Lea-Artibai eta Mutrikuko Hitza

27. Zapato Azulak urdinez tindatu du Ondarroa

Lea-Artibai eta Mutrikuko Hitza — 2026-06-27 16:22:15

Azken egunetako bero sargoririk barik esnatu da gaur [ekainak 27] Euskal Herria, eta gustura hartu dute hori Ondarroara joan direnek. Kamiseta urdinak armairutik atera, eta Alde Zaharra goitik-behera eta ezker-eskubi bete dituzte bertaratu direnek. Herritarrak, inguruko herrietakoak nahiz Euskal Herriko hamaika txokotatik bertaratutakoak elkartu ditu gaur Radixu Irratiak antolatzen duen 27. Zapato Azulak Ondarroan. Hala, aurtengo kartelean keinu egin dioten Felix Beristainen koadro baten antzera, urdinez tindatu dira herriko txoko guztiak.

11:00etarako prest zeuden Radixu Irratiako kideak zuzeneko emisioagaz batera jaiari ekiteko, eta egunaren nondik norakoak azaldu ostean, Koldo Azpiazuk hartu du mikroa. Hain zuzen ere, iaz hartu zuen Azpiazuk Nekane Akarregiren erreleboa, eta aurtengoan ere berea izan da jaiari hasiera emateko ardura. Hala, urtero bezala, Alai Tabernako balkoiak bereganatu ditu begirada guztiak, eta bertan zeudenek adi jarraitu dituzte Azpiazuk esandakoak. Nola ez, Manuel Eluren bolanderek ere ez dute hutsik egin, eta 12:00etan egin du eztanda jaiak, bolandera eta bolandera artean.

Bolandera ugari bota ostean jaiak ez du etenik izan, eta urteroko osagaiekin osatu dute goiza. Txistulariak, Kresalako bandaren eta Artelango erraldoien kalejira nahiz falta direnak gogoan hartzeko tartea hartu dute herritarrek, eta Txalainak taldearen kontzertuak biribildu du goizeko jarduna. Abanikoak dantzan eta gorputzak ere bai, Hertzainak taldearen abesti ezagunenak abesteko tartea hartu dute Kalekutz inguruan batu direnek.

Zapato Azule berezia bada, Dinamartxaren ailegaera are bereziagoa da herritar askorentzat. Dina Bilbao Barruetabeñaren omenez Tolosa eta Ondarroa elkartzen dituzte martxalariek oinez nahiz bizikletan, eta irrintzi, txalo, oihu eta musika artean egiten diete harrera ondarrutarrek. Oinez egin duten 77 martxalarientzat bart 01:00etan hasi ziren Zapato Azuleko ekintzak, eta gaur 09:00etan, ostera, bizikletaz etorri diren 223 partaideentzat. Iazko parte hartze kopurua gaindituta (iaz 259 partaide eduki zituen), poztasunez nahiz emozioz betetako malko eta irribarreen artean sartu dira herrira 300 martxalariak.

Martxalariak, Alde Zaharrera heltzen.

Dinamartxako kide denak heldu ostean, aurtengo pregoia irakurri dute Radixuko kideek balkoitik. Besteren artean, Palestina, Saharan, Iran Libano eta Kubagaz gogoratu dira, eta zelan ez, baita Venezuelako herriagaz ere. Jarraian, denborarik galdu barik, aurtengo omendua izendatu dute. “Omendu guztiak dira bereziak, baina aurtengoa, Zapato Azule antolatzen dugun guztiontzat, bereziena da. Zorionak Nekane Akarregi Amutxastegi, zeu zara aurtengo omendua!”. Hala, Akarregi ezustean harrapatu du omenaldiak, baina irribarrez jaso du Radixukoen aipamena.

Ostean, 11:00etan zabaldu duten Euskal Herriko Kamiseta Azoka eta Artisau Azoka itxi, eta aurtengo kamisetarik eta erakusleihorik onenak izendatu dituzte. Kamiseta Azokan Ondarroako hiru postu eta Euskal Herriko beste hamahiru egon dira, eta Torontilek (Artea) irabazi du Euskal Herriko kamisetarik onenaren saria. Ondarroako kamisetarik onenaren saria, aldiz, Saturrarango Haitzak irabazi du, eta erakusleiho onenarena, Lorak Estherrek.

[ARGAZKI GALERIA]

Txo! Antzerki Kolektiboak omenduari egindako sketchagaz amaitu dute eguerdiko jarduna, baina jai luzea geratzen da oraindik Ondarroan. Arratsaldean mota eta gustu guztietako musika entzuteko aukera egongo da herriko txoko guztietan, eta jaiak ez du etenik izango goizeko ordu txikiak arte.

"Begirunez egindako esperientzia sentikor bat" dauka gordeta Arretxinagako ermitak

Lea-Artibai eta Mutrikuko Hitza — 2026-06-26 15:37:21

Ereinotz bat Arretxinagako ermitari. Prozesu luze baten ostean, Markina-Xemeingo balio handiko gunearen zaharberritze lanak amaitu dituzte, hala, San Migel ermita eraberrituta ikusteko hainbat herritar batu ziren atzo arratsaldean. Herritarrez gain, Zerutxu Dantza Taldeak eman zion ongietorria gune berrituari.

Begibistakoak dira ermitaren kanpoaldean egin dituzten lanak. Ermitaren kanpoko hormak kareorez berritu dituzte, kolore eta ehundura bereizgarriak emanez. Eraikina bakarrik ez, alboan dagoen probalekua ere berritu dute eta ikusleentzako armailak jarri dituzte. Lanak amaituta daudela adierazteko, Alde Zaharrean egin zuten era berean lotu zioten ereinotza ermitari.

Kanpoaldekoaldekoak ikusita, barrualdean jarri zuten begirada. Honetarako, ermitara sartu baino lehen, Jon Astorkiza eta Joseba Beristain artistek hartu zuten hitza, erakinaren barnealdean egindako arte proiektu berritzaileari buruzko nondik norakoak azaltzeko. Astorkiza izan da proiektuaren grafiko zuzendaria, eta Arretxinagan egon zen lehen aldian sentitu zuen “konexio handia” aitortu zuen bere berbaldian. Horregatik, toki honetarako “begirunez egindako esperientzia sentikor bat” sortu du. Azalpenekin jarraitzeko, Beristainek hartu zuen hitza. “Tokiko natura elementuen soinuekin eta sintetizadoreekin jolastuz”, sortu du esperientzia bisualari balio gehigarri bat emango dion soinu paisaia. Sei bozgoragailuk osatutako instalazio bat sortu du, eta hala, “txikia den espazio bat handitu egiten du”.

