Lea-Artibai eta Mutrikuko Hitza

27. Zapato Azulak urdinez tindatu du Ondarroa

Lea-Artibai eta Mutrikuko Hitza — 2026-06-27 16:22:15

Azken egunetako bero sargoririk barik esnatu da gaur [ekainak 27] Euskal Herria, eta gustura hartu dute hori Ondarroara joan direnek. Kamiseta urdinak armairutik atera, eta Alde Zaharra goitik-behera eta ezker-eskubi bete dituzte bertaratu direnek. Herritarrak, inguruko herrietakoak nahiz Euskal Herriko hamaika txokotatik bertaratutakoak elkartu ditu gaur Radixu Irratiak antolatzen duen 27. Zapato Azulak Ondarroan. Hala, aurtengo kartelean keinu egin dioten Felix Beristainen koadro baten antzera, urdinez tindatu dira herriko txoko guztiak.

11:00etarako prest zeuden Radixu Irratiako kideak zuzeneko emisioagaz batera jaiari ekiteko, eta egunaren nondik norakoak azaldu ostean, Koldo Azpiazuk hartu du mikroa. Hain zuzen ere, iaz hartu zuen Azpiazuk Nekane Akarregiren erreleboa, eta aurtengoan ere berea izan da jaiari hasiera emateko ardura. Hala, urtero bezala, Alai Tabernako balkoiak bereganatu ditu begirada guztiak, eta bertan zeudenek adi jarraitu dituzte Azpiazuk esandakoak. Nola ez, Manuel Eluren bolanderek ere ez dute hutsik egin, eta 12:00etan egin du eztanda jaiak, bolandera eta bolandera artean.

Bolandera ugari bota ostean jaiak ez du etenik izan, eta urteroko osagaiekin osatu dute goiza. Txistulariak, Kresalako bandaren eta Artelango erraldoien kalejira nahiz falta direnak gogoan hartzeko tartea hartu dute herritarrek, eta Txalainak taldearen kontzertuak biribildu du goizeko jarduna. Abanikoak dantzan eta gorputzak ere bai, Hertzainak taldearen abesti ezagunenak abesteko tartea hartu dute Kalekutz inguruan batu direnek.

Zapato Azule berezia bada, Dinamartxaren ailegaera are bereziagoa da herritar askorentzat. Dina Bilbao Barruetabeñaren omenez Tolosa eta Ondarroa elkartzen dituzte martxalariek oinez nahiz bizikletan, eta irrintzi, txalo, oihu eta musika artean egiten diete harrera ondarrutarrek. Oinez egin duten 77 martxalarientzat bart 01:00etan hasi ziren Zapato Azuleko ekintzak, eta gaur 09:00etan, ostera, bizikletaz etorri diren 223 partaideentzat. Iazko parte hartze kopurua gaindituta (iaz 259 partaide eduki zituen), poztasunez nahiz emozioz betetako malko eta irribarreen artean sartu dira herrira 300 martxalariak.

Martxalariak, Alde Zaharrera heltzen.

Dinamartxako kide denak heldu ostean, aurtengo pregoia irakurri dute Radixuko kideek balkoitik. Besteren artean, Palestina, Saharan, Iran Libano eta Kubagaz gogoratu dira, eta zelan ez, baita Venezuelako herriagaz ere. Jarraian, denborarik galdu barik, aurtengo omendua izendatu dute. “Omendu guztiak dira bereziak, baina aurtengoa, Zapato Azule antolatzen dugun guztiontzat, bereziena da. Zorionak Nekane Akarregi Amutxastegi, zeu zara aurtengo omendua!”. Hala, Akarregi ezustean harrapatu du omenaldiak, baina irribarrez jaso du Radixukoen aipamena.

Ostean, 11:00etan zabaldu duten Euskal Herriko Kamiseta Azoka eta Artisau Azoka itxi, eta aurtengo kamisetarik eta erakusleihorik onenak izendatu dituzte. Kamiseta Azokan Ondarroako hiru postu eta Euskal Herriko beste hamahiru egon dira, eta Torontilek (Artea) irabazi du Euskal Herriko kamisetarik onenaren saria. Ondarroako kamisetarik onenaren saria, aldiz, Saturrarango Haitzak irabazi du, eta erakusleiho onenarena, Lorak Estherrek.

[ARGAZKI GALERIA]

Txo! Antzerki Kolektiboak omenduari egindako sketchagaz amaitu dute eguerdiko jarduna, baina jai luzea geratzen da oraindik Ondarroan. Arratsaldean mota eta gustu guztietako musika entzuteko aukera egongo da herriko txoko guztietan, eta jaiak ez du etenik izango goizeko ordu txikiak arte.

"Begirunez egindako esperientzia sentikor bat" dauka gordeta Arretxinagako ermitak

Lea-Artibai eta Mutrikuko Hitza — 2026-06-26 15:37:21

Ereinotz bat Arretxinagako ermitari. Prozesu luze baten ostean, Markina-Xemeingo balio handiko gunearen zaharberritze lanak amaitu dituzte, hala, San Migel ermita eraberrituta ikusteko hainbat herritar batu ziren atzo arratsaldean. Herritarrez gain, Zerutxu Dantza Taldeak eman zion ongietorria gune berrituari.

