Lea-Artibai eta Mutrikuko Hitza

27. Zapato Azulak urdinez tindatu du Ondarroa

Lea-Artibai eta Mutrikuko Hitza — 2026-06-27 16:22:15

Azken egunetako bero sargoririk barik esnatu da gaur [ekainak 27] Euskal Herria, eta gustura hartu dute hori Ondarroara joan direnek. Kamiseta urdinak armairutik atera, eta Alde Zaharra goitik-behera eta ezker-eskubi bete dituzte bertaratu direnek. Herritarrak, inguruko herrietakoak nahiz Euskal Herriko hamaika txokotatik bertaratutakoak elkartu ditu gaur Radixu Irratiak antolatzen duen 27. Zapato Azulak Ondarroan. Hala, aurtengo kartelean keinu egin dioten Felix Beristainen koadro baten antzera, urdinez tindatu dira herriko txoko guztiak.

11:00etarako prest zeuden Radixu Irratiako kideak zuzeneko emisioagaz batera jaiari ekiteko, eta egunaren nondik norakoak azaldu ostean, Koldo Azpiazuk hartu du mikroa. Hain zuzen ere, iaz hartu zuen Azpiazuk Nekane Akarregiren erreleboa, eta aurtengoan ere berea izan da jaiari hasiera emateko ardura. Hala, urtero bezala, Alai Tabernako balkoiak bereganatu ditu begirada guztiak, eta bertan zeudenek adi jarraitu dituzte Azpiazuk esandakoak. Nola ez, Manuel Eluren bolanderek ere ez dute hutsik egin, eta 12:00etan egin du eztanda jaiak, bolandera eta bolandera artean.

Bolandera ugari bota ostean jaiak ez du etenik izan, eta urteroko osagaiekin osatu dute goiza. Txistulariak, Kresalako bandaren eta Artelango erraldoien kalejira nahiz falta direnak gogoan hartzeko tartea hartu dute herritarrek, eta Txalainak taldearen kontzertuak biribildu du goizeko jarduna. Abanikoak dantzan eta gorputzak ere bai, Hertzainak taldearen abesti ezagunenak abesteko tartea hartu dute Kalekutz inguruan batu direnek.

Zapato Azule berezia bada, Dinamartxaren ailegaera are bereziagoa da herritar askorentzat. Dina Bilbao Barruetabeñaren omenez Tolosa eta Ondarroa elkartzen dituzte martxalariek oinez nahiz bizikletan, eta irrintzi, txalo, oihu eta musika artean egiten diete harrera ondarrutarrek. Oinez egin duten 77 martxalarientzat bart 01:00etan hasi ziren Zapato Azuleko ekintzak, eta gaur 09:00etan, ostera, bizikletaz etorri diren 223 partaideentzat. Iazko parte hartze kopurua gaindituta (iaz 259 partaide eduki zituen), poztasunez nahiz emozioz betetako malko eta irribarreen artean sartu dira herrira 300 martxalariak.

Martxalariak, Alde Zaharrera heltzen.

Dinamartxako kide denak heldu ostean, aurtengo pregoia irakurri dute Radixuko kideek balkoitik. Besteren artean, Palestina, Saharan, Iran Libano eta Kubagaz gogoratu dira, eta zelan ez, baita Venezuelako herriagaz ere. Jarraian, denborarik galdu barik, aurtengo omendua izendatu dute. “Omendu guztiak dira bereziak, baina aurtengoa, Zapato Azule antolatzen dugun guztiontzat, bereziena da. Zorionak Nekane Akarregi Amutxastegi, zeu zara aurtengo omendua!”. Hala, Akarregi ezustean harrapatu du omenaldiak, baina irribarrez jaso du Radixukoen aipamena.

Ostean, 11:00etan zabaldu duten Euskal Herriko Kamiseta Azoka eta Artisau Azoka itxi, eta aurtengo kamisetarik eta erakusleihorik onenak izendatu dituzte. Kamiseta Azokan Ondarroako hiru postu eta Euskal Herriko beste hamahiru egon dira, eta Torontilek (Artea) irabazi du Euskal Herriko kamisetarik onenaren saria. Ondarroako kamisetarik onenaren saria, aldiz, Saturrarango Haitzak irabazi du, eta erakusleiho onenarena, Lorak Estherrek.

[ARGAZKI GALERIA]

Txo! Antzerki Kolektiboak omenduari egindako sketchagaz amaitu dute eguerdiko jarduna, baina jai luzea geratzen da oraindik Ondarroan. Arratsaldean mota eta gustu guztietako musika entzuteko aukera egongo da herriko txoko guztietan, eta jaiak ez du etenik izango goizeko ordu txikiak arte.

"Begirunez egindako esperientzia sentikor bat" dauka gordeta Arretxinagako ermitak

Lea-Artibai eta Mutrikuko Hitza — 2026-06-26 15:37:21

Ereinotz bat Arretxinagako ermitari. Prozesu luze baten ostean, Markina-Xemeingo balio handiko gunearen zaharberritze lanak amaitu dituzte, hala, San Migel ermita eraberrituta ikusteko hainbat herritar batu ziren atzo arratsaldean. Herritarrez gain, Zerutxu Dantza Taldeak eman zion ongietorria gune berrituari.

Begibistakoak dira ermitaren kanpoaldean egin dituzten lanak. Ermitaren kanpoko hormak kareorez berritu dituzte, kolore eta ehundura bereizgarriak emanez. Eraikina bakarrik ez, alboan dagoen probalekua ere berritu dute eta ikusleentzako armailak jarri dituzte. Lanak amaituta daudela adierazteko, Alde Zaharrean egin zuten era berean lotu zioten ereinotza ermitari.