Instalazioaz gain, ikus-entzunezko pieza bat eskaintzen digu San Migel ermitak. Bertaratzen direnek QR bat aurkitu eta horren bitartez helduko dira piezara. Eneritz Artetxe aktore gernika-lumotarrak gidatuko du ikuslea lau hizkuntzatan (euskeraz, gazteleraz, frantsesez eta ingelesez) entzun daitekeen piezan. Ermitari eta hau inguratzen duen artearen historiari buruz ari da Artetxe ikus-entzunezko horretan, “bisitaria leku honen magiarkein, unibertsoarekin, naturarekin eta bizitzarekin lotzeko”.

Aurkezpena amaituta, ermitako ateak zabaldu zitzaizkien herritarrei, eta orduan izan zuten instalazioa ezagutu eta tokiarekin konektatzeko aukera. Bertaratzen direnek ermita zabalik dagoen artean izango dute esperientzia bizitzeko aukera.

Gizon ba atxilotu dute Ondarroan, lapurreta egitea egotzita

Lea-Artibai eta Mutrikuko Hitza — 2026-06-26 15:49:45

Gizon bat atxilotu du Udaltzaingoak Ondarroan, Arrigorri hondartzan lapurreta egiten ahalegintzeagatik. Ondarroako Udalak jakinarazi duenez, herritarrek eman die abisua udaltzainei, eta Ondarroa eta Mutriku arteko mugan atxilotu dute gizona.

Ondarroa kolore urdinez janztera dator 27. Zapato Azule

Lea-Artibai eta Mutrikuko Hitza — 2026-06-26 10:16:04

Ondarroako Bolo-Bolo aldizkariak eman zion hasiera 1998an hain ezaguna den Zapato Azulari. Hasierako urteetan herriko kuadrillak batzen baziren ere, urteek aurrera egin ahala “sekulako” dimentsioa hartu duen jaia bihurtu da. Aurtengoa, 27. aldia izango da, eta herritarrak “gogotsu” daude goizean goizetik jai giroan murgiltzeko.

Eta biztuxun Radixu, pasako dou, geu bixok Auiminyulinblu dio Esne Beltzak Zapato Azulerako 2012an egin zuten abestiak. Jende askok Auiminyulinblu leloa ahozkatzen ez badaki ere, ondarrutar guztien artean ezaguna da Nakarrak hainbeste erabiltzen zuen esaldia: Auiminyulinblu, lo bailau, bailau esta! Hala, Zapato Azuleko ereserkia bozgorailuetatik entzuten den bitartean, 11:00etarako Radixu Irratiaren zuzenekoa (105.0 FM / Radixu.info) hasiko da, eta egunaren nondik-norakoen berri emango dute irratiko kideek.

Ordu berean irekiko ditu ateak 27. Euskal Herriko kamiseta azokak, Latxanbre enparantzan, eta 15:00ak arte egongo da zabalik. Aurten, 16 postu egongo dira, eta horiez gain, Turismo Bulegoak ere bertan jarriko du bere postua: “Turismo Bulegoaren aurrean txosna muntatzen dugunez, kamiseta azokan postu bat jartzen dugu horretarako. Gainera, bertan jasoko dira Cantabrico jatetxeak oparitutako zozketan parte hartzeko paperak”. Ondarroako hiru postu eta Euskal Herri mailako beste hamahiru egongo dira: Radixu Irratia, Andrak Erramutan, Saturrarango haitza, Artea soinean (Elorrio), Mugimendu Sozialista (Euskal Herria), Tallerra Tatto (Mutriku), Euskaralogikoada (Donostia), Euskal Herrian Euskaraz (Euskal Herria), Maitia (Arrasate), Katxalote (Deba), Iparlur (Atarrabia), Itzal diseinua (Hernani), Xipiroi (Orereta), Hazi (Abadiño), Torontile (Artea), Arnasa (Gipuzkoa). Ordu berean, Artisau azoka egongo da Kantoipe Errebueltan.

12.00etan lehertuko da jaia. Manuelen bolanderagaz batera emango diote hasiera ofiziala egunari, Alde Zaharreko Alai tabernako balkoitik. Horregaz batera irekiko da Alde Zaharreko txosna, eta herriko txistulariak kalerik kale ibiliko dira bazter guztiak alaitzen. “Joan den urtean Koldo Azpiazuk hartu zuen balkoian egoteko Nekane Akarregiren lekukoa, eta aurten ere, bera izango da Alaiko balkoitik hitz egin eta pregoia botako duena”.

Ondoren, 12:30ean, Txalainak taldearen kontzertua egongo da Kalekutzeko eskaileretan, eta ondoren, 13:30ean, euskal preso, iheslari eta deportatuen aldeko elkarretaratzea egongo da, abestiak dioen legez: Faltaten dizenak gogun hartute kalin barrena. “Aurten Txalainak taldea egongo da Kalekutzeko eskaileretan. Ahalegintzen gara giroa sortu ahal duen taldeak ekartzen, bertokoak direnak, eta euskaraz abesten dutenak. Aurten ere hainbat aukeren artean ibili gara, baina azkenean Txalainak taldea aukeratu dugu”. Elkarretaratzearen ondoren, Kresalako banda eta Artelango erraldoiak ere Kalekurutzera ailegatuko dira.

14:00etan, herritarrek hainbeste espero duten momentua helduko da: Dinamartxari ongietorria ematea. Irrintzi eta musika artean sartuko dira Alde Zaharrean 291 lagun; 77 oinez eta 214 bizikletaz. Urtero momentu “hunkigarria” izaten da Dina Bilbao Barruetabeñaren omenez egiten den Dinamartxaren ailegaera, eta parte hartzaileek zein ikusleek ere horrela bizi dute.

[EGITARAUA]

Dinamartxa herrian sartu ondoren, Radixu Irratiaren pregoia entzuteko ordua izango da, eta aurtengo omendua zein den emango dute jakitera. Horrez gain, Euskal Herriko eta Ondarroako kamiseta onenaren eta erakusleiho onenaren sariak banatuko dira, baita zozketako irabazleak ere. Horregaz batera, TXO! Antzerki Kolektiboak antzerkia egingo dio omenduari.

