Lea-Artibai eta Mutrikuko Hitza

27. Zapato Azulak urdinez tindatu du Ondarroa

Lea-Artibai eta Mutrikuko Hitza — 2026-06-27 16:22:15

Azken egunetako bero sargoririk barik esnatu da gaur [ekainak 27] Euskal Herria, eta gustura hartu dute hori Ondarroara joan direnek. Kamiseta urdinak armairutik atera, eta Alde Zaharra goitik-behera eta ezker-eskubi bete dituzte bertaratu direnek. Herritarrak, inguruko herrietakoak nahiz Euskal Herriko hamaika txokotatik bertaratutakoak elkartu ditu gaur Radixu Irratiak antolatzen duen 27. Zapato Azulak Ondarroan. Hala, aurtengo kartelean keinu egin dioten Felix Beristainen koadro baten antzera, urdinez tindatu dira herriko txoko guztiak.

11:00etarako prest zeuden Radixu Irratiako kideak zuzeneko emisioagaz batera jaiari ekiteko, eta egunaren nondik norakoak azaldu ostean, Koldo Azpiazuk hartu du mikroa. Hain zuzen ere, iaz hartu zuen Azpiazuk Nekane Akarregiren erreleboa, eta aurtengoan ere berea izan da jaiari hasiera emateko ardura. Hala, urtero bezala, Alai Tabernako balkoiak bereganatu ditu begirada guztiak, eta bertan zeudenek adi jarraitu dituzte Azpiazuk esandakoak. Nola ez, Manuel Eluren bolanderek ere ez dute hutsik egin, eta 12:00etan egin du eztanda jaiak, bolandera eta bolandera artean.

Bolandera ugari bota ostean jaiak ez du etenik izan, eta urteroko osagaiekin osatu dute goiza. Txistulariak, Kresalako bandaren eta Artelango erraldoien kalejira nahiz falta direnak gogoan hartzeko tartea hartu dute herritarrek, eta Txalