Lea-Artibai eta Mutrikuko Hitza

27. Zapato Azulak urdinez tindatu du Ondarroa

Lea-Artibai eta Mutrikuko Hitza — 2026-06-27 16:22:15

Azken egunetako bero sargoririk barik esnatu da gaur [ekainak 27] Euskal Herria, eta gustura hartu dute hori Ondarroara joan direnek. Kamiseta urdinak armairutik atera, eta Alde Zaharra goitik-behera eta ezker-eskubi bete dituzte bertaratu direnek. Herritarrak, inguruko herrietakoak nahiz Euskal Herriko hamaika txokotatik bertaratutakoak elkartu ditu gaur Radixu Irratiak antolatzen duen 27. Zapato Azulak Ondarroan. Hala, aurtengo kartelean keinu egin dioten Felix Beristainen koadro baten antzera, urdinez tindatu dira herriko txoko guztiak.

11:00etarako prest zeuden Radixu Irratiako kideak zuzeneko emisioagaz batera jaiari ekiteko, eta egunaren nondik norakoak azaldu ostean, Koldo Azpiazuk hartu du mikroa. Hain zuzen ere, iaz hartu zuen Azpiazuk Nekane Akarregiren erreleboa, eta aurtengoan ere berea izan da jaiari hasiera emateko ardura. Hala, urtero bezala, Alai Tabernako balkoiak bereganatu ditu begirada guztiak, eta bertan zeudenek adi jarraitu dituzte Azpiazuk esandakoak. Nola ez, Manuel Eluren bolanderek ere ez dute hutsik egin, eta 12:00etan egin du eztanda jaiak, bolandera eta bolandera artean.

Bolandera ugari bota ostean jaiak ez du etenik izan, eta urteroko osagaiekin osatu dute goiza. Txistulariak, Kresalako bandaren eta Artelango erraldoien kalejira nahiz falta direnak gogoan hartzeko tartea hartu dute herritarrek, eta Txalainak taldearen kontzertuak biribildu du goizeko jarduna. Abanikoak dantzan eta gorputzak ere bai, Hertzainak taldearen abesti ezagunenak abesteko tartea hartu dute Kalekutz inguruan batu direnek.

Zapato Azule berezia bada, Dinamartxaren ailegaera are bereziagoa da herritar askorentzat. Dina Bilbao Barruetabeñaren omenez Tolosa eta Ondarroa elkartzen dituzte martxalariek oinez nahiz bizikletan, eta irrintzi, txalo, oihu eta musika artean egiten diete harrera ondarrutarrek. Oinez egin duten 77 martxalarientzat bart 01:00etan hasi ziren Zapato Azuleko ekintzak, eta gaur 09:00etan, ostera, bizikletaz etorri diren 223 partaideentzat. Iazko parte hartze kopurua gaindituta (iaz 259 partaide eduki zituen), poztasunez nahiz emozioz betetako malko eta irribarreen artean sartu dira herrira 300 martxalariak.

Martxalariak, Alde Zaharrera heltzen.

Dinamartxako kide denak heldu ostean, aurtengo pregoia irakurri dute Radixuko kideek balkoitik. Besteren artean, Palestina, Saharan, Iran Libano eta Kubagaz gogoratu dira, eta zelan ez, baita Venezuelako herriagaz ere. Jarraian, denborarik galdu barik, aurtengo omendua izendatu dute. “Omendu guztiak dira bereziak, baina aurtengoa, Zapato Azule antolatzen dugun guztiontzat, bereziena da. Zorionak Nekane Akarregi Amutxastegi, zeu zara aurtengo omendua!”. Hala, Akarregi ezustean harrapatu du omenaldiak, baina irribarrez jaso du Radixukoen aipamena.

Ostean, 11:00etan zabaldu duten Euskal Herriko Kamiseta Azoka eta Artisau Azoka itxi, eta aurtengo kamisetarik eta erakusleihorik onenak izendatu dituzte. Kamiseta Azokan Ondarroako hiru postu eta Euskal Herriko beste hamahiru egon dira, eta Torontilek (Artea) irabazi du Euskal Herriko kamisetarik onenaren saria. Ondarroako kamisetarik onenaren saria, aldiz, Saturrarango Haitzak irabazi du, eta erakusleiho onenarena, Lorak Estherrek.

[ARGAZKI GALERIA]

Txo! Antzerki Kolektiboak omenduari egindako sketchagaz amaitu dute eguerdiko jarduna, baina jai luzea geratzen da oraindik Ondarroan. Arratsaldean mota eta gustu guztietako musika entzuteko aukera egongo da herriko txoko guztietan, eta jaiak ez du etenik izango goizeko ordu txikiak arte.

"Begirunez egindako esperientzia sentikor bat" dauka gordeta Arretxinagako ermitak

Lea-Artibai eta Mutrikuko Hitza — 2026-06-26 15:37:21

Ereinotz bat Arretxinagako ermitari. Prozesu luze baten ostean, Markina-Xemeingo balio handiko gunearen zaharberritze lanak amaitu dituzte, hala, San Migel ermita eraberrituta ikusteko hainbat herritar batu ziren atzo arratsaldean. Herritarrez gain, Zerutxu Dantza Taldeak eman zion ongietorria gune berrituari.