Lan handia. Radixu Irratiko kideek “arduraz” bizi dute jaiak hartu duen dimentsioa: “Ardura handia suposatzen du Zapato Azule antolatzeak, batez ere, ikusi dugulako zelako dimentsioa hartu duen jaiak. Ardura eta kezka ere sortzen digu, eta horren aurrean, buelta asko eman izan diogu antolatzaile moduan zelan jokatu behar dugun”. Horregatik, herritarrei zein kanpotik datozenei “errespetuz” jokatzeko deia egin diete: “Jaia ondo pasatzeko da, baina beti ere alboan daukaguna errespetatzen badugu. Errespetuzko jarrera edukitzen ez dakiena, ez dadila etorri. Horrez gain, garbi jokatzeko eskatu nahi dugu: erabili edalontzi berrerabilgarriak, zamar gutxi sortu, eta kontsumitu txosnetan. Errespetatu lanean dabilen jendea: txosnetan, tabernetan, garbiketa lanetan… guztiak”.

Aurten, gainera, Zapato Azularen parte diren eragile guztiek —antolatzaileak, udalak, txosna jarriko duten eragileak zein ekimenak antolatuko dituztenak—bat egin dute eraso matxista, arrazista, homofobo zein transfoboen aurkako mezua zabaltzeko. Horretarako, argazkia atera dute, herritarrei jai seguruen aldeko mezua helarazteko.

Aurreko urteetan bezala, Ondarroako Udalak eraso matxisten kontrako arreta zerbitzua jarriko du martxan Zapato Azulean. Zerbitzua 18:00etatik 08:00etara bitartean egongo da, presentzialki Etxelilan (Artibai, 3) eta telefonoz, hurrengo zenbakian: 688 77 27 72.

Udalak neurri “bereziak” hartu ditu zapaturako. Hainbat gai barnebiltzen dituzte neurriek, eta adierazi dutenez, aurreko urteetako balorazioen eta udaleko sailen arteko lanketaren ondorio dira; besteak beste, garbitasuna eta hondakinen kudeaketa, segurtasuna, eraso matxisten kontrako protokoloa, komunak, aparkalekuak, garraioa eta azpiegiturak. Beraz, udalak plan bat jarri du martxan herria “ahal bezain arinen lehengoratzeko”. Hala, aurten, udalaren esanetan, “esfortzu berezia” egin dute larrialdi zerbitzuak indartzeko eta hondakinen kudeaketa hobetzeko. Esaterako, jai guneari estaldura emango dion mediku eta anbulantzia zerbitzu propioa kontratatu du udalak: “Zaldupe futbol zelaiko aldagelen eraikin berria erabiliko dute, larrialdiak kudeatzeko. Anbulategia ohiko zerbitzuetarako ahalik eta libreen mantentzea da helburua, gainerako herritarrek dituzten beharrizanetarako”.

Gaur, ekainak 26.
- 22:30. Mendiz mendiko Dinamartxara doazenen irteera autobusez Itsasaurreko geltokitik Tolosarantz.
Bihar, ekainak 17.
- 01:00. Tolosatik mendirik mendi Dinamartxa oinez.
- 07:00. Dinamartxan bizikletan doazenen irteera autobusean Itsasaurretik Tolosarantz.
- 09:00. Tolosatik Dinamartxa bizikletaz, Ondarroarantz.
- 11:00. Radixu Irratiaren kaleko zuzeneko emisioa.
- 11:00. EHko Kamiseta Azoka, Latxanbre plazan.
- 11:00. Artisau Azoka, Kantoipe Errebueltan.
- 12:00. Alaiko balkoitik jaiaren hasiera eta Alde Zaharreko txosnaren irekiera.
- 12:10. Ondarroako Txistulariak kalerik kale.
- 12:30. Txalainak taldea, Kalekutzeko eskaileretan.
- 13:30. Faltaten dizenak gogun hartute elkarretaratzea, Kalekutzeko eskaileretan.
- 13:30. San Pedro iturritik Kresalako banda eta Artelango erraldoiak.
- 14:00. Dinamartxaren ailegaera.
- Ondoren. Radixu Irratiaren pregoia eta omendua.
- 14:45. Sari banaketa Alaiko balkoitik: kamiseta onenak eta erakusleiho onena.
- 15:00. Euskal Herriko Kamiseta Azokaren itxiera.
- 15:00. Txo! Antzerki Kolektiboaren sketch-a omenduari.
- 17:00. Itsasaurren, Altxa Porru erromeria.
- 17:00. Frontoiko gunea zabalik.
- 18:00. Kalekutzeko eskaileretan, DJ Kol.
- 18:00. Kafeatzean, umeen jolasak (Txirrimorraski).
- 18:00. Frontoian, Zerotan.
- 18:30. Itsasaurren, Zumba.
- 19:00. Itsasaurren, Altxa Porru.
- 20:00. Kafeko Atzean, Euskal Erromeria.
- 20:00. Frontoian, DJ Lyma.
- 20:30. Itsasaurren, DJ Mali.
- 21:00. Kafekoatzean, Musutruk erromeria eta DJ Jotatxo.
- 22:30. Frontoian, IranJaise kolektive.
- 22:30. Itsasaurren, Kumbialari.
- 00:00. Itsasaurren, DJ Tintz.
- 00:30. Frontoian, DJ Puntx.
- 02:30. Frontoian, Pan con txitxarron.
- 03:00. Itsasaurren, DJ Txustiyas.
- 04:30. Frontoian, DJ Enabil.

Alazne Solabarrieta zendu da Venezuelako lurrikaretan, Jose Maria Solabarrieta Ondarroako alkate ohiaren biloba

Lea-Artibai eta Mutrikuko Hitza — 2026-06-25 12:35:16

Delcy Rodriguez Venezuelako presidenteak jakitera eman dutenez, gutxienez 188 pertsona hil dira eta 1.000 zauritutik gora daude [ekainak 25eko 23:50] Venezuelan bart — Euskal Herrian gauerdia zenean, Venezuelako 18:00etan — izandako lurrikara bikoitzaren ondorioz. Richter eskalari dagokionez, 7,2 eta 7,5 graduko lurrikarak izan dira, eta ohartarazi dute, aipatutako zifrek ez dutela barnebiltzen La Guaira estatuko biktima kopurua; izan ere, bertan jo dute gogorren lurrikarek. Hildakoen artean Alazne Solabarrieta dago, desagertu eta ordu batzuetara bere senideek jakinarazti dutenez. Antza denez, Solabarrieta zegoen eraikina egoera “oso txarrean” zegoen eta behera etorri da. Bere bikotekidea zaurituta dago, baina etxetik irteteko aukera eduki du.

