Lea-Artibai eta Mutrikuko Hitza

27. Zapato Azulak urdinez tindatu du Ondarroa

Lea-Artibai eta Mutrikuko Hitza — 2026-06-27 16:22:15

Azken egunetako bero sargoririk barik esnatu da gaur [ekainak 27] Euskal Herria, eta gustura hartu dute hori Ondarroara joan direnek. Kamiseta urdinak armairutik atera, eta Alde Zaharra goitik-behera eta ezker-eskubi bete dituzte bertaratu direnek. Herritarrak, inguruko herrietakoak nahiz Euskal Herriko hamaika txokotatik bertaratutakoak elkartu ditu gaur Radixu Irratiak antolatzen duen 27. Zapato Azulak Ondarroan. Hala, aurtengo kartelean keinu egin dioten Felix Beristainen koadro baten antzera, urdinez tindatu dira herriko txoko guztiak.

11:00etarako prest zeuden Radixu Irratiako kideak zuzeneko emisioagaz batera jaiari ekiteko, eta egunaren nondik norakoak azaldu ostean, Koldo Azpiazuk hartu du mikroa. Hain zuzen ere, iaz hartu zuen Azpiazuk Nekane Akarregiren erreleboa, eta aurtengoan ere berea izan da jaiari hasiera emateko ardura. Hala, urtero bezala, Alai Tabernako balkoiak bereganatu ditu begirada guztiak, eta bertan zeudenek adi jarraitu dituzte Azpiazuk esandakoak. Nola ez, Manuel Eluren bolanderek ere ez dute hutsik egin, eta 12:00etan egin du eztanda jaiak, bolandera eta bolandera artean.

Bolandera ugari bota ostean jaiak ez du etenik izan, eta urteroko osagaiekin osatu dute goiza. Txistulariak, Kresalako bandaren eta Artelango erraldoien kalejira nahiz falta direnak gogoan hartzeko tartea hartu dute herritarrek, eta Txalainak taldearen kontzertuak biribildu du goizeko jarduna. Abanikoak dantzan eta gorputzak ere bai, Hertzainak taldearen abesti ezagunenak abesteko tartea hartu dute Kalekutz inguruan batu direnek.

Zapato Azule berezia bada, Dinamartxaren ailegaera are bereziagoa da herritar askorentzat. Dina Bilbao Barruetabeñaren omenez Tolosa eta Ondarroa elkartzen dituzte martxalariek oinez nahiz bizikletan, eta irrintzi, txalo, oihu eta musika artean egiten diete harrera ondarrutarrek. Oinez egin duten 77 martxalarientzat bart 01:00etan hasi ziren Zapato Azuleko ekintzak, eta gaur 09:00etan, ostera, bizikletaz etorri diren 223 partaideentzat. Iazko parte hartze kopurua gaindituta (iaz 259 partaide eduki zituen), poztasunez nahiz emozioz betetako malko eta irribarreen artean sartu dira herrira 300 martxalariak.

Martxalariak, Alde Zaharrera heltzen.

Dinamartxako kide denak heldu ostean, aurtengo pregoia irakurri dute Radixuko kideek balkoitik. Besteren artean, Palestina, Saharan, Iran Libano eta Kubagaz gogoratu dira, eta zelan ez, baita Venezuelako herriagaz ere. Jarraian, denborarik galdu barik, aurtengo omendua izendatu dute. “Omendu guztiak dira bereziak, baina aurtengoa, Zapato Azule antolatzen dugun guztiontzat, bereziena da. Zorionak Nekane Akarregi Amutxastegi, zeu zara aurtengo omendua!”. Hala, Akarregi ezustean harrapatu du omenaldiak, baina irribarrez jaso du Radixukoen aipamena.

Ostean, 11:00etan zabaldu duten Euskal Herriko Kamiseta Azoka eta Artisau Azoka itxi, eta aurtengo kamisetarik eta erakusleihorik onenak izendatu dituzte. Kamiseta Azokan Ondarroako hiru postu eta Euskal Herriko beste hamahiru egon dira, eta Torontilek (Artea) irabazi du Euskal Herriko kamisetarik onenaren saria. Ondarroako kamisetarik onenaren saria, aldiz, Saturrarango Haitzak irabazi du, eta erakusleiho onenarena, Lorak Estherrek.

[ARGAZKI GALERIA]

Txo! Antzerki Kolektiboak omenduari egindako sketchagaz amaitu dute eguerdiko jarduna, baina jai luzea geratzen da oraindik Ondarroan. Arratsaldean mota eta gustu guztietako musika entzuteko aukera egongo da herriko txoko guztietan, eta jaiak ez du etenik izango goizeko ordu txikiak arte.

"Begirunez egindako esperientzia sentikor bat" dauka gordeta Arretxinagako ermitak

Lea-Artibai eta Mutrikuko Hitza — 2026-06-26 15:37:21

Ereinotz bat Arretxinagako ermitari. Prozesu luze baten ostean, Markina-Xemeingo balio handiko gunearen zaharberritze lanak amaitu dituzte, hala, San Migel ermita eraberrituta ikusteko hainbat herritar batu ziren atzo arratsaldean. Herritarrez gain, Zerutxu Dantza Taldeak eman zion ongietorria gune berrituari.

Begibistakoak dira ermitaren kanpoaldean egin dituzten lanak. Ermitaren kanpoko hormak kareorez berritu dituzte, kolore eta ehundura bereizgarriak emanez. Eraikina bakarrik ez, alboan dagoen probalekua ere berritu dute eta ikusleentzako armailak jarri dituzte. Lanak amaituta daudela adierazteko, Alde Zaharrean egin zuten era berean lotu zioten ereinotza ermitari.