Begibistakoak dira ermitaren kanpoaldean egin dituzten lanak. Ermitaren kanpoko hormak kareorez berritu dituzte, kolore eta ehundura bereizgarriak emanez. Eraikina bakarrik ez, alboan dagoen probalekua ere berritu dute eta ikusleentzako armailak jarri dituzte. Lanak amaituta daudela adierazteko, Alde Zaharrean egin zuten era berean lotu zioten ereinotza ermitari.

Kanpoaldekoaldekoak ikusita, barrualdean jarri zuten begirada. Honetarako, ermitara sartu baino lehen, Jon Astorkiza eta Joseba Beristain artistek hartu zuten hitza, erakinaren barnealdean egindako arte proiektu berritzaileari buruzko nondik norakoak azaltzeko. Astorkiza izan da proiektuaren grafiko zuzendaria, eta Arretxinagan egon zen lehen aldian sentitu zuen “konexio handia” aitortu zuen bere berbaldian. Horregatik, toki honetarako “begirunez egindako esperientzia sentikor bat” sortu du. Azalpenekin jarraitzeko, Beristainek hartu zuen hitza. “Tokiko natura elementuen soinuekin eta sintetizadoreekin jolastuz”, sortu du esperientzia bisualari balio gehigarri bat emango dion soinu paisaia. Sei bozgoragailuk osatutako instalazio bat sortu du, eta hala, “txikia den espazio bat handitu egiten du”.

Instalazioaz gain, ikus-entzunezko pieza bat eskaintzen digu San Migel ermitak. Bertaratzen direnek QR bat aurkitu eta horren bitartez helduko dira piezara. Eneritz Artetxe aktore gernika-lumotarrak gidatuko du ikuslea lau hizkuntzatan (euskeraz, gazteleraz, frantsesez eta ingelesez) entzun daitekeen piezan. Ermitari eta hau inguratzen duen artearen historiari buruz ari da Artetxe ikus-entzunezko horretan, “bisitaria leku honen magiarkein, unibertsoarekin, naturarekin eta bizitzarekin lotzeko”.

Aurkezpena amaituta, ermitako ateak zabaldu zitzaizkien herritarrei, eta orduan izan zuten instalazioa ezagutu eta tokiarekin konektatzeko aukera. Bertaratzen direnek ermita zabalik dagoen artean izango dute esperientzia bizitzeko aukera.

"Giro herrikoia" nagusitu da Etxebarriko Ganadu Azokan

Lea-Artibai eta Mutrikuko Hitza — 2026-06-13 15:27:18

Eguzkia, taloak, hamaika postu eta animaliak izan dira beste urte betez Etxebarriko Ganadu Azokak batu duena. Herriko eta inguruko abeltzain zein ekoizleen elkargune bihurtu da gaur [ekainak 13] Galartza industriagunea. “Etxebarrian lehenengo sektorean hainbat lagun egiten dugu lan eta hemen dauden animali guztiak bertokoak dira”, adierazi dute abeltzainek. Ez hori soilik, abeltzainek aitortu dute gazte askok lehen sektorean egiten dutela lan eta belaunaldien arteko erreleboa dagoela. Guztira 225 ganadu buru batu dira industriagunean: 23 zaldi, 27 poni, 51 ahuntz, 38 asto eta 89 ardi. Aurten, dermatosis nodularra gaixotasunagatik ez dituzte behirik ekarri.

Giro ederra, herrikoia eta eguzkitsua nagusitu da goizean. Animaliez gain, ekoizleen hainbat postu ere egon dira azokan, eta inguruko herritarrak postu batetik bestera ibili dira erosketak egiten. Jateko eta edateko aukera ere egon da; horiek horrela, txosnak inguruan zituen mahaiak jendez beteta egon dira.

Arratsaldean ere, plana Etxebarrian egongo da. Ganadu Azoka amaituta, II. Artzain Txakurren lehiaketa ospatu dute Errekarte auzoko zelaian, eta 18:00etan hasi zen artzain txakurren lehia. Partaideei dagokionez, sei dira erakustaldia egingo duten txakurrak: Igor Elordi, Lagun txakurragaz (Barinagatik); Mikel Pagazartundua, Lay txakurragaz (Lemoatik); Angel Gerediaga, Uda txakurragaz (Getxotik); Javier Gastañaga, Fol txakurragaz (Antzuolatik); Pello Segurola, Yak txakurragaz (Matxinbentatik) eta Xabier Gaztañaga, Sandy txakurragaz (Antzuolatik). Mikel Garalar eta Bittor Bengoetxea ariko dira epaile lanetan.

Txapelduna Mikel Pagazartundua, Lay txakurragaz (Lemoatik) izan zen; bigarrena, Igor Elordi, Lagun txakurragaz (Barinagatik); eta, hirugarrena, Javier Gastañaga, Fol txakurragaz (Antzuolatik).

Abeltzain eta ekoizleen Ganadu Azoka hartuko du Etxebarriak

Lea-Artibai eta Mutrikuko Hitza — 2026-06-11 12:40:53

Etxebarria ekoizle eta abeltzainen topagune izango da zapatuan [ekainak 13]. Urtero legez, lehen sektorea bultzatzeko Ganadu Azoka ospatuko dute Galartza industrialgunean, eta Etxebarriko eta inguruetako produktu zein abereen erakusleiho izango da 10:00etatik 14:00etara. Ekoizleek ekarriko dituzten produktuen artean, gazta eta ogien bina postu, eta gildak, berakatz beltza, eztia, garagardo artisauak, ahatekiak eta lorak erosteko postu bana egongo da. Animalien kasuan, 225 abereren erakusketa eta salerosketarako aukera egongo da: guztira, 23 zaldi, 27 poni, 51 ahuntz, 38 asto eta 89 ardi ekarriko dituzte. Dermatosi Nodularra ekiditeko neurriak direla eta, ez da behirik egongo aurten.