Solabarrieta Caracasen jaio zen, baina jatorri ondarrutarra dauka. Jose Maria Solabarrietaren biloba da. Azken hori Ondarroako alkatea izan zen Bigarren Errepublikan eta Venezuelan erbesteratua 36ko gerraren ostean. Eusko Jaurlaritzako Uren zuzendari ohia eta Bizkaiko Lurralde Ekintzako eta Ingurumeneko foru diputatu ohi María Esther Solabarrietaren lehengusina da.

San Joan jaiak, termometroa lehertzeko zorian

Lea-Artibai eta Mutrikuko Hitza — 2026-06-24 17:45:26

San Joan jaiek Lea-Artibaiko herri zein auzoetako bazterrak berotu dituzte aurten ere. Aulestin, Ziortza-Bolibarren, Gorozikan eta Amallon jaiekin batera eman diote hasiera udari, gainera, jaiak goi-goitik ospatu dituzten bezala, tenperaturak ere maila berean ibili dira. Izan ere, beroak arreta bereganatu du aurten, azken egunotan erregistratutako tenperatura altuek udako giro bete-betea ekarri dute eskualdera, eta San Joan jaiak ohikoak baino beroagoak izan dira.

Aulestin egun garrantzitsua izan dute gaurkoan [ekainak 24]. 26. Sobra sariketa izan dute gaur, eta tenperatura altuengatik frontoira lekualdatu dute goizeko egitaraua. Hala, 12:15erako aurkeztu dituzte herritarrek sobrak, eta epaimahaiak irabazleak aukeratzeko tarte bat hartu bitartean, herritarren arteko herri kirol desafioa egin dute: “Giro oso ederra sortu du desafioak. Aulestiko lau talde elkarren kontra aritu dira, eta normalean baino jende gehiago etorri da sortu duen ikusminagatik. Horrez gain, Euskal Ardi Moztaileek ere hartu dute parte”. Hala, Unai Gorostola, Olatz Malatsetxebarria eta Iraiz Idoietak osatutako taldeak lortu du garaipena, 11.05eko denboragaz; bigarren postua lortu dute Nora Urizar, Itziar Salegi eta Iñaki Urberuagak [12.07]; Hirugarrena Ziara Kareaga, Onintza Galdos eta Xabi Malatsetxebariak eskuratu dute [12.40]; eta laugarrena Aitor Atxurra, Aimar Irigoien eta Irati Goitiak [12.25]. Hasierako ideia sobra sariketa egin bitartean herri kirol talde baten erakustaldia egitea bazen ere, herriko gazte talde batek euren arteko desafioa egiteko ideia izan zuen: “Herri giro polita sortu da”.

Ondoren, 26. Sobra sariketaren txanda izan da, eta antolatzaileek zehaztu dutenez 60 lagunek parte hartu dute aurten. “Parte hartze handia egon da aurten, eta gainera, jarritako helburuetako bat betetzen ari da: belaunaldi berriek parte hartzea. Oso pozik gaude”. Mertxe Gerenabarrena, Izar Uriarte eta Izaro Aranburu izan dira lehen saria irabazi dutenak, eta Noelia Arakistain, Nieves Unamuno eta Izei Arriagak lortu dute bigarren saria. Horrez gain, Eneko Willis izan da sari berezia jaso duena.

Leiho eta balkoietako III. Lore lehiaketari dagokionez, Leiho eta balkoirik onenaren lehen saria Aitor Ansotegik irabazi zuen; Iñaki Araunguenak bigarrena; eta Rosario Unamuno hirugarrena. Etxaurreetan Mertxe Gerenabarrena izan da lehena; Enkarna Anitua bigarrena; eta Ziortza Jaio hirugarrena. Arratsaldean pilota partidak egongo dira, eta pintxopotea egongo da herriko tabernetan.

Antolatzaileek jaien balorazio “oso ona” egin dute: “Dena ondo atera da eta giro ederra egon da herrian, barikutik hasi eta gaur arte”. Hala, bihar [ekainak 25] emango diote amaiera jaiei eta adin nagusiko herritarrak izango dira protagonista. 12:00etan mezagaz emango diote hasiera eguari, Murlan. Ondoren, Roberto eta Idoia trikitilariek alaituko dute herria, eta 14:30ean bazkaritan batuko dira Ilunzarren.

Ondarroako Gorozika auzoan ere gaur emango diote amaiera jaiei. Mezagaz hasi dute eguna, eta lore sorten bedeinkapenaren ostean, Xuhare eta Araia trikitilariek alaitu dituzte auzoko bazterrak. Domekan [ekainak 21] hasi zituzten San Joan jaiak Nerea Ibarzabal eta Angel Mari Peñagarikanoren bertso saioagaz. Arratsaldean, herri kirolek bete zuten auzoko plazan, aizkolari, harri jasotzaile eta ingude zein trontzako erakustaldia eginez. Umeek ere eduki zuten zertaz gozatu; izan ere, txokolatada egon zen guztientzat, eta baita umeei zuzendutako herri kirolak ere. Arratsaldea alaitzen ibili ziren Mirari eta Izarra trikitilariak.

Amallo. Auzolanean egindako “lan handiari” esker, aurten ere lau eguneko egitaraua atera dute aurrera auzotarrek. Hala, gaur [ekainak 24] San Joan egunagaz batera eman diote amaiera jaiei; goizean meza baino lehen tortilla txapelketa egin dute, eta 15 tortilla aurkeztu dira lehiaketara.

Irabazlea Olazar beheko baserriko Amets Arrizabalaga izan da, eta antolatzaileek tortilla patataren itxura, patataren egoera eta gustua saritu dituzte. Mezaren ostean, “giro ederrean” elkartu dira auzoko trikitilariak. 12:30ean, ostera, eguneko punturik gorena heldu da: Amalloko gazteek Ibekohondoren zaldi gaztearen kontra neurtu dituzte indarrak.

Bertan, auzoko zazpi gazte hiru urteko zaldi baten aurka lehiatu dira. Amalloko gazteek 28 metroko ibilbidea osatu behar izan dute–joan eta etorrian–, 440 kilogramoko harria arrastatuz, eta 20 minutuko denbora tarteagaz. Ondoren, Pipa zaldiaren txanda izan da: denbora tarte beragaz, gazteek egindako buelta kopurua 1,75 aldiz gehiago egin behar izan du, 650 kilogramoko harria arrastatuz. Gazteak hasi dira, eta 29 buelta eman dituzte. Halaber, Pipa zaldiak irabazteko gutxienez 51 buelta egin behar zituen, eta 52 buelta osatuta, lehia irabazi du.

