Lea-Artibai eta Mutrikuko Hitza

27. Zapato Azulak urdinez tindatu du Ondarroa

Lea-Artibai eta Mutrikuko Hitza — 2026-06-27 16:22:15

Azken egunetako bero sargoririk barik esnatu da gaur [ekainak 27] Euskal Herria, eta gustura hartu dute hori Ondarroara joan direnek. Kamiseta urdinak armairutik atera, eta Alde Zaharra goitik-behera eta ezker-eskubi bete dituzte bertaratu direnek. Herritarrak, inguruko herrietakoak nahiz Euskal Herriko hamaika txokotatik bertaratutakoak elkartu ditu gaur Radixu Irratiak antolatzen duen 27. Zapato Azulak Ondarroan. Hala, aurtengo kartelean keinu egin dioten Felix Beristainen koadro baten antzera, urdinez tindatu dira herriko txoko guztiak.

11:00etarako prest zeuden Radixu Irratiako kideak zuzeneko emisioagaz batera jaiari ekiteko, eta egunaren nondik norakoak azaldu ostean, Koldo Azpiazuk hartu du mikroa. Hain zuzen ere, iaz hartu zuen Azpiazuk Nekane Akarregiren erreleboa, eta aurtengoan ere berea izan da jaiari hasiera emateko ardura. Hala, urtero bezala, Alai Tabernako balkoiak bereganatu ditu begirada guztiak, eta bertan zeudenek adi jarraitu dituzte Azpiazuk esandakoak. Nola ez, Manuel Eluren bolanderek ere ez dute hutsik egin, eta 12:00etan egin du eztanda jaiak, bolandera eta bolandera artean.

Bolandera ugari bota ostean jaiak ez du etenik izan, eta urteroko osagaiekin osatu dute goiza. Txistulariak, Kresalako bandaren eta Artelango erraldoien kalejira nahiz falta direnak gogoan hartzeko tartea hartu dute herritarrek, eta Txalainak taldearen kontzertuak biribildu du goizeko jarduna. Abanikoak dantzan eta gorputzak ere bai, Hertzainak taldearen abesti ezagunenak abesteko tartea hartu dute Kalekutz inguruan batu direnek.

Zapato Azule berezia bada, Dinamartxaren ailegaera are bereziagoa da herritar askorentzat. Dina Bilbao Barruetabeñaren omenez Tolosa eta Ondarroa elkartzen dituzte martxalariek oinez nahiz bizikletan, eta irrintzi, txalo, oihu eta musika artean egiten diete harrera ondarrutarrek. Oinez egin duten 77 martxalarientzat bart 01:00etan hasi ziren Zapato Azuleko ekintzak, eta gaur 09:00etan, ostera, bizikletaz etorri diren 223 partaideentzat. Iazko parte hartze kopurua gaindituta (iaz 259 partaide eduki zituen), poztasunez nahiz emozioz betetako malko eta irribarreen artean sartu dira herrira 300 martxalariak.

Martxalariak, Alde Zaharrera heltzen.

Dinamartxako kide denak heldu ostean, aurtengo pregoia irakurri dute Radixuko kideek balkoitik. Besteren artean, Palestina, Saharan, Iran Libano eta Kubagaz gogoratu dira, eta zelan ez, baita Venezuelako herriagaz ere. Jarraian, denborarik galdu barik, aurtengo omendua izendatu dute. “Omendu guztiak dira bereziak, baina aurtengoa, Zapato Azule antolatzen dugun guztiontzat, bereziena da. Zorionak Nekane Akarregi Amutxastegi, zeu zara aurtengo omendua!”. Hala, Akarregi ezustean harrapatu du omenaldiak, baina irribarrez jaso du Radixukoen aipamena.

Ostean, 11:00etan zabaldu duten Euskal Herriko Kamiseta Azoka eta Artisau Azoka itxi, eta aurtengo kamisetarik eta erakusleihorik onenak izendatu dituzte. Kamiseta Azokan Ondarroako hiru postu eta Euskal Herriko beste hamahiru egon dira, eta Torontilek (Artea) irabazi du Euskal Herriko kamisetarik onenaren saria. Ondarroako kamisetarik onenaren saria, aldiz, Saturrarango Haitzak irabazi du, eta erakusleiho onenarena, Lorak Estherrek.

[ARGAZKI GALERIA]

Txo! Antzerki Kolektiboak omenduari egindako sketchagaz amaitu dute eguerdiko jarduna, baina jai luzea geratzen da oraindik Ondarroan. Arratsaldean mota eta gustu guztietako musika entzuteko aukera egongo da herriko txoko guztietan, eta jaiak ez du etenik izango goizeko ordu txikiak arte.

