Lea-Artibai eta Mutrikuko Hitza

27. Zapato Azulak urdinez tindatu du Ondarroa

Lea-Artibai eta Mutrikuko Hitza — 2026-06-27 16:22:15

Azken egunetako bero sargoririk barik esnatu da gaur [ekainak 27] Euskal Herria, eta gustura hartu dute hori Ondarroara joan direnek. Kamiseta urdinak armairutik atera, eta Alde Zaharra goitik-behera eta ezker-eskubi bete dituzte bertaratu direnek. Herritarrak, inguruko herrietakoak nahiz Euskal Herriko hamaika txokotatik bertaratutakoak elkartu ditu gaur Radixu Irratiak antolatzen duen 27. Zapato Azulak Ondarroan. Hala, aurtengo kartelean keinu egin dioten Felix Beristainen koadro baten antzera, urdinez tindatu dira herriko txoko guztiak.

11:00etarako prest zeuden Radixu Irratiako kideak zuzeneko emisioagaz batera jaiari ekiteko, eta egunaren nondik norakoak azaldu ostean, Koldo Azpiazuk hartu du mikroa. Hain zuzen ere, iaz hartu zuen Azpiazuk Nekane Akarregiren erreleboa, eta aurtengoan ere berea izan da jaiari hasiera emateko ardura. Hala, urtero bezala, Alai Tabernako balkoiak bereganatu ditu begirada guztiak, eta bertan zeudenek adi jarraitu dituzte Azpiazuk esandakoak. Nola ez, Manuel Eluren bolanderek ere ez dute hutsik egin, eta 12:00etan egin du eztanda jaiak, bolandera eta bolandera artean.

Bolandera ugari bota ostean jaiak ez du etenik izan, eta urteroko osagaiekin osatu dute goiza. Txistulariak, Kresalako bandaren eta Artelango erraldoien kalejira nahiz falta direnak gogoan hartzeko tartea hartu dute herritarrek, eta Txalainak taldearen kontzertuak biribildu du goizeko jarduna. Abanikoak dantzan eta gorputzak ere bai, Hertzainak taldearen abesti ezagunenak abesteko tartea hartu dute Kalekutz inguruan batu direnek.

Zapato Azule berezia bada, Dinamartxaren ailegaera are bereziagoa da herritar askorentzat. Dina Bilbao Barruetabeñaren omenez Tolosa eta Ondarroa elkartzen dituzte martxalariek oinez nahiz bizikletan, eta irrintzi, txalo, oihu eta musika artean egiten diete harrera ondarrutarrek. Oinez egin duten 77 martxalarientzat bart 01:00etan hasi ziren Zapato Azuleko ekintzak, eta gaur 09:00etan, ostera, bizikletaz etorri diren 223 partaideentzat. Iazko parte hartze kopurua gaindituta (iaz 259 partaide eduki zituen), poztasunez nahiz emozioz betetako malko eta irribarreen artean sartu dira herrira 300 martxalariak.

Martxalariak, Alde Zaharrera heltzen.

Dinamartxako kide denak heldu ostean, aurtengo pregoia irakurri dute Radixuko kideek balkoitik. Besteren artean, Palestina, Saharan, Iran Libano eta Kubagaz gogoratu dira, eta zelan ez, baita Venezuelako herriagaz ere. Jarraian, denborarik galdu barik, aurtengo omendua izendatu dute. “Omendu guztiak dira bereziak, baina aurtengoa, Zapato Azule antolatzen dugun guztiontzat, bereziena da. Zorionak Nekane Akarregi Amutxastegi, zeu zara aurtengo omendua!”. Hala, Akarregi ezustean harrapatu du omenaldiak, baina irribarrez jaso du Radixukoen aipamena.

Ostean, 11:00etan zabaldu duten Euskal Herriko Kamiseta Azoka eta Artisau Azoka itxi, eta aurtengo kamisetarik eta erakusleihorik onenak izendatu dituzte. Kamiseta Azokan Ondarroako hiru postu eta Euskal Herriko beste hamahiru egon dira, eta Torontilek (Artea) irabazi du Euskal Herriko kamisetarik onenaren saria. Ondarroako kamisetarik onenaren saria, aldiz, Saturrarango Haitzak irabazi du, eta erakusleiho onenarena, Lorak Estherrek.

[ARGAZKI GALERIA]

Txo! Antzerki Kolektiboak omenduari egindako sketchagaz amaitu dute eguerdiko jarduna, baina jai luzea geratzen da oraindik Ondarroan. Arratsaldean mota eta gustu guztietako musika entzuteko aukera egongo da herriko txoko guztietan, eta jaiak ez du etenik izango goizeko ordu txikiak arte.

"Begirunez egindako esperientzia sentikor bat" dauka gordeta Arretxinagako ermitak

Lea-Artibai eta Mutrikuko Hitza — 2026-06-26 15:37:21

Ereinotz bat Arretxinagako ermitari. Prozesu luze baten ostean, Markina-Xemeingo balio handiko gunearen zaharberritze lanak amaitu dituzte, hala, San Migel ermita eraberrituta ikusteko hainbat herritar batu ziren atzo arratsaldean. Herritarrez gain, Zerutxu Dantza Taldeak eman zion ongietorria gune berrituari.