Kanpoaldekoaldekoak ikusita, barrualdean jarri zuten begirada. Honetarako, ermitara sartu baino lehen, Jon Astorkiza eta Joseba Beristain artistek hartu zuten hitza, erakinaren barnealdean egindako arte proiektu berritzaileari buruzko nondik norakoak azaltzeko. Astorkiza izan da proiektuaren grafiko zuzendaria, eta Arretxinagan egon zen lehen aldian sentitu zuen “konexio handia” aitortu zuen bere berbaldian. Horregatik, toki honetarako “begirunez egindako esperientzia sentikor bat” sortu du. Azalpenekin jarraitzeko, Beristainek hartu zuen hitza. “Tokiko natura elementuen soinuekin eta sintetizadoreekin jolastuz”, sortu du esperientzia bisualari balio gehigarri bat emango dion soinu paisaia. Sei bozgoragailuk osatutako instalazio bat sortu du, eta hala, “txikia den espazio bat handitu egiten du”.

Instalazioaz gain, ikus-entzunezko pieza bat eskaintzen digu San Migel ermitak. Bertaratzen direnek QR bat aurkitu eta horren bitartez helduko dira piezara. Eneritz Artetxe aktore gernika-lumotarrak gidatuko du ikuslea lau hizkuntzatan (euskeraz, gazteleraz, frantsesez eta ingelesez) entzun daitekeen piezan. Ermitari eta hau inguratzen duen artearen historiari buruz ari da Artetxe ikus-entzunezko horretan, “bisitaria leku honen magiarkein, unibertsoarekin, naturarekin eta bizitzarekin lotzeko”.

Aurkezpena amaituta, ermitako ateak zabaldu zitzaizkien herritarrei, eta orduan izan zuten instalazioa ezagutu eta tokiarekin konektatzeko aukera. Bertaratzen direnek ermita zabalik dagoen artean izango dute esperientzia bizitzeko aukera.

Auzo eta herriak alaitzera datoz San Pedro jaiak

Lea-Artibai eta Mutrikuko Hitza — 2026-06-25 16:27:24

San Joan jaiak igaro ondoren, San Pedroen txanda izango da datorren asteburuan, eta Berriatuan, Mutrikun, Artan (Ziortza-Bolibar) eta Barinagan (Markina-Xemein) ospatuko dituzte.

Berriatuko San Pedroak ekainaren 23an hasi baziren ere, gaurtik [eguena] martitzenera arte ere edukiko dute zer ospatu herritarrek; batez ere, kirola eta kultura uztartuko dituzte. Izan ere, gaur [eguena] Euskal Herri mailako gazteen bertso sariketa egongo da bideogelan: Berritxu saria. Bertan parte hartuko dute Kattin Madariaga Apaolaza, Adei Urbitarte Aiestaran, Kattalin Arabolaza Palono, Maia Ortiz De Zarate Idiakez, Iradi Barrenetxea Akesolo, Naroa Iturrioz Lauzirika, Jon Abasolo Sarralde eta Amaiur Betanzos Caminosek. Bihar [barikua] Euskal Herriko mutilen banakako zesra finalak jokatuko dira.

Zapatuan ere kirolak protagonismo berezia izango du. 09:30ean Triatloi herrikoia hasiko da herriko plazatik, eta eguerdian, entsalada eta tortilla lehiaketa egingo dute. Bihar izango da izena emateko azkenengo eguna. Ondoren, Bola joko txapelketagaz jarraituko dute, eta azkenik, Kaletrik musika emanaldia egongo da herriko plazan. Domekan [ekainak 28] Zerbait sartu zait begian antzezlana egongo da bideogelan.

San Pedro egunean [ ekainak 29] eta San Pedro txiki [ekainak 30] egunean ere egun guztiko egitaraua izango dute. Lehenengoan, goizean, Open Bizkaia esku pilota partidak egongo dira, eta arratsaldean, Mus eta Briska txapelketak. Martitzenean umeak izango dira protagonista. Umeen parkea egongo da goiz zein arratsaldez, eta gero, bazkaltzeko batuk dira ume guztiak. Apar festagaz eta txokolateagaz emango diote amaiera egunari.

Mutrikun, ohi legez, omenaldi “xume bezain politarekin” ospatuko dute San Pedro eguna. Itsasoan desagertutako arrantzaleak omenduko dituzte, 12:00etan, Kofradia Zaharrean. “Udalak hartuko du hitza lehenengo, eta ondoren, abadearen txanda izango da. Dantzariek agurra dantzatuko dute, eta korua eta eskaintza egingo dira. Ondoren, bertsolariek bertsoak botako dituzte, eta udalaren agurra egin ondoren, jan-edana egongo da”. Horrez gain, Xabier Basterretxea Esnaola Txordori omenaldia egingo zaio.

Auzoetan ere, San Pedoen gosez daude. Barinaga auzoan bihar [ekainak 26] emango diote hasiera, eta gaztetxoen pilota partiden ondoren, hasiera ofiziala emango diote txupinagoagaz, 20:00etan. Ondoren, txikiteoa egingo dute auzoan, eta iluntzean, su artifizialak egongo dira. Zapatuan [ekainak 27] arratsaldean hasiko da jai giroa: zaldi probak, parrillada eta bolo txapelketa egongo dira. Domekan umeak izango dira protagonista Briska txapelketa eta jolasen artean, eta astelehenean, nagusiagoen txanda izango da. Mezaren ostean, jubilatuen bazkaria egongo da tabernan.

Ziortza-Bolibarko Arta auzoan ere asteburuan ospatuko dituzte San Pedro jaiak. Zapatuan, 17:00etan, XIII. Briska txapelketa egongo da. Antolatzaileek azaldu dutenez, momentuan bertan eman beharko da izena: “Gutxi gorabehera, 22 bikote inguruk ematen dute izena. Auzokoak eta herritarrak etortzen dira, baina baita inguruko jendea ere”.

Domekan [ekainak 28] egun guztiko jaia izango dute. “Eguerdi aldera batzen gara jende gehien, eta Zerutxu dantza taldeko dantzariek ere jendea erakartzen dute. Horrez gain, umeekin ere etortzen da jendea, eta bazkaritara bakoitza norbere etxera joaten da, antzinako erara”. Hala ere, bazkaldu aurretik Onintza Enbeita eta Miren Amuriza ariko dira bertsotan.

Bazkalostean, umeen jolasak egongo dira, eta Imanol Intxausti eta Iñaki Larrañaga trikitilariek alaituko dute auzoa: “Trikitilariak egun guztian egongo dira, eta umeen jolasak ere girotuko dituzte. Umeen jolasetan betikoak egiten ditugu: aulki jolasa, puxikak puskatu… Jolas bereziena patata dantza izaten da: patata bat begian jarri eta dantza egin patata erori gabe”.

Hamabost lagun inguru dabiltza antolakuntzan, eta “dena denen artean” egiten dutela zehaztu dute: “Bilerak egiten ditugu eta bakoitzak bere ardurak hartzen ditu. Gu momentuz jaiak mantentzen saiatzen gara, eta nahiko indartsu daudela esango nuke. Gogotsu gaude aurtengorako ere”.

EGITARAUA

BERRIATUA

Bihar, barikua
- 19:00. Euskal Herriko mutilen banakako zesta txapelketako finalak.
Etzi, zapatua
- 09:30. Triatloi herrikoia, herriko plazan.
- 14:30. Entsalada eta tortilla lehaiketa, herriko plazan.
- 17:00. Bola joko txapelketa.
- 18:00. Kaletrik musika emanaldia, herriko plazan.
Ekainak 28, domeka
- 19:00. Zerbait sartu zait begian, antzezlana, bideogelan.
Ekainak 29, San Pedro eguna
- 12:00. Meza San Pedro elizan.
- 12:30. Open BIzkaia esku pilota partidak emakumezko eta gizonezkoak. Kanpoko frontoian (euriagaz, barruko frontoian).
- 17:00. Mus eta Briska txapelketak.
Ekainak 30, San Pedrotxiki
- 11:00-13:00/15:00-17:00. Umeen parkea, herriko plazan.
- 13:30. Umeen bazkaria herriko plazan.
- 17:00. Apar festa herriko plazan.
- Ondoren. Txokolatea herriko plazan.
Uztailak 5 eta 12
- Zesta: Jai Alai League B, Mendibarren frontoian.

MUTRIKU

Ekainak 29, San Pedro eguna:
- 12:00. Itsasoan desagertutako arrantzaleei omenaldia, Kofradia Zaharrean.

BARINAGA AUZOA (MARKINA-XEMEIN)

Bihar, barikua
- 17:00. Gaztetxoen arteko pilota partidak.
- 20:00. Txupinazoa eta txikiteoa.
- Iluntzean. Su artifizialak.
Etzi, zapatua
- 18:00. Zaldi probak.
- Ostean. Parrillada.
- 21:00. Bolo txapelketa.
Ekainak 28, domeka
- 16:00. Umeen briska txapelketa.
- 17:00. Umeen jolasak.
Astelehena, ekainak 29
- 12:15. Meza.
- Ostean. Mezaostekoa.
- 14:00. Jubilatuen bazkaria tabernan.

ARTA AUZOA (ZIORTZA-BOLIBAR)

Etzi, zapatua
- 17:00. Artako XIII. Briska txapelketa.
Ekainak 28, domeka
- 11:00. Meza santua.
- 12:00. Zerutxu dantza taldea.
- Ondoren. Bertsolariak: Onintza Enbeita eta Miren Amuriza.
- 18:00. Umeen jolasak. Imanol Intxausti eta Iñaki Larrañaga.
- Trikitilariak egun guztian.

Itsaskorda enpresako kaleratzeen aurrean, “gizatasun falta kezkagarria” salatu du LABek

Lea-Artibai eta Mutrikuko Hitza — 2026-06-24 18:35:58

LAB sindikatuak erabateko “gaitzespena eta desadostasuna” agertu du Itsaskorda enpresako zuzendaritzak egindako kaleratzeen aurrean. Sindikatuak jakinarazi duenez, Itsaskorda enpresako zuzendaritzak bost langile kaleratu ditu aurretik ezer jakinarazi barik. Horren aurrean, langileak antolatu eta enpresaren aurrean mobilizazioa egin dute gaur, “lanpostuak defendatzeko eta errespetua eta duintasuna eskatzeko”.

Enpresak hartutako erabakia “traumatiko” bezala deskribatu du LABek, eta zalantzan jarri ditu enpresak emandako “arrazoi ekonomiko eta produktiboak”. Horretaz gain, sindikatuak eta langileek enpresaren “modu onartezinak” salatu dituzte: “Itsaskordako zuzendaritzak erabateko opakotasunez jokatu du, langileen oinarrizko eskubideak urratuz”.

“Aldez aurretik pentsatutako informazioa ezkutatzea” leporatu diote enpresari, izan ere, adierazi dute langileei eta haien legezko ordezkariei ez dietela enpresaren benetako egoeraren berri eman. Sindikatuak adierazitakoaren arabera, enpresak ez du inolako alternatibarik mahaigaineratu, eta ez du kaleratzeak saihesteko proposamenak jasotzeko aukerarik zabaldu. Kaleratzeak bideratzeko “onartezinak diren moduak” ere salatu dituzte, kaleratzeak “langileen lan txandaren erdian eta inolako aurreabisurik barik” jakinarazi omen zituztelako.

LABen ustetan, Itsaskordako zuzendaritzak hartutako erabakiek “langileekiko erabateko enpatia falta” erakusten dute, izan ere, langileak “produkzio-zenbaki” huts modura tratatu dituztela salatu dute, “gizagabeko enpresa kudeaketa” bat agerian utziz.

San Joan jaiak, termometroa lehertzeko zorian

Lea-Artibai eta Mutrikuko Hitza — 2026-06-24 17:45:26

San Joan jaiek Lea-Artibaiko herri zein auzoetako bazterrak berotu dituzte aurten ere. Aulestin, Ziortza-Bolibarren, Gorozikan eta Amallon jaiekin batera eman diote hasiera udari, gainera, jaiak goi-goitik ospatu dituzten bezala, tenperaturak ere maila berean ibili dira. Izan ere, beroak arreta bereganatu du aurten, azken egunotan erregistratutako tenperatura altuek udako giro bete-betea ekarri dute eskualdera, eta San Joan jaiak ohikoak baino beroagoak izan dira.

Aulestin egun garrantzitsua izan dute gaurkoan [ekainak 24]. 26. Sobra sariketa izan dute gaur, eta tenperatura altuengatik frontoira lekualdatu dute goizeko egitaraua. Hala, 12:15erako aurkeztu dituzte herritarrek sobrak, eta epaimahaiak irabazleak aukeratzeko tarte bat hartu bitartean, herritarren arteko herri kirol desafioa egin dute: “Giro oso ederra sortu du desafioak. Aulestiko lau talde elkarren kontra aritu dira, eta normalean baino jende gehiago etorri da sortu duen ikusminagatik. Horrez gain, Euskal Ardi Moztaileek ere hartu dute parte”. Hala, Unai Gorostola, Olatz Malatsetxebarria eta Iraiz Idoietak osatutako taldeak lortu du garaipena, 11.05eko denboragaz; bigarren postua lortu dute Nora Urizar, Itziar Salegi eta Iñaki Urberuagak [12.07]; Hirugarrena Ziara Kareaga, Onintza Galdos eta Xabi Malatsetxebariak eskuratu dute [12.40]; eta laugarrena Aitor Atxurra, Aimar Irigoien eta Irati Goitiak [12.25]. Hasierako ideia sobra sariketa egin bitartean herri kirol talde baten erakustaldia egitea bazen ere, herriko gazte talde batek euren arteko desafioa egiteko ideia izan zuen: “Herri giro polita sortu da”.

Ondoren, 26. Sobra sariketaren txanda izan da, eta antolatzaileek zehaztu dutenez 60 lagunek parte hartu dute aurten. “Parte hartze handia egon da aurten, eta gainera, jarritako helburuetako bat betetzen ari da: belaunaldi berriek parte hartzea. Oso pozik gaude”. Mertxe Gerenabarrena, Izar Uriarte eta Izaro Aranburu izan dira lehen saria irabazi dutenak, eta Noelia Arakistain, Nieves Unamuno eta Izei Arriagak lortu dute bigarren saria. Horrez gain, Eneko Willis izan da sari berezia jaso duena.

Leiho eta balkoietako III. Lore lehiaketari dagokionez, Leiho eta balkoirik onenaren lehen saria Aitor Ansotegik irabazi zuen; Iñaki Araunguenak bigarrena; eta Rosario Unamuno hirugarrena. Etxaurreetan Mertxe Gerenabarrena izan da lehena; Enkarna Anitua bigarrena; eta Ziortza Jaio hirugarrena. Arratsaldean pilota partidak egongo dira, eta pintxopotea egongo da herriko tabernetan.

Antolatzaileek jaien balorazio “oso ona” egin dute: “Dena ondo atera da eta giro ederra egon da herrian, barikutik hasi eta gaur arte”. Hala, bihar [ekainak 25] emango diote amaiera jaiei eta adin nagusiko herritarrak izango dira protagonista. 12:00etan mezagaz emango diote hasiera eguari, Murlan. Ondoren, Roberto eta Idoia trikitilariek alaituko dute herria, eta 14:30ean bazkaritan batuko dira Ilunzarren.

Ondarroako Gorozika auzoan ere gaur emango diote amaiera jaiei. Mezagaz hasi dute eguna, eta lore sorten bedeinkapenaren ostean, Xuhare eta Araia trikitilariek alaitu dituzte auzoko bazterrak. Domekan [ekainak 21] hasi zituzten San Joan jaiak Nerea Ibarzabal eta Angel Mari Peñagarikanoren bertso saioagaz. Arratsaldean, herri kirolek bete zuten auzoko plazan, aizkolari, harri jasotzaile eta ingude zein trontzako erakustaldia eginez. Umeek ere eduki zuten zertaz gozatu; izan ere, txokolatada egon zen guztientzat, eta baita umeei zuzendutako herri kirolak ere. Arratsaldea alaitzen ibili ziren Mirari eta Izarra trikitilariak.

Amallo. Auzolanean egindako “lan handiari” esker, aurten ere lau eguneko egitaraua atera dute aurrera auzotarrek. Hala, gaur [ekainak 24] San Joan egunagaz batera eman diote amaiera jaiei; goizean meza baino lehen tortilla txapelketa egin dute, eta 15 tortilla aurkeztu dira lehiaketara.

Irabazlea Olazar beheko baserriko Amets Arrizabalaga izan da, eta antolatzaileek tortilla patataren itxura, patataren egoera eta gustua saritu dituzte. Mezaren ostean, “giro ederrean” elkartu dira auzoko trikitilariak. 12:30ean, ostera, eguneko punturik gorena heldu da: Amalloko gazteek Ibekohondoren zaldi gaztearen kontra neurtu dituzte indarrak.