"Begirunez egindako esperientzia sentikor bat" dauka gordeta Arretxinagako ermitak

Lea-Artibai eta Mutrikuko Hitza — 2026-06-26 15:37:21

Ereinotz bat Arretxinagako ermitari. Prozesu luze baten ostean, Markina-Xemeingo balio handiko gunearen zaharberritze lanak amaitu dituzte, hala, San Migel ermita eraberrituta ikusteko hainbat herritar batu ziren atzo arratsaldean. Herritarrez gain, Zerutxu Dantza Taldeak eman zion ongietorria gune berrituari.

Begibistakoak dira ermitaren kanpoaldean egin dituzten lanak. Ermitaren kanpoko hormak kareorez berritu dituzte, kolore eta ehundura bereizgarriak emanez. Eraikina bakarrik ez, alboan dagoen probalekua ere berritu dute eta ikusleentzako armailak jarri dituzte. Lanak amaituta daudela adierazteko, Alde Zaharrean egin zuten era berean lotu zioten ereinotza ermitari.

Kanpoaldekoaldekoak ikusita, barrualdean jarri zuten begirada. Honetarako, ermitara sartu baino lehen, Jon Astorkiza eta Joseba Beristain artistek hartu zuten hitza, erakinaren barnealdean egindako arte proiektu berritzaileari buruzko nondik norakoak azaltzeko. Astorkiza izan da proiektuaren grafiko zuzendaria, eta Arretxinagan egon zen lehen aldian sentitu zuen “konexio handia” aitortu zuen bere berbaldian. Horregatik, toki honetarako “begirunez egindako esperientzia sentikor bat” sortu du. Azalpenekin jarraitzeko, Beristainek hartu zuen hitza. “Tokiko natura elementuen soinuekin eta sintetizadoreekin jolastuz”, sortu du esperientzia bisualari balio gehigarri bat emango dion soinu paisaia. Sei bozgoragailuk osatutako instalazio bat sortu du, eta hala, “txikia den espazio bat handitu egiten du”.

Instalazioaz gain, ikus-entzunezko pieza bat eskaintzen digu San Migel ermitak. Bertaratzen direnek QR bat aurkitu eta horren bitartez helduko dira piezara. Eneritz Artetxe aktore gernika-lumotarrak gidatuko du ikuslea lau hizkuntzatan (euskeraz, gazteleraz, frantsesez eta ingelesez) entzun daitekeen piezan. Ermitari eta hau inguratzen duen artearen historiari buruz ari da Artetxe ikus-entzunezko horretan, “bisitaria leku honen magiarkein, unibertsoarekin, naturarekin eta bizitzarekin lotzeko”.

Aurkezpena amaituta, ermitako ateak zabaldu zitzaizkien herritarrei, eta orduan izan zuten instalazioa ezagutu eta tokiarekin konektatzeko aukera. Bertaratzen direnek ermita zabalik dagoen artean izango dute esperientzia bizitzeko aukera.

Haurren autoestimari buruzko formakuntza hartuko du Gizaburuagak

Lea-Artibai eta Mutrikuko Hitza — 2026-05-28 17:57:22

Haurren autoestima eta segurtasun emozionala lantzeko gurasoentzako formakuntzak antolatu dituzte martitzenerako [ekainak 2], 18:00etatik 20:00etara, Gizaburuagako Etxetxun.

Lea Ibarreko guraso eta helduei zuzenduriko ikastaroa da. Informazioa eman eta tresna praktikoak landuko dira, haurren autoestimua eta segurtasun emozionala indartzeko, lotura eta ikuspegi sistemikotik abiatuta.

Lea Ibarreko Mankomunazgoak bigarren berdintasun plana diseinatzeko prozesua jarri du martxan

Lea-Artibai eta Mutrikuko Hitza — 2026-05-26 10:56:43

Lea Ibarrako Udal Mankomunazgoak bigarren berdintasun plana diseinatzeko parte hartze prozesua abiarazi du. Prozesuaren helburua, herrien beharrizanei erantzuten dien bideorria marraztea dela azaldu dute Mankomunazgotik. Hala, irailean egingo dute herritar guztiei zuzendutako lehenengo saioa, “guztien iritziak eta beharrak jaso ahal izateko”.