Artzain txakurren erakustaldia. Ganadu Azoka amaituta, II. Artzain Txakurren lehiaketa ospatuko dute Errekarte auzoko zelaian, eta 18:00etan hasiko da artzain txakurren lehia. Partaideei dagokionez, sei dira erakustaldia egingo duten txakurrak: Igor Elordi, Lagun txakurragaz (Barinagatik); Mikel Pagazartundua, Lay txakurragaz (Lemoatik); Angel Gerediaga, Uda txakurragaz (Getxotik); Javier Gastañaga, Fol txakurragaz (Antzuolatik); Pello Segurola, Yak txakurragaz (Matxinbentatik) eta Xabier Gaztañaga, Sandy txakurragaz (Antzuolatik). Mikel Garalar eta Bittor Bengoetxea ariko dira epaile lanetan.

Udaburuko dantzak ikasteko aukera egongo da Etxebarrian

Lea-Artibai eta Mutrikuko Hitza — 2026-06-09 11:04:06

Udarburuko dantza ikastaroa antolatu dute Etxebarrian beste urte batez. Suaren inguruan dantza egin nahi? galdera eginez, Etxebarriko herritar guztiak gonbidatu nahi dituzte gar inguruetan egiten diren dantzak ikastera. Horretarako, eguenean [ekainak 11] egingo dute lehen entsegua, eta beste bi saio antolatu dituzte ekainaren 18rako eta ekainaren 23rako. Hiru egunetan, herriko frontoian batuko dira 18:00etan.

Pertsona bakoitzak bi zapi ekartzeko eskaera egin dute.

Daniel Diaz Bejaranok irabazi du IX. Etxebarriko Sari Nagusia

Lea-Artibai eta Mutrikuko Hitza — 2026-06-08 10:45:51

Markina-Xemeingo Txirrindulari Elkarteak Etxebarriko VII. Sari Nagusia antolatu zuen zaptuan [ekainak 6]. Hain zuzen ere, lasterketa Euskadiko Txirrindularitza Federazioak antolatutako Gaztetxoak Txapelketako azken proba izan zen. Izena eman zuten kadete mailako 186 txirrindulariek 61,7 kilometroko eta 800 metroko desnibel positibo metatua duen ibilbideari egin behar izan zioten aurre. Txirrindulariek Etxebarritik hasi eta Markina-Xemeindik, Berriatutik eta Ondarroatik pasatu ziren. Hortik, Mendexarako bidea egin zuten, Lekeitiotik pasa eta Amorotora abiatuz. Ostean, Gizaburuaga, Aulesti, Munitibar eta Ziortza-Bolibar igaro zuten. Markina-Xemeindik igaro ostean, Etxebarrian amaitu zuten lasterketa.

Helmugara heltzen azkarrena Daniel Diaz Bejarano izan zen, eta, berarekin bartera, podiuma Xabat Martin Mariezkurrenak eta Paul Reyk osatu zuten. Taldeka, ordea, Cafe Dromedario-Flotamet taldea gailendu zuen.

Lea-Artibaiko ordezkaritza ere egon zen, Amets Uranga Arostegi eta Aner Burgaña Jaramillo, biak ondarrutarrak, F2 informatika taldekoak. Etxebarriko sarian, eskualdeko txirrindularien artean banatzen dena, lehen postuan sailkatzen dena saritzen da. Aurten, Uranga izan da irabazlea.

Lea-Artibaiko errepideek Etxebarriko IX. Sari Nagusia hartuko dute

Lea-Artibai eta Mutrikuko Hitza — 2026-06-04 16:07:00

Etxebarriko IX. Sari Nagusia lehiatuko dute txirrindulari gaztetxoek zapatuan [ekainak 6]. Bizkaiko, Gipuzkoako, Arabako eta Nafarroako txirrindulariak batuko ditu Etxebarriak, eta 10:15ean herrigunetik hasiko da 61,7 kilometroko eta 800 metroko desnibel positibo metatua duen ibilbidea. 198 txirrindulari ariko dira norgehiagoka Lea-Artibaiko errepideetan; Etxebarritik hasi eta Markina-Xemeindik, Berriatutik eta Ondarroatik pasako dira. Hortik, Mendexarako bidea egingo dute txirrindulariek, Lekeitiotik pasa eta Amorotora abiatuz. Ostean, Gizaburuaga, Aulesti, Munitibar eta Ziortza-Bolibar igaroko dituzte. Markina-Xemeindik, Etxebarriara itzuliko dira.

Sugarren Mende komikia izango dute hizpide Etxebarrian

Lea-Artibai eta Mutrikuko Hitza — 2026-06-02 12:38:32

Etxebarriko Irakurketa Txokoak ateak zabaldu ditu beste behin. Asisko Urmeneta irudigile eta komikilaria Etxebarriko Kultur Aretoan izango da Sugarren Mende komikiari buruzko solasaldian. Barikuan [ekainak 5] 18:30ean Urmenetagaz solasaldian parte hartzeko aukera izango dute, eta baita aztergai izango duten komikiari buruz galdetzeko ere. Etxebarriko Euskara Batzordeak adierazi duen bezala, Sugarren Mende irakurri nahi duten herritarrek herriko liburutegian eskatu ahal izango dute.

Nahia Ibarzabal eta Gaizka Sotil nagusitu dira Etxtrail lasterketan

Lea-Artibai eta Mutrikuko Hitza — 2026-05-26 16:13:02

Txik Txak Kirol Elkarteak eta Etxebarriko Udalak antolatuta, I. Etxtrail proba hartu zuen Etxebarriak joan den zapatuan [maiatzak 23]. 200 lagunetik gora izan ziren bi ibilbideek batu dituzten kirolariak, eta estreinakoz antolatu den lasterketan “giro oso ona” sortuta, oso pozik agertu dira antolatzaileak.

Eskualdeko bi irabazle izan ditu lasterketak bere lehen urtean: 14 kilometroko eta ibilbide laburrean, Nahi Ibarzabal Gisasola markina-xemeindarrak eraman zuen urrezko domina, 01.39,25ko markarekin. Ibarzabalek Leire Etxebarria izan zuen podiumean lagun; lekeitiarrak hirugarren postua lortu zuen, ibilbidea 01.41,35eko denboran egin ostean. Gaizka Sotil Etxabek ikuskizuna eman zuen bere herrian; etxebarritarrak 01.16,00ko denboran amaitu baitzituen egin beharrekoak. Sotilen atzetik eta bigarren postuan, Mikel Goikoetxea Guridik amaitu zuen lasterketa 01:18,20ko denboran. Ondarroak ere izan zuen ordezkaritza podiumean, Endika Beiro Monasteriok 1.22,10eko denboran amaitu baitzuen ibilbidea.

Ibilbide luzeari dagokionez, Ibon Badiolak 02.04,50ko denboran egin zituen zuen 25 kilometroak, eta hala lortu zuen bigarren postua, Unai Fernandez arabarraren atzetik. 1.480 metroko desnibel metatua zuen bideak, eta lan erraza izan ez bazen ere, Josu Urrutia Zubikaraik 02.11,45ko denboran gurutzatu zuen helmuga.

Ibilbide motzeko podiumeko sarituak.Txik Txak Kirol Elkartea

Ibilbide luzeko nesken podiuma.Txik Txak Kirol Elkartea

Ibon Badiola eta Josu Urrutia ibilbide luzeko podiumean.Txik Txak Kirol Elkartea

Turtziozek hartuko du barikuan Bizkaiko Eskola Txikien Topaketa

Lea-Artibai eta Mutrikuko Hitza — 2026-05-26 15:12:38

Bizkaiko Eskola Txikien Topaketa antolatu dute barikurako [maiatzak 29] hirugarren urtez. Herri txikietako eskolen bilkura Turtziozen izango da aurten, eta lau eta zortzi urte arteko 450 haur baino gehiago batuko dira bertan. Hala, “egun osoko jai eta elkarbizitza egitarau” handia antolatu du Turtziozko Eskolako Guraso Elkarteak. Bertan izango dira Lea-Artibaiko haurrak, Amoroto, Ispaster, Aulesti, Munitibar, Berriatua eta Etxebarriko eskoletatik joango direnak.

Turtziozko Eskolak adierazi duen bezala, barikuko topaketarako egun osoko egitarau “erakargarria” antolatu dute: Goizean goizetik, euskal abereen azoka egongo da ikusgai, eta haurrek “gertutik ezagutu ahal izango dituzte bertako animaliak”. Jolasteko eta ondo pasatzeko momentua ere izango dute, “elkar ezagutzeko eta lagun berrian egiteko” helburuarekin antolatutako jolasen bidez.

Bazkalordurako, “giro hurbil eta polita” sortzeko eta jolasen ostean indarberritzeko asmoarekin bazkaria antolatu du Turtziozeko Eskolak. Gainera, jaiari amaiera emateko ikuskizun “berezia” antolatu dute. Hori amaitutakon, haur bakoitza bere herrira bueltatuko da aurrez antolatutako autobusetan.

“Landa eremuko ikastetxeen arteko loturak sendotzeko” helburuarekin antolatu dute Eskola Txikien Topaketa; beste urte batez, haurrei elkarrekin egoteko eta “errealitate bereko kideekin ondo pasatzeko aukera emanez”. Honetaz gain, “landa-eremuko eskolak bizirik daudela eta hezkuntzaren parte garrantzitsua dela ” adieraztea dute helburu.

Etxebarria "unibertso euskaldun" bihurtu dute

Lea-Artibai eta Mutrikuko Hitza — 2026-05-19 14:00:38

Hainbat herritar batu zituen Eusfera Egunak joan den domekan [maiatzak 17] Etxebarrian. Herriko plaza apaitzen, esperientziak partekatzen edo bertsotan aritu ziren euskara erdigunean jarriz. Haur zein heldu, herritar guztiek izan zuten bertaratzeko eta “unibertso euskaldun” bat eraikitzeko bidean parte hartzeko aukera. Altxorraren bila aritu ziren jolasean, eta haur txikienenentzat ere jolasak prestatu zituzten. Eguna gogoratzeko argazkia atera eta nagusiek kopauarekin amaitu zuren eguna.