Bertan, auzoko zazpi gazte hiru urteko zaldi baten aurka lehiatu dira. Amalloko gazteek 28 metroko ibilbidea osatu behar izan dute–joan eta etorrian–, 440 kilogramoko harria arrastatuz, eta 20 minutuko denbora tarteagaz. Ondoren, Pipa zaldiaren txanda izan da: denbora tarte beragaz, gazteek egindako buelta kopurua 1,75 aldiz gehiago egin behar izan du, 650 kilogramoko harria arrastatuz. Gazteak hasi dira, eta 29 buelta eman dituzte. Halaber, Pipa zaldiak irabazteko gutxienez 51 buelta egin behar zituen, eta 52 buelta osatuta, lehia irabazi du.

Horrela, giro “ona eta ederra” nagusitu da jaien azken egunean, eta antolakuntzatik adierazi dute “oso pozik” daudela hainbeste auzokide bertaratzeagatik. Eskerrak eman diete gazteei izan duten parte hartzagatik, batez ere, sekulako bero egin duen arren lehiaketan parte hartu dutelako.

Ziortza-Bolibarren. Surik ez piztea erabaki zuten herrietako bat izan zen atzo. Surik barik bazen ere, egitarauak bere horretan jarritu zuen herrian. Sorginen eta pertsonaia mitologikoen etorrera eta antzezpenak beste urte batez mantendu du egun horretan herria batzeko ohitura. Jan eta edana ere izan zuten bertaratu zirenek; Idoia eta Roberto Etxebarria trikitilariek girotuta, urdaia, txistorra, gazta eta irasagarra izan zituzten. Gauari amaiera emateko, suaren inguruan izan ez bazen ere, sorgin dantza ikusteko aukera izan zuten ziortza-bolibartarrek.

Tenperatura altuei aurre egiteko babesleku izan dute eliza gaur. Ohiturak agintzen duen modura, San Joan eguneko mezarako hitzordua izan dute herritarrek, eta bertan bedeinkatu dituzte aurten egindako sobrak. Meza amaitu denerako, herriko umeek prest izan dute sobren erakusketa eutsi duen egurrezko mahaia. Herriko andrak, sobrak eskuan, erakusketa osatzen joan dira elizatik irten ahala, eta haur eta helduen begiradapean, erakusketa lore eta kolorez bete da.

'Si vis pacem para bellum' antzezlanagaz dator Abarka Antzerki Taldea

Lea-Artibai eta Mutrikuko Hitza — 2026-06-23 16:25:18

Arretxinagako zubi azpiko anfiteatroa izan da Abarka Antzerki Taldearen lantokia urte luzez. Lan egin ahal izateko leku berri baten beharra ikusi zuten duela bi urte, eta beheko mojen komentuaren barrenak ezagutzeko aukera izan zuten orduan. “Monjen istorio bat sortu eta bertan antzezteko ideia” sortu zela adierazi du Ander Lipus taldeko zuzendariak. Hala ere, espazioa zaharkituta eta argirik eta eszenatokitik barik zegoela ikusi zuten. Gainera, hutsik zegoenez, “sekulako oihartzuna” zuen tokiak. Konbentua ez zen lan egiteko toki aproposa, beraz. Hala ere, “ordurako oso berotuta geunden monjen istorioagaz”.

Proiektuarekin jarraitzeko erabakia hartuta eta bi urteko lanaren ostean, Abarka Antzerki Taldeak Si vis pacem para bellum antzezlana aurkeztuko du domekan [ekainak 28] 19:00etan, Arretxinagako zubiko anfiteatroan.

Musikari garrantzia eman diote oraingoan ere. Autokarabana lanean txarangek osatzen zuten soinu banda. Oraingoan, gospela sartu dutela aurreratu du Lipusek, eta horretarako, mojen dantza eta koreografiak eraikitzen aritu dira azken hilabeteetan Garazi Etxaburugaz. Gidoia idazteko eta istorioari norabide argia emateko, Xemein Larrinaga izan dute gidoigile lanetan, Maria Gloria Escabias eta Lucia Larrinaga jantzitegian, Iban Mendizabal soinuan eta Mikel Unamuntzaga kartelaren diseinuan.

Markina-Xemeingo AEK ere izan dute lagun. Ahizpak euren artean hikaz ari dira antzezlanean, eta euskararen alde egin duten “ekarpen polit” honek beste aberastasun bat emango dio antzerkairi bere osotasunean: “Markina-Xemeingo hitanoaren aldeko apustu bat da, eta oso polita da neskak horrelako konfiantzarekin elkarrekin berbetan entzutea”.

“Bizi dugun garaiari oso lotuta” dagoen Si vis pacem para bellum esaldiak ematen dio izena ordu bete pasatxoko iraupena duen antzezlanari. Aldarri edo kritika sozialetik badu antzezlanak, gaur egungo egoera bat modu oso berritzailean eraiki dutena.

Urreisti-Sorozabal eta Erkiaga-Atain finalerdietan daude

Lea-Artibai eta Mutrikuko Hitza — 2026-06-22 16:51:21

Urreisti-Sorozabal eta Erkiaga-Atain dira Markina-Xemeingo Grand Slameko bigarren jardunaldiko irabazleak.

Javier-Zabala bikotea eduki zuten aurrez aurre Urreistik eta Sorozabal. Bi setak irabazita lortu zuten garaipena mutrikurrak eta biarriztarrak (6-15 eta 8-15). Garaipenagaz, zortzi puntu irabazi dituzte guztira.

Bigarren partidan, Julen Basterra Txanika eta Eñaut Salegi estreinatu ziren, atariko neurketak irabazi ostean. Aurreko asteko irabazle Aritz Erkiaga eta Gorka Mugartegi Atain-en kontra jokatu zuten, eta ispastertarra eta markina-xemeindarra 13-15 eta 10-15 markagailuagaz nagusitu ziren.