Kanpoaldekoaldekoak ikusita, barrualdean jarri zuten begirada. Honetarako, ermitara sartu baino lehen, Jon Astorkiza eta Joseba Beristain artistek hartu zuten hitza, erakinaren barnealdean egindako arte proiektu berritzaileari buruzko nondik norakoak azaltzeko. Astorkiza izan da proiektuaren grafiko zuzendaria, eta Arretxinagan egon zen lehen aldian sentitu zuen “konexio handia” aitortu zuen bere berbaldian. Horregatik, toki honetarako “begirunez egindako esperientzia sentikor bat” sortu du. Azalpenekin jarraitzeko, Beristainek hartu zuen hitza. “Tokiko natura elementuen soinuekin eta sintetizadoreekin jolastuz”, sortu du esperientzia bisualari balio gehigarri bat emango dion soinu paisaia. Sei bozgoragailuk osatutako instalazio bat sortu du, eta hala, “txikia den espazio bat handitu egiten du”.

Instalazioaz gain, ikus-entzunezko pieza bat eskaintzen digu San Migel ermitak. Bertaratzen direnek QR bat aurkitu eta horren bitartez helduko dira piezara. Eneritz Artetxe aktore gernika-lumotarrak gidatuko du ikuslea lau hizkuntzatan (euskeraz, gazteleraz, frantsesez eta ingelesez) entzun daitekeen piezan. Ermitari eta hau inguratzen duen artearen historiari buruz ari da Artetxe ikus-entzunezko horretan, “bisitaria leku honen magiarkein, unibertsoarekin, naturarekin eta bizitzarekin lotzeko”.

Aurkezpena amaituta, ermitako ateak zabaldu zitzaizkien herritarrei, eta orduan izan zuten instalazioa ezagutu eta tokiarekin konektatzeko aukera. Bertaratzen direnek ermita zabalik dagoen artean izango dute esperientzia bizitzeko aukera.

Lekeitiok udari hasiera emango dio sanpedroekin

Lea-Artibai eta Mutrikuko Hitza — 2026-06-25 15:23:24

Ekaina amaitzear dago, eta “udari hasiera emateko jaiak” dira San Pedro jaiak. Lekeitiarrek eta herrira etorriko direnek bost eguneko egitarau kulturala, musikala eta tradizioz beterikoa dastatuko dute.

Aurten zapatuan [ekainaik 27] emango diote hasiera San Pedro jaiari, Danok BatELA ekimen solidarioa ardatz delarik. Egun berean ospatuko dute Salazoi Eguna ere. Aeroplano Bi elkarteak hamabi urte daramatza eguna antolatzen, eta aurtengoan ere, arrain gazitua zelan egiten zen azalduko dute. Aldi berean, Kilin-kala abesbatza kantuz kalejiran egongo da, Musikaia Udal Musika Eskolaren eskutik. Arratsaldeari begira, Lekeitioko 37. Kilin-Kala igeriketa zeharkaldia ospatuko da abadeen moilan, Garraitz Kirol taldeak antolatuta. Aipatutako ekintza guztiak bat egingo dute Danok BatELA ekimenagaz –adibidez, igerilarien kasuan, txanoetan ELAren sinboloa eramango dute–.

San Pedro bezperari dagokionez, domekan [ekainak 28], buruhandiak eta erraldoiak ariko dira kalerik kale, Lekittoko Itxaropena txistulari elkarteak eta dultzaineroek animatuta. Gainera, aldi berean, sanpedroetako eskuz binakako finalak egingo dira Trinketeko frontoian eta 11:30ean Zinga txapelketa portuan. “Pasaden urtean, Lekeitiok 700 urte bete zituenean berreskuratu genuen txapelketa. Aurtengo sanpedroetan mantentzea pentsatu dugu”. Egunagaz jarraituz, sardina dastaketa, mus txapelketa eta Gauargi erromeria egongo dira plazan. “Mus txapelketan espero dugu gutxienez hogei bikotek parte hartzea”, adierazi dute udalak.

Astelehena [ekainak 29] da, zalantzarik gabe, tradizioa gehien mantentzen duen eguna: dei eittekuak kalez kale, Kaxarranka, emakumeen aurreskua… Hala, goizean agintarien prozesioa eta San Pedroren omenezko prozesioa egingo dituzte herritarrek, eta horren ostean, Etorkizuna Dantza Taldeak Kaxarranka dantzatuko du San Pedro irudiaren aurrean, Kofradia aurrean eta plazan. 2022an Ane Maruri Basterrika izan zen Kaxarranka dantzatu zuen lehenengo emakumea, eta aurten Naia Rojo Ikazuriagagoitia izango da protagonista. “Emakumeen aurreskua bada zerbait oso oso gurea, eta niretzako hori sekulakoa da. Euskal Herrian egiten den bakarra da, eta niretzako horrek badauka balio sinboliko handia”, azaldu du Lekeitioko Udalak. Beste hainbat ekintzaren artean, danborrada herrikoiagaz amaituko dute egunak, Zaletxuak taldearen ekimenez.

San Pedro Txiki eta San Pedro Baltza [ekainak 30 eta uztailak 1] ospatuko dituzte jarraian. Eguzkilore jubilatuen abesbatza Eskolapean eta udaletxeko eskaileretan, buruhandiak eta erraldoiak kalerik kale eta talatik udaletxeraino kalejira Lekitto Txirrist txarangaren eskutik izango dira San Pedro Txiki osatuko duten ekintzak. Gauean, Lekittoko Deabrutxuek Correfoca egingo dute.

Eguaztenerako [uztailak 1] umeentzako jolasak antolatu dituzte, eta 12:30ean meza egingo da San Pedro baltzaren aurrean, Tortola kalean. Gainera, lore eskaintza ere egingo diote San Pedrori. Arratsaldean, aldiz, jaiari amaiera emateko, Lagun Zarrak elkartearen ekimenez, Tunantiak eta Txernobil taldeen kontzertuak egongo dira.

Udaletik aipatu dute, betiko legez, Kaxarranka izango dela unerik esperoena eta jendetsuena. Gainera, aipatu dute Danok BatELA sanpedroetan egiteak elkartasuna gehitu diola jaiari: “Herri guztiak bat egin du ekimenagaz. Herritarrek, tabernek eta herriko elkarteek, denek bat egin dute. Hori txalotxekoa da”.

Zapatua [ekainak 27]
- Egunean. Danok BatELA eguna.
- 12:00-15:00. XII. Salazoi Eguna, plazan. Aeroplano Bi elkarteak antolatuta.
- 12:00. Kilin-kala abesbatza kantuz kalejiran, Musikaia Udal Musika Eskolak antolatuta.
- 16:00. 27. Kilin Kala igeriketa lehiaketa, Garraitz Kirol Taldeak antolatuta.
Domeka [ekainak 28], San Pedro bezpera
- 11:00. Buruhandi eta erraldoiak, kalerik kale.
- 11:00. San Pedroetako eskuz binakako txapelketako finalak, Trinketeko frontoian.
- 11:30. Zinga txapelketa portuan.
- 13:00. 44. Irrintzi Txapelketa, San Pedropean. Izen ematea, 12:30etik 13:00etara.
- 13:30. Sardina dastaketa herrikoia, San Pedropean.
- 17:00. Mus txapelketa, Sociedad Recreativan. Izen ematea, 16:30ean.
- 20:00. Gauargi erromeria, plazan.
Astelehena [ekainak 29], San Pedro Eguna
- 07:00. Dei eittekuak, kalez kale.
- 10:15. Lekeitioko Udaleko alkate eta zinegotzi jaun-andreen eta Kofradiako lehendakari eta arduradunen prozesioa udaletxetik elizara, Txirrist Txarangagaz.
- 10:30. Meza Nagusia, herriko abesbatzak abestuta.
- Jarraian. San Pedroren omenezko prozesioa. Amaieran, antzinako ohitura zaharrari jarraituz, San Pedroren irudiagaz, Kilin-Kalakoa, portuko santuaren irudi aurrean. Lea Itsas Ondarea taldeko batelek uretatik harrera egingo diote santuari.
- 12:45. Lekeitioko Etorkizuna Dantza taldearen eskutik, Kaxarranka. San Pedropean dantzatu ostean, Kofradia aurrean dantzatuko da.
- 12:50. Kaxarranka, San Pedropean dantzatu ostean, Kofradia aurrean dantzatuko da.
- 13:00. Lekeitioko Etorkizuna dantza taldeak Eguzki dantza edo Lekeitioko andren aurreskua dantzatuko du, plazan.
- 13:30. Kaxarranka, plazan.
- 20:00. Danborrada herrikoia Aittitta Makurra txarangagaz, ikastola aurretik hasita, Zaletxuak taldeak antolatuta.
- Ondoren. Suzko zezena, plazan.
- 21:30. Aittitta Makurra txarangaren kalejira, plazatik hasita.
Martitzena [ekainak 30], San Pedro Txiki
- 12:30. Eguzkilore jubilatuen abesbatza, Baserri tabernan, Eskolapean eta udaletxeko eskaileretan.
- 19:00. Buruhandiak eta erraldoiak, kalez kale, Itxaropena txistulari taldeagaz.
- 21:00. Lekittoko Deabrutxoen Correfoca.
- 23:00. Talatik udaletxerainoko kalejira, Lekitto Txirrist txarangagaz.
Eguaztena [uztailak 1], San Pedro Baltza
- 11:00-12:30. Umeentzako jolasak, Rufo Atxurra plazan.
- 12:30. Meza, San Pedro baltzaren aurrean (Tortola kalean).
- 12:30. Lore eskaintza, San Pedro Baltzaren aurrean.
- 19:00. Tunantiak eta Txernobil taldeen kontzertua, Rufo Atxurra plazan, Lagun Zarrak elkartearen eskutik.

Lekeitiok 'Danok batELA' elkartasun eguna hartuko du zapatuan

Lea-Artibai eta Mutrikuko Hitza — 2026-06-24 17:45:26

Lekeitio elkartasunaren eta konpromiso sozialaren bilgune bihurtuko da zapatuan [ekainak 27], Danok batELA ekimenaren ospakizunagaz. Herritarrei zein bisitariei zuzendutako jardunaldi bereziak helburu argia dauka: AEA (Alboko Esklerosi Amiotrofikoa) gaixotasunari ikusgarritasuna ematea, ikerketarako baliabide ekonomikoak biltzea eta gaixotasuna pairatzen duten pertsonei eta haien familiei babesa erakustea. AEA nerbio sistemako gaixotasun neurodegeneratiboa da, mugimendua kontrolatzen duten neuronak pixkanaka hondatzen dituena. Horren ondorioz, giharrak ahuldu eta paralisi progresiboa agertzen da. Gaur egun ez du sendabiderik, eta horregatik, ikerketa eta gizartearen inplikazioa ezinbestekoak dira etorkizunean aurrerapausoak emateko.

Goizean goizetik hasita, plazak jarduera ugari hartuko ditu. Salazoi Eguna ospatuko da, antxoa dastaketekin eta arrain gazitua egiteko tailerragaz. Aldi berean, Lekeitioko saregin eta ehoziri jostunen lana gertutik ezagutzeko aukera egongo da. Gainera, kaleetako giro musikatua jarriko dute Estudiantinak, txistulariek, Kilin-kala abesbatzak, Lekeitioko kantu tailerrak eta Arratiako 11 Kantu taldeak.

Eguneko unerik hunkigarrienetakoa 12:30ean izango da. Mikel Laboaren omenez Isuntzako hondartzan dagoen horma irudiaren aurrean elkartuk dira herritarrak Txoria txori abestia elkarrekin abesteko. Goizean, Eskulanen Azoka Solidarioa ere egingo da. Bertan parte hartuko dute Lekeitioko Azkue Ikastolak, Lekeitioko Herri Eskolak, Ispasterko Eskolak, Amorotoko Eskolak, Eskolapeko bigarren eskuko azokak eta hainbat eskulan tailerrek –azokak sormena eta elkartasuna uztartuko ditu helburu solidarioagaz–. Bestalde, eguerditik aurrera, Arragua kolektiboak haurrei zuzendutako sormen jolasak eta ekintzak eskainiko ditu plaza erdian.

Egitarauagaz jarraituz, 13:00etan, Independentzia plaza artez bustiko da. Mikel Oses, Martin eta Jose Angel Lasa artistek sortutako BatELA, oinarria, borroka eta oreka izeneko performance artistikoa estreinatuko da, antolatzaileen hitzetan, egitarauaren momenturik “bitxiena” izango dena. Eskultura performatiboak gaixotasunaren aurkako borroka eta orekaren bilaketa irudikatuko ditu. Ondoren, 14:00etan, zozketak egingo dira. Aurrez txartelak eskuratu dituztenen artean ia 200 sari banatuko dituzte: tokiko merkatariek, artistek, elkarteek, kirolariek eta enpresek emandako opariekin.

Arratsaldeari begira, 16:00etan, 27. Kilin Kala Igeri Zeharkaldia izango da. Kirol proba horrek ere elkartasuna izango du ardatz, parte hartzaileek AEAren aldeko ekarpenean parte hartzeko aukera izango baitute. Ez hori bakarrik. Parte hartzaileak AEAren sinboloa eroango dute txanoetan. 18:00etan, berriz, Aittitta Makurra txarangak herriko kaleak alaituko ditu musikaz eta giro onez. Jardunaldiari amaiera emateko, 19:00etatik aurrera, kontzertu handia izango da plazan. Gauerdira arte luzatuko den emanaldi berezian zortzi talde igoko dira oholtzara: Marmara, Viva Bermut, Sara & Montxo, Nabil, Ziur Laters, Drunk Smile, Iñigito Txapelpunk eta The Honkies. Kontzertuaren baitan, gainera, Miren Agur Meabe idazleak egunari lotutako testu berezia irakurriko du, kulturari eta literaturari ere lekua emanez.

Aeroplano Bi elkarteak, Zakilixut kuadrillak eta Aittitta Makurra txarangak antolatutako jardunaldiak Lekeitioko Udalaren eta Bizkaiko Foru Aldundiaren babesa jaso du.

Ondarroa eta Lekittarra "gogotsu eta indarrez" daude ligarako

Lea-Artibai eta Mutrikuko Hitza — 2026-06-24 15:40:23

Euskotren eta Eusko Label ligak uztaileko lehen asteburuan [uztailak 4 eta 5] iritsiko dira Bizkaira, Bilboko eta Zierbenako jardunaldiekin. Hori baino lehen, Buitrago del Lozoyako (Madril) Riosequilloko urtegian egingo dituzte ligen irekierako estropadak. Pueblos con Vida Comunidad de Madrid bandera jokatuko dute Eusko Label Ligan, eta Canal de Isabel II – 175 aniversario bandera, Euskotren Ligaren baitan. Estropada binakako erlojupeko formatuan jokatuko da, 6 luze eta 5 ziaboga gizonezkoetan 12:15ean hasita, eta 4 luze eta 3 ziaboga emakumezkoetan 11:20an hasita.

Euskolabel ligan lehiatuko dira Ondarroa eta Lekittarra. Zortzigarren urtez jarraian uretaratuko dute lekeitiarrek trainerua Eusko Label Ligan. Hamar urtez taldearen gidari izan den Osertz Aldayri erreleboa hartu dio Markel Akarregi Bengoetxeak, eta “indarrez eta gogotsu” ikusten du taldea aurtengo denboraldirako. Joan diren bi denboraldietan egindakoari jarraitu eta sailkapen orokorrean zazpigarren postuari eusteko itxaropentsu agertu da taldea. Entrenamenduetan eta aurredenboraldian “espero genituen emaitza onak” lortu dituztela adierazi dute, hala, “orain arteko sentsazioak baieztatzeko” lehen estropada izango da domekakoa. “Gure urteroko helburua Eusko Label Ligan lehiatzea” izaten da, eta helburu hori lortuta lekeitiarrek beste urte batez izango dute traineru onenen artean lehiatzeko aukera. Aurten zazpi eta hamabigarren postuak oso paretkatuta egongo direla aurreikusten dute, beraz, “hamabigarren postutik ahalik eta urrunen egotea” izango da lekeitiarren helburua.

Hurbil izango du Lekittarrak Ondarroako trainerua. 2017tik etenik barik aritu da Eusko Label Ligan, eta bederatzigarren eta zortzigarren postuetara eraman dute Antiguako Ama azken bi urteetan. Aurtengo helburua “bigarren txandan lehiatzea” dute ondarrutarrek, hala, aurreko denboraldietan egindakoari eutsi eta bosgarren eta zortzigarren postuetan mantentzeko indarrak batu beharko dituzte. Helburu nagusia “kategoria mantentzea eta play off-a saihesteko gure azpitik bi talde uztea” izango dela azaldu du Iñaki Errasti entrenatzaileak. “Sei talde ikusten ditut gure gainetik, eta beste seien artean egongo da bigarren txandan sartzeko borroka”. “Estropada txukuna egiteko gai” ikusten du Errastik taldea, hala ere, gainerako taldeek emango duten mailari ere begiratu beharko diotela argitu du.

Lekeitio eta Ondarroako urak ere lehiaren lekuko izango dira aurtengo denboraldian. Abuztuaren 2an helduko dira Euskotren eta Eusko Label ligak Lekeitiora, eta abuztuaren 8an, Ondarroara.

Herri Eskolako zirkuko ikasleek emanaldi "zoragarria" eskaini dute

Lea-Artibai eta Mutrikuko Hitza — 2026-06-23 16:14:43

Barikuan [ekainak 19] Lekeitioko Herri eskolako jolastokian zirkuko ikasleen ikuskizuna egin zen. 50 lagun inguru batu zituen ekitaldi “zoragarriak” eta Guraso Elkartetik ikasleak animatu dituzte hurrengo urtean izena emateko.

Kale arteak, herritarren parte hartzea eta sorkuntza batuko ditu uztailaren 3tik 5era Kalekak

Lea-Artibai eta Mutrikuko Hitza — 2026-06-23 13:39:10

Kaleka Lekeitioko Kale Arteen Jaialdiak uztailaren 3an, 4an eta 5ean ospatuko du bere ekitaldi berria. Aurten, jaialdia lau hildo nagusiren inguruan egituratuko da: Kaleka Programa Ofiziala, Kaleka Scratch, Kalekaz Blai eta Kalekari, kale arteak herriko espazio publikoetara hurbiltzeko eta herritarren parte hartzea sustatzeko helburuagaz. Hiru egunetan Lekeitioko kaleak eta plazak arte eszenikoen agertoki bihurtuko dira. Antzerkia, zirkua, dantza garaikidea, instalazio artistikoak, tailerrak eta prozesu sortzaileen erakustaldiak izango dira protagonistak.

Urtero legez, nazioarteko eta Euskal Herriko proposamena nagusituko dira. Aurtengo jaialdiak guztira hamar ikuskizun bilduko ditu, eta parte hartuko duten konpainia eta artistak deialdi ireki baten bidez hautatu dira. Guztira, 177 proposamen inguru aurkeztu dira . Jaialdian egongo dira Berceurs du temps (Kanada), Circ Vermut eta Mumusic Circus (Katalunia), Desprovistos (Andaluzia), Haatik eta Bitsa Konpania (Euskal Herria), Bruboc (Italia), Quase Cia (Brasil), Compagnie Bivouac (Frantzia) eta Moveo (Katalunia).

Lau ildo nagusi. Kaleka Programa Ofizialak kalea sorkuntza artistikorako espazio eta euskarri gisa erabiltzen duten ikuskizun eta esku hartzeak bilduko ditu. Kaleka Scratch atalak sortze prozesuan dauden lanak aurkeztuko ditu. Ikuskizunen erakustaldiez gain, artistek eta ikusleek elkarrekin hausnartzeko eta feedback-a partekatzeko espazioak sortuko dira, tailer eta topaketen bidez. Kalekaz Blai ildoak urte osoan herrian garatzen diren prozesu artistikoak eta parte hartze ekintzak bilduko ditu, jaialdiaren presentzia hiru egunetatik harago zabalduz eta herritarrekin lotura iraunkorra eraikiz. Gainera, Kalekaz Blai programaren barruan, hainbat “proiektu berezi” garatuko dira. Horien artean, Kanadako Berceurs du temps konpainiagaz elkarlanean egingo den Artxibo Soinuduna, herritarren ahots eta grabazioak bilduko dituen proiektua; Eneritz Artetxeren antzerki fisiko ikastaroa, urte osoan garatutako prestakuntza-prozesuaren erakustaldiagaz; eta Espazioa eta Argia / Objektu Argidunak egitasmoa, haur eta gazteekin egindako sorkuntza tailerren emaitzak herritar guztiekin partekatzeko. Kalekari programak publikoaren eta sorkuntza artistikoaren arteko harremana aztertzeko eta indartzeko jarduerak proposatuko ditu. Aurten, Moveo konpainiaren Ballar Sol És Un Pal ikuskizun parte hartzailea izango da ekimen nagusietako bat, ikusleak sorkuntza-prozesuaren parte aktibo bihurtuz.

Hiri eta Komunitate Lagunkoien III. Mundu Biltzarrean parte hartu du Lekeitioko eta Ispasterko Lagunkoi taldeek

Lea-Artibai eta Mutrikuko Hitza — 2026-06-23 13:32:13

Donostian egin zen nazioarteko biltzarrak xede argia zuen: “Gizartea gero eta zaharragoa den honetan, testuinguru horrek sortzen dituen erronka eta aukeren inguruko ikuspegiak, esperientziak eta ikaskuntzak partekatzea”. Bertan, eskualdeko bi lagun egon ziren: Julian Arrate Lekeitioko Lagunkoiko kidea eta Maite Zabala Ispasterko Lagunkoi eta Nagusien kontseilaria.

“Biztanleria zahartzearen ondorioz, hiri bizitzaren eremu guztiak eraldatzen ari dira”, azaldu du erakundeak, eta horrek erronka eta aukera berriak dakartza hainbat esparrutan: besteak beste, etxebizitzan, espazio publikoan, mugikortasunean, zaintzan, parte hartze demokratikoan, enpleguan, tokiko ekonomian, bizialdi osoko ikaskuntzan, klima larrialdian eta bizikidetza eta bizitza komunitarioko moduetan.

Arratek eta Zabalak eskualdeko esperientzia partekatu dute Euskadi Lagunkoiak antolatutako Zelan bultzatu bolondresen partaideza tailerrean, Mexiko, Colombia, Argentina, Dominikar Errepublika, Italia, Espania eta Euskal Herriko partaideen aurrean. Ispaster eta Lekeitioko herritarren inplikazioa, auzolana, udalaren laguntzak, prentsaren jarraipena eta egiten dituzten jardueren zabalkunde eta publizitate moduak “oso gustuko” izan dituzte bertako zein atzerriko bisitariek. Era berean, “biziki txalotu” zituzten hizlariek aurkeztutako adibide praktikoak. Ez hori bakarrik, Arratek aukera eduki zuen elkarrizketa batean parte hartzeko, eta bertan Lekeitioko Lagunkoi tabernen errealitatea azaldu zuen, “eredugarria dena” Euskal Herria mailan.

Lekeitio Lagunkoiaren hurrengo irteera. Taldearen X. urteurrena ospatzeko, Lekitto Bedarra taldearen laguntzagaz, Ipar Martxa ekitaldia egingo dute barikuan [ekainak 26] 17:00etan, Karraspio hondartzako dutxetatik hasita. “Ibilbide erraza eta leuna” izango da, eta bastoi barik ere parte hartzeko aukera dago. Hainbat geldialdi egingo dira, helburu argiagaz: bertoko ezaugarriak ezagutu eta auzolanean egindako ekintzak azaldu. Gainera, Santa Elenan kokatuta dagoen Sosoaga dolada barrutik ikusteko aukera egongo da, baita Santa Katalinako bide zaharreko aterpeko horma irudia ere. Izena emateko azken eguna bihar [ekainaik 24] da. Kiroldegiko harreran eman beharko da. Antolakuntzak jakinarazu du bezperan ere aukera egongo dela izena emateko, inor atzean ez gelditzeko.

Mikel Arrasate eta Aratz Aizpurua lekeitiarrak osatu dute Lekeitioko triatloiko podiuma

Lea-Artibai eta Mutrikuko Hitza — 2026-06-22 18:25:50

Aurten, etxekoak podiuma bete dute. Mikel Arrasate Amandarri Triatloi Taldeko kideak lehenengo postua lortu du (00.57,39) eta Aratz Aizpurua Garraitz Kirol Taldeko kirolariak hirugarrena (00.59,46). Antolakuntzak nabarmendu du Arrasate “oso erraz” ibili zela eta Aizpurua, aldiz, “oso azkar eta oso korrika onagaz” heldu zela helmugara. Bigarren postua Isaac Lamprachet estatubatuarrarentzat izan da, 00.59,33 denboragaz. Aurreko urteagaz alderatuta, Arrasate bigarren postutik lehenegora igo da eta Aizpurua segarrenetik hirugarrenera.

Gainera, sailkapen orokorrean, Garraitz Kirol Taldeko Aner Larrategik eta Julen Ugaldek laugarren eta bosgarren postua eskuratu dute. Sailkatutako lehen 20 kirolarietatik zazpi Garraitzekoak izan dira. “Talde modura, oso pozik eta oso goian gaude. Gainera, taldeko neskak oso indartsu ibili dira”.

Izena eman zuten 520 kirolari irten ziren helmugatik. Emakumezkoei dagokienez, Briana Mow australiarrak (01.06,57), Isla Watson australiarrak (01.07,37) eta Iratxe Arenal AD Nautico de Naroneko (01.07,56) kirolariak osatu zuten podiuma. Sailkapen orokorrean lehenengo geratu da iaz bigarren postua lortu zuen Briana Mow australiarra. Eskualdeko lehenengo emakumea, ostera, Garraitz Kirol Taldeko Mireia Arrillaga izan zen, 01.14,01ko denbora eginda; sailkapen orokorrean hamabigarren postua eskuratu zuen.

Taldeka. Gizonezkoen taldekako sailkapenetan, ostera, Garraitz Kirol Taldeko kideek lortu zuten garaipena, 03.00,02ko denboragaz. 23 segundo gehiago baino ez zuen behar izan Amandarri Triatloi Klubak lanak amaitzeko, eta hala, bigarren postua eskuratu zuen, 03.00,25ko denbora eginda.

Emakumeen taldekako sailkapenean Mugarra Triatloi Taldea izan zen garaile (03.41,25). Haren atzetik, bigarren postua eskuratu zuen Getxo Triatloi Taldeak (03.49,39), eta 10 minutu gehiago baino ez zituzten behar izan Amandarrikoek lanak amaitzeko; hala, taldeak hirugarren postua eskuratu zuen, 03.59,15ko denboragaz. Garraitz Kirol Taldekoek seigarren postua lortu zuten (03.59,48).

Garraitz Kirol Taldearen ekimenez, 33. Lekeitioko triatloiak inoiz baino kirolari nahiz ikusle gehiago elkartu ditu herrian. Taldeak ez du atsedenik izango, zapatuan [ekainak 27] 27. Kilin Kala igeriketa zeharkaldia egingo delako.

Ligako lehen arraunkadak eman dituzte etxeko taldeek

Lea-Artibai eta Mutrikuko Hitza — 2026-06-22 13:44:14

Ondarroako eta Isuntzako trainerek ETE Ligako lehen estropadak lehiatu zituzten joan den zapatuan eta domekan [ekainak 20 eta 21], hurrenez hurren, Astilleroko eta Pasaiako uretan. KAE 2 Ligako lehen estropada ere jokatu zuten Astilleron, eta bertan eman dituzte trainerek lehen pausuak sailkapen orokorrean.

Hondarribia, Kaiku eta Zarautz oso parekatuta ibili ziren Astilleron lehiatu zuten lehen estropadan. Eguneko ziaboga bakarreko biraketa 00.06.00ko denboran egin zuten hirurek, hala, bigarren eta azken luzea izan zen irabazlea erabaki zuena: zarauztarrek egin zuten marka onena, egin beharrekoak 11.18,34ko denboran burutuz. Hondarribia bigarren, Kaiku hirugarren eta Deusto laugarren geratu ziren. 11.35,22ko denboragaz, bosgarren postua lortu zuen Ondarroak, lau puntuak eurenganatuz . Zazpi segundu gehiago behar izan zituen Isuntzak, eta eurena izan zen hiru puntu eman zizkien seigarren postua. Hala, Hernaniko eta Portugaleteko trainerek bete zituzten azken bi postuak.

Pasaian jokatu zuten ETE Ligako bigarren jardunaldia, eta bi txandatan aritu ziren emakumezkoen trainerak 1,5 milietan. Aurreko eguneko estropadako postuak kontuan hartuta, Deustok, Kaikuk, Hondarribiak eta Zarautzek osatu zuten ohorezko txanda. Zapatuko ildotik jarraiki, Kaikuk, Hondarribiak eta Zarautzek guztiz parekatuta egin zituzten lehen bi ziabogetako biraketak, hala, azken luzean indarrak batu eta Hondarribiaizan zen azkarrena; 11.49,88ko denbora eginda, zortzi puntuak eurenganatu zituzten. Lehenengo txandan, denborarik onena egin zuten ondarrutarrek, eta 12.06,24ko denboragaz, lau puntu lortu zituzten. Postu bat atzera egin eta zazpigarren postua lortu zuen Isuntzak domekan; 12.34,60ko denboragaz, bi puntu gehitu dituzte sailkapen orokorrera.

Isuntza estropadan.Bermeo Arraun Argazkiak

KAE 2 Ligako lehen estropada ere hartu zuen Astillerok zapatuan. Mutrikuko trainera ligara bueltatu da, eta zapatuko lehian izan zen. Mutrikuarrek 22.38,96ko denboran egin zituzten lau luze eta hiru ziabogak; hala, seigarren postua eurenganatu eta sailkapenerako hiru puntu lortu zituzten. Castrok lortu zuen denborarik onena Astilleron 21.07,98ko denboran, eta Camargoko trainera izan zuen atzetik. Portugalete geratu zen hirugarren, Deusto laugarren eta Busturialdea bosgarren. Laredo eta Lutxana izan ziren azkenak hiru miliak osatzeko lehian.

Mutrikuko trainera estropadan.Bermeo Arraun Argazkiak

Sailkapen orokorra. Emaitzak horrela, ETE Ligako sailkapen nagusian 8 puntugaz amaitu du Ondarroak asteburua, eta 5 puntugaz, Isuntzak. Datorren zapatuan [ekainak 27], 11:00etatik aurrera ariko dira aurrez aurre emakumeen trainerak Elantxobeko Andran I. Ikurrina jokatzeko.

KAE 2 ligako lehen estropadan lortutako hiru puntuek sailkapen orokorrean seigarren postua eman die mutrikuarrei. Elantxobeko 38. traineru estropada jokatuko dute datorren zapatuan [ekainak 27], eta Mutrikuko Unebide 8. bandera, domekan [ekainak 28], biak 11:00etatik aurrera.

Etxeko taldeek jardunaldiak hasi baino lehen aurreikusitako helburuak bete ditzutela esan daiteke, ohorezko txandan ez bazen ere, lehen txandako postu onenetan egotea espero baitzuten.

Lekeitioko frontoiko teilatua konpontzeko obrak hasi ditu udalak

Lea-Artibai eta Mutrikuko Hitza — 2026-06-16 15:42:16

Lekeitioko Udalak frontoiko teilatuko itoginak kentzeko lanak hasi ditu, urteetan egon den arazoari irtenbidea emateko. Udalak 262.000 euroko inbertsioa egin du, udal ordezkariek azaldu duenez, “inoiz egin barikoa”. Frontoia itxita egongo da lanek iraun bitartean.

Lekeitioko Baserri Azokan parte hartzeko epea zabalik egongo da ekainaren 23ra arte

Lea-Artibai eta Mutrikuko Hitza — 2026-06-16 15:27:03

Urtero legez, Baserri Azoka hartuko du Lekeitioko Independentzia plazak. Abuztuaren 8rako jarri dute hitzordua. Interesdunek atzotik [ekainak 15] ekainaren 23ra arte edukiko dute izena emateko aukera. Azokan parte hartu nahi dutenek Lea-Artibai Landa Garapenaren webgunean aurkituko dituzte arauak, oinarriak eta izena emateko beharrezko argibide guztiak.

Antolakuntzak horrelako azokek daukaten garrantzia azpimarratu du: “Lehen sektorea ezinbesteko sektorea da Lekeitio bizirik egoteko. Bertokoa eskaitzen digute, modu duinean ekoiztua eta osasungarria”.

35 ikusle batu dira 'Memorias de una geisha' filmaren proiekzioan

Lea-Artibai eta Mutrikuko Hitza — 2026-06-11 15:07:16

Atzoko Lekeitio Lagunkoiko zinema emanaldiak 35 ikusle batu zituen. Gerturatutakoak Memorias de una geisha filmagaz “gozatzeko” aukera eduki zuten. Elkartetik adierazi dute irailera arte ez dela egongo ez zarzuela emanaldirik, ez zinema proiekziorik, uda sasoia delako.

Kantu eneak 250 ikasle batuko ditu, Lekeitioko plazan

Lea-Artibai eta Mutrikuko Hitza — 2026-06-10 13:25:00

Urtero legez, Lekeitioko Herri Eskolak Kantu enea ospatuko du, Independentzia plazan. 2 urtetik LH6ra arteko ikasleek parte hartuko dute ekitaldian, urte osoan musika irakasleekin eta tutoreekin egindako lana plazaratzeko. Kantu enea barikuan [ekainak 12] 11:00tan egingo dute. Herritarrak animatu dituzte plazan haiekin bat egiteko.

Ikasturtean eguenero batu izan dira, eta ikastetxetik aitortu dute “festa giroa” sortu nahi dutela. “Urte osoan ikasleak kantuak prestatu dituzte, eta herritarrak hurbiltzea gustatuko litzaiguke, batez ere, denok ezagutzen ditugun kantak abestuko ditugulako”. Lekeitioko kantuez eta euskal abesti ezagunez gozatzeko aukera “paregabea” izango dela azpimarratu dute.

Ortugintza bere osotasunean ezagutzeko ikastaro berria egingo dute Lekeition

Lea-Artibai eta Mutrikuko Hitza — 2026-06-03 11:59:37

Ortugintza zaleek hitzordu berezia izango dute zapatuan [ekainak 6], Lekeition. Lekitto Bedarrak antolatuta, “Ortugintza bere osotasunean” izeneko ikastaro berria eskainiko da, Gabiriako Gabino Murua adituaren gidaritzapean.

