gazteen kezka eta arriskuak fikzioaren bidez jorratzen ditu berriro ere.

Fashion dagoeneko eskuragarri dago liburu-dendetan eta gazte irakurleentzat zein hezkuntza-komunitatearentzat interes bereziko irakurketa gisa aurkezten da, entretenimendua eta gogoeta uztartzen dituen proposamen batekin.

Berriatuak Jai Batzordearen bilera deitu du datozen jaiak eta ekitaldiak antolatzeko

Lea-Artibai eta Mutrikuko Hitza — 2026-06-03 10:10:26

Berriatuako Udalak Jai Batzordearen bilera berria antolatu du eguenean [ekainak 4], 18:00etan. Topaketaren helburua izango da azken asteetan herrian egin diren jarduera eta ospakizunen balorazioa egitea, baita datozen hilabeteetako ekitaldiak prestatzen hastea ere.

Gai ordenaren barruan, San Gregorio jaien eta maiatzean zehar egindako ekintzen balorazioa egingo da. Era berean, Senegaldarren Egunaren antolaketa landuko da, herriko kultura-aniztasuna eta elkarbizitza sustatzen dituen hitzordu garrantzitsua.

Bestalde, Jai Batzordeak San Juan eta San Pedro jaien prestaketari ekingo dio. Udako egutegiko ospakizun esanguratsuenetakoak direnez, programazioaren lehen urratsak zehazteko aukera izango da bileran.

Azkenik, Jai Batzordearen eraketa ere aztertuko da, etorkizuneko ekitaldien koordinazioa indartzeko eta herritarren parte-hartzea sustatzeko helburuarekin.

Berriatuko Udalak herriko jai eta ekitaldien antolaketan parte hartu nahi duten herritar guztiak bileran parte hartzera animatu ditu.

Laso eta Landa bikoteak eta Zubizarretak irabazi dute San Fermingo Lau eta Erdiko Txapelketa Berriatuan

Lea-Artibai eta Mutrikuko Hitza — 2026-06-01 13:16:46

Joan den barikuan [maiatzak 29], Berriatuko Mendibarren frontoiak pilota jaialdi berezia hartu zuen, San Fermin Lau eta Erdiko Txapelketaren barruan antolatutako neurketekin. Arratsaldean hasi zen jaialdia, eta pilotazale ugari bildu ziren harmailetan, maila handiko partidak zuzenean ikusteko.

Jaialdiko lehen norgehiagokan, bikoteka, Laso eta Landa aritu ziren Elordi eta Gabirondoren aurka. Partida lehiatua izan bazen ere, Laso eta Landa bikoteak erakutsitako sendotasunak garaipena ekarri zien, txapelketako garaile bihurtuz.

Bigarren partidan, Lau eta Erdi modalitatean, Senar eta Zubizarreta IV.a izan ziren aurrez aurre. Ikusmin handia piztu zuen buruz buruko neurketak, eta azkenean Zubizarreta IV.ak eskuratu zuen garaipena, pilotakadaz pilotakada nagusitasuna erakutsita.

San Fermin Lau eta Erdi Txapelketako jardunaldiak giro aparta utzi zuen Berriatuan, eta bertaratutako zaleek goi mailako pilotaz gozatzeko aukera izan zuten. Ekitaldia Baiko Pilota, Pelota Pro Liga, Aspe Pelota eta Berriatuko Udalaren laguntzarekin antolatu zen.

Berriatuko Udalak oso balorazio positiboa egin du ekimenaren inguruan. Udal ordezkarien hitzetan, “Oso ondo joan da ekimena”, eta herritarren zein pilotazaleen erantzuna nabarmendu dute.

Pello Segurolak irabazi du Berriatuko I. Artzai Txakurren Lehiaketa

Lea-Artibai eta Mutrikuko Hitza — 2026-06-01 12:53:06

Joan den domekan [maiatzak 31] ospatu zen Berriatuan I. Artzai Txakurren Lehiaketa, Zubialdeko Zelaian. 12:00etan hasi zen ekitaldia, eta Euskal Herriko hainbat txokotatik etorritako sei artzain eta euren txakurrek parte hartu zuten.

Lehia estuaren ondoren, Pello Segurola izan zen garailea, Matxinbentatik etorrita, bere Yak txakurrarekin. Bikoteak “lan bikaina” egin zuen ardiekin eta epaileen puntuaziorik onena eskuratu zuen.

Lehiaketan honako parte-hartzaileek ere jardun zuten: Igor Elordi (Bariñaga) eta Lagun, Inaxio Irakulis (Etxano) eta Beltx, Xabier Gastañaga (Antzuola) eta Cool, J. Ramon Azkargorta (Galdakao) eta Bat, eta Mikel Pagazartundua (Lemoa) eta Lay.