A multzoan, Erkiaga-Atain bikoteak 7 puntu ditu; Barandikak eta Ibarzuleak bigarren postua dute momentuz, puntu bakarragaz; eta Txanika eta Salegi azken postuan daude 0 puntugaz. B multzoari dagokionez, Urreisti-Sorozabalek 8 puntu dauzkate. Goitia eta Basque bigarren postuan daude -5 puntugaz. Azken lekuan Urrutia-Zabalan daude, -16 puntugaz.

Hurrengo jardunaldia barikuan [ekainak 26] jokatuko dute, eta irabazleek finalerdiak osatuko dituzte, Erkiaga-Atain eta Urreisti-Sorozabal bikoteekin batera.

Ereinotza lotu diote Alde Zaharrari

Lea-Artibai eta Mutrikuko Hitza — 2026-06-19 15:08:39

Markina-Xemeingo Alde Zaharraren lanen amaiera ospatzeko ekitaldia egin zuen atzo [ekainak 18] udalak. “Prozesu luzea” izan dela aitortu zuen Iratxe Lasa alkateak, eta ekitaldia baliatu zuten lanetan aritu ziren enpresa, langile eta udal eragileei eskerrak emateko. Alde zaharreko bizilagunak ere aipatu zituzten, prozesu guzti honetan lanek eragindako eragozpenen aurrean izan duten jarrera eredugarriagatik. Merkatari eta ostalariei ere eskerrak eman dizkie lanek iraun duten denbora guztian euren denda eta tabernak zabalik mantentzeagatik. Orain, “espazioa bizitzeko garaia” dute herritarrek.

Baserrien teilatuak amaitzen zituzten eran, ereinotza jarri zuten alde zaharra osatzen duten kaleetan. Haizea Rotaetxe eta Naia Zelaia izan ziren, bertsotan, eta Zerutxu Dantza Taldea, dantzan, Alde Zahar berriari ongietorria eman zienak. Ostean, Josepa Kale-kale taldea aritu zen alde zaharrari musika jartzen eta berriro ere bizitzaz betetzen.

Auzoetan ere, San Joan jaien berotasunean udari ongi etorria emateko prest

Lea-Artibai eta Mutrikuko Hitza — 2026-06-19 10:06:23

San Joan suetarako metak prestatzen hasita daude hango eta hemengo udalerrietako bizilagunak. Ate joka daude sanjoanak; ate joka, uda. Suaren inguruan batu eta gaitz guztiak erre daitezela eskatzeko ohituragaz bat egingo dute herritarrek ekainaren 23an, San Joaz bezperaz, eta askok, dagoeneko prest dituzte sorginak, lastoa eta egurra; prest su garretan errez atzean utzi nahi duten guztia. Sanjoanak, baina, konjuruak bota eta onak eskatu eta erakartzeko aukera ere badira, eta hori izango da, hain zuzen ere, Lea-Artibaiko hainbat auzotan ospatu nahi izango dutena.

San Joanen aitzakipean auzoetako jaiak ospatuko dituzte hamaika txokotan baina, egun handia iritsi bitartean, udari hasiera emateko ere baliatuko dute asteburua. Hala, gaurtik hasita, datozen egunetarako hamaika ospakizun aurreikusten dira eskualdean.

Lea-Artibain ere badaude sanjoanak gogotik ospatuko dituzten auzoak. Markina-Xemeingo Amallo auzoak egitarau oparoa atondu du, berrikuntzak ere barnebiltzen dituena. Bihar, adibidez, I. Ermita igoera egingo dute, VK Open World Cuperako puntuagarria izango dena. Amalloko III. Zortziko Txiki txapelketa ere ez da faltako, beste urte batez, maila handiko bertsolarien parte hartzeagaz: Andoni Egaña, Maialen Lujanbio, Oihana Bartra eta Xabat Galletebeitia ariko dira kantuan. Festaren garra piztuta mantenduko dute eguaztenerarte, eta jaiak 600 euroko saria zozkatuz agurtuko dituzte orduan.

Bestetik, Ondarroan ere prest daude uda jai giroan hartzeko eta, etzirako, san joan bezperarako eta San Joan egun handirako hitzorduak finkatu dituzte Gorozika auzoan ere ez dira bertsoak, herri kirolak, jan-edana eta auzotarren arteko giro ona faltako.

EGITARAUAK:

MARKINA-XEMEIN
(AMALLO)

Bihar

12:00. I. Ermitara igoera.

12:30. Zerutxu Dantza Taldearen emanaldia.

Ostean. Herri bazkaria. Txartelak bertan eskuragarri.

17:00. Xabier Larrearen Up! ikuskizuna.

Ostean. Umeen jolasak.

18:30. Zaldi-probak.

19:00. 28. Hiru Txirlo
txapelketa.

21:00. Bertso afaria: Andoni Egaña, Maialen Lujanbio, Oihana Bartra, Xabat Galletebeitia.

Goizaldean. Auzoko gazteen DJ saioa.

Etzi

02:00. Ecuador-Curazao partida, pantaila erraldoian.

18:00. 21. Mus txapelketa. 15 euro bikoteko.

18:30. 35. Briska txapelketa. 10 euro bikoteko.

Ekainak 23, martitzena.

22:00. Suak eta txapliguak.

Ekainak 24, eguaztena.

Goizean. Tortilla txapelketa.

11:30. Meza.

Ostean. Auzoko trikitilariak eta nagusien jolasak.

Jarraian. Amalloko gazteak zaldi gazteen kontra.

Amaitzeko. Jaiak agurtzeko, 600 euroko sariaren zozketa.

ONDARROA (GOROZIKA)

Etzi

12:30. Meza ospakizuna.

Ondoren. Bertsolariak: Nerea Ibarzabal eta Angel Mari Peñagarikano.

17:15. DJ Nai.

Ondoren. Herri kirolak.