Etxtrail mendi jaia hartuko du Etxebarriak, estreinakoz

Lea-Artibai eta Mutrikuko Hitza — 2026-05-14 11:55:19

Etxebarritar zein mendizaleek hitzordu berria izango dute maiatzaren 23an [zapatua], udalerriak trail lasterketa eta mendi martxa “berezia” hartuko baititu estreinakoz: Txik Txak Kirol Elkarteak eta Etxebarriko Udalak antolatutako I. Etxtrail proba. Gaur gaurkoz 110 lagun baino gehiago daude antolatzaileek “ilusio handiz” prestatu duten ekimenean parte hartzeko izena emanda, baina eguna iritsi bitartean “kopurua handitzea” aurreikusten dute: izen ematea zabalik dago maiatzaren 22a bitartean [barikua], karteletan jarritako QR kodearen bitartez.

Herriko hainbat elkarte eta boluntariok bat egin dute ekimena aurrera eramateko, eta parte hartzaileen gozamenerako bi ibilbide prestatu dituzte: trailean dabiltzanak zein mendi martxa aukeratzen dutenek ibilbide luzea eta laburra izango dituzte aukeran. Ibilbide luzea 25 kilemetrok eta 1.480 metro positibodun desnibel metatuak osatuko dute eta laburrra, berriz, 14 kilometro eta 830 metro desnibelduna izango da. “Bi aukerek inguruko paisaia eta mendiez gozatzeko aukera emango dute, maila ezberdinetako kirolariei eta mendizaleei egokituta”, nabarmendu dute.

Ibilbide guztiak herriko plazan hasi eta amaituko dira. Ordutegiari dagokionez, mendi martxa luzean izena ematen dutenak 08:00etan aterako dira, eta ibilbide laburrekoak, 09:00etan. Trail luzearen irteera 09:30ean ipini dute eta motzearena, 10:00etan. Proba amaitu ostean, nahi dutenek bertan dutxatzeko aukera izango dute. Gainera, trail probetako parte hartzaileek kamiseta oroigarria jasoko dute, eta proba guztietan izena eman dutenentat zozketak egingo dituzte.

Probak izandako “harrera bikainagaz pozik” dago antolakuntza, mendi ekirol eta herri ekitaldiek eskualdean duten “indarra eta interesa” erakusten dituelako. Horregatik, aurtengoa Etxtrail-aren lehen aldia izango bada ere, “urteetan zehar erreferente bihurtzea” dute xede: “Kirola, natura eta herri giroa uztartuko dituen hitzordu bat sortzea da helburua”.

Herriko elkarte, boluntario eta babesleen laguntza eguna aurrera eraman ahal izateko ezinbestekoa izango denaren jakitun, eskerrak eman dizkiete deitzaileek: “Haien inplikaziorik gabe ezinezkoa izango litzateke halako ekimen bat aurrera eramatea”. Era berean, mendia gustuko duen oro animatu nahi izan dute maiatzaren 23an Etxebarrira gerturatu eta “giro paregabeaz eta mendi jai egun batez gozatzera”.

Ekainaren 13an izango da Etxebarriko Ganadu Azoka

Lea-Artibai eta Mutrikuko Hitza — 2026-05-12 13:06:30

Aurten ere, Lea-Artibai eta inguruetako ganaduen plaza bihurtuko da Etxebarria, ekainaren 13an [zapatua] egongo den Ganadu Azokagaz. Bertan, animalien erakusketa eta salerosketa egiteko aukera egongo da, baita elikagaiak erosteko aukera ere.

Etxebarriko Udalak jakinarazi duenez, azokan parte hartu nahi dutenek, gehienez ere, maiatzaren 15erako eman beharko dute izena. Hala, eskaerak aurkezteko bi bide zabaldu dituzte: udaletxean (09:00etatik 14:00etara) edo emailez udala.etxebarria@bizkaia.org helbidera idatzita.

Postua jartzeko orduan hainbat baldintza bete beharko dituzte partaideek, eta doakoa eta librea izango den arren, dieta jasotzeko, erakusketako animaliak herrikoak izan beharko dira. Sei hilabetetik gorako animaliek jasoko dituzte dietak; jabe bakoitzak abere mota bakoitzeko gehienez lau bururen dietak kobratu ahalko ditu. Zaldi, behor, mando, asto eta poniak eroaten dituztenek 75 euro jasoko dituzte buruko; behi, txahal eta idiek, berriz, 115 euro jasoko dute buruko. Sei hilabetetik gorako loteei, berriz, 120 euro emango dizkiete: loteak bederatzi ardik eta ahari batek edo bederatzi ahuntz eta aker batek osatutakoak izan beharko dira.

Horrez gain, euskal arrazako etxabereak eramaten dituztenek izena ematean ziurtagiria aurkeztu beharko dute, eta honela banatuko dituzte dietak: oilo, untxi, antzara, ahate eta ahuntzen lote bakoitzeko (bi eme eta ar batek osatuta) 60 euro emango dituzte, eta euskal artzain txakur bakoitzeko, berriz, 25 euro jaso ahalko dituzte.

Izena emateko orduan, osasun arloan indarrean dauden arauak bete beharko dituzte; beraz, beharrezkoa izango da animalien kartilla aurkeztea, presentzialki edo e-mail bidez. Gainera, azokak iraun bitartean, animaliak sokan lotuta egon beharko dira.