Begibistakoak dira ermitaren kanpoaldean egin dituzten lanak. Ermitaren kanpoko hormak kareorez berritu dituzte, kolore eta ehundura bereizgarriak emanez. Eraikina bakarrik ez, alboan dagoen probalekua ere berritu dute eta ikusleentzako armailak jarri dituzte. Lanak amaituta daudela adierazteko, Alde Zaharrean egin zuten era berean lotu zioten ereinotza ermitari.

Kanpoaldekoaldekoak ikusita, barrualdean jarri zuten begirada. Honetarako, ermitara sartu baino lehen, Jon Astorkiza eta Joseba Beristain artistek hartu zuten hitza, erakinaren barnealdean egindako arte proiektu berritzaileari buruzko nondik norakoak azaltzeko. Astorkiza izan da proiektuaren grafiko zuzendaria, eta Arretxinagan egon zen lehen aldian sentitu zuen “konexio handia” aitortu zuen bere berbaldian. Horregatik, toki honetarako “begirunez egindako esperientzia sentikor bat” sortu du. Azalpenekin jarraitzeko, Beristainek hartu zuen hitza. “Tokiko natura elementuen soinuekin eta sintetizadoreekin jolastuz”, sortu du esperientzia bisualari balio gehigarri bat emango dion soinu paisaia. Sei bozgoragailuk osatutako instalazio bat sortu du, eta hala, “txikia den espazio bat handitu egiten du”.

Instalazioaz gain, ikus-entzunezko pieza bat eskaintzen digu San Migel ermitak. Bertaratzen direnek QR bat aurkitu eta horren bitartez helduko dira piezara. Eneritz Artetxe aktore gernika-lumotarrak gidatuko du ikuslea lau hizkuntzatan (euskeraz, gazteleraz, frantsesez eta ingelesez) entzun daitekeen piezan. Ermitari eta hau inguratzen duen artearen historiari buruz ari da Artetxe ikus-entzunezko horretan, “bisitaria leku honen magiarkein, unibertsoarekin, naturarekin eta bizitzarekin lotzeko”.

Aurkezpena amaituta, ermitako ateak zabaldu zitzaizkien herritarrei, eta orduan izan zuten instalazioa ezagutu eta tokiarekin konektatzeko aukera. Bertaratzen direnek ermita zabalik dagoen artean izango dute esperientzia bizitzeko aukera.

Munitibar, kolorez eta musikaz beteta

Lea-Artibai eta Mutrikuko Hitza — 2026-06-26 10:08:05

Herritik eta herriarentzat sortutako San Pedro jaiak hasiko dira gaur [ekainak 26] Munitibarren. Gaurtik astelehenera bitartean, udalak eta herriko eragileek antolatutako ekintzek herritarrak plazan zein frontoian batuko dituzte. Aurten, San Pedro jaiei egun bat gehiago eman, eta astelehenera luzatuko dute jaia.

Pregoia eta txupinazoagaz emango die hasiera lau eguneko egitarauari. Plazako karpan batuko dira munitibartarrak gaur, 19:00etan, pregoilarien berbak entzun eta jaien hasiera elkarregaz ospatzeko. “Pregoilaria aurkitzea kostatzen zaigu askotan, beraz, eskolako haurren esku uzteko erabakia hartu dugu”; hala, sanbizenteetan Lehen Hezkuntzako seigarren mailako gaztetxoek bota zuten bezala, lehen mailako haurrak izango dira sanpedroetan pregoilari lanak egingo dituztenak. “Irakurketa eta idazketa prozesuan hasiberriak” direla eta eureri “protagonismoa emateko modua” dela adierazi du antolakuntzak. Pregoiaren muinari buruz ez dute asko aurreratu, baina “ondo pasatzeko eta elkar errespetatzeko” mezua aurreikusten dute herritarrek.

Txupina botata, herriko gaztetxoek euskal dantzen emanaldia egingo dute plazan. Barikuro izaten dituzte entseguak, eta “ikasturte honetan ikasi dutena erakutsiko digute herritar guztioi”. Jaiari eten barik, aurten berreskuratu duten Pizza fest!-az gozatzeko aukera izango dute. Duela urte batzuk pare bat aldiz egin eta “ondo atera” zen ekintza da, urte batzuk beranduago berriro antolatu dutena: “Etxebarriko Antsotegi jatetxetik ekarriko dituzte pizzak, eta musikagaz girotuta, horiek dastatuko dira”.

Munitibarko Rookies Series final handira heldu da, eta bihar 21:30ean frontoian batuko dira herritarrak, lehiaren lekuko izateko. Ekainaren 6an eta 13an jokatu zituzten final-laurdenak, eta ekainaren 20ko finalerdietan erabaki zituzten gaurko finalistak. Txomin Landaluze markina-xemeindarra eta Xuban Galdos berriatuarra lehiatuko dira Haritz Egaña zumaiarraren eta Oinatz Agirregomezkortaren mutrikuarraren aurka. Txapelketak jardunaldi guztietan jaso duen “harrera ona” azpimarratu dute, eta ikuskizun handia ematera dator final handia.

Heldu zein gaztetxoentzako jaiak dira sanpedroak. Gaueko eskaintza helduei zuzenduta badago ere, zapatu eguerdia haurrentzako eskaintzagaz dator. 12:00etatik aurrera, zirku tailerra egongo da frontoian, Txitatokiren eskutik. Haurrei zuzenduta badago ere, “adin guztietako herritarrek” izango dute parte hartzeko aukera.