Bitartean. txokolatada.

Ondoren. Haurrentzako herri kirolak.

Amaitzeko. Ibiriren poniak.

Ekainak 23, martitzena.

Ilunabarrean. San Joan suak eta
txapliguak.

Ekainak 24, eguaztena.

12:30. Meza santua eta Lore sorten bedeinkapena.

Jaialdi feminista antolatu du Morelarrek

Lea-Artibai eta Mutrikuko Hitza — 2026-06-18 17:17:28

Markina-Xemeingo Morelarre talde feministak ikasturte amaierako jaialdia antolatu du zapaturako [ekainak 20]. “Saretzeko, sortzeko eta elkarregaz gozatzeko” egun erdiko egitaraua antolatu dute, Arte Eskolan eta Akerbeltz gaztetxean eskainiko dituzten tailer eta kontzertuekin. 18:00etan batuko dira Mikele Sotilek antolatutako bitxigintza tailerrean. Hortik, 19:30ean, gaztetxera egingo dute bidea luntxaz gozatzeko. 20:30ean Anuk eta Elene usurbildarrek kontzertu akustikoa eskainiko dute, arratsalde lasai bat girotzeko. Gau giroan murgilduta, Oxen MJ eta Lumatzak MJ izango dira gaua girotzeko arduradunak.

XVI. Duatloi Txikirako izena emateko epea ekainaren 24ra arte egongo da zabalik

Lea-Artibai eta Mutrikuko Hitza — 2026-06-17 14:42:57

Txikiei bideratuta dagoen duatloia badator Markina-Xemeinera Aurten, ekainaren 27an (zapatua) egingo da, 11:00etan Zelaian. Izan ere, parte hartzeko interesdunek izena eman beharko dute ekainaren 24a baino lehen. Izen ematea doakoa da, eta Internetez egin beharko da.

Betiko legez, bost multzotan banatu dute lasterketa. LH1etik LH4rainoko ikasleek 250 metro korrika eginaz hasi dute ibilbidea; ostean, LH1 eta LH2ko gaztetxoek 325 metro egin dituzte bizikletan eta LH3 eta LH4koek, berriz, 800 metro. Amaitzeko, berriro ere 250 metro egin dituzte korrika. LH5 eta LH6koek, berriz, 325 metro korrika egin dituzte lasterketa hasi eta amaitzeko, eta tartean, aldiz, 800 metro bizikletaz. DBH1 eta DBH2ko gazteek, ostera, 500 metro korrika, 1.600 metro bizikletan eta 325 metro korrika osatuko dituzte. Nagusienek, berriz, 600 metro korrika, 2.400 metro bizikletan eta 325 metro korrika eginez amaitu dute.

Dortsalen banaketa egunean bertan egin da, 10:30ak orduko.

Zabalik dago Karmen jaietako kroserako izen ematea

Lea-Artibai eta Mutrikuko Hitza — 2026-06-17 14:23:38

Markina-Xemeingo Karmen jaien egitarauaren barruan, Aringa-Aringa Kirol Klubak antolatuta, krosa egingo dute. Bakarka nahiz mistoan aritzeko aukera egongo da, eta parte hartzaileek 7,5 kilometroko ibilbidea egin beharko dute, 19:30ean hasita. Izena emateko epea ekainaren 27ra artekoa izango da, hau da, lasterketa egunera artekoa. 12 euroko prezioa izango du lasterketa indibidualak eta 24 eurokoa lasterketa mistoak.

Gizonezko nahiz emakumezkoek banaka aritzeko aukera edukiko dute, baina baita taldeka ere, bikote mistoetan. Horrenbestez, horren araberako sariak banatuko dituzte. Lehenengo hiru garaileek txapela eta 50 euroko ordainsaria jasoko dute; bigarren sailkatuek, ordea, oroigarria eta 30 euroko saria; podiumeko hirugarrenek, aldiz, oroigarria eta 20 euroko saria. Ez hori bakarrik: lehenengo hiru emakumezko zein gizonezko markina-xemeindarrei ere saria emango diete; oroigarri bana jasoko dute.

Markina-Xemeingo Alde Zaharrak lanen amaiera ekitaldia izango du

Lea-Artibai eta Mutrikuko Hitza — 2026-06-17 11:00:42

Amaitu dira Markina-Xemeingo Alde Zaharreko lanak. 2025eko ekainean hasi ziren Guenkalea, Erdikokalea, Kaleokerra eta Zeharkalea zaharberritzeko lanak, eta azpiegiturak berritu eta zolaketa egokitu ostean, lanak amaitu direla iragarri du udalak.

“Espazio berritu honen hasiera ospatzeko”, bihar [ekainak 18] Goikoportalean batzeko deia egin die udalak herritar guztiei. 19:00etan hasiko da inaugurazio ekitaldi txikia, eta horren ostean, Josepa Kale-Kale taldeak Alde Zaharreko kaleak musikaz girotuko ditu.

Udalaren hitzetan, “birgaitze-lanak ez dira prozesu erraza izan”. Auzoko herritar, merkatarieta ostalariengan eragin handia izan duten lanak izan dira, eta eskerrak eman nahi izan dizkie “pertsianak goian mantentzeagatik”. Honetaz gain, udalak argi adierazi du zaharberritze honek “bertan bizi eta egunero bizitzaz betetzen duzuenon bizi-kalitatea hobetuko duela, zalantzarik gabe”.