Animalien azokagaz gain, produktuen azoka ere egongo da ekainaren 15ean. Besteak beste ortuariak, gaztak, gozokiak, eztia, jogurtak, esnekiak eta ogia bezalako produktuak egongo dira salgai. Postua jarri nahi dutenentzat kasetak ipinita egongo dira, eta postu bakoitzari 100 euroko dieta ordainduko diete. Guztira, 10 postu egongo dira: hiru postu gaztagintza eta esnekiak, postu bat ogia eta gozogintza, beste bat eztiarena eta beste bost postu bestelako produktuekin. Postuak esleitzeko irizpideak udaleko webgunean argitaratu dituzte.

Santixau Jaietarako kartel lehiaketa abian da

Lea-Artibai eta Mutrikuko Hitza — 2026-05-06 15:10:58

Etxebarriko Udalak herriko jaietako kartel lehiaketa martxan dagoela iragarri du. Santixau Jaiak iragarriko dituen kartelaren bila dabiltza, eta horretarako, diseinuek bete beharko dituzten oinarri eta arauak argitaratu dituzte.

Kartelak bakarka edo taldeka aurkezteko aukera izango dute, hala ere, egile edo egileek lan bakar bat aurkeztu ahalko dute. Lanak jatorrizkoak izan beharko dute, eta aurretik argitaratu barik daudenak bakarrik onartuko dituzte. Testuari dagokionez, SANTIXAU JAIAK 2026 ETXEBARRIA ikusgai egon beharko da diseinuan, eta erabiltzen den testu oro euskeraz idatzita egon beharko da. Kartel bakotizak titulu edo goitizen bat izan beharko du.

Lanek formatu jakin bat izan beharko dute: diseinu bertikala izan beharko da, A3 neurrian. Inteligentzia artifizialaren erabilerarik ez dela onartuko azpimarratu du udalak, hala, diseinatzaile bakoitzaren originaltasuna nabarmendu nahi dute.

Lanak aurkezteko bi bide zabaldu ditu udalak. Paperean aurkezteko, kartelak atzeko aldean eraman beharko du goitizena. Lanarekin batera, gutun-azal bat aurkeztu beharko da, eta horren barruan egilearen izena, helbidea eta telefonoa idatzita egongo da. Lanak euskarri digital baten bidez aurkezteko, gutun-azalaren barruan USBa eta egilearen datuak sarut beharko dira. Artxibo digitalaren izena lanaren goitizena izango da.

Hala, lanak Etxebarriko Udalexean aurkezteko aukera egongo da ekainaren 5era arte. Astelehenetik ostiralera, 09:00etatik 14:00etara ariko dira lanak batzen, udaletxeko bulegoan. Epaimahaiak, lanaren kalitate artistikoa, sortzen duen interesa, xehetasunen koherentzia eta iragartzeko ahalmena kontuan hartuta erabakiko du kartel irabazlea.

Unai De La Dehesak eta Olatz San Miguelek menderatu dituzte Lea-Artibaiko errepideak

Lea-Artibai eta Mutrikuko Hitza — 2026-05-04 16:26:32

Motor hotsen eta abiaduraren zaleek goraino bete zituzten Lea-Artibaiko bide bazterrak joan den zapatuan [maiatzak 2]. Eskualdeko zein kanpotik etorritako rallyak ikusteko aukera egon zen barikuan Markina-Xemeinen egindako irteera ekitaldian, eta zapatuan heldu zen zaleek hainbeste itxarondako lasterketa. Espainiako estatu mailan S-CER txapelketan konpetitzen ari den Unai de la Dehesa pilotuak eta bidean lagun izan duen Olatz San Miguel kopilotuak eraman dute XIV. Lea-Artibai Rallye lasterketako txapela.

“Inoiz baino jende gehiago” erakarri du aurten hamalaugarrenez ospatu duen Lea-Artibai Rallye txapelketak, eta barikuko irteera ekitaldian eta zapatuko lasterketan sortu zen “giro ona” azpimarratu dute Kastinparro Racing taldeko antolatzaileek. Eguraldiari begira pasa zuten asteburua zale, pilotu eta antolatzaileek. Lea-Artibain lasterketak egitea “kaos” bat izan ohi da eguraldi aldetik, eta oraingoan ere, urduritasun eta zalantza asko piztu dituen aldagaia izan da. Autoak azken unera arte altxatuta izan zituzten pilotuek, lehorreko edo euritarako gurpilak muntatu erabakitzen zuten artean. Gurpilen hautaketa izan zen asteburuko buruhausterik handiena, eta erabat erabakigarria izan zen egindako aukeraketa.

Unai De La Dehesa XIV. Lea Artibai Rallyen.Ander Zelaia

Espainiako estatu mailan kotxerik onena eta kilometro askoko ibilbidea dauka Unai De La Dehesa Pilotu burgostarra ikuskizuna eskaintzera etorri zen eskualdera, eta zale askok aurreikusi bezala, bere Citroen C3 Rally 2 autoa izan zen lehena lasterketaren tarte guztietan, 01.01:37ko markarekin. Txapeldunak ia lau minutuko tartea atera zien bigarren postua lortu zuten Aingeru Castro eta Alaitz Urkiolari, hala ere, errepideak menderatu eta bigarren postua emango zien lasterketa ikaragarria egin zuten. Ioritz Odiaga eta Iker Mintegia Kastinparro Racing taldean lehiatzen duen bikotearen Citroen C3a atzeragoko postuetan hasi zen egunaren lehen zatian, hala ere, azken tarteetan, euritan gidatzeko trebetasunak erakutsi eta aurrea hartzea lortu zuten, hirugarren postua eurenganatuz. Laugarren postua lortzeko lehia oso handia izan zen Iraitz Olariaga eta Ion Zubiaurreren rallyaren eta Mikel Gandiaga eta Anton Gandiagaren rallyaren artean. Hala ere, 20 segundoko aldea erabakigarria izan zen laugarren postua Olariaga eta Zubiaurreren Honda Civicari emateko.