Begibistakoak dira ermitaren kanpoaldean egin dituzten lanak. Ermitaren kanpoko hormak kareorez berritu dituzte, kolore eta ehundura bereizgarriak emanez. Eraikina bakarrik ez, alboan dagoen probalekua ere berritu dute eta ikusleentzako armailak jarri dituzte. Lanak amaituta daudela adierazteko, Alde Zaharrean egin zuten era berean lotu zioten ereinotza ermitari.

Kanpoaldekoaldekoak ikusita, barrualdean jarri zuten begirada. Honetarako, ermitara sartu baino lehen, Jon Astorkiza eta Joseba Beristain artistek hartu zuten hitza, erakinaren barnealdean egindako arte proiektu berritzaileari buruzko nondik norakoak azaltzeko. Astorkiza izan da proiektuaren grafiko zuzendaria, eta Arretxinagan egon zen lehen aldian sentitu zuen “konexio handia” aitortu zuen bere berbaldian. Horregatik, toki honetarako “begirunez egindako esperientzia sentikor bat” sortu du. Azalpenekin jarraitzeko, Beristainek hartu zuen hitza. “Tokiko natura elementuen soinuekin eta sintetizadoreekin jolastuz”, sortu du esperientzia bisualari balio gehigarri bat emango dion soinu paisaia. Sei bozgoragailuk osatutako instalazio bat sortu du, eta hala, “txikia den espazio bat handitu egiten du”.

Instalazioaz gain, ikus-entzunezko pieza bat eskaintzen digu San Migel ermitak. Bertaratzen direnek QR bat aurkitu eta horren bitartez helduko dira piezara. Eneritz Artetxe aktore gernika-lumotarrak gidatuko du ikuslea lau hizkuntzatan (euskeraz, gazteleraz, frantsesez eta ingelesez) entzun daitekeen piezan. Ermitari eta hau inguratzen duen artearen historiari buruz ari da Artetxe ikus-entzunezko horretan, “bisitaria leku honen magiarkein, unibertsoarekin, naturarekin eta bizitzarekin lotzeko”.

Aurkezpena amaituta, ermitako ateak zabaldu zitzaizkien herritarrei, eta orduan izan zuten instalazioa ezagutu eta tokiarekin konektatzeko aukera. Bertaratzen direnek ermita zabalik dagoen artean izango dute esperientzia bizitzeko aukera.

Auzo eta herriak alaitzera datoz San Pedro jaiak

Lea-Artibai eta Mutrikuko Hitza — 2026-06-25 16:27:24

San Joan jaiak igaro ondoren, San Pedroen txanda izango da datorren asteburuan, eta Berriatuan, Mutrikun, Artan (Ziortza-Bolibar) eta Barinagan (Markina-Xemein) ospatuko dituzte.

Berriatuko San Pedroak ekainaren 23an hasi baziren ere, gaurtik [eguena] martitzenera arte ere edukiko dute zer ospatu herritarrek; batez ere, kirola eta kultura uztartuko dituzte. Izan ere, gaur [eguena] Euskal Herri mailako gazteen bertso sariketa egongo da bideogelan: Berritxu saria. Bertan parte hartuko dute Kattin Madariaga Apaolaza, Adei Urbitarte Aiestaran, Kattalin Arabolaza Palono, Maia Ortiz De Zarate Idiakez, Iradi Barrenetxea Akesolo, Naroa Iturrioz Lauzirika, Jon Abasolo Sarralde eta Amaiur Betanzos Caminosek. Bihar [barikua] Euskal Herriko mutilen banakako zesra finalak jokatuko dira.

Zapatuan ere kirolak protagonismo berezia izango du. 09:30ean Triatloi herrikoia hasiko da herriko plazatik, eta eguerdian, entsalada eta tortilla lehiaketa egingo dute. Bihar izango da izena emateko azkenengo eguna. Ondoren, Bola joko txapelketagaz jarraituko dute, eta azkenik, Kaletrik musika emanaldia egongo da herriko plazan. Domekan [ekainak 28] Zerbait sartu zait begian antzezlana egongo da bideogelan.

San Pedro egunean [ ekainak 29] eta San Pedro txiki [ekainak 30] egunean ere egun guztiko egitaraua izango dute. Lehenengoan, goizean, Open Bizkaia esku pilota partidak egongo dira, eta arratsaldean, Mus eta Briska txapelketak. Martitzenean umeak izango dira protagonista. Umeen parkea egongo da goiz zein arratsaldez, eta gero, bazkaltzeko batuk dira ume guztiak. Apar festagaz eta txokolateagaz emango diote amaiera egunari.