LGTBIQ+ film laburren proiekzioa egingo dute Markina-Xemeinen

Lea-Artibai eta Mutrikuko Hitza — 2026-06-16 12:03:58

Zinegoak zinema jaialdiaren eskutik, film laburren proiekzioa egingo dute zapatuan, Markina-Xemeinen. Esperantza aretoak 12:00etan hartuko du Bilboko LGTBIQ+ Zinema eta Arte Eszenikoen Nazioarteko jaialdian eskainiko diren film laburrak. Ekainaren 22tik 29ra ospatuko dute jaialdia Bilbon, hala ere, hirigunetik aldendu eta herrietan «topaketaren eta hausnarketa kolektiboaren aldeko» apustua egin nahi izan dute dute. Sarrera librea izango da, eta aforoa bete arte sartu ahalko dira ikusleak.

ZG Hedapena programa 2005ean sortu zuen Zinegoak Jaialdiak. Ekimenaren helburua Zinegoak jaialdiko lanak toki gehiagotara zabaltzea da, eta LGTBIQ+ edukiko lanak zailtasunak dituzten herrietara hurbiltzea: «Programak Euskal Herriko hainbat herritan erakusten ditu urte berean jaialdian ikusitako lanak, jatorrizko bertsioan eta euskaraz zein gaztelaniaz azpidatzita. Gainera, funtsezko tresna da Zinegoak Elkartearentzat, LGTBIQ+fobien aurkako ikusgarritasunari eta borrokari begira».

Gazteak zein helduak egon dira Leartibai Fundazioko Enplegu Azokan

Lea-Artibai eta Mutrikuko Hitza — 2026-06-15 14:20:17

Leartibai Fundazioak urteroko enplegu azoka egin du gaur [ekainak 15] goizean. Eskualdeko hamabi udalen eta Bizkaiko Foru Aldundiaren laguntzagaz, Bizkaia Gazteak Lea-Artibai elkarteagaz egin da eskualdeko enplegu azoka. Hamazortzi postu egon dira denetara: Burdinola, Cikautxo, Fagor, Itsaskorda, KauTenik, Kide, Laboral Kutxa, Lanbide, Lantegi Batuak, Lea Artibai ikastetxea, Lea-Artibai Mankomunitatea, Leartibai Fundazioa, Leartiker, Maier, Nemak, Novias Salcedo fundazioa, Onare eta Orbea.

Eguraldi eguzkitsuagaz, Lea-Artibai Berrikuntza Gunea gazte zein helduz bete da. Lan eskaintzak askotarikoak izan dira; administraria izateko lan eskaintzatik kamara frigorikoen muntzatzaile lan eskaintzara arte. Gainera, hainbat profiletako lan eskaintzak egon dira, eta enpresekin lehen harremana izateko aukera paregabea izan da. Ez hori bakarrik, bertaratutakoek aukera eduki dute curriculuma uzteko.

Enpresa industrialen kasuan, hainbat lanpostu desberdin eskaini dituzte: soldadoreak, elektronikoak, ingeniariak… Era berean, Leartikerrek ikertzaile profilaren eskaintza eraman du: osasun alorrerako, modelizazio eta simulazio aurreraturako… Bestelako hainbat lanpostu ere egon dira aukeran, esate baterarako, Lantegi Batuaken eta Lea-Artibai Mankomunitean.

Karmen Jaietako kartel lehiaketak baditu irabazleak

Lea-Artibai eta Mutrikuko Hitza — 2026-06-09 12:56:16

Markina-Xemeingo Karmen Jaiek badute irudia. Urtero legez, markina-xemeindarrek herriko jaiei irudia jartzeko aukera izan dute, eta aurten ere, uzta anitza jaso du udalak. Guztira 23 lan aurkeztu dituzte lehiaketara, zazpi nagusien kategorian, eta 16 ume eta gaztetxoenean.

Edurne Arginzoniz Mendizabal izan da nagusien kategoriako saritua, hala, ‘Kimua‘ lana izango da aurtengo jaiak iragarriko dituen kartela. Haur eta gaztetxoen kategorian, ‘Alarabi be jolasten!‘ saritu du epaimahaiak, Ixone Ugarte Intxaustiren lan handia aitortuz. Lehiaketan parte hartu duten kartel guztiak udaletxeko sarreran egongo dira ikusgai.

300 lagun inguru elkartu ditu Bizkaiko Nagusien Egunak

Lea-Artibai eta Mutrikuko Hitza — 2026-06-08 15:32:55

Markina-Xemeinek hartu zuen iaz Bizkaiko Nagusien Eguna, eta aurten, Sodupe izan da ospakizunen erdigunea. Hala, zapatuan [ekainak 6] bertan elkartu ziren Bizkaiko 300 nagusi inguru, eta eskualdetik joandakoek adierazi dutenez, “egun ederra” igaro zuten bertan: “Giro polita egon zen eta egun ederra pasa genuen. Herria bera ere ederto prestatu zuten”.

11:30erako heldu ziren Bizkaiko hamaika herritako nagusiak Sodupera, eta Nagusiak elkarteko kideek nahiz herriko ordezkariek egin zieten harrera. Besteren artean, bertan egon ziren Nagusiak elkarteko presidente eta presidenteordea, Juan Andres Iragorri Ruiz Sodupeko alkatea, Sodupeko nagusien elkarteko kideak, Elixabete Etxanobe Bizkaiko Ahaldun Nagusia eta Amaia Antxustegi Gizarte Ekintza saileko foru diputatua.

Denek hartu zuten Bizkaiko nagusiek egiten duten lana balioan jartzeko tartea, eta jarraian Tolin el Mariachiren eta Gazte Berri dantza taldearen emanaldiaz gozatu zuten bertaratu zirenek: “Mariatxiekin dantzan egon ginen, eta ostean, sekulako bazkaria egin genuen: ilarrak eta menesta, karrilerak eta arroz esnea pantxinetagaz”. Sodupeko kiroldegian bazkaldu zuten, eta egunagaz amaitzeko dantzaldia egin zuten.

Markina-Xemeingo Beti Jai elkarteko kideak Sodupen.Beti Jai jubilatuen elkartea