Ioritz Odiaga, XIV. Lea-Artibai Rallye txapelketan.Txebi Arriaga

Irten aurreko ezustekoak. 67 autok eman zuten izena lasterketan parte hartzeko, hala ere, ezusteko eta gora-beherak zirela eta, 30 rallyk amaitu zuten lasterketa. Aurtengo kinielan, zale askok Gorka Antxustegiren eta Garikoitz Lopezen aldeko apustua egin zuten, baina aurreikuspenek ez ziren lasterketan gertatutakoarekin bat egin. Oso lasterketa ona egin behar zuen Gorka Antxustegik, baina bere Renault Clio Williamsaren motelgailuak arazoak eman zizikion goizeko lehen tartean, eta beranduago lasterketa berrartu bazuen ere, ez zuen jada irabazteko aukerarik izan. Lopezek eguna oso ondo hasi zuen, eta lehen bosten artean amaitzeko aukerak bazituen ere, ez zuen gurpilekin asmatu eta motorrean arazo bat izan zuen, podiumera igotzeko aukera galduz.

Antolakuntzako kideek Gorka Idigoras eta Nerea Campos pilotuak gogoratu nahi izan dituzte Gizaburuagan izandako istripuaren ostean. Antolatzaile eta zaleek susto handia hartu bazuten ere, ospitalean egindako egiaztapenek ondo daudela adierazi dute, eta antolakuntzatik animoak eman nahi izan dizkie pilotu eta kopilotuari. Gainera, esker bereziak eman nahi izan dizkie laguntzaile, babesle, udal eta kolaboratzaileei, baita zale guztiei ere, emandako babesagatik.

Mikel Gandiaga lasterketan.Txebi Arriaga

Indar eta gogo handiz. 2003. urtean hasi zen Kastinparro Racing taldea auto lasterketak antolatzen. Rallyen modalitateko hamalaugarren lasterketa izan da aurtengoa, eta antolakuntza lanetan aritzen diren kideek lasterketan parte hartzen dute urtez urte. 10 lagunen lan nekaezinaren emaitza da asteburuan Etxebarria eta inguruetan bizitakoa, eta beti “gogotsu” antolatzen badute ere, lan handia dela aitortu dute taldekideek. Beti “puntu bat gehiago” ematen saiatzen dira, ibilbide tarte berri bat antolatzen edo bi eguneko ekitaldia egiten. Urtero gero eta jende gehiago erakartzen du ekitaldiak, eta horren izena ezagunago egiten den heinean, lan kargak ere gora egiten duela ikusten ari dira. Hori horrela, antolakuntza arduratuta agertu da: “Jasotzen dugun erantzunagatik jarraitzen dugu, baina ikusten ari gara atzetik ez datorrela inor. Egunean bertan laguntza izugarria izaten dugu, 200 lagunetik gora hurbiltzen dira euren alea jartzera, baina ez daukagu bermatuta hurrengo belaunaldiek hau antolatzen jarraituko dutenik”. Hala ere, ardurak alde batera uzteko gaitasuna izaten dute urtero, “gogotsu eta indartsu” dabil Kastinparro Racing antolakuntza lanetan, eta datorren urtera begira, badabiltza zer gehitu pentsatzen.

Zesta-punta eskolen topaketa egin dute Markina-Xemeinen

Lea-Artibai eta Mutrikuko Hitza — 2026-04-28 12:38:09

Urte luzez egin duten bezala, Euskal Herriko zesta-punta eskolen topaketa egin zuten joan den zapatuan [apirilak 25]. Markina-Xemeinen batu ziren hainbat herritako eskoletako umeak, eta elkar ezagutzeko eta sarea handitzeko aukera bikaina izan zuten. Eskolarteko topaketan, benjaminen, haurren eta kimuen kategorietako umeak izan ziren protagonista.

125 haur batu ziren guztira. Kategorietan banatuta, Markina-Xemeingo Uni frontoian, herriko frontoi txikian, Barinagako frontoian eta Etxebarrian jokatu zituzten zenbait partida. Benjaminak Markina-Xemeingo eta Barinagako frontoi txikietan batu ziren, kimuak Etxebarrian eta haurrak Markina-Xemeingo Uni frontoian batu eta sei kiniela jokatu zituzten frontoi bakoitzean. Partiden ostean, 300 lagunetik gora batu ziren Plazabarripean, eta honen ostean, eguna gogoratzeko balio izango duen argazkia atera zuten.

Ume, guraso eta eskoletako irakasleak oso pozik agertu dira zapatuko egunarekin. “Giro oso ona” sortu zela adierazi dute, eta honelako egunek duten garrantzia eta helburua azpimarratu dute: “Topaketen helburua umeek lagun berriak egitea eta frontoi berrietan jokatzeko aukera ematea da. Honetaz gain, zesta-punta bultzatzea da helburu nagusia”.