Herriko jendearentzako jaiak dira sanpedroak. “Herriko jendea elkartzeko” helburuagaz egiten dute lan Munitibarko Udalak eta eragileek, eta zapatuko herri bazkaria izango da elkartze horren isla. 210 lagun batuko dira bazkarian, eta, horren ostean, bingo musikatuagaz emango diote jarraipena jaiari. 19:00etan musika jarriko dute kalean, 21:00ean Iratzar erromeria hasi arte.

“Herriko talde askoren topaleku” da Habixi Elkargunea, eta, herriko “ekimen eta ekintza guztietan” parte hartzen duen bezala, aurtengo jaietako antolakuntzan buru-belarri murgilduta egon da. Asteburuan zabalik egongo da, eta zapatu gauean DJ Zatzaz egongo da Habixi girotzen, bertan bilduko direnen gozamenerako.

Urdaibai Kantagunea izango da domekan 13:00etan hasiko duten kopauari musika jarriko diona. Arratsaldean San Pedro txapelketako esku pilota finalak izango dituzte frontoian, 17:00etan. Astelehenean amaituko dute jaia, eta bazkari berezia antolatu dute azken egunerako. Adineko herritarrak elkartzeko helburua du bazkariak, eta aurreko urteetan batu izan dituen bezala, ohituragaz jarraitzeko.

Jendearen parte hartzearen garrantzia azpimarratu du udalak: “Herriko kuadrilla guztiak inplikatzen dira, bai aurretik egin beharreko lanetan, bai jaiek dirauten artean”. Horien garrantziaz eta beharraz ere aritu dira: “Kuadrillaka edo banaka apuntatzen dira herritarrak ardura banaketa egiten dugunean, eta esan beharra dago boluntario eta pertsona konprometitu asko agertzen direla”.

Hala, Munitibarrek urtero sortzen den “giro ederra” espero dute gaur arratsaldean hasiko dituzten sanpedroetan.

Gaur, ekainak 26
- 19:00. Pregoia eta txupinazoa, plazako karpan.
- Ostean. Herriko gazteen eskutik, euskal dantzak plazan.
- 20:30. Pizza fest! musikagaz girotuta, plazako karpan.
- 21:30. Rookies Series zesta-punta txapelketako finala, frontoian.
Bihar, ekainak 27
- 12:00. Zirku tailerra, Txitatokiren eskutik, frontoian.
- 14:30. Bazkari herrikoia, frontoian.
- Ostean. Bazkalostea girotzeko bingo musikatua.
- 19:00. Kale musika, herriko plazatik.
- 21:00. Iratzar erromeria, plazako karpan.
- 00:30. DJ Zatzaz, Habixi elkargunean.
Etzi, ekainak 28
- 13:00. Kopaua, plazako karpan.
- Bitartean. Urdaibai Kantaguneak girotuko du kopaua.
- 17:00. San Pedro txapelketako esku pilotako finalak.
Ekainak 29, astelehena.
- 14:00. Adineko herritarren bazkaria, Lea tabernan.

Munitibarren sorgin dantzen entsegua antolatu dute sanjoanetarako

Lea-Artibai eta Mutrikuko Hitza — 2026-06-10 17:39:06

San Joan suaren inguruan dantza egiteko entseguak hasiko dira Munitibarren. Hurrengo martitzenean [ekainak 16], 19:30ean, udaletxeko sarreran geratzeko deia egin dute. Helburua argia da: herritarrek San Joanetan Sorgin dantzan parte hartzea. Antolatzaileek herritar guztiak animatu dituzte parte hartzera.

San Pedro Jaietako herri bazkarian izena emateko epea zabalik dago ekainaren 15era arte

Lea-Artibai eta Mutrikuko Hitza — 2026-06-02 10:50:07

San Pedro jaiak ate joka dira, eta horiekin batera iritsi da herri bazkarian parte hartzeko izen-emate epea. Jai batzordeak jakinarazi duenez, kuadrillek ekainaren 1etik 15era arte izango dute izena emateko aukera, eta epez kanpoko eskaerarik ez da onartuko.

Izen-ematea udaletxeko administrazioan eta liburutegian egin ahal izango da. Izena ematean, taldeko kide bakoitzak 3 euroko ekarpena egin beharko du, eta kuadrilla bakoitzak arduradun bat izendatu beharko du antolakuntzarekin harremanak eta koordinazioa errazteko.

Jai batzordeak, gainera, ekainaren 18rako bilera deitu du. Bertan, kuadrilla bakoitzetik pertsona batek edo bik parte hartu beharko dute, herri bazkariaren antolakuntzarekin lotutako ardurak nola banatuko diren adosteko. Bilera horretan jai giroa mantentzeko eta ekitaldiaren garapena ahalik eta ondoen koordinatzeko beharrezko xehetasun guztiak landuko dira.

Kuadrilla bakoitzak bere bazkaria prestatu beharko du

Antolatzaileek azaldu dutenez, kuadrilla bakoitzak bere bazkaria prestatuko du jai egunean. Horretarako, talde bakoitzak sukaldatzeko mahai bat izango du aurrez esleituta, eta beharrezkoa izanez gero, muntatzeko edo jasotzeko materiala ere bere gain hartu beharko du.