Horrela, giro “ona eta ederra” nagusitu da jaien azken egunean, eta antolakuntzatik adierazi dute “oso pozik” daudela hainbeste auzokide bertaratzeagatik. Eskerrak eman diete gazteei izan duten parte hartzagatik, batez ere, sekulako bero egin duen arren lehiaketan parte hartu dutelako.

Ziortza-Bolibarren. Surik ez piztea erabaki zuten herrietako bat izan zen atzo. Surik barik bazen ere, egitarauak bere horretan jarritu zuen herrian. Sorginen eta pertsonaia mitologikoen etorrera eta antzezpenak beste urte batez mantendu du egun horretan herria batzeko ohitura. Jan eta edana ere izan zuten bertaratu zirenek; Idoia eta Roberto Etxebarria trikitilariek girotuta, urdaia, txistorra, gazta eta irasagarra izan zituzten. Gauari amaiera emateko, suaren inguruan izan ez bazen ere, sorgin dantza ikusteko aukera izan zuten ziortza-bolibartarrek.

Tenperatura altuei aurre egiteko babesleku izan dute eliza gaur. Ohiturak agintzen duen modura, San Joan eguneko mezarako hitzordua izan dute herritarrek, eta bertan bedeinkatu dituzte aurten egindako sobrak. Meza amaitu denerako, herriko umeek prest izan dute sobren erakusketa eutsi duen egurrezko mahaia. Herriko andrak, sobrak eskuan, erakusketa osatzen joan dira elizatik irten ahala, eta haur eta helduen begiradapean, erakusketa lore eta kolorez bete da.

Ondarroa eta Lekittarra "gogotsu eta indarrez" daude ligarako

Lea-Artibai eta Mutrikuko Hitza — 2026-06-24 15:40:23

Euskotren eta Eusko Label ligak uztaileko lehen asteburuan [uztailak 4 eta 5] iritsiko dira Bizkaira, Bilboko eta Zierbenako jardunaldiekin. Hori baino lehen, Buitrago del Lozoyako (Madril) Riosequilloko urtegian egingo dituzte ligen irekierako estropadak. Pueblos con Vida Comunidad de Madrid bandera jokatuko dute Eusko Label Ligan, eta Canal de Isabel II – 175 aniversario bandera, Euskotren Ligaren baitan. Estropada binakako erlojupeko formatuan jokatuko da, 6 luze eta 5 ziaboga gizonezkoetan 12:15ean hasita, eta 4 luze eta 3 ziaboga emakumezkoetan 11:20an hasita.

Euskolabel ligan lehiatuko dira Ondarroa eta Lekittarra. Zortzigarren urtez jarraian uretaratuko dute lekeitiarrek trainerua Eusko Label Ligan. Hamar urtez taldearen gidari izan den Osertz Aldayri erreleboa hartu dio Markel Akarregi Bengoetxeak, eta “indarrez eta gogotsu” ikusten du taldea aurtengo denboraldirako. Joan diren bi denboraldietan egindakoari jarraitu eta sailkapen orokorrean zazpigarren postuari eusteko itxaropentsu agertu da taldea. Entrenamenduetan eta aurredenboraldian “espero genituen emaitza onak” lortu dituztela adierazi dute, hala, “orain arteko sentsazioak baieztatzeko” lehen estropada izango da domekakoa. “Gure urteroko helburua Eusko Label Ligan lehiatzea” izaten da, eta helburu hori lortuta lekeitiarrek beste urte batez izango dute traineru onenen artean lehiatzeko aukera. Aurten zazpi eta hamabigarren postuak oso paretkatuta egongo direla aurreikusten dute, beraz, “hamabigarren postutik ahalik eta urrunen egotea” izango da lekeitiarren helburua.

Hurbil izango du Lekittarrak Ondarroako trainerua. 2017tik etenik barik aritu da Eusko Label Ligan, eta bederatzigarren eta zortzigarren postuetara eraman dute Antiguako Ama azken bi urteetan. Aurtengo helburua “bigarren txandan lehiatzea” dute ondarrutarrek, hala, aurreko denboraldietan egindakoari eutsi eta bosgarren eta zortzigarren postuetan mantentzeko indarrak batu beharko dituzte. Helburu nagusia “kategoria mantentzea eta play off-a saihesteko gure azpitik bi talde uztea” izango dela azaldu du Iñaki Errasti entrenatzaileak. “Sei talde ikusten ditut gure gainetik, eta beste seien artean egongo da bigarren txandan sartzeko borroka”. “Estropada txukuna egiteko gai” ikusten du Errastik taldea, hala ere, gainerako taldeek emango duten mailari ere begiratu beharko diotela argitu du.

Lekeitio eta Ondarroako urak ere lehiaren lekuko izango dira aurtengo denboraldian. Abuztuaren 2an helduko dira Euskotren eta Eusko Label ligak Lekeitiora, eta abuztuaren 8an, Ondarroara.

LABek udaleko negoziazio mahaia utzi du, eta udalak, berriz, elkarrizketarako borondatea erakutsi du

Lea-Artibai eta Mutrikuko Hitza — 2026-06-23 17:12:47

LAB sindikatuak iragarri du Ondarroako Udalagaz osatutako negoziazio mahaitik atera dela, “benetako negoziazio prozesu bat” martxan jarri arte. Kontrara, udalak, harriduraz hartu du erabakia eta ukatu egin du negoziaziorako borondaterik ez dagoenik, azken urteotan hainbat akordio eta hobekuntza adostu direla azpimarratuz.

Sindikatuak jakinarazi duenez, Ondarroako Udalean azken aldian sortutako lan gatazken ondorioz erabaki du negoziazio mahaiari planto egitea. LABen arabera, mahaietan aurkeztutako planteamenduak ez dira kontuan hartu, eta udalaren jarrera “blokeatzailea” izan da. Halaber, salatu du lanpostuen amortizazio planak kalte egingo diela bai langileen lan baldintzei bai herritarrei eskaintzen zaien zerbitzuaren kalitateari.

LABen esanetan, azken negoziazio mahaietan udalak adierazi du EUDELek Udalhitz hitzarmena negoziatzen duen bitartean ez duela barne negoziazioetan aurrera egiteko asmorik, eta horrek edozein proposamen blokeatzen duela uste du sindikatuak. Horrez gain, bi lanposturen amortizazioa “guztiz onartezina” dela adierazi du: “Betidanik defendatu dugu enplegu publikoaren indartzea eta kalitatezko zerbitzu publikoak bermatzeko beharrezkoak diren lanpostuen mantentzea. Horregatik, lanpostuak deuseztatzearen aurka gaude erabat”.