Ikastaroa 09:30ean hasiko da Azkue Ikastolan, eta lehenengo bi orduetan saio teorikoa egingo da, 12:30ak arte. Bertan, ohiko eta sasoiko barazkiez gain, gure ortuetan hain arruntak ez diren espezieak ere aztertuko dira, hala nola meloia, sandia, zainzuria edo orburuaren laborantza, besteak beste.

Ondoren, parte-hartzaileak Usotegi parkeko Herrittarron Ortura joango dira. Bertan, ikasgelan landutako edukiak praktikan jartzeko aukera izango dute, lurrean bertan egindako saio baten bidez. Antolatzaileek nabarmendu dutenez, eskualde osotik jende ugari animatu da ikastarora, nahiz eta oraindik plaza batzuk libre dauden. Izena emateko azken eguna bihar [ekainak 4] izango da.

Ikastaroaren amaieran, ekitaldi berezia egingo da Usotegi parkean. Herrittarron Ortuko kartel berriaren aurkezpena egingo da, baita taldearen ongietorri-margoaren esanahiaren azalpena ere.

Kartela eta hormako pintaketa auzolanean egin dituzte Mari Talako pintura taldeko kideek eta Lekitto Bedarrako boluntarioek. Gainera, kartela estalita egongo da Gantxilloko Kakorratz taldeak egindako estalki berezi batekin, eta bi talde horiek izango dute estalkia kentzeko ohorea.

Antolatzaileek azaldu dutenez, 15 minutuko ekitaldi “xumea” izango da, baina auzolanaren balioa eta herritarren parte-hartzea aitortzeko balio izango duena. Horregatik, gonbidapena luzatu diete Lagunkoi taldeari, Herriko Auzolan taldeari eta Udaleko alkate eta zinegotzi guztiei.

Burrundada Egunak giro bikaina eta parte-hartze handia batu ditu

Lea-Artibai eta Mutrikuko Hitza — 2026-06-01 11:24:55

Lekeitiok rock musikaren festa handi bihurtu zen joan den zapatuan [maiatzak 30] ospatutako Burrundada Egunaren bosgarren jaialdia. Egun osoko egitarauak ehunka musikazale batu zituen herrian, eta antolatzaileek aurreikusitako giro ona bete-betean gauzatu zen goizetik gauera arte.

Jardunaldia Nautika aurrean hasi zen, Musikaia Udal Musika Eskolaren eskutik. Gazteen rock konboak eta eskolako hainbat espezialitatetako ikasleek kontzertua eskaini zuten, rock doinuekin eguna martxan jarriz. Ondoren, Dr. Palauer talde lekeitiarrak hartu zuen lekukoa.

Musikaia Udal Musika Eskolatik egindako balorazioa oso positiboa izan da. Azaldu dutenez, emanaldia “oso ondo” joan zen, 50 minutu inguruko kontzertu arina eta fluidoa eskainiz. Gainera, eguraldia lagungarri izan zela nabarmendu dute: nahiz eta zerua lainotuta egon, jotzeko baldintza ezin hobeak izan ziren.

Eskolako arduradunen esanetan, publikoaren erantzuna ere bikaina izan zen, eta giro ederra sortu zen kontzertu osoan zehar. Ikasleak gustura aritu ziren oholtzan, eta ikusleen aldetik jasotako harrerak pozik utzi zituen parte-hartzaile guztiak.

Aurten, gainera, hainbat berritasun izan dira Musikaia Musika Eskolaren emanaldian. Rock taldeaz gain, beste espezialitate batzuk ere batu ziren ekitaldira, besteak beste saxofoia, ahotsa eta bateria, ikuskizunari aniztasun handiagoa emanez.

“Lanarekin, giroarekin eta sortu zen ambientearekin oso pozik gelditu gara. Ikasleak ere gustura ibili dira eta esperientzia zoragarria izan da”, adierazi dute Musikaia Udal Musika Eskolatik.

Goizeko saioaren ostean, Burrundada Egunak arratsaldean eta gauean jarraitu zuen Gaztetxeko kontzertuekin eta Kontzijope Rock ekitaldiarekin. Tunantiak, Hortzak, ETZ eta Mitosia taldeek osatu zuten kartela, rock, metal eta thrashcore doinuekin jaialdiari amaiera indartsua emanez.

Bizkaiko Traineru Txapelketa hartuko du Lekeitiok

Lea-Artibai eta Mutrikuko Hitza — 2026-05-28 16:39:31

Bizkaiko arraunlariek domekan [maiatzak 31] izango dute hurrengo hitzordua; izan ere, beste urte batez Lekeitioko uretan lehiatuko da Bizkaiko Traineru Txapelketa, 10:30ean.

Hala, bi kategoria ariko dira lehian domekan: beteranoak eta absolutuak. Beteranoak 2.778 metroko distantzian ibiliko dira, eta bi txanda egingo dituzte. Lehenengo, Bilbo Tigreak eta Itsasoko Amaren txanda izango da, eta ondoren, Getxo, Iberia, Mundaka eta Plentzia aterako dira itsasora.

Absolutuetan, emakumezkoek 2.778 metroko distantzia egingo dute, eta hauek ere, bi txandatan banatuko dira. Lehenengo Portugalete eta Isuntza, eta ondoren, Deusto, Kaiku eta Ondarroa. Bestalde, gizonezkoak hiru tandatan aterako dira itsasora, eta 5.556 metrotan ibiliko dira. Lehenengo, Portugalete, Elantxobe eta Lutxanaren txanda izango da, gero, Arkote, Deustu, Itsasoko Ama eta Kaikurena, eta azkenik, Bermeo, Zierbena, Isuntza eta Ondarroarena.