Bazkaria amaitutakoan, kuadrilla bakoitzak erabilitako espazioa garbitu eta txukun utzi beharko du, baita mahaiak dagokien lekura itzuli ere.

Jai batzordeak materiala jarriko du

Bazkaltzeko mahaiak jai batzordeak kokatuko ditu, eta talde bakoitzari ogia, eskuzapiak, edaria, postrea eta tresna berrerabilgarriak emango dizkio. Horien artean platerak, edalontziak eta mahai-tresnak egongo dira, jai jasangarriagoak sustatzeko helburuarekin.

Material hori guztia bazkaria amaitzean itzuli beharko da, antolakuntzak emandako poltsetan. Jai batzordeak gogorarazi du pieza bakoitzak 4 euroko balioa duela, eta itzultzen ez den edo hondatzen den materialaren ardura kuadrillarena izango dela.

Hondakinen kudeaketa egokia

Antolatzaileek arreta berezia jarri dute ingurumenarekiko konpromisoan. Hori dela eta, kuadrilla bakoitzak sortutako hondakin guztiak dagokien edukiontzira bota beharko ditu, hondakinen bereizketa eta birziklapena bermatzeko.

"Gure herriak elkar zaintzan, errespetuan eta askatasunean oinarritutako espazio seguru eta feministak behar ditu"

Lea-Artibai eta Mutrikuko Hitza — 2026-05-28 11:11:23

Atzo [maiatzak 27], dozenaka lagun batu ziren Munitibarko plazan joan den zapatuan adin txikiko pertsona batek jasandako erasoa gaitzesteko eta biktimari elkartasuna adierazteko. Herritarrek, udal ordezkariek eta hezkuntza komunitateko kideek parte hartu zuten elkarretaratzean, indarkeria mota guztien aurrean herriaren gaitzespena agerian uzteko.

Mobilizazioan herritarrek prestatutako adierazpena irakurri zuten. Bertan, maiatzaren 23an herriko jai giroan gertatutako erasoa “argi eta irmo” salatu zuten, eta oso larritzat jo zuten adin txikiko pertsona baten aurkako indarkeria kasua izatea.

Irakurritako testuan azpimarratu zuten ez dutela onartuko “inoren askatasuna, segurtasuna eta duintasuna urratzen duen jokabiderik”, eta gogorarazi zuten gertatutakoa ez dela kasu isolatu bat. Horregatik, komunitate gisa erantzuteko eta ardura kolektiboz jokatzeko beharra nabarmendu zuten.

Halaber, herri eta espazio seguruak eraikitzearen garrantzia aldarrikatu zuten, bereziki haur eta gazteen segurtasuna eta ongizatea erdigunean jarriz. “Gure herriak elkar zaintzan, errespetuan eta askatasunean oinarritutako espazio seguru eta feministak behar ditu”, adierazi zuten.

Elkarretaratzean, erasoa jasan duen pertsonari eta haren ingurukoei babesa, maitasuna eta elkartasuna helarazi zizkieten. Era berean, herritarrei dei egin zieten egoera hauen aurrean isilik ez geratzeko eta prebentzio, zaintza eta erantzun mekanismoak indartzen jarraitzeko.

Amaitzeko, mezu argia zabaldu zuten plazan bildutakoek: “Munitibarren argi eta ozen diogu ez dugula inolako erasorik onartzen. Erasorik ez erantzunik gabe”.

Bertsolaritzaren harrobiaren plaza bihurtuko da Aulesti

Lea-Artibai eta Mutrikuko Hitza — 2026-05-27 13:47:36

Bizkaiko eskolarteko txapelketa apirilaren 27an hasi zuten Bilbon, eta Aulestiko frontoian jokatuko dituzte finalak, barikuan eta zapatuan [maiatzak 29 eta 30].

Barikuan, 18:00etatik aurrera lehiatuko dute Lehen Hezkuntzako 5. eta 6. mailakoen idatzizko finala, eta ostean, gazteentzako bertso saioa edukiko dute. Zapatuan, berriz, 18 urtera artekoen idatzizkoen finala jokatuko dute 10:00etan hasita, eta 11:30etik aurrera izango da bat-bateko finala. Azken horretan egongo da Jon Abasolo Sarralde munitibartarra; berarekin batera ariko dira Eider Fernandez Aranburu eta Helene Yerga Bollegui bermeotarrak, Izaro Pagalday Aburto, Maddi Aurtenetxe Bustinza eta Naroa Iturrioz Lauzirika zornotzarrak, Amaiur Betanzos Caminos bilbotarra eta Iradi Barrenetxea Akesolo artearra.

Lau kanporaketa jokatu dituzte; saio bakoitzeko irabazlea zuzenean sailkatu da, eta gainontzeko laurak puntuazioz. Iturriozek irabazi zuen maiatzaren 6an Igorren jokatutako laugarren eta azkenengo kanporaketa; Fernandez nagusitu zen hirugarrenean, Barrenetxea bigarrenean eta Betanzos lehenengoan.