Epaimahaia Mikel Garatek eta Bittor Bengoetxeak osatu zuten. Haien ardura izan zen txakurren gidaritza, obedientzia eta artaldearekin egindako lana baloratzea.

Antolatzaileek oso balorazio positiboa egin dute lehen edizio honen inguruan. Parte-hartzaileen maila eta ikusleen erantzuna nabarmendu dituzte, eta ekitaldiak izan duen harrera ona azpimarratu dute. Antolakuntzatik adierazi dutenez, “Oso ondo joan da ekimena”.

Turtziozek hartuko du barikuan Bizkaiko Eskola Txikien Topaketa

Lea-Artibai eta Mutrikuko Hitza — 2026-05-26 15:12:38

Bizkaiko Eskola Txikien Topaketa antolatu dute barikurako [maiatzak 29] hirugarren urtez. Herri txikietako eskolen bilkura Turtziozen izango da aurten, eta lau eta zortzi urte arteko 450 haur baino gehiago batuko dira bertan. Hala, “egun osoko jai eta elkarbizitza egitarau” handia antolatu du Turtziozko Eskolako Guraso Elkarteak. Bertan izango dira Lea-Artibaiko haurrak, Amoroto, Ispaster, Aulesti, Munitibar, Berriatua eta Etxebarriko eskoletatik joango direnak.

Turtziozko Eskolak adierazi duen bezala, barikuko topaketarako egun osoko egitarau “erakargarria” antolatu dute: Goizean goizetik, euskal abereen azoka egongo da ikusgai, eta haurrek “gertutik ezagutu ahal izango dituzte bertako animaliak”. Jolasteko eta ondo pasatzeko momentua ere izango dute, “elkar ezagutzeko eta lagun berrian egiteko” helburuarekin antolatutako jolasen bidez.

Bazkalordurako, “giro hurbil eta polita” sortzeko eta jolasen ostean indarberritzeko asmoarekin bazkaria antolatu du Turtziozeko Eskolak. Gainera, jaiari amaiera emateko ikuskizun “berezia” antolatu dute. Hori amaitutakon, haur bakoitza bere herrira bueltatuko da aurrez antolatutako autobusetan.

“Landa eremuko ikastetxeen arteko loturak sendotzeko” helburuarekin antolatu dute Eskola Txikien Topaketa; beste urte batez, haurrei elkarrekin egoteko eta “errealitate bereko kideekin ondo pasatzeko aukera emanez”. Honetaz gain, “landa-eremuko eskolak bizirik daudela eta hezkuntzaren parte garrantzitsua dela ” adieraztea dute helburu.

Helmugak Bizipoza Jaiak ehunka lagun batu ditu Lea-Artibain, elkartasunaren eta euskararen alde

Lea-Artibai eta Mutrikuko Hitza — 2026-05-25 10:40:15

Barikutik domekara [maiatzaren 22tik 24ra] ospatutako Helmugak Bizipoza Jaiak arrasto handia utzi du Lea-Artibai eskualdean. Bizipoza Elkarteak, Helmugak-ek, Aspanovasek eta Aspanogik antolatutako egitarauak ehunka lagun batu ditu egunero, euskararen, elkartasunaren eta inklusioaren aldeko mezu argiarekin.

Berriatua bihurtu da asteburuko topagune nagusia. Hiru egunez, herria kulturaz, musikaz, kirolaz eta aldarrikapenez bete da, eta herritarrek erantzun bikaina eman diete antolatutako jarduera guztiei. Antolatzaileek “oso balorazio positiboa” egin dute jaiaren inguruan, parte hartzea eta herriz herri jasotako harrera bereziki azpimarratuz.

Jaiari hasiera bero sargoriaren erdian eman zioten eguenean, herri kirolekin eta Galbaheren kontzertuarekin. Giro bero horretan abiatu zen Helmugak erronka ere: hainbat txirrindularik Lea-Artibai eskualdeari sei itzuli eman dizkiote, guztira 420 kilometro eta 8.500 metroko desnibela osatuz. Herri guztietan egin dituzte geldialdiak, udal bakoitzari oroigarri bana emanez, eskualde osoak jaiari erakutsitako babesa eskertzeko.

Ander Txakartegik, Helmugak proiektuko sortzailea, oso modu positiboan baloratu du erronka solidarioaren garapena, eta eskerrak eman dizkie herriz herri jasotako harreragatik. Bibitxa kolektiboaren laguntzarekin abiatu zen ekimenak elkartasuna eta komunitatearen indarra erakutsi ditu beste behin ere.