Ondarroako Udalak, ordea, bestelako irakurketa bat egin du. Udal ordezkarien arabera, harriduraz hartu dute LABen erabakia, negoziazio mahaietan ez delako aparteko tentsiorik izan eta sindikatuak ez duelako bertan halako jarrerarik adierazi. Gainera, udalaren esanetan, ez dute argi LABek aipatzen duen lan gatazka zehatz mehatz zein den.

Lanpostuen amortizazioei dagokienez, udalak azaldu du hasiera batean hiru plaza amortizatzea aurreikusten zela, baina sindikatuen eskaerak aztertu ondoren horietako bat mantentzeko bidea aurkitu dela. Ondorioz, azkenean bi plaza baino ez lirateke amortizatuko. Udalaren arabera, gainera, amortizatuko diren postuak hutsik daude: bata 2023tik eta bestea 2025eko irailetik. Bestalde, udalak ez du partekatzen amortizazioek langileen lan baldintzak okertuko dituztenik. “Era berean, gogorarazi nahi dugu brigadako langileen baldintzak hobetzeko neurriak hartu direla, besteak beste soldaten eta funtzioen parekatze bidean aurrerapausoak emanez. Urteetako eskaera izan da, eta LAB egon zen azken mahai negoziatzailean onartu zen. Horregatik udalaren harridura jarrera blokeatzailea diotenean”.

Negoziazioari dagokionez, udalak ukatu egin du elkarrizketarako prestutasunik ez duenik. Izan ere, azken negoziazio mahaia egiteko deialdia egina zegoela eta LABeko ordezkariak ez zirela bertaratu adierazi du. “Aste batzuk lehenago telelana inplementatzeko arautegi zirriborroa eskuartean zeukan, eta negoziazio mahai horretan lantzea zen asmoa”. Horrez gain, sindikatuak egindako eskera batzuk Udalhitz hitzarmenaren negoziazioaren emaitzen zain daudela azaldu du. “Hala ere, horrek ez du inola ere negoziaketa mahaia gelditu, negoziazio mahaietan onartutakoak adibide”.

Azkenik, udalak nabarmendu du azken urteotan hainbat hobekuntza adostu direla langileen lan baldintzetan. Besteak beste, 58 urtetik gorako udaltzainek txandarik ez egitea gauez edota asteburuetan lan egiten duten brigadako langileek bi atseden egunak nahi duten egunetan hartu ahal izatea, astelehen eta martitzena izan beharrean. Horregatik, negoziazio borondatea falta leporatzea ez dela bidezkoa defendatu du.

Andra Mari jaietako kartel lehiaketa martxan jarri du Ondarroako Udalak

Lea-Artibai eta Mutrikuko Hitza — 2026-06-23 15:27:35

Joan den urtean Ondarroako jaietako kartela aukeratzeko formatuak izandako “arrakasta” ikusita, aurten ere kartelaren aukeraketa modu berean egitea pentsatu du udalak. Hala, 2026ko Andra Mari jaietako kartela herritarrek aukeratuko dute bigarrenez.

Udaletik azaldu dutenez, lehiaketak bi fase izango ditu: kartelak egitekoa eta herritarren bozketa. Lehenengo fasea zabalik dago ekainaren 30eko 13:00etara arte, eta udal erregistro orokorrean edo Ondarroako Egoitza Elektronikoan aurkeztu beharko da, postaz aurkezteko hurrengo helbidera: Ondarroako Udala-Jaietako kartel-lehiaketa 2026- 48700 Ondarroa. “Aldi honetan kartelak aurkezteko aukera izango dute nahi duten guztiek, beti ere, jarritako baldintzak betetzen badituzte”. Behin kartelak aurkeztuta, eta baldintzak betetzen dituztela bermatuta, bozketa faseari emango diote hasiera, “oraindik data zehaztu gabe dago. Iazko egiturari jarraituz, udal erakusketa aretoan jarriko dira ikusgarri lehiaketara aurkeztutako kartel guztiak eta herritar bakoitzak bozka bat eman beharko du, presentzialki.

Gaia librea izango da, eta egile bakoitzak lan bakarra aurkeztu ahalko du, edozein teknika erabilita. A-3 edo proportzionala izan beharko da neurria, eta euskarria gogorra edo papera izan daiteke. Kartelaren tituluak ondorengo informazioa jaso beharko du: 2026ko Ondarroako Jaiak eta letra txikiagoan, Andra Maixak, abuztuaren 11tik 17ra. “Ezinbestekoa izango da aipatutako datuak zehatz mehatz jasotzea”.

Kartelek ez dute jasoko egilearen izenik, eta kartazal zarratuan sartuta aurkeztu beharko dira. Kartazalean soilik leloa edo goitizena jarri beharko da. Aipatutako kartazalaren barruan beste kartazal bat sartuko du parte hartzaileak, eta kanpoan leloa edo goitizena jarriko du, eta barruan, egilearen izen abizenak, telefonoa, helbidea, posta elektronikoa eta nortasun agiriaren kopia. Udaletik jakinarazi dute irabazleak 600 euro irabaziko dituela.

Bozketa prozesua. Aurkeztutako lanak udal erakusketa aretoan jarriko dira ikusgai uztailaren 2tik 12ra bitartean, aurkeztutako formatu berdinean. Bertan, kutxa bat jarriko da botoa emateko, eta pertsona bakoitzak gustukoen duen kartela bozkatu ahal izango du; bakarrik bozka bakarra emanez. Pertsona berdinak bozka bat baino gehiago emanez gero, emandako bozka guztiak baliogabetuko dira. Gainera, bozka presentzialki egin beharko da. Irabazlea, bozka gehien jasotzen duen kartela izango da, eta bi kartelek puntu berdinak jaso izanez gero, Ondarroako Kultura Saila izango da irabazlea nor den aukeratuko duena. Era berean, aurkeztutako kartelek ez badaukate behar besteko kalitaterik, kultura sailak saririk ez banatzeko erabakia hartu dezake.