“Azken urteotan egindako bideari jarraituz, orain, Berdintasunerako Bigarren Plana diseinatzeko prozesua jarri dugu martxan, eskualdeko emakumeen eta gizonen benetako berdintasun eraginkorra bermatzeko asmoz”, azaldu dute mankomunazgotik. Gainera, bigarren prozesu honekin, Lea Ibarreko Mankomunazgoak eta bera osatzen duten bost udalerriek (Amoroto, Aulesti, Gizaburuaga, Mendexa eta Munitibar) azkenengo urteetan egindako lana aztertu nahi dute, zer lortu den ikusi, eta oraindik egiteko dauden erronkak identifikatzeko: “Hausnarketa kolektibo honen helburua herri bakoitzaren berezitasunak eta Mankomunazgoaren beharrak kontuan hartuko dituen tresna errealista eta praktikoa osatzea izango da”.

Herritarrei zuzendutako saioa irailean egingo duten arren, udal idazkari eta ordezkariekin lan saioak eta elkarrizketak egiten hasi dira maiatzean, administrazioaren barne funtzionamendua aztertzeko. Hala ere, Mankomunazgotik zehaztu dute prozesuaren bizkarrezurra bizilagunen ahotsa izango dela: “Zentzu horretan, Mankomunazgoak herritarren parte hartzearen garrantzia azpimarratu nahi du”. Horregatik iragarri dute irailean egingo dela lehen saioa. Bertan, Lea Ibarrako emakume, elkarte eta interesa duten pertsonen kezkak, beharrak eta proposamenak partekatzeko aukera egongo da; izan ere, plan berriaren helburua Lea Ibarreko errealitatea ondo jasotzea da.

Horrez gain, egitasmoaren beste helburuetako bat Lea Ibarreko Berdintasun Kontseilu Herritarra indartzea eta aktibatzea ere bada: “2025ean sortutako organo hau prozesuaren parte aktibo eta berdintasun politikak sustatzeko ezinbesteko aliatu bihurtzea da helburua. Plan berria une egokian dator kontseiluaren jarduna edukiz betetzeko eta bere hurrengo urteetako egitekoak egituratu eta gidatzeko”.

Gainera, Mankomunazgotik nabarmendu bezala, plan berria landa eremuko beharrei erantzutera dator. Izan ere, egitasmoak “arreta berezia” jarriko du herri txikietako egunerako bizitzan: “Zaintza lanak, emakumeen ahalduntzea edota indarkeriarik gabeko bizitzak sustatzea izango dira ardatz nagusienetako batzuk”.

Horretarako, Lea Ibarreko Mankomunazgoak Elhuyar aholkularitzaren laguntza teknikoa izango du, eta aurreikuspenen arabera, emaitzak prest egongo dira urte amaierarako.

Lea Ibarreko udalekuetan izena emateko epea zabaldu dute

Lea-Artibai eta Mutrikuko Hitza — 2026-05-19 12:53:31

Lea Ibarreko udalekuetan parte hartu nahi dutenek maiatzaren 22ra arte edukiko dute izena emateko aukera Kubike Aisialdi taldeak zabaldutako estekaren bitartez, edo baita ere, Lea Ibarra osatzen duten herrietako udaletxeetan.

Behin izena emanda, antolatzaileek umearen Osakidetzako Osasun Txartelaren zenbakia hurrengo telefonora bidaltzeko eskatu dute: 673 45 87 51.

Gizaburuagak hartuko du Lea Ibarreko Umeen Eguna

Lea-Artibai eta Mutrikuko Hitza — 2026-05-06 12:06:06

Urtero legez, maiatzagaz batera dator aurten ere Lea Ibarreko Umeen Eguna. Hala, zapatuan [maiatzak 9] ospatuko dute Lea Ibarreko ume zein gaztetxoei zuzendutako jai eguna. Urtez urte, bailara hori osatzen duten bost udalerriak arduratu izan dira eguna antolatzeaz, Lea Ibarreko Udal Mankomunazgoagaz batera, eta aurten, Gizaburuagaren txanda izango da.

Arratsalderako egitaraua antolatu dute zapaturako; 16:00etan emango diote hasiera jai giroari. Askotariko jarduerak egongo dira aukeran Gizaburuagan, izan ere, bertaratzen diren ume zein gaztetxoek denetarik aprobatzeko aukera izango dute; besteak beste, ludoteka, puzgarriak, hondarrezko gazteluak, zezen mekanikoa eta zirku eskola. 19:00ak arte luzatuko dira aipaturiko jarduerak, eta, gero, Oier Jurado magoak magia ikuskizuna eskainiko du. Antolatzaileek aurreratu dutenez, eguna “ondo” bukatzeko txokolatada egongo da bertaratu diren guztientzat.