Xabier Abasolo, Jon Abasolo eta Aner Goikoetxea munitibartarrek Muxikako kanporaketa lehiatu zuten.Bizkaiko Bertsozale Elkartea

Euskal Herrikoa. Martxotik ekainera bitartean, herrialde guztietan jokatuko dituzte eskolartekoak, eta herrialde bakoitzetik sailkatutako gazteek Euskal Herriko finala jokatuko dute ekainaren 13an, Arantzan (Nafarroa).

Bertsozale Elkarteak eta Ikastolen Elkarteak elkarlanean antolatzen dituzte eskolarteko txapelketak, “gaztetxoei jendaurrean bat-batean jarduteko aukera” emateko helburuarekin: “Gainera, harremanak egiteko, hurbilekoak bertsozaletzeko eta antolakuntza lanetan ardurak hartzen hasteko ere balio dute”.

Turtziozek hartuko du barikuan Bizkaiko Eskola Txikien Topaketa

Lea-Artibai eta Mutrikuko Hitza — 2026-05-26 15:12:38

Bizkaiko Eskola Txikien Topaketa antolatu dute barikurako [maiatzak 29] hirugarren urtez. Herri txikietako eskolen bilkura Turtziozen izango da aurten, eta lau eta zortzi urte arteko 450 haur baino gehiago batuko dira bertan. Hala, “egun osoko jai eta elkarbizitza egitarau” handia antolatu du Turtziozko Eskolako Guraso Elkarteak. Bertan izango dira Lea-Artibaiko haurrak, Amoroto, Ispaster, Aulesti, Munitibar, Berriatua eta Etxebarriko eskoletatik joango direnak.

Turtziozko Eskolak adierazi duen bezala, barikuko topaketarako egun osoko egitarau “erakargarria” antolatu dute: Goizean goizetik, euskal abereen azoka egongo da ikusgai, eta haurrek “gertutik ezagutu ahal izango dituzte bertako animaliak”. Jolasteko eta ondo pasatzeko momentua ere izango dute, “elkar ezagutzeko eta lagun berrian egiteko” helburuarekin antolatutako jolasen bidez.

Bazkalordurako, “giro hurbil eta polita” sortzeko eta jolasen ostean indarberritzeko asmoarekin bazkaria antolatu du Turtziozeko Eskolak. Gainera, jaiari amaiera emateko ikuskizun “berezia” antolatu dute. Hori amaitutakon, haur bakoitza bere herrira bueltatuko da aurrez antolatutako autobusetan.

“Landa eremuko ikastetxeen arteko loturak sendotzeko” helburuarekin antolatu dute Eskola Txikien Topaketa; beste urte batez, haurrei elkarrekin egoteko eta “errealitate bereko kideekin ondo pasatzeko aukera emanez”. Honetaz gain, “landa-eremuko eskolak bizirik daudela eta hezkuntzaren parte garrantzitsua dela ” adieraztea dute helburu.

Munitibartarrek adin txikiko bati egindako erasoa gaitzetsi eta elkarretaratzea deitu dute

Lea-Artibai eta Mutrikuko Hitza — 2026-05-26 12:02:34

Munitibarko herritarrek eta udalak publikoki gaitzetsi dute joan den zapatuan [maiatzak 23], adin txikiko pertsona batek jasandako erasoa. Udalak zabaldutako oharrean, herritarrek adierazitako salaketa eta gaitzespenarekin bat egin duela adierazi du, biktimari elkartasuna helaraztearekin batera.

Udalaren esanetan, “herri eta espazio seguruak eraikitzea guztion ardura da”, eta beharrezkoa da “denon segurtasuna eta ongizatea erdigunean jartzea”.

Horrez gain, herritarrei dei egin diete bihar [maiatzak 27], eguaztena, 20:15ean herriko plazan egingo den kontzentrazioan parte hartzera. Mobilizazioaren helburua erasoa gaitzestea eta biktimarekiko elkartasuna modu bateratuan adieraztea izango da. Udalaren mezuak argi uzten du jarrera: “Erasorik ez!”.

Munitibar Eskolak ere gaitzespena adierazi du

Munitibar Eskolako irakasleek ere bat egin dute herritarrek adierazitako salaketa eta gaitzespenarekin. Zabaldutako oharrean, zapatuan [maiatzak 23] adin txikiko pertsona bati egindako erasoa salatu dute, eta biktimari elkartasuna helarazi diote.

Hezkuntza komunitateak azpimarratu du beharrezkoa dela ingurune seguru eta errespetuzkoak eraikitzen jarraitzea, bereziki haur eta gazteen ongizatea bermatzeko.

Biharko kontzentrazioan, herritarrak, udal ordezkariak eta hezkuntza komunitateko kideak elkartuko dira, edozein indarkeria motaren aurrean herriaren gaitzespena adierazteko.

Lea Ibarreko Mankomunazgoak bigarren berdintasun plana diseinatzeko prozesua jarri du martxan

Lea-Artibai eta Mutrikuko Hitza — 2026-05-26 10:56:43

Lea Ibarrako Udal Mankomunazgoak bigarren berdintasun plana diseinatzeko parte hartze prozesua abiarazi du. Prozesuaren helburua, herrien beharrizanei erantzuten dien bideorria marraztea dela azaldu dute Mankomunazgotik. Hala, irailean egingo dute herritar guztiei zuzendutako lehenengo saioa, “guztien iritziak eta beharrak jaso ahal izateko”.