Behin bozketa prozesua amaitzean, udalak saritutako kartelaren jabetza eskuratuko du, eta argitaratzeko eta zabaltzeko eskubidea izango du. “Horrez gain, udalak eskumena izango du, beharrezkoa ikusiz gero, QR edo antzeko elementuak kartelean txertatzeko, beti ere kartelaren konposizioa aldatu gabe. Kartelean erabilitako irudiak egilearen originalak, egileak baimenduak edo erabilpen libreko irudiak izan beharko dira”.

Eguraldi ona lagun, "giro ederrean" ospatu dituzte Galiziar Letren Eguna eta Karmen jaiak

Lea-Artibai eta Mutrikuko Hitza — 2026-06-22 16:00:15

Joan den asteburuan, hiru eguneko ospakizuna eduki dute Galiziar Etxeko kideek, eta Ondarroako Itsasaurre plaza kulturaren epizentro bihurtu dute. “Eguraldi onagaz igaro ditugu hiru egunak, eta oso ondo joan dira. Herritarrek oso erantzun ona ematen dute, jende asko etorri da jai gunera, eta musikaz gozatzera edota gure produktu gastronomikoak dastatzera”.

Barikuan eman zioten hasiera jai giroari: zapatuan Letren Eguna ospatu zuten, eta domekan, Karmengo jaiak. “Euskal eta galiziar kultak uztartu ditugu, eta gure tradizio zein ohiturak erakutsi. Oso asteburu polita izan da. Hunkituta gaude”. Orokorrean, guztia “oso ondo” atera dela azpimarratu dute antolatzaileek: “Momentuko gauza txiki batzuk kenduta, guztia oso ondo atera da”.

Zapatuan [ekainak 20] udal ordezkariei eta gonbidatuei ongietorria egin zieten, eta ondoren Markina-Xemeingo Zerutxu dantza taldeak emanaldia eskaini zuen. “Urtza Alkorta alkatea, udaleko ordezkari gehiago eta galiziar etxeetako ordezkariak ere etorri ziren. Zerutxu dantza taldeak sekulako emanaldia eskaini zuen, eta giro ederra egon zen. Horrez gain, gure elkarteko Os Novos Mariñeiros taldea herrian zehar ibili zen gure musika zabaltzen, eta Artibai egoitzara ere egin zuten bisita”.

Ligako lehen arraunkadak eman dituzte etxeko taldeek

Lea-Artibai eta Mutrikuko Hitza — 2026-06-22 13:44:14

Ondarroako eta Isuntzako trainerek ETE Ligako lehen estropadak lehiatu zituzten joan den zapatuan eta domekan [ekainak 20 eta 21], hurrenez hurren, Astilleroko eta Pasaiako uretan. KAE 2 Ligako lehen estropada ere jokatu zuten Astilleron, eta bertan eman dituzte trainerek lehen pausuak sailkapen orokorrean.

Hondarribia, Kaiku eta Zarautz oso parekatuta ibili ziren Astilleron lehiatu zuten lehen estropadan. Eguneko ziaboga bakarreko biraketa 00.06.00ko denboran egin zuten hirurek, hala, bigarren eta azken luzea izan zen irabazlea erabaki zuena: zarauztarrek egin zuten marka onena, egin beharrekoak 11.18,34ko denboran burutuz. Hondarribia bigarren, Kaiku hirugarren eta Deusto laugarren geratu ziren. 11.35,22ko denboragaz, bosgarren postua lortu zuen Ondarroak, lau puntuak eurenganatuz . Zazpi segundu gehiago behar izan zituen Isuntzak, eta eurena izan zen hiru puntu eman zizkien seigarren postua. Hala, Hernaniko eta Portugaleteko trainerek bete zituzten azken bi postuak.

Pasaian jokatu zuten ETE Ligako bigarren jardunaldia, eta bi txandatan aritu ziren emakumezkoen trainerak 1,5 milietan. Aurreko eguneko estropadako postuak kontuan hartuta, Deustok, Kaikuk, Hondarribiak eta Zarautzek osatu zuten ohorezko txanda. Zapatuko ildotik jarraiki, Kaikuk, Hondarribiak eta Zarautzek guztiz parekatuta egin zituzten lehen bi ziabogetako biraketak, hala, azken luzean indarrak batu eta Hondarribiaizan zen azkarrena; 11.49,88ko denbora eginda, zortzi puntuak eurenganatu zituzten. Lehenengo txandan, denborarik onena egin zuten ondarrutarrek, eta 12.06,24ko denboragaz, lau puntu lortu zituzten. Postu bat atzera egin eta zazpigarren postua lortu zuen Isuntzak domekan; 12.34,60ko denboragaz, bi puntu gehitu dituzte sailkapen orokorrera.

Isuntza estropadan.Bermeo Arraun Argazkiak

KAE 2 Ligako lehen estropada ere hartu zuen Astillerok zapatuan. Mutrikuko trainera ligara bueltatu da, eta zapatuko lehian izan zen. Mutrikuarrek 22.38,96ko denboran egin zituzten lau luze eta hiru ziabogak; hala, seigarren postua eurenganatu eta sailkapenerako hiru puntu lortu zituzten. Castrok lortu zuen denborarik onena Astilleron 21.07,98ko denboran, eta Camargoko trainera izan zuen atzetik. Portugalete geratu zen hirugarren, Deusto laugarren eta Busturialdea bosgarren. Laredo eta Lutxana izan ziren azkenak hiru miliak osatzeko lehian.

Mutrikuko trainera estropadan.Bermeo Arraun Argazkiak

Sailkapen orokorra. Emaitzak horrela, ETE Ligako sailkapen nagusian 8 puntugaz amaitu du Ondarroak asteburua, eta 5 puntugaz, Isuntzak. Datorren zapatuan [ekainak 27], 11:00etatik aurrera ariko dira aurrez aurre emakumeen trainerak Elantxobeko Andran I. Ikurrina jokatzeko.

KAE 2 ligako lehen estropadan lortutako hiru puntuek sailkapen orokorrean seigarren postua eman die mutrikuarrei. Elantxobeko 38. traineru estropada jokatuko dute datorren zapatuan [ekainak 27], eta Mutrikuko Unebide 8. bandera, domekan [ekainak 28], biak 11:00etatik aurrera.

Etxeko taldeek jardunaldiak hasi baino lehen aurreikusitako helburuak bete ditzutela esan daiteke, ohorezko txandan ez bazen ere, lehen txandako postu onenetan egotea espero baitzuten.