Bazkari musikatuak batu ditu Lea Ibarreko herritarrak

Lea-Artibai eta Mutrikuko Hitza — 2026-03-23 15:01:59

Lea Ibarreko herritarrek hitzordu “berezia” izan zuten zapatuan [martxoak 21]. Lea Ibarreko Udal Mankomunazgoak antolatuta, musika eta abesti inguruan elkartu ziren. Bazkari herrikoia EinGo taldeak girotu zuen, herritarrak dantza egitera erakarriz eta aparteko giroa sortuz.

Martxoaren 21ean egingo dute Lea Ibarreko kantu bazkaria

Lea-Artibai eta Mutrikuko Hitza — 2026-03-13 11:40:51

Lea Ibarreko herritarrek hitzordu “berezia” izango dute martxoaren 21ean [zapatua], 14:30ean, Epermendi jatetxean, Lea Ibarreko Udal Mankomunazgoak antolatuta. Bazkariko tiketak salgai daude Munitibar, Aulesti, Gizaburuaga, Amoroto eta Mendexako udaletxeetan, martxoaren 16ra [astelehena] arte.

Abestien bueltan batuko dira Lea Ibarreko herritarrak, eta EinGO taldea ere egongo da giroa berotzeko. Menuari dagokionez, hurrengoa izango da: Bakailao entsalada, askotariko frijituak, otarrainxka egosiak, legatza plantxan gulekin, txerri-masailak, tarta eta izozkia, kafea eta txupitoa, eta urteko ardoa, sagardoa eta ura. Antolatzaileek jakinarazi dutenez, bazkariak 40 euro balioko ditu.

Gizaburuagako Udalak herritarren eskura jarriko ditu ortu munizipalak jartzeko lursailak

Lea-Artibai eta Mutrikuko Hitza — 2026-03-11 14:19:50

Gizaburuagako Udalak ortu munizipalak jartzeko Larraigana atzean dauden lursailak herritarren eskura jarriko ditu; lursail hauek bidegorriaren ondoan daudela zehaztu du udalak.

Interesa duen herritarra udalarekin jarri beharko da harremanetan martxoaren 20a baino lehen, eta zalantzaren bat duenak ere, bide bera erabili beharko du. Horretarako, 94 684 25 86 telefono zenbakira deitu beharko da.

Interesa duen herritarren kopurua jakitean Gizaburuagako Udala arduratuko da traktora pasatu eta lursailak prestatzeaz. “hortik aurrerako kudeaketa eta zaintza erabiltzaileak berak egin beharko ditu,eta erramintak ere norberarenak erabili beharko dira”, nabarmendu dute udaletik. Horrez gain, herritarren eskura jarritako lursailetan ezingo da zuhaitzik landatu, ezta legez kanpoko landarerik ere.

Hasiera batean lurrak bi urterako emango diren arren, epea pasa ostean luzapena eskatu ahalko da udalak horrela erabakiz gero.

Lea Ibarrako sare feminista ehuntzen

Lea-Artibai eta Mutrikuko Hitza — 2026-03-06 11:12:06

Lea Ibarra eskualdeak badu tresna berri bat feminismotik eragiteko: Lea Ibarrako Berdintasun Kontseilu Herritarra. Parte hartzean oinarritutako organo horrek mankomunitateko ordezkariak ez ezik Amorotoko, Aulestiko, Gizaburuagako, Mendexako eta Munitibarko mugimendu feministako zein herriko beste esparruetako eragileak batzen ditu, baita norbanakoak ere.

Nahiz eta herri bakoitzean mugimendu feminista edo feminismoa lantzen duten eragileak egon, orain arte ez zegoen eskualde mailako egitura bateraturik. Beraz, hutsune hori betetzeko sortu da Lea Ibarrako Berdintasun Kontseilu Herritarra.

Prozesuaren xehetasunak. Proiektuaren hazia 2024an erein zuten, eskualde mailako lanketa bateratua proposatu, eta herriak banaka aritu beharrean, indarrak batu zituzten: “Gaur egun kontseiluan gauden bi kideren ideiatik abiarazi zen proiektua, eta Lea Ibarrako Mankomunazgoak Bizkaiko Foru Aldundiko diru laguntza batera aurkeztu zuen proiektua. Aldi berean, Lea Ibarrak bazuen jada berdintasun plan garatu bat, eta bi ildo horiek uztartuz sortu zen kontseilua eratzeko aukera”.