“Azken urteotan egindako bideari jarraituz, orain, Berdintasunerako Bigarren Plana diseinatzeko prozesua jarri dugu martxan, eskualdeko emakumeen eta gizonen benetako berdintasun eraginkorra bermatzeko asmoz”, azaldu dute mankomunazgotik. Gainera, bigarren prozesu honekin, Lea Ibarreko Mankomunazgoak eta bera osatzen duten bost udalerriek (Amoroto, Aulesti, Gizaburuaga, Mendexa eta Munitibar) azkenengo urteetan egindako lana aztertu nahi dute, zer lortu den ikusi, eta oraindik egiteko dauden erronkak identifikatzeko: “Hausnarketa kolektibo honen helburua herri bakoitzaren berezitasunak eta Mankomunazgoaren beharrak kontuan hartuko dituen tresna errealista eta praktikoa osatzea izango da”.

Herritarrei zuzendutako saioa irailean egingo duten arren, udal idazkari eta ordezkariekin lan saioak eta elkarrizketak egiten hasi dira maiatzean, administrazioaren barne funtzionamendua aztertzeko. Hala ere, Mankomunazgotik zehaztu dute prozesuaren bizkarrezurra bizilagunen ahotsa izango dela: “Zentzu horretan, Mankomunazgoak herritarren parte hartzearen garrantzia azpimarratu nahi du”. Horregatik iragarri dute irailean egingo dela lehen saioa. Bertan, Lea Ibarrako emakume, elkarte eta interesa duten pertsonen kezkak, beharrak eta proposamenak partekatzeko aukera egongo da; izan ere, plan berriaren helburua Lea Ibarreko errealitatea ondo jasotzea da.

Horrez gain, egitasmoaren beste helburuetako bat Lea Ibarreko Berdintasun Kontseilu Herritarra indartzea eta aktibatzea ere bada: “2025ean sortutako organo hau prozesuaren parte aktibo eta berdintasun politikak sustatzeko ezinbesteko aliatu bihurtzea da helburua. Plan berria une egokian dator kontseiluaren jarduna edukiz betetzeko eta bere hurrengo urteetako egitekoak egituratu eta gidatzeko”.

Gainera, Mankomunazgotik nabarmendu bezala, plan berria landa eremuko beharrei erantzutera dator. Izan ere, egitasmoak “arreta berezia” jarriko du herri txikietako egunerako bizitzan: “Zaintza lanak, emakumeen ahalduntzea edota indarkeriarik gabeko bizitzak sustatzea izango dira ardatz nagusienetako batzuk”.

Horretarako, Lea Ibarreko Mankomunazgoak Elhuyar aholkularitzaren laguntza teknikoa izango du, eta aurreikuspenen arabera, emaitzak prest egongo dira urte amaierarako.

Habixi Elkarguneak bere lehen loraldia ospatu du

Lea-Artibai eta Mutrikuko Hitza — 2026-05-23 17:42:39

Begirada soil batean ezin ikusi daiteke hazia loratzen, baina sustraiak isilean haziz doaz. Modu berean joan da hazten azken hamabi hilabeteetan Munitibarko Habixi Elkargunea ere, eta herri ekimen baten erroak sendotuz, iaz ereindako haziaren lehen loraldia heldu da gaur [maiatzak 23]: Habixi Elkargunearen lehenengo urteurrena. Eguraldi eguzkitsua lagun, munitibartar ugari elkartu dira herriko plazan.

Duela urtebete abiatu zuten proiektua ekarri dute gogora gaur Habixiko kideek, eta herritarrek adi entzun dituzte urtebeteko ibileraren hausnarketak: “Duela urtebete erein genuen hazia. Ez genekien zer forma hartuko zuen, baina bagenuen intuizio bat: elkarrekin egindakoak indar berezia duela. Eta urte honetan ez dugu soilik espazio bat eraiki. Ez dugu soilik egitarau bat osatu. Ohitura txikiak landatu ditugu. Konfiantzak ureztatu ditugu. Eta harreman batzuk sustraiak botatzen hasi dira”.

Hain zuzen ere, Gaurko hazixe, bixerko loraldixe izan da lehen urteurren honetarako erabili duten leloa, eta atzera begiratu bai, baina aurrera ere begiratu dute. Hala, ozen adierazi dute belaunaldien arteko transmisioan sinesten dutela: “Badakigu hazten jarraitzeko ezinbestekoa dela sustraiak zaintzea. Horregatik, belaunaldien arteko transmisioan sinesten dugu: aurretik izan eta egindakoa jaso eta entzun, gaur eraikitzen jarraitzeko, eta etorriko direnei ere zerbait ederra uzteko. Horregatik, gaur ez dugu urte bat bakarrik ospatzen. Gaur gure lehenengo loraldia ospatzen dugu”. Eskerrak emateagaz batera amaitu dute aurtengo pregoia, eta hemendik aurrera hazten jarraitzeko gogoz daudela adierazi dute, “sustraiei helduta, baina loraldi berriei lekua egiten”.

Herriko gazteek ere parte hartu dute ekitaldian, eta bertsoak abestu nahiz aurreskua dantzatzeko tartea hartu dute. Pregoiaren irakurketaren aurretik, gainera, pala txapelketako finalak ere jokatu dituzte: 16 urtetik beherakoen artean Ander eta Oihan izan dira irabazleak, eta bigarren postuan geratu dira Jurdan eta Aina. 16 urtetik gorakoen artean, ostera, Gorka eta Iziar izan dira irabazleak, Jon eta Anderri irabazita.