Mutrikun, ohi legez, omenaldi “xume bezain politarekin” ospatuko dute San Pedro eguna. Itsasoan desagertutako arrantzaleak omenduko dituzte, 12:00etan, Kofradia Zaharrean. “Udalak hartuko du hitza lehenengo, eta ondoren, abadearen txanda izango da. Dantzariek agurra dantzatuko dute, eta korua eta eskaintza egingo dira. Ondoren, bertsolariek bertsoak botako dituzte, eta udalaren agurra egin ondoren, jan-edana egongo da”. Horrez gain, Xabier Basterretxea Esnaola Txordori omenaldia egingo zaio.

Auzoetan ere, San Pedoen gosez daude. Barinaga auzoan bihar [ekainak 26] emango diote hasiera, eta gaztetxoen pilota partiden ondoren, hasiera ofiziala emango diote txupinagoagaz, 20:00etan. Ondoren, txikiteoa egingo dute auzoan, eta iluntzean, su artifizialak egongo dira. Zapatuan [ekainak 27] arratsaldean hasiko da jai giroa: zaldi probak, parrillada eta bolo txapelketa egongo dira. Domekan umeak izango dira protagonista Briska txapelketa eta jolasen artean, eta astelehenean, nagusiagoen txanda izango da. Mezaren ostean, jubilatuen bazkaria egongo da tabernan.

Ziortza-Bolibarko Arta auzoan ere asteburuan ospatuko dituzte San Pedro jaiak. Zapatuan, 17:00etan, XIII. Briska txapelketa egongo da. Antolatzaileek azaldu dutenez, momentuan bertan eman beharko da izena: “Gutxi gorabehera, 22 bikote inguruk ematen dute izena. Auzokoak eta herritarrak etortzen dira, baina baita inguruko jendea ere”.

Domekan [ekainak 28] egun guztiko jaia izango dute. “Eguerdi aldera batzen gara jende gehien, eta Zerutxu dantza taldeko dantzariek ere jendea erakartzen dute. Horrez gain, umeekin ere etortzen da jendea, eta bazkaritara bakoitza norbere etxera joaten da, antzinako erara”. Hala ere, bazkaldu aurretik Onintza Enbeita eta Miren Amuriza ariko dira bertsotan.

Bazkalostean, umeen jolasak egongo dira, eta Imanol Intxausti eta Iñaki Larrañaga trikitilariek alaituko dute auzoa: “Trikitilariak egun guztian egongo dira, eta umeen jolasak ere girotuko dituzte. Umeen jolasetan betikoak egiten ditugu: aulki jolasa, puxikak puskatu… Jolas bereziena patata dantza izaten da: patata bat begian jarri eta dantza egin patata erori gabe”.

Hamabost lagun inguru dabiltza antolakuntzan, eta “dena denen artean” egiten dutela zehaztu dute: “Bilerak egiten ditugu eta bakoitzak bere ardurak hartzen ditu. Gu momentuz jaiak mantentzen saiatzen gara, eta nahiko indartsu daudela esango nuke. Gogotsu gaude aurtengorako ere”.

EGITARAUA

BERRIATUA

Bihar, barikua
- 19:00. Euskal Herriko mutilen banakako zesta txapelketako finalak.
Etzi, zapatua
- 09:30. Triatloi herrikoia, herriko plazan.
- 14:30. Entsalada eta tortilla lehaiketa, herriko plazan.
- 17:00. Bola joko txapelketa.
- 18:00. Kaletrik musika emanaldia, herriko plazan.
Ekainak 28, domeka
- 19:00. Zerbait sartu zait begian, antzezlana, bideogelan.
Ekainak 29, San Pedro eguna
- 12:00. Meza San Pedro elizan.
- 12:30. Open BIzkaia esku pilota partidak emakumezko eta gizonezkoak. Kanpoko frontoian (euriagaz, barruko frontoian).
- 17:00. Mus eta Briska txapelketak.
Ekainak 30, San Pedrotxiki
- 11:00-13:00/15:00-17:00. Umeen parkea, herriko plazan.
- 13:30. Umeen bazkaria herriko plazan.
- 17:00. Apar festa herriko plazan.
- Ondoren. Txokolatea herriko plazan.
Uztailak 5 eta 12
- Zesta: Jai Alai League B, Mendibarren frontoian.

MUTRIKU

Ekainak 29, San Pedro eguna:
- 12:00. Itsasoan desagertutako arrantzaleei omenaldia, Kofradia Zaharrean.

BARINAGA AUZOA (MARKINA-XEMEIN)

Bihar, barikua
- 17:00. Gaztetxoen arteko pilota partidak.
- 20:00. Txupinazoa eta txikiteoa.
- Iluntzean. Su artifizialak.
Etzi, zapatua
- 18:00. Zaldi probak.
- Ostean. Parrillada.
- 21:00. Bolo txapelketa.
Ekainak 28, domeka
- 16:00. Umeen briska txapelketa.
- 17:00. Umeen jolasak.
Astelehena, ekainak 29
- 12:15. Meza.
- Ostean. Mezaostekoa.
- 14:00. Jubilatuen bazkaria tabernan.