Diru laguntza onartu ondoren, kontseiluak Elhuyarren laguntza izan zuen metodologia eta dinamizazio lanetarako; finean, kontseiluaren sorreran bultzada eman eta eragileei laguntzeko. Bost bilera egin zituzten, horietako bi irekiak, herritarrei eta elkarteei ekarpenak egiteko aukera emanez. Iazko irailerako arautegia adostuta zuten, eta urriaren 3an aurkeztu zuten ofizialki kontseilua Gizaburuagan egindako ekitaldian. “Kontseilua izaera mistokoa da: udal ordezkariak, teknikariak, elkarteetako kideak eta norbanakoak biltzen ditu. Gaur gaurkoz, emakumeak gara denok, baina genero aniztasuna ere bilatzen dugu”, adierazi dute kontseiluko kideek.

Saretzea eta eragitea. Datozen hilabeteetako erronka nagusietako bat eskualde mailako erasoei aurre egiteko protokolo bateratua osatzea izango da. Herri bakoitzak baditu jaietako protokoloak, baina asmoa da urte osoan “aktibo egongo den tresna komun bat” sortzea, arreta eta orientazioa “parametro berdinetan eskaintzeko”. Horretarako, erreferentziazko udal protokoloak aztertzen ari dira, eta egokitzapen bateratua landu nahi dute, herri txikien errealitatera egokituta.

Bestalde, kontseiluaren helburuen artean daude emakumeen parte-hartze soziopolitikoa sustatzea, eskualdeko elkarte eta norbanakoen arteko sareak sortzea, bost udalerrien arteko elkarlana indartzea eta kultura feminista hedatzea.

Lehenengo urratsa barne-saretzea izan da: komunikazio kanal propioak sortu dituzte eta herrietako ekitaldien berri ematen diote bertatik elkarri. Ekimen bateratuak antolatzea da hurrengo pausoa. Jaietarako lelo eta irudi komunarekin, zapiak ateratzea da mahai gainean duten proposamenetako bat.

Gainera, Martxoaren 8a ate joka dagoen honetan, kontseiluak bere nortasun bisuala sortzeko urratsa eman du. Izan ere, kontseiluak izena badauka ere, irudia falta zaioa azpimarratu dute bertako kideek. Horretarako, logo lehiaketa abiatu dute, herritarrek beren proposamenak bidal ditzaten. Lanak apirilaren 10era arte aurkeztu ahalko dira posta elektronikoz, eta baldintzen artean daude, besteak beste, inoiz argitaratu gabekoak izatea eta pertsonako gehienez bi lan aurkeztea. Onartutako formatuen artean daude argazkiak, marrazkiak eta ordenagailuz egindako konposaketak.

Ekimen horren bidez, kontseiluak herritarrak inplikatu nahi ditu bere identitate kolektiboa eraikitzera, eta aldi berean, berdintasunaren aldeko proiektua ikusgarri bihurtu nahi dute.

Herritarrentzako gonbita. Izenak berak adierazten duen bezala, kontseiluak izaera herritarra izatea du helburu. Udal ordezkarien eta teknikarien presentzia garrantzitsua bada ere, “funtsezkotzat” jotzen dute kultur elkarteetako kideek, jai batzordeetakoek, hezkuntza arloko eragileek eta interesa duen edozein herritarrek parte hartzea.

Urtean lau bilera egitea eta bertan helburuak zehaztu eta lehentasunak adostea aurreikusi dute. Parte hartu nahi duenak bere herriko talde feministako kideekin edota berdintasun zinegotziarekin harremanetan jartzea besterik ez dauka.

Beraz, Lea Ibarrako Berdintasun Kontseilu Herritarrak eskualdean “betaurreko moreak” jantzita jardungo duen sare bat ehuntzea du helburu: elkarri lagunduz, koordinatuz eta feminismoa eguneroko jardunean txertatuz.

'Irabazi arte!' telesailaren 5. denboraldiaren estreinaldia egongo da eskualdeko herrietan

Lea-Artibai eta Mutrikuko Hitza — 2026-01-28 15:56:30

2022ko otsailaren 11n estreinatu zen Irabazi arte! telesaila ETB 1en, eta ordutik, Euskal Herriko milaka neraberen barikuetako hitzordua bihurtu da. Hala, ETBk barikuan estreinatuko du telesailaren bosgarren denboraldia Makusi plataforman, eta datorren astetik aurrera [otsailak 6] ikusgai egongo da lehen atala ETB1en.

Hala ere, aurretik, bariku honetatik aurrera, Uemako kide diren 90 herritan estreinatuko da lehenengo kapitulua. “Uemak eta ETBk eukarazko ikus-entzunezkoak zabaltzeko sinatuta duten hitzarmenaren baitan, euskarazko telesail arrakastatsuenak Uemako kide diren herrietako zinemetan eta areto publikoetan estreinatzeko lizentzia du Uemak”. Beraz, Lea-Artibai eta Mutrikun ere estreinatuko da datozen egunetan: Ondarroa, Aulesti, Lekeitio, Markina-Xemein, Etxebarria, Gizaburuaga eta Mutriku.