Goizeko jardunaren ostean, bazkaritarako elkartu dira herritarrak: “Guztira 80 pertsona elkartu gara bazkarian. Oraingoz ondo doa eguna, erantzuna ona ari da edukitzen. Eguraldia bero dago baina giroa ere bero dagoela ikusten da”. Pello Lejarzegi eta Irati Monasterio Habixi Elkarguneko kideek aitortu dutenez, gaurko egunerako gogo handiz zeuden: “Duela urtebete oso ondo ospatu genuen Habixiren hasiera, eta gaurko egunerako gogo handiz geunden. Jendearengan ere, sekulako gogoa eta energia ikusi dugu”. Hala, bazkalostean ere, badute zer egina: Kittu taldearen emanaldia, ume eta gazteentzako jolasak eta Sueder eta DJ Bullen emanaldiak egongo dira.

Lehenengo urtea, “oso aberatsa”. Lejarzegik eta Monasteriok lehenengo urtearen balorazio positiboa egin dute: “Uste dugu urte oso aberatsa izan dela. Herrian eduki duen harrera ona izan da, eta ikusi dugu halako proiektu baten beharrizana egon dela. Herritarrek dena eman dute proiektu honetan”. Aurrera begira, ostera, pregoian azpimarratu duten bezala, hazten jarraitu nahi dute: “Urte hau urtebeteko loraldia bain ez da izan, baina urtero etorriko da loraldi berri bat, eta hori zaindu behar dugu. Munitibar bizirik mantentzeko, herria entzun, zaindu eta denon artean elkarlan proiektu hau bultzatzen jarraitu nahi dugu”.

Munitibarko Habixi elkarguneak urteurrena ospatuko du zapatuan egun osoko egitarauagaz

Lea-Artibai eta Mutrikuko Hitza — 2026-05-20 13:20:49

Munitibarko Habixi elkarguneak lehen urteurrena ospatuko du zapatu honetan [maiatzak 23], egun osoko egitarauagaz. Duela urtebete sortu zuten proiektua herriko hainbat talderen elkarlanetik, eta ordutik “herria bizirik eta aktibo mantentzeko” espazio bihurtu dela azaldu dute antolatzaileek.

Habixi elkargunea Munitibarko bost taldek osatzen dute gaur egun: guraso elkarteak, adinekoen taldeak, ezker abertzaleak, emakume talde feministak eta gazte taldeak. Sortzaileek nabarmendu dute lehen urte honek “balorazio oso positiboa” izan duela, herritarren parte-hartzea handia izan delako antolatutako ekintza guztietan.

Urteurreneko ospakizunari “Gaurko hazixe, bixerko loraldixe” leloa jarri diote. Antolatzaileen esanetan, esaldi horrek proiektuaren izaera islatzen du, etorkizunera begirako herri ekimen bat delako.

Goizean pala txapelketako finalak jokatuko dituzte frontoian. Ondoren, pregoia eta txupinazoa egingo dituzte modu kolektiboan, eta herriko gazte batzuek dantzan parte hartuko dute. Eguerditik aurrera, poteo musikatua izango da herrian zehar.

14:30ean herri bazkaria egingo dute plazan bertan, eta 80 lagunek eman dute izena. Bazkalostean, Kittu taldearen girotzea eta ume zein gazteentzako jolas kooperatiboak izango dira.

Gauean emango diote amaiera ospakizunari, Sueder taldearen kontzertuagaz eta DJ Bullen saioagaz.

Antolatzaileek azaldu dute egitaraua adin guztietako herritarrentzat prestatu dutela, “giro herrikoia eta parte-hartzailea” sustatzeko helburuagaz.

EGITARAUA.
11:00. Pala txapelketako finalak.

13:00. Pregoia eta txupina.

Ostean. Poteo musikatua.

14:20. Argazki herrikoia aterako da, Plazan.

14:30. Bazkaria.

17:00. Bazkal oste girotua. Kittu taldea.

Ostean. Ume eta gazteentzako jolasak.

22:00. Sueder eta Dj Bull-en kontzertuak.

Lea Ibarreko udalekuetan izena emateko epea zabaldu dute

Lea-Artibai eta Mutrikuko Hitza — 2026-05-19 12:53:31

Lea Ibarreko udalekuetan parte hartu nahi dutenek maiatzaren 22ra arte edukiko dute izena emateko aukera Kubike Aisialdi taldeak zabaldutako estekaren bitartez, edo baita ere, Lea Ibarra osatzen duten herrietako udaletxeetan.

Behin izena emanda, antolatzaileek umearen Osakidetzako Osasun Txartelaren zenbakia hurrengo telefonora bidaltzeko eskatu dute: 673 45 87 51.

Txopitturri Guraso Elkarteak urteko irteera antolatu du Gesaltza Añanara

Lea-Artibai eta Mutrikuko Hitza — 2026-05-11 14:45:21

Txopitturri Guraso Elkarteak urteko irteera antolatu du, familiei elkarrekin egun berezi bat pasatzeko aukera eskainiz. Aurtengo helmuga Gesaltza Añanako Gatz Harana izango da. Bertan, parte hartzaileek gatzategiak ezagutzeko bisita gidatua egingo dute eta bi esperientziaz gozatzeko aukera izango dute: gatzaren inguruko tailerra eta spa saioa.