ARTA AUZOA (ZIORTZA-BOLIBAR)

Etzi, zapatua
- 17:00. Artako XIII. Briska txapelketa.
Ekainak 28, domeka
- 11:00. Meza santua.
- 12:00. Zerutxu dantza taldea.
- Ondoren. Bertsolariak: Onintza Enbeita eta Miren Amuriza.
- 18:00. Umeen jolasak. Imanol Intxausti eta Iñaki Larrañaga.
- Trikitilariak egun guztian.

Klik Mutriku Energia komunitateak lehenengo Batzar Orokorra egingo du ekainaren 29an

Lea-Artibai eta Mutrikuko Hitza — 2026-06-23 17:44:49

Klik Mutriku Energia Komunitatearen lehenengo Batzar Orokorra egingo dute ekainaren 29an [astelehena], 19:00etan, Zabiel kultur etxean. Orain arte egindakoa eta aurrera begira egingo direnak mahaigaineratuko dira, eta Klik Kooperatibako bazkide guztiak gonbidatuta daudela zehaztu dute.

Klik Mutriku irabazi asmorik gabeko kooperatiba herritarra da, borondatezko partaidetzan oinarritutakoa. Bost helburu nagusi ditu definituta kooperatibak: “Energia berriztagarriak sustatzea, autokontsumoa handitzea, hau da, norberaren kontsumora bideratutako energia ekoiztea, energia gaietan herritarrak heztea eta ahalduntzea, energia fakturak hobeto ulertu eta gastua gutxitzen laguntzea eta pobrezia energetikoan dauden pertsonei laguntzea”.

Hainbat proiektu ditu eskuartean kooperatibak; ikastolako jolastokiko estalpean 40 kilowattotako instalazio fotovoltaikoa jarri dute, eta eguzki plakak ere jarriko dituzte herrian. “Energia berriztagarria sortzea eta herrian bertan kontsumitzea oso garrantzitsua dela uste dugu”.

Izan ere, autokontsumo kolektiboaren aldeko apustua egiten dute Klik Mutriku Energia Komunitatetik: “Inbertsioa modu kolektiboan egiten da, hau da, bazkide guztian artean. Energia Berriztagarrien Komunitatea arduratuko da haien instalazioa gauzatzeaz, finantzatzeaz eta mantentzeaz”. Gainera, zehaztu dute, ez dela beharrezkoa instalazioa norbere teilatuan jartzea, “horrek baldintza onenak ez dituztenek ere tokian sortutako energia kontsumitzea ahalbidetzen du”. Hala ere, azpimarratu dute, bost kilometroko distantzian bizi direnek bakarrik edukiko dutela kontsumitzeko aukera. “Instalazio fotovoltaikoaren bidez ekoizten den energia, beraz, sortzen den momentuan bertan kontsumitu behar da eta horrek saretik erositako elektrizitate kopurua murriztea eragiten du eta beraz, baita argindar faktura ere”.

Irabazi asmorik gabeko kooperatiba da; beraz, irabazirik egotekotan, kooperatibak ez du bazkideen artean banatuko: “Irabaziak kooperatibara itzuliko dira, bazkideek erabakitako proiektuetan berrinbertitzeko“.

Mutriku Sokatira Taldekoak, laugarren eta hirugarren Euskadiko Lur Gaineko Sokatira Txapelketan

Lea-Artibai eta Mutrikuko Hitza — 2026-06-23 16:07:58

Mutrikun lehiatu zuten zapatuan [ekainak 20] Euskadiko Lur Gaineko Sokatira Txapelketa.

Bertan, emakumezkoek bigarren jardunaldia eduki zuten, 540 kilotan. Mutrikuko taldeak laugarren postua lortu zuen, 2,5 punturekin. Goiherri Ak eskuratu zuen lehenengo postua, 5,5 punturkin eta atzetik jarraitu zion Gaztedi Ak, puntuazio berarekin. Akelarre gelditu zen hirugarren, 4 punturekin.

Gizonezkoak 600 kilotan lehiatu ziren. Mutrikuarrak hirugarren geratu ziren, 2,5 punturekin. Lehenengoak Gaztedi A taldekoak izan ziren, 5 punturekin eta bigarrenak Goiherrikoak, 4 punturekin.

Hurrengo jardunaldia zapatuan [ekainak 27] izango da, Laukizen.

Mutrikuko Goizeko Izarra Ikastetxeko komunitateak Euskal Selekzioaren ofizialtasuna aldarrikatu du

Lea-Artibai eta Mutrikuko Hitza — 2026-06-23 15:50:34

Mutrikuko Goizeko Izarra ikastetxeko hezkuntza komunitateak Euskal Selekzioaren ofizialtasunaren aldeko elkarretaratzea egin du. Gizonezkoen Munduko Futbol Kopa jokatzen dabiltzan honetan, Euskal Selekzioari nazioarteko lehiaketetan parte hartzea galarazten zaiola salatu du hezkuntza komunitateak, eta herritarren gehiengoak babesten duen aldarria gauzatzeko eskatu du.