Domekako jardunaldia izan zen jaiaren unerik jendetsuena. Bizipoza Elkartea osatzen duten 39 elkarteetako ordezkari ugari bertaratu ziren, beren lana herritarrei gertutik erakusteko. Informazio-postuak, kalejirak, haur eta familientzako jolasak, Go!azeneko ikuskizuna, kontzertuak eta paella solidarioa izan ziren egun osoko egitarauaren ardatz nagusiak.

Leire Elizegik, Bizipoza Kultur Elkartearen izenean, gogorarazi du elkartearen helburu nagusia haur eta gazteen eskubideak erdigunean jartzea dela. Azaldu duenez, jaiak berriro ere aukera eman du “euskararen, elkartasunaren eta aldarrikapenaren bidetik” elkarte ezberdinen lana ikusarazteko.

Bizipoza Elkartea haur eta familien elkarteek osatzen dute, eta hainbat errealitate lantzen dituzte: gaixotasunak, heriotzaren pedagogia, aniztasun funtzionala, kulturartekotasuna, genero eta sexu aniztasuna edota familiartekotasuna. Elkartearen helburua da gai horiek gizarteratzea, sentsibilizatzea eta gizartean eragitea.

Asteburuko arrakastaren ostean, antolatzaileek argi utzi dute lanean jarraituko dutela Euskal Herri inklusiboago baten alde, “euskaratik eta euskaraz”.

Berriatuak aparkalekuak ahalbidetu ditu Helmugak Bizipoza Jairako

Lea-Artibai eta Mutrikuko Hitza — 2026-05-21 11:50:55

Asteburuan hartuko du Berriatuak Helmugak Bizipoza Jaia. Barikuan, zapatuan eta domekan [maiatzak 22,23 eta 24] kolorez, musikaz eta elkartasunez beteko dute Lea-Artibai ekimenera bertaratzea aurreikusten duten pertsona guztiek. Hala, Berriatuara irisgarritasuna bermatzea da helburua, eta hori ahalbidetzeko, antolakuntzak herrira erosotasunez heltzeko argibideak plazaratu ditu.

Berriatuara iristeko hainbat modu egongo dira asteburuan. Kotxez datozen familia, talde edo norbanakoentzat, udalak hainbat aparkaleku jarri ditu erabilgarri; bat Cikautxon eta bi herrian. Furgoneta eta autokarabanaz datozen horiek ere lekua izango dute asteburuko jaian geratu ahal izateko. Herriko hainbat puntu egokitu dituzte gaua pasatzera datozen horientzat, hala nola, Cikautxoko aparkalekua edo futbol zelaiaren atzeko aldea. Gainera, herriak eskaintzen dituen zerbitzuak ere eskuragarri izango dituzte: tabernak, kafetegia edo supermerkatu txikia. Asteburu osoko egitaraua izanik, antolakuntzak asteburu osoa pasatzera gonbidatu du jendea.

Garraio publiko bidez gerturatzeko aukera ere badago, Bizkaibus zerbitzuko A3915 (Ondarroa Durango Bilbo) eta A3916 (Ondarroa-Ermua-Bilbo) lineen bidez. Baita Lurraldebusak eskaintzen duen DB03 (Lekeitio-Donostia) linean ere.

Modu honetan, Berriatuan batuko du jendea Helmuga Bizipoza Jaiak, “euskara, kirola, natura eta pertsonak” bateratzeko.

Berriatuko San Gregorio jaietako Paella Egunean 820 lagun eta 36 paella bildu dira

Lea-Artibai eta Mutrikuko Hitza — 2026-05-09 15:25:46

Berriatuko San Gregorio jaiek ez dute etenik, eta gaur [ maiatzak 9] jaietako hitzordu jendetsuenetako bat ospatuko dute herrian: Paella Eguna. Guztira, 820 lagunek hartuko dute parte eta 36 paella aurkeztuko dituzte aurtengo edizioan, herriko jai giroa indartuz.

Joseba Goienola alkateak azaldu duenez, eguraldiaren iragarpenak ez du gaurko eguna baldintzatuko. Euria eginez gero ere, antolakuntzak alternatibak prest ditu. “Denok agian ez gara toki berean sartuko, baina beharrezkoa bada frontoira joango gara. Herritarrek badituzte aukerak eguna normaltasunez egiteko”, adierazi du.

Alkateak oso balorazio positiboa egin du jaietako asteburu indartsuaren ostean, bereziki atzo, ostirala, bizi izan zen giroagatik. Kontzertuek eta gaueko erromeriak jendetza batu zuten, eta une batzuetan euriak agerpena egin bazuen ere, ez zuen ospakizuna zapuztu. “Atzo kristongo giroa egon zen. Euri pixka bat egin zuen une batean, baina gero barruan jarraitu ahal izan zen, eta gainontzeko ekitaldi guztietan jende pila bat ibili zen. Oso ondo joan zen”, nabarmendu du.