Bazkalostean, Gesaltza Añana herria ezagutzeko tartea izango dute, eta 16:30 aldera itzuliko dira Munitibarrera. Antolatzaileen esanetan, irteeraren helburua familiek elkarrekin plan desberdin batez gozatu eta oroitzapen politak sortzea da.

Elkarteko bazkideentzat jardueraren kostua elkarteak bere gain hartuko du; bazkide ez direnek, berriz, 10 euro ordaindu beharko dituzte autobusagatik eta 8 euro inguru tailerrengatik. Izena emateko epea bihar [maiatzak 12] arte egongo da zabalik, eta interesa dutenek txopitturri@gmail.com helbidera idatzi beharko dute.

Udaberriko azoka Munitibarren domekan izango da artisautza, musika eta jarduera ugarirekin

Lea-Artibai eta Mutrikuko Hitza — 2026-04-23 11:30:42

Munitibarrek udaberriari ongietorria emango dio domekan [apirilak 26] egingo den Udaberriko azokarekin. 10:00etatik 15:00etara bitartean, herria artisautzaz, tokiko produktuez eta kultur jarduerez beteko da, publiko guztientzako egitarau oparoarekin.

Egun osoan zehar askotariko postuak egongo dira, artisautza, elikadura eta sormen lanak ardatz hartuta. Parte hartzaileen artean izango dira, besteak beste, bitxigintza, zeramika, kontserbak, ogigintza eta ehungintza lantzen dituzten sortzaileak. Horrela, bisitariek aukera izango dute bertatik bertara ezagutzeko eta erosteko tokiko eta inguruko produktuak.

Azokan izango dira Artisieta, Ajaniz, Ateun harategia, Barock, Elortzatxuko goxoak, Enara artesania, Eskune, Eskulapo pateak, Gigil, Kikuxa, Larruz gazta, Lauky, Mxuk, Orratz ehungintza, Sarrikola okindegia, Torontile, Txokopunto, Urdaibai kontserbak, Urdaibai upategia, Zigehini eta Lea-Artibai eta Mutrikuko HITZA bezalako eragileak. Halaber, kanpotik etorritako sortzaileak ere izango dira, hala nola Ni naiz proiektua (Hernani) eta beste hainbat artisau.

Bertoko ekoizleei ere protagonismo berezia emango zaie, non Dardara, Jesus Belaustegi eta Amagoia Santakoloma, Naioa josi ta pozik, Pascual del Rio, Reyes eta Txopitturri bezalako izenak bilduko diren.

Egitarauari dagokionez, jarduera ugari antolatu dira egunari dinamismoa emateko. 12:00etan, artzai txakurren lehiaketa egingo da futbol zelaian. Ondoren, 13:00etan, Berakatz taldea kalez kale eta tabernaz taberna ibiliko da giroa alaitzen.

14:30ean, ekitaldi berezi bat izango da Eskualdunako Eskultoreen Elkarteak antolatuta. Bertan, Xabier Amurizak kantaldia eskainiko du Palestinaren alde, eta gerraren aurkako performance bat ere egingo da.

Azoka honek, merkatu izateaz gain, topagune izaera ere badu, tokiko ekonomia sustatzeko eta kultur adierazpenak plazaratzeko helburuz. Antolatzaileen esanetan, herritarrak eta bisitariak elkartzeko eta giro atsegina sortzeko eguna izango da.

Munitibarko Udaberriko azoka aukera paregabea izango da artisautza ezagutzeko, tokiko produktuak dastatzeko eta kultur jarduerez gozatzeko, udaberriari ongietorri giro ezin hobean emanez.

Auzolan herrikoia, "komunitatea indartzeko"

Lea-Artibai eta Mutrikuko Hitza — 2026-04-21 10:47:54

Munitibartarrek auzolanean bat egin dute, herriko eskola margotzeko eta konpontzeko. Herritarrek bikain erantzun diote Txopitturri Guraso Elkartearen deialdiari, eta, guztien “konpromisoari, elkarlanari eta dedikazioari” esker, “elkarrekin gehiago lortzeko gai” girela frogatu dute. Haur zein guraso aritu dira eskola margotzen eta doitzen. Parte hartzaile bakoitzarentzako egokitutako “lan txikiak” prestatu dituzte, eta guztien “denborarekin eta ahaleginarekin” lortu dute berritze lana aurrera eroatea.

Txopitturri Guraso Elkarteko zuzendaritza taldetik “eskerrik beroenak” eman dizkiete auzolanean parte hartu duten herritaer guztiei, tankerako jarduerek “komunitatea indartzeko” duten esangura azpimarratuta.

Bazkari musikatuak batu ditu Lea Ibarreko herritarrak

Lea-Artibai eta Mutrikuko Hitza — 2026-03-23 15:01:59

Lea Ibarreko herritarrek hitzordu “berezia” izan zuten zapatuan [martxoak 21]. Lea Ibarreko Udal Mankomunazgoak antolatuta, musika eta abesti inguruan elkartu ziren. Bazkari herrikoia EinGo taldeak girotu zuen, herritarrak dantza egitera erakarriz eta aparteko giroa sortuz.