Euskal Selekzioa orain! lelopean bildu ziren joan den astean Mutrikuko Goizeko Izarra ikastetxeko hezkuntza komunitateko kideak. Elkarretaratzean, gizonezkoen Munduko Futbol Kopan Euskal Herriak bere selekzio propioarekin nazioarteko txapelketetan parte hartzeko duen eskubidea aldarrikatu zuten.

Ekimenaren sustatzaileek azpimarratu dutenez, euskal gizartearen gehiengo zabalak babesten du Euskal Selekzioaren ofizialtasuna: “Telesforo Monzon eLab naziometroak emandako datuen arabera, herritarren %75 inguruk babesten du Euskal Selekzioen nazioarteko aitortza, eta Araba, Bizkaia eta Gipuzkoan babesa %77ra ere iristen da”.

Elkarretaratzean gogorarazi zutenez, munduan badira estaturik gabeko hainbat nazio nazioarteko kirol federazioetan ordezkaritza propioa dutenak, besteak beste Gales, Eskozia edo Feroe Uharteak. Horregatik, Euskal Herriak ere aukera bera izatea bidezkoa dela defendatu zuten.

Hala, ekimenarekin Goizeko Izarrako komunitateak herritarren borondatea errespetatu eta gauzatzeko garaia zela nabarmendu zuen, Euskal Selekzioaren aldeko “babes sozial zabala” agerian utzi eta aldarria plazaratuz.

MRK-ko kideak "pozik" daude Xiri Egunak izandako harrerarekin

Lea-Artibai eta Mutrikuko Hitza — 2026-06-22 16:28:59

Zapatuan [ekainak 20] laugarren Xiri Eguna ospatu zuten Mutrikun, herriko rock kolektiboak antolatuta. Goizean Leherkaitz eta Maraca Diablo taldeen kontzertuak egon ziren Xiri Gunean, eta arratsaldean, Sugrams eta Harat igo ziren gaztetxeko oholtzara. Horrez gain, bazkalostean erraldoi eta buruhandiekin eta txistulariekin kalejira egin zuten Beheko Plazatik gaztetxera: “Egunaren balorazio ona egiten dugu, hiru urtez eguraldi txarra egin ostean, oraingoan, gure lagun izan dugu. Jendea etorri zen kontzertuetara eta kalejirara eta pozik gaude emaitzarekin”.

Ligako lehen arraunkadak eman dituzte etxeko taldeek

Lea-Artibai eta Mutrikuko Hitza — 2026-06-22 13:44:14

Ondarroako eta Isuntzako trainerek ETE Ligako lehen estropadak lehiatu zituzten joan den zapatuan eta domekan [ekainak 20 eta 21], hurrenez hurren, Astilleroko eta Pasaiako uretan. KAE 2 Ligako lehen estropada ere jokatu zuten Astilleron, eta bertan eman dituzte trainerek lehen pausuak sailkapen orokorrean.

Hondarribia, Kaiku eta Zarautz oso parekatuta ibili ziren Astilleron lehiatu zuten lehen estropadan. Eguneko ziaboga bakarreko biraketa 00.06.00ko denboran egin zuten hirurek, hala, bigarren eta azken luzea izan zen irabazlea erabaki zuena: zarauztarrek egin zuten marka onena, egin beharrekoak 11.18,34ko denboran burutuz. Hondarribia bigarren, Kaiku hirugarren eta Deusto laugarren geratu ziren. 11.35,22ko denboragaz, bosgarren postua lortu zuen Ondarroak, lau puntuak eurenganatuz . Zazpi segundu gehiago behar izan zituen Isuntzak, eta eurena izan zen hiru puntu eman zizkien seigarren postua. Hala, Hernaniko eta Portugaleteko trainerek bete zituzten azken bi postuak.

Pasaian jokatu zuten ETE Ligako bigarren jardunaldia, eta bi txandatan aritu ziren emakumezkoen trainerak 1,5 milietan. Aurreko eguneko estropadako postuak kontuan hartuta, Deustok, Kaikuk, Hondarribiak eta Zarautzek osatu zuten ohorezko txanda. Zapatuko ildotik jarraiki, Kaikuk, Hondarribiak eta Zarautzek guztiz parekatuta egin zituzten lehen bi ziabogetako biraketak, hala, azken luzean indarrak batu eta Hondarribiaizan zen azkarrena; 11.49,88ko denbora eginda, zortzi puntuak eurenganatu zituzten. Lehenengo txandan, denborarik onena egin zuten ondarrutarrek, eta 12.06,24ko denboragaz, lau puntu lortu zituzten. Postu bat atzera egin eta zazpigarren postua lortu zuen Isuntzak domekan; 12.34,60ko denboragaz, bi puntu gehitu dituzte sailkapen orokorrera.

Isuntza estropadan.Bermeo Arraun Argazkiak

KAE 2 Ligako lehen estropada ere hartu zuen Astillerok zapatuan. Mutrikuko trainera ligara bueltatu da, eta zapatuko lehian izan zen. Mutrikuarrek 22.38,96ko denboran egin zituzten lau luze eta hiru ziabogak; hala, seigarren postua eurenganatu eta sailkapenerako hiru puntu lortu zituzten. Castrok lortu zuen denborarik onena Astilleron 21.07,98ko denboran, eta Camargoko trainera izan zuen atzetik. Portugalete geratu zen hirugarren, Deusto laugarren eta Busturialdea bosgarren. Laredo eta Lutxana izan ziren azkenak hiru miliak osatzeko lehian.