Asteburu honetan ere berriro batuko dira Bidarten egingo den eskolen topaketa handian. Jende asko batuko dela aurreikusten dute, izan ere, iparraldeko eskoletako ume asko etortzen dira bertara. Markina-Xemeingo eskolatik ere, bertara joango dira zesta-punta bultzatzera eta saretzen jarraitzera.

Pintxo Bidea: ostalaritzari bultzada txiki bat

Lea-Artibai eta Mutrikuko Hitza — 2026-04-17 09:00:12

Bide bera jarraitzeko asmoarekin antolatu dute Pintxo Bidea aurten ere, pintxoak dastatzeko, tabernarien lana bultzatzeko eta gastronomiaren bitartez jendea herrira erakartzeko. Markina-Xemein bizirik mantentzen duten ostalarientzat erakusleiho entzutetsu bihurtu da Pintxo Bidea. Hamalau taberna dira aurten pintxoz pintxo aritzeko bidea eraiki dutenak

Apirilaren 23an hasi eta 26ra arte egongo da pintxoak dastatzeko aukera. Lau egun horietan, Markina-Xemeinen, Etxebarrian eta Ziortza-Bolibarren egongo da pintxoen eskaintza, 12:30etik 14:30era eta 18:30etik 21:30era. Pintxo bakoitzak 2 euroko kostua izango du, eta tabernek izango dute mokadu bakoitzaren alergenoak adierazteko ardura.

Fantasia, Baserriko Mokadua, Urxenpintx, Lur Kurruskaria edo Itsas Eztanda bezalako izenek ondo ordezkartzen dute pintxoek eskaintzeko daukaten guztia. Markina-Xemeingo Ilunpe, Irurok, iruzubi, Kindal, Melo’s, Mendibil, Mugarri, Vega, Noa, Sakris, Toldope eta Naroki tabernak izan dira saretzeko pausoa eman dutenak. Etxebarriko Antsotegi jatetxeko sukaldariek ere, iazko txapelketako garaipena errepikatzea dute helburu, eta aurten ere erakustaldia egiteko asmoekin datoz. Azkenik, Ziortza-Bolibarren ere egingo dute geldialdia pintxo zaleek, bidea egiten lagunduko baitu aurten Arkupe tabernak.

Dastaketa egin ondoren, gehien gustatu zaien pintxoaren aldeko botoa emango dute bezeroek. Tabernetan bertan aukituko dute botoa emateko Pintxo Bidearen orria. Tabernari bakoitzak bere zigilua jarriko du bezeroaren orrian, bertako pintxoa dastatu duenaren adierazle. Bezeroak, orri horretan bertan, bere datuak eta pintxo onenaren izena jartzeko aukera izango du. Botoa emateko, Hemen Be Bai elkartearen lokaleko postontzian sartu beharko du, Artibai kaleko 4. zenbakian.

Antsotegi jatetxeko SantaKroke Festa izan zen iazko irabazlea.Antsotegi Jatetxea

Aurrerapauso nabarmenak ematen ari da ekimena urtez urte, eta maila gero eta altuagoa ari da izaten. Horregatik, beste herri batzuetatik gero eta jede gehiago antzeman izan da azken aldietan, eta aurten ere, bide horietatik hobetzen jarraitzeko asmoa du Hemen Be Baik. Berritzailetik badu kanpainak, baita tradiziotik ere. Bertako produktuak erabiltzeak balio gehigarri bat ematen die pintxoei, eta bezero zein ostalariek hurbiltasun horren alde egiten dute.

Esker bereziak eman nahi izan dizkie Hemen Be Bai elkarteak elkarlanean aritu diren Markina-Xemeingo Udalari eta Etxebarriko Udalari. Hala, aintzat hartu dituzte Euskitze Likor Ardoak, Olasagasti Kontserbak, Ateun eta Guenaga harategiak, Onkaia arraindegia, Uronza, Mari eta Hipolita janari dendak, Larruz Gaztak, Xuri Burdindegia, Itziar optika, Tate gozotegia eta Ulemotx ileapaindegia, eskainitako laguntzagatik.

Sari banaketa. Joan diren urteetako ereduari jarraiki, lau izango dira banatuko dituzten sariak. Herriak emandakoa herriari bueltatzea helburu, merkataritza elkarteko establezimenduetan gastatzeko txekeak izango dira sariak.

Pintxo onenaren bi sari banatuko dira; lehena, 200 eurokoa, hainbat gastronomia sari jaso dituzten sukaldariek osatutako epaimahai profesional batek erabakiko du. Eguenean, apirilaren 23an, arituko dira Markina-Xemeingo bazter eta tabernak ezagutzen, eta sukaldariek euren pintxoa nola sortu duten entzuten. Bigarren saria herritarren esku utzi du markatari elkarteak: herritarren euren irizpide pertsonalen eta gustuen arabera emango dute botoa, eta horren arabera erabakiko da 100 euroko sariaren irabazlea.

Ostalari eta merkataritza elkarteak euren esker ona erakutsi nahi die bezeroei, horregatik, herritarrak ere saridun suertatu daitezke. Baina, nola funtzionatzen du honek? Bi zozketa abiaraziko dituzte antolatzaileek; lehenengoa, pintxo guztiak probatu eta zigilu guztiak batu dituztenen artean; bigarrena, pintxo onena asmatzen dutenen artean, gainerakoak probatu ez badituzte ere. Sariak eta zozketetako irabazleak maiatzaren 1erako argitaratuko dituzte.