Gaurko egitaraua mezeagaz hasi da eguerdian, eta ondoren erraldoien kalejirak girotu ditu herriko kaleak. 14:30ean egin da paellen aurkezpena, eta segidan bazkaria izan da. Arratsaldean, 17:30ean playback emanaldiak hartuko du lekukoa, eta ondoren Skapaie elektrotxarangak girotuko ditu kaleak. Gauean, berriz, Mirua, Iratzar erromeria eta Elepunto taldeen kontzertuek emango diote jarraipena jai giroari.

Goienolak azpimarratu du aurtengo jaietan giro herrikoia eta parte-hartze handia nagusitzen ari direla. “Jende asko dabil, giro oso ona dago eta aurten jai politak izaten ari dira”, adierazi du.

Berriatuko San Gregorio jaiek domekara arte jarraituko dute; bihar Herri Kirolak eta Tapia eta Leturiaren emanaldia izango dira jaiak agurtzeko azken ekitaldi nagusiak. Hilaren 16ra arte egongo da zegaz ondo pasa.

Jolas artean hasi dituzte sangregorioak

Lea-Artibai eta Mutrikuko Hitza — 2026-05-08 15:31:33

Berriatua prest dago jaietako bigarren asteburuari hasiera emateko. Gaur [maiatzak 8], jardueraz beteriko eguna izango da. Goizean, 10:00etatik 13:00etara, umeentzako jolasak egin dituzte. Herriko plaza umeekin eta gurasoekin bete da. Giro herrikoian eta onean umeek puzgarrietan jolastu dute goiz osoa, eta marrazketa zein kareten tailerretan parte hartu dute. Arratsaldean, 18:00etan, Kataluniatik etorritako ordezkaritza bati ongietorria egingo zaio, eta 19:30ean, Sarats Dantza Taldearen emanaldia izango da. Gauari amaiera emateko, 22:30etik aurrera, kontzertu gau handia izango da. Azken orduko aldaketa baten ondorioz, Shibari taldeak ordezkatuko du Arlanka, osasun arazoengatik baja hartu ostean; hala ere, Txuleria Joder! eta Añube taldeek ere euren emanaldiak eskainiko dituzte. Eskualde osotik jendea erakartzea espero dute antolatzaileek.

Halaber, egitaraua eguenean [maiatzak 7] hasi zen kaxeroen jaitsiera tradizionalagaz. Jaietako ekitaldirik esperoenetakoa izan da, eta aurten berezia izan da, izan ere, pregioia herriko gazte eta umeek hartu baitute euren gain. Kaxeroaren eta monitoreen arteko elkarrizketaren bidez, belaunaldi berrien indarra eta herriko etorkizunean izango duten protagonismoa nabarmendu zituzten, “Lore Berri” ekimenaren bitartez herriko gazteen parte-hartzea eta aniztasunarekiko errespetua aldarrikatuz. Bertso eta aldarrikapen artean, errespetua, askatasuna eta elkarbizitza izan ziren mezu nagusiak, eta amaieran oihu ozenez goraipatu zituzten Berritxuko umeak, gazteak, kultura desberdinak eta Kaxero bera. Aurten ere 40 bat lagunek, ume zein helduk, parte hartu dute herriko kaleetan barrena egindako kalejiran, eta antolatzaileek herritarrak mozorrotuta irtetera eta giroan murgiltzera animatu dituzte. Ondoren, 19:30ean, Olatz eta Aiza bikotearen musika emanaldia egon zen.

Egitarauak domekan [maiatzak 10], jarraituko du herri kirolen aldeko apustuagaz. 12:00etan, aizkolari eta harri-jasotzaile ezagunek parte hartuko duten probak egingo dira. Arratsaldean, 19:00etan, Tapia eta Leturia taldearen kontzertuak emango dio amaiera asteburuko egitarau nagusiari. Antolatzaileen arabera, publiko zabalago bati zuzendutako proposamena da, musika eskaintzari aniztasuna emateko helburuagaz.

Egun batzuetako etenaldiaren ostean, jaiak maiatzaren 14an itzuliko dira Ekai Lersundiren dokumentalaren emanaldiarekin, LGTBIfobiaren aurkako egunaren harira antolatuta. Amaiera handia maiatzaren 16an iritsiko da, BTT martxagaz, zesta punta probagaz eta 38. San Gregorio Txapelketako finalakaz.

Antolatzaileek mezu argia zabaldu dute: jaiak gozatu, ekitaldi guztietan parte hartu eta ospakizunak errespetuz eta elkarbizitzaz bizitzea, Berriatuk beste behin jai gogoangarriak bizi ditzan.