Mutrikuko trainera estropadan.Bermeo Arraun Argazkiak

Sailkapen orokorra. Emaitzak horrela, ETE Ligako sailkapen nagusian 8 puntugaz amaitu du Ondarroak asteburua, eta 5 puntugaz, Isuntzak. Datorren zapatuan [ekainak 27], 11:00etatik aurrera ariko dira aurrez aurre emakumeen trainerak Elantxobeko Andran I. Ikurrina jokatzeko.

KAE 2 ligako lehen estropadan lortutako hiru puntuek sailkapen orokorrean seigarren postua eman die mutrikuarrei. Elantxobeko 38. traineru estropada jokatuko dute datorren zapatuan [ekainak 27], eta Mutrikuko Unebide 8. bandera, domekan [ekainak 28], biak 11:00etatik aurrera.

Etxeko taldeek jardunaldiak hasi baino lehen aurreikusitako helburuak bete ditzutela esan daiteke, ohorezko txandan ez bazen ere, lehen txandako postu onenetan egotea espero baitzuten.

Euskal Herriko Txapela, Sagarmendirentzat

Lea-Artibai eta Mutrikuko Hitza — 2026-06-19 14:25:20

Eneko Sagarmendi mutrikuarrak eta Unax Gurrutxaga zuamaiarrak jantzi dute Euskal Herriko Pilota Egokituko Txapelketako txapela, zapatuan [ekainak 13] Lazkaoko Jose Miguel Barandiaran pilotalekuan jokatutako partida irabazi ondoren.

Lehenengo partida 10-5eko eta 10-3ko markagailuaz eraman zuten poltsikora, Fernando Cuesta eta Jesus Lapuente arabarren aurka jokatu ondoren. Bigarren partida Joseba Altuna oriotarraren eta Jurdan Arakistain zestoarraren aurka jokatu zuten, lehenengo setean 10-2 irabazi zuten, eta bigarrenean, 10-6. Bigarrena poltsikoratuta, finalerdietako ateak ireki zitzaizkien Sagarmendi eta Gurrutxagari. Erik Gaston donostiarraren eta Ibai Gomez errenteriarraren aurka ere bi setak irabazita heldu ziren finalera: 10-5 eta 10-6. Azkenik, Altuna eta Arakistainen aurka jokatu zuten finala, eta hiru set jokatu ondoren, txapela jantzi zuten mutrikuarrak eta zumaiarrak.

“Denboraldi bikaina eta polita izan da niretzat. Eskerrak eman nahi dizkiet Lander, Joseba, Xabat eta Unaxi. Plazer bat izan da txapelketa ezberdinetan beraiekin jokatzea, oso gustura egon naiz. Horrez gain, palako entrenatzaileak ere eskertu nahi ditut, baita gimnasiokoari ere: Mikel, Irati eta Unax”, nabarmendu du Sagarmendik.

Sukaldaritza eta nutrizioa ikuspuntu "praktiko" batetik landuko dituzte

Lea-Artibai eta Mutrikuko Hitza — 2026-06-19 06:00:53

Gipuzkoako Azoken Sareak Azokatik Mahaira: Sukaldean Behin izeneko tailerra antolatu du, Mutrikuko Udalarekin elkarlanean. Nutrizioa eta sukaldaritza onduko ditu jarduera horrek, etzi [ekainak 21], 11:30ean hasita, Mutrikuko Merkatu Txikian. Tailerrak herritarrei “tresnak” eskaintzea izango du helburu, beraien eguneroko elikadura “modu erraz, osasungarri eta iraunkorrean” antolatu dezaten.

Proposamenaren ardatza “argia” izango dela aurreratu dute antolatzaileek: “Egun bakarrean eta ordu biko iraupenez, aste osorako janaria prestatzen laguntzea”. Beraz, tailerrean parte hartuko dutenek sukaldean denbora optimizatzen ikasi ahalko dute, aldi berean “dieta orekatua bermatuz”.

Horretarako, tokiko eta sasoiko produktuak baliatuko dituzte tailerrean, bertako ekoizleen beharra aintzatesteko eta kontsumo arduratsua sustatzeko asmoz. Anne Otegi sukaldaria eta Aitziber Aizpuru nutrizionista izango dira gidari lanak egingo dituztenak; sukaldaritzaren eta elikaduraren arteko “ikuspegi osagarriak” uztartuko dituztela aurreratu dute. Dinamizatzaile bien eskutik, parte hartzaileek “aholku praktikoak” eta beren egunerokotasunean erabat aplikagarriak izango diren “errezetak” jaso ahal izango dituzte zapatuan.