Ondarroan, Aulestin, Lekeition eta Gizaburuagan barikuan [urtarrilak 30] estreinatuko da. Ondarroan, bi saio egongo dira Kofradia Zaharrean: 17:00etan,eta 18:30ean. Doan izango den arren sarrera eskuratu beharko da Turismo Bulegoan. Aulestin, 18:00etan izango da estreinaldia, Udal Aretoan, eta Lekeition eta Gizaburuagan 19:00etan; Lekeition Azkue Aretoan, eta Gizaburuagan Udaletxean.

Mutrikuren txanda izango da zapatuan [urtarrilak 31], eta bi emanaldi egingo dira Zabiel Kultur Etxean: 17:30ean eta 19:00etan.

Markina-Xemeingo eta Etxebarriako estreinaldiak domekan izango dira [otsailak 1]. Markina-Xemeinen Esperantza Aretoan batuko dira gaztetxoak, 17:00etan, eta Etxebarrian Kultur aretoan ikusi ahalko dute kapitulua, 18:00etan.

Arantza Plaza gizaburuagarrak jantziko dio txapela Bizkaiko txapeldunari

Lea-Artibai eta Mutrikuko Hitza — 2025-12-04 14:33:24

Arantza Plaza Zamorak jantziko dio txapela abenduaren 20an ospatuko den Bizkaiko Bertso Txapelketako irabazleari. Bizkaiko Bertsozale Elkartetik iragarri duenez, urte luzeetan bertsolaritzaren transmisioan egindako lanagatik saritu nahi izan dute Plaza.

2004an ekin zion Arantza Plazak lehen eskoletan bertsolaritza irakasteari, eta ordutik, herrietako ikastetxeetan ibili da irakasle lanetan, Mundu bat bertso programaren bidez. 2022ra arte aritu da bertsolaritza irakasten, eta Bizkaiko Bertsolaritza Elkartetik jakinarazi dutenez, Bizkaiko elkartean laneko erretiroa hartu duen lehenengo langilea izan da.

Egoera soziolinguistiko ezberdinak, eskola handi zein txikiak, hiriburuak eta herriak… errealitate ezberdinak ezagutu ditu Plazak: “Garai bakoitzeko errealitateari erantzun behar izan dio bi hamarkada luzeetan, eta kasu guztietan ederto moldatu da”. Gizaburuagarraren hitzetan, bertsoak asko laguntzen du euskarara gerturatzeko, “baita kantuak ere, umeekin konektatzeko altxorra delako”.

Bertsolaritzaren transmisioan lan egitea ez ezik, euskararekiko “jarrera positiboa” indartzea ere helburu izan du Plazak: “Euskara guztiak onak direla azpimarratzen zien ikasleei, euskalkiak, batua, aberatsak eta ez hain aberatsak: egiten dena da balio duena”.

Gainera, Bizkaiko Bertsozale Elkarteko gainerako proiektuetan ere ibili izan da laienen: “Bizkaiko bertsolaritza lantzeko eta elikatzeko dokumentazio beharretan ibili da hamaika elkarrizketa eginez; tartean, Bizkaiko Bertsogintza IV liburuko dokumentazio lanetan”.

Beraz, abenduaren 20an Bilboko La Casillan izango den Bizkaiko Bertsolari Txapelketako finaleko irabazleari jarriko dio txapela Arantza Plazak, eta Bizkaiko Bertsozale Elkartetik oraindik sarrerak eskuragarri daudela gogorarazi dute.

Tradizioak eta auzolanak bat egingo dute Santa Katalina egunean

Lea-Artibai eta Mutrikuko Hitza — 2025-11-20 12:28:21

Egunak mozten eta hozten doazen arren, badago oraindik ere ospakizunetarako tartea zenbait herritar. Gizaburuagan Santa Katalina eguna ospatuko dute domekan [azaroak 23]: tradizioak eta auzolanak bat egingo dute herriko kaleetan, eta komunitatearen berotasuna izango da protagonista egun guztian. Olazar Kultur Elkarteak antolatuta eta Gizaburuagako Udalaren laguntzagaz, egun guztiko egitarauan murgilduko dira.

Ospakizunak tradizioz beteta hasiko dituzte, 10:30ean, meza nagusiarekin, eta jarraian, aldarrirako tartea hartuko dute. Azaroaren 25ean Indarkeria Matxistaren Kontrako Nazioarteko Eguna dela-eta, 12:00etan puntu morea marrazteko bilduko dira herritarrak, eta 13:30ean udaletxeko balkoian ipiniko dute, aurtengo mezua irakurtzeagaz batera.