Dinamartxarako izen ematea, ekainaren 23an eta 24an

Lea-Artibai eta Mutrikuko Hitza — 2026-06-16 14:44:56

Zapato Azulean hain esanguratsua den Dinamartxan izena emateko datak zehaztu ditu Radixu Irratiak. Hala, Tolosatik Ondarroara oinez zein bizikletaz ibilbidea egin nahi duenak ekainaren 23an eta 24an izango du aukera izena emateko, Musika Plazan, 19:00etatik 21:00etara. Hortaz, ezin izango da telefonoz egin, izena ematerakoan baimena sinatu behar baita.

Inskripzioa 20 euro ordaindu beharko dira, eta kamiseta beste 20. Bertaratzen direnak aukera izango dute beste lagun baten izena emateko, “betiere beraien sinadurapean”. Hala ere, mendi martxaren kasuan, kopurua mugatua denez, pertsona bakoitzak lagun bakarraren izena eman dezake.

Mendi martxa txirrindu bidez egingo duenak egunean bertan [ekainak 27] egingo du Tolosarako bidea, autobusean. Bizikletak bezperan utzi beharko dira kamioian kargatuta. Oinezkoak, ostera, bezperan irtengo dira, 22:30etan. Autobusez joango dira Tolosara, eta garraioa betetakoan itxiko dute izen ematea.

Boluntarioak, beharrezkoak. Antolatzaileek zehaztu dutenez, mendi martxarako boluntarioak behar dira: “Boluntariorik egon ezean, martxa bertan behera gelditzeko arriskua dago”. Bizikleta martxarako laguntzaileak badaudela azpimarratu dute. Horrez gain, Dinamartxa kirol proba “gogorra” dela nabarmendu dute, beraz, tentuz jokatzeko deia egin diete parte hartzaileei. Hala ere, argi utzi nahi izan dute ez dela txapelketa bat, lagun artean lasai joateko martxa baizik.

Ondarroako AEK-k ibilaldia antolatu du Saturrarango emakumeen kartzela izan zen tokira

Lea-Artibai eta Mutrikuko Hitza — 2026-06-16 12:54:47

Ondarroako AEK-k Saturrarango emakumeen kartzela izan zena bisitatzeko ibiladia antolatu du eguenerako [ekainak 18]. 11:00etan batuko dira Moby Dick tabernaren aurrean, eta denek batera egingo dute Arrigorri hondartzatik Saturraranera arteko ibilbidea. Bertan, Mikel Etxaburu idazlearen Mattalingo alaba liburuko poemen eta kantuen bitartez bertan gertatutakoa oroituko dute.

Urrezko eta zilarrezko domina banaz egin dute buelta Solabarrietak eta Badiolak Espainiako Tiro Txapelketatik

Lea-Artibai eta Mutrikuko Hitza — 2026-06-15 13:57:37

Espainiako Tiro Txapelketan egon dira asteburuan Maite Badiola eta Ager Solabarrieta, Murtzian. Zutikako zein etzandako probetan parte hartu zuten Badiolak eta Solabarritak, eta maila handia erakutsi zuten. Izan ere, zapatuan zutikako probako sailkapenean bigarren postua lortu zuten, eta finalean, lehenengoa. Beraz, urrea eskuratu zuten Solabarrieta eta Badiolak. Domekan [ekainak 15] etzandako probaren txanda izan zen. Bigarren proba honetan finalerako lehenengo postuan sailkatu ziren, eta finalean zilarra lortu zuten. “Egindako lanagaz oso pozik egin dugu buelta etxera”, azaldu du Ager Solabarrietak.

Ondarroa Arraun Elkarteak traineruak aurkeztuko ditu zapatuan

Lea-Artibai eta Mutrikuko Hitza — 2026-06-11 15:03:59

Datorren asteburuan [ekainak 21 eta 22] hasiko da ETE Liga. Ondarroa Arraun Taldeko emakumeen traineruaren zortzigarren denboraldia izango da ETE Ligan.

Horren harira, zapatuan [ekainak 12], 12:00etan, Ondarroako Arraun taldeak traineruen aurkezpen ekitaldia egingo du, Erretegi eta Latxanbre plaza inguruan. Ekitaldian arraunlariak ezagutzeko aukera edukiko dute herritarrek.

'Gato Negro Gato Blanco' filmaren emanaldia egingo dute Ondarroan

Lea-Artibai eta Mutrikuko Hitza — 2026-06-11 13:44:16

Gato Negro Gato Blanco filmaren emanaldia egingo dute bihar [ekainak 12] Ondarroako Kofradia Zaharrean. 18:30ean hasiko da Emir Kursturica zinemagile bosniar-serbiarraren filma, Angel Aretxaga Bedialaunetaren oroigarri izango dena.

"Itsasoa zaintzea bizitza zaintzea delako"

Lea-Artibai eta Mutrikuko Hitza — 2026-06-10 14:45:10

Zero Zabor Uretan ekimenak itsas hondakinen arazoari buruz gogoeta egiteko eta irtenbideak bilatzeko prozesu parte-hartzailea sortu du. Udalak, ikastetxeak, kultur elkarteak eta etorkizun osasuntsuago baten alde lan egiten duten hainbat pertsonak batu ditu ekimenak, MATER Ontzi Museo Ekoaktiboaren gainean egingo duten itsas zeharkaldiagaz bat egin dutenak.

Zeharkaldia uztailean izango bada ere, Zero Zabor Uretan ekimena herriz herri ari da. Ondarroan izan ziren atzo Zabor eta Bio eraldoiak, herriko haurrekin itsasoari eta bertan amaitzen duen zaborrari buruzko hausnarketa egiteko. Sentsibilizazio eta ahalduntze hitzaldiak egin dituzte egunero sortzen diren hondakinei eta itsasoaren kutsadurari buruz. Hala, Zaldupe eskolako eta Zubi Zahar ikastolako Lehen Hezkuntzako laugarren mailako ikasleek gai honi buruzko mezuak idatzi eta erakusketa bat sortu dute. Ane Goenaga eta Yeissa Arruabarrena MATER ontziko tripulazioko kideek eman zien itsasoaren egoeraren berri, ingurumenak behar duen etorkizuna eraikitzeko.

Erakusketa Ondarroako erregistro bulegoan ikusgai egongo da domekara arte [ekainak 14]. Ondoren, itsasoa zaintzearen aldeko kartel eta mezuak Ondarroako merkatarien erakusleihoetan jarriko dituzte, herritarrak erosketa ohitura jasangarrietara bideratzeko. MATER ontzia Ondarroako portura helduko da uztailaren 10ean, eta uztailaren 12ra arte egongo da portuan, doako jarduetaz betetako egitarauagaz.