Azoka “indarberritzeko”.
Nekazal azoka “indarberritzea” tokian tokiko azoka guztien jomuga nagusia izanik, egitasmoak indarberritze horretan “eragitea” da antolatzaileek duten helburua, jarduera horrekin. Horrenbestez, herritarrek “zuzen-zuzenean” ikasiko dute garaian garaiko produktuekin etxean “modu azkar eta erosoan” prestatzeko errezetak kozinatzen: “Ohiko errezetatik apur bat urrundu, eta egunerokoan kontsumitu ditzaketen bertako elikagaiak modu erakargarriagoan prestatzen ikasiko dute”.

Egitasmoaren antolatzaileek iragarri dutenaren arabera, tailerrak ez du izen ematerik edukiko; “bertaratzearekin nahikoa” izango da. Gainera, bertaratzen direnek egunean kozinatutako jakiak dastatzeko aukera edukiko dute. Ez hori bakarrik: tailerrean egingo diren errezetak eta nutrizio aholkuak ere banatuko dituztela iragarri dute.

Mutrikuko Rock Kolektiboak laugarrenez antolatuko du Xiri Eguna

Lea-Artibai eta Mutrikuko Hitza — 2026-06-18 17:20:43

Mutrikuko Rock Kolektiboak laugarrenez antolatuko du Xiri Eguna zapatuan [ekainak 20]. Xiri Andonegi Egurbide mutrikuar eskultore eta margolariak Atxukale inguruan sortutako obra eta espazioa biziberritzeko asmoz sortu zuten ekimena duela hiru urte, eta ordutik herritarren egutegian tokia egin duen hitzordua izan da.

Xiri Guneari bizitza ematea da ekimenaren helburu nagusietako bat. Hala ere, aurten hainbat aldaketa egin dituzte egitarauan. “Aurten, arratsaldeko kontzertuak gaztetxean izango dira. Eguraldiaren menpe ibiltzen gara beti; izan ere, Xiri Guneak ez dauka aterpe askorik, eta azken urteetan egitaraua birformulatu eta kontzertuak gaztetxean egiten amaitu dugu. Beraz, aurten, lehenengotik bermatu nahi izan dugu hori, eta arratsaldeko kontzertuak zuzenean gaztetxean egitea erabaki dugu”.

Horrela, goizeko ekintzak Xiri Gunean egingo dituzte. Leherkaitz eta Maraca Diablo taldeak igoko dira oholtzara: “Maraca Diablo taldeak diskoa aurkeztuko du. Mendaroko taldea da, eta Gararock musikarien kolektiboko kideak dira. Horrelako egunak bereziak izaten dira guretzako, polita iruditzen zaigulako musikarien kolektibo ezberdinak elkartzea, harremanak egitea eta esperientziak partekatzea”.

Bazkalostean emango diote jarraipena egunari, Beheko plazatik gaztetxeraino egongo den Mutrikuko erraldoien eta txistularien kalejirarekin. Ondoren, bertan hasiko dira kontzertuak, eta Bizixo jai batzordeak kudeatuko du barra. “Aurtengo beste berezitasunetako bat da egitaraua Xiri Gunetik haratago zabaldu dugula. Aurreko urteetan bezala, herriko hainbat eragilerekin elkarlanean aritu gara”. Gainera, iaz bezala, aurten ere ez da sortzaileen azokarin egongo. Lehenengo bi urteetan antolatu bazuten ere, Merkatu Txikiaren egun berean ez antolatzeko erabakia hartu zuten iaz: “Beheko Plazan Merkatu Txikia egiten da egun horretan, beraz, udalarekin koordinatu ondoren, iaz erabaki genuen azokarik ez egitea”.

Arratsaldean, berriz, Sugrams eta Harat taldeen kontzertuak egongo dira gaztetxean. Antolatzaileek nabarmendu dutenez, “maila handiko” musikariak dira guztiak, tartean, Jon Gurrutxaga elgoibartarra: “Maila handiko musikariak dira, guretzat erreferenteak. Musika zaleentzat gozatzeko moduko eguna izango da”.

Antolatzaileen esanetan, zapaturako “egun polita” espero dute, musika, kale giroa eta herriko eragileen arteko elkarlana uztartuko dituena: “Proposamen interesgarriak aurkituko ditu jendeak; beraz, animatu!”.

Xiri Gunea biziberritzen. MRK-ko kideek aitortu dute Xiri Egunean jende asko batzen dala gunean, baina oraindik ez dela bete hasieratik zuten helburu nagusietako bat: Xiri Gunea urte osoan erabiltzea. “Urteko beste egunetan ez zaio nahiko genukeen erabilera ematen guneari. Herriko eragileei erakutsi nahi diegu bertan gauzak antolatzea posible dela. Guk musika eramaten dugu, hori baita gure jardunaren ardatza, baina beste edozein motatako ekimenak ere egin daitezke”.