Tartean, baina, eguneko pasarterik bereziena hasiko da: barraskilo lasterketa. Umorea eta jolaserako gogoa elkartuko dira une horretan, eta ohitura xume baina maitatu horrek herriko ume zein helduen arreta eskuratuko du. Egun ezin hobeak dituzte aurretik herritarrek barraskiloak batzeko, eta horretarako deia egin dute, hain zuzen ere, antolatzaileek.

Ondoren, herri bazkarian elkartuko dira: 14:00etan hasiko da umeena (14 urtetik beherakoentzat doakoa), eta 15:00etan nagusiena (15 euro). Elkarrekin bazkaldu ostean, bingoan jokatuko dute. Umeek, gainera, bazkaldu eta jarraian ludotekan jolasteko aukera edukiko dute, 18:00ak bitarte.

Jaiak amaitzeko, azaroaren 25ean meza egongo da, 11:00etan.

Domekako egitaraua.

10:30. Meza.
12:00. Puntu morea marraztea.
12:30. Barraskilo lasterketa.
13:30. Puntu morea udaletxeko balkoian jartzea eta mezuaren irakurketa.
14:00. Umeen bazkaria (14 urtetik beherakoentzako, doan).
15:00. Nagusien bazkaria (15 euro).
Ostean. Bingoa.
15:00-18:00. Umeentzako ludoteka.

Berdintasun Kontseiluaren aurkezpenaren balorazio "positiboa" egin dute

Lea-Artibai eta Mutrikuko Hitza — 2025-10-06 11:52:53

Lea-Ibarrako Berdintasun Kontseiluaren aurkezpena egin zuten barikuan [urriak 3] Gizaburuagan. Kontseiluko kideek ekitaldiaren balorazio “positiboa” egin dute: “40 lagun inguru batu ginen Lea Ibarrako bost herrietatik eta aretoa bete egin zen”.

Aurkezpenean prozesuaren xehetasunak azaltzeaz gain, Berdintasun Kontseiluaren helburu nagusiak mahaigaineratu zituzten: “Berdintasun politikak era planifikatuan, koordinatuan eta elkarlanean egin ahal izateko espazio bat sortzea da helburua; mugimendu feministaren, herri eragileen, mankomunitatearen eta bertako bost udalen artean”.

Aipatutako helburuez gain, beste zenbat ere esleitu dizkiote Berdintasun Kontseiluari; besteak beste, Lea Ibarrako udalen, mankomunitatearen eta mugimendu feministaren arteko harremana eta interlokuzioa hobetzea, berdintasun politiken irismena arlo, herri eta herritar gehiagorengana iristea, Lea Ibarrako udalen jarduerak era gardenean eta parte hartzaileagoan kudeatzea, herrien arteko sinergiak indartzea eta elkarrengandik ikasteko aukerak sustatzea, politika feministetan elkarrekin aurrera egiten joateko, eta Lea Ibarrako emakumeen parte hartze soziopolitikoa sustatzeko aukerak areagotzea.

Aurkezpenaren ostean, Kilimaterio ikuskizunagaz gozatzeko aukera izan zuten bertaratuek; Kaitin Allenderen bakarrizketagaz, eta Oihana Perea eta Irati Anda bertsolarien hitzekin.

Gizaburuagako bederatzi herritarrek WOP Challengean parte hartuko dute

Lea-Artibai eta Mutrikuko Hitza — 2025-10-02 12:43:57

Bilboko kaleak zeharkatuko ditu urriaren 4an [zapatua] eta 5ean [domeka] WOP Challenge bira solidarioak, gaixotasun neurodegeneratiboen alde. Bertan parte hartuko dute Gizaburuagako bederatzi herritarrek. “Bederatzi herritarrek bizipoza eta indarra eramango dituzte Bizkaiko zein Bilboko errepideetara”.

Arnaitz Aboitiz, Ainara Plaza, Janire Azpiazu, Unai Artetxe, Ane Uriondo, Koldobika Leniz, Jon Jauregi, Laia Artetxe eta Naia Azpiazu izango dira erronkan parte hartuko duten herritarrak. Denek bat egiten dute bira solidarioaren helburuarekin: gaixotasun neurodegeneratiboen ikerketarako dirua eta babesa lortzea. “Erronka ez da guretzat bakarrik, gizarte osoarentzat baizik. Elkartasunez gauza handiak lortu daitezke”, adierazi dute parte hartzaileek.

Erronka gogorra izango dela azpimarratu dute bederatziek, egunez zein gauez izango baita, baina hala ere, ilusioz beteta daudela nabarmendu dute. Gainera, Gizaburuagako Udalak lagundu die ekipamenduagaz, eta gainerako herritarrek ere babesa adierazi die: “Herri osoarena da parte hartzea”.

Lea Ibarrako Berdintasun Kontseilu herritarra aurkeztuko dute barikuan, Gizaburuagan

Lea-Artibai eta Mutrikuko Hitza — 2025-10-01 13:14:20

Lea Ibarrako berdintasun politikei bultzada ematea helburu, Lea Ibarrako Berdintasun Kontseilu herritarra sortu dute martxotik irailera bitarteko prozesu parte hartzaile baten bitartez, Elhuyarren laguntzagaz. Hala, barikuan [urriak 3] aurkeztuko dute proiektua eta hona heltzeko egindako bidea Gizaburuagako aretoan, 19:00etan.

“Kontseilua parte hartze prozesu baten bidez sortu den organo berria da, non herritarrek protagonismoa eta lidergoa izan duten. Azken hilabeteetan Amoroto, Aulesti, Gizaburuaga, Mendexa eta Munitibarreko herritarrek Mankomunitateko berdintasun politikei bultzada emango dien egitura honen inguruko gogoeta egin dute, zer helburu eta funtzio bete beharko lituzkeen pentsatuz”, adierazi dute Lea Ibarrako Mankomunitatetik.

Proiektuaren sorrerak Mankomunitateak berdintasunarekiko duen konpromisoa erakusteaz gain, Lea Ibarrako herritarrek duten motibazio eta konpromisoaren erakusle da, “herritarrak direlako prozesuaren bultzatzaile eta protagonista nagusiak”.

Beraz, barikuan proiektuaren eta prozesuaren aurkezpena egingo dute Gizaburuagan, eta ondoren, Kilimaterio ikuskizunagaz gozatzeko aukera izango dute bertaratuek, “topaketa hau borobildu eta goxatuko duen eskaintza kulturala izango da”. Hala, Kaitin Allenderen bakarrizketak eta Oihana Perea eta Irati Anda bertsolarien hitzek emango diote amaiera aurkezpenari. “Lea ibarrako herrietako zein inguruko herrietako biztanleak ekimenean parte hartzera gonbidatu nahi ditugu, urrats hau gurekin partekatuz eta ikuskizunaz gozatuz”.

Eguraldia ez dute lagun izan Andra Mari Egunean

Lea-Artibai eta Mutrikuko Hitza — 2025-09-08 14:43:20

Andra Mari Egunean eguraldiak ez du inondik inora lagundu. Asteburuan eguzkia eta beroa protagonista izan badira ere, gaur [irailak 8] euria izan da nagusi. Markina-Xemeingo Erdotzan ohikoa den Zerutxu Dantza Taldearen emanaldia bertan behera utzi behar izan dute eta meza besterik ez dute egin.

Gizaburuagan ere aldaketak egin behar izan dituzte. Herriko eta inguruko trikitilari eta pandero joleek eguerdia alaitu dute, baina tabernetako barrualdean jo behar izan dute. Ez zegoen eguraldia nork alaituko zuenik. Euriagatik ere txapel jaurtiketa lekuz aldatu behar izan dute, eta azkenean frontoian elkartu dira herritarrak. Asko izan dira izena eman dutenak eta eguraldiari aurre eginez, giro ezin hobean elkartu dira. Arandok irabazi du txapelketa, bigarren Unai Artetxe izan da, hirugarren Miren Lurdes Leniz eta laugarren Juanjo Ibarra.

Andra Mari Egunean baino, bihar [irailak 9] Oibarren amaituko dituzte jaiak gizaburuarrek. Meza egingo dute bertan, eta 18:00etan Zirika Zirkus zirko tailerra egingo dute txokolateagaz jaiak amaitutzat eman aurretik.

Kirolagaz hasi dituzte
Hain zuzen ere, Gizaburuagako andramariak atzo [irailak 7] hasi zituzten. Tino lasterketan goi mailako parte hartzea izan zuten, Mikel Arrasate Amandarriko triatleta eta Mikel Dolaraga elkarrekin sartu ziren helmugan. Lehen neska herriko Ane Uriondo izan eta eta Gizaburuagko lehen gizona Aimar Okamika izan zen. Bitartean, zesta punta partidak jokatu zituzten txikienek eta amaitzeko Maialen Aldazabal eta Elaia Gojenola berriatuarrak nor baino nor gehiago aritu ziren bakarka.