Ondarroako AEK-k ibilaldia antolatu du Saturrarango emakumeen kartzela izan zen tokira

Lea-Artibai eta Mutrikuko Hitza — 2026-06-16 12:54:47

Ondarroako AEK-k Saturrarango emakumeen kartzela izan zena bisitatzeko ibiladia antolatu du eguenerako [ekainak 18]. 11:00etan batuko dira Moby Dick tabernaren aurrean, eta denek batera egingo dute Arrigorri hondartzatik Saturraranera arteko ibilbidea. Bertan, Mikel Etxaburu idazlearen Mattalingo alaba liburuko poemen eta kantuen bitartez bertan gertatutakoa oroituko dute.

Mutrikuko LGTBI+ diagnostikoa osatzen ari da Hiruki Larroxa Kooperatiba

Lea-Artibai eta Mutrikuko Hitza — 2026-06-16 12:34:32

Mutrikuko Udala LGTBI+ errealitateei buruzko udal diagnostikoa osatzen dabil Hiruki Larroxa Kooperatibaren eskutik. Horretarako, herritarren parte hartzea “beharrezkoa” dela adierazi dute: “zenbat eta ahots gehiago, orduan eta irudi osatuagoa izango dugu”. Horretarako, galdetegi bat jarri dute herritarren eskura, eta parte hartzeko deia egin dute. Galdetegia Mutrikuko Udalaren komunikazio kanaletan dago eskuragarri, eta guztiz konfidentziala izango dela zehaztu dute.

Zabalik dago Malen bezperako danborradan parte hartzeko izen ematea

Lea-Artibai eta Mutrikuko Hitza — 2026-06-11 13:28:01

Mutrikuko Mandazketa elkarteak Malen bezperako danborradan parte hartzekodeia zabaldu die mutrikuarrei. Mandazketa elkartean eman beharko dute izen bihar [ekainak 12], 19:00etan. Antolakuntzak adierazi duenez, pertsona bakoitzak hiru pertsona apuntatu ahalko ditu gehienez.

Mutriku Futbol Taldeko Bazkide Egunean 1975-76 denboraldiko futbolariak omenduko dituzte

Lea-Artibai eta Mutrikuko Hitza — 2026-06-10 15:51:18

Mutriku Futbol Taldeak Bazkide Eguna antolatu du zapaturako [ekainak 13]. Gainera, aurten, 50 urte betetzen dira Mutriku Futbol Taldeak Errenteriako Touring taldearen kontra kopako finala irabazi zuenetik, Atotxan, 3-0ko markagailuarekin. Futbol taldetik final “gogoangarria” izan zela nabarmendu dute, eta 50. urteurrena aitzakiatzat hartuta zapatuan omenaldia egingo diote finala jokatu zuen taldeari. Hala, 13:30ean San Miguel futbol zelaian batuko dira guztiak, omenaldi “xume bezain berezia” eskaintzeko: “Guztiok aho batez esango dugu: izan zinetelako gara!”.

Omenaldiaz gain, egun guztiko egitaraua antolatu du Mutriku Futbol Taldeak. 09:00etatik 11:00etara futbol eskolako partidak egongo dira, eta 11:00etatik 13:30era futbol zazpiko infantilak eta kadeteak jokatuko dute. 12:30ean, bazkideak batuko dira futbol zelaian, eta luntxa egingo dute tabernan. Ondoren, 13:30ean egingo diete omenaldia txapeldunei, eta 14:30ean Egaña frontoira joango dira bazkaltzera. Bazkalostean, denboraldiko sari banaketa egingo dute frontoian bertan.

'Mi Pequeño Gran Samurai' dokumentalaren emanaldia egingo dute Mutrikun

Lea-Artibai eta Mutrikuko Hitza — 2026-06-10 14:02:31

Naizen Adingabe Transexualen Familien Elkartearen eskutik, Mi Pequeño Gran Samurai dokumentalaren emanaldia egingo dute bihar [ekainak 11] 18:30ean, Mutrikuko Zabiel Kultur Etxean. LGTBI+ Harrotasunaren eta Sexu Askapenaren Nazioarteko Eguna hurbiltzen ari den honetan, Ekai Lersundi gogoratuko dute herrian, eta proiekzioaren ostean, solasaldia egingo dute.

Zabalik dago Mutrikuko Gazte Eguneko kamisetak eta bazkariko tiketak eskuratzeko epea

Lea-Artibai eta Mutrikuko Hitza — 2026-06-10 13:17:24

Gero eta gutxiago falta da Mutrikuko Malen Jaietarako. Hala, Bizixo Jai Konpartsak uztailaren 21ean ospatuko duten Gazte Egunerako kamisetak eta bazkariko tiketak eskatzeko deialdia egin du, eta herriko gazteek astelehenera arte [ekainak 15] egin ahalko dute eskaera. Konpartsak adierazi duenez, kamiseten prezioa 8 eurokoa izango da, eta denak izango dira neurri zabalekoak. Bazkariko tiketak 7 euroren truke eskuratu ahalko dira, eta bazkari beganoa eskainiko dute. Adierazi dutenez, kamisetak eta bazkaria ordaintzeko eguna aurrerago zegaztuko dute.

Kamiseten eta tiketen eskaera egiteko formulario hau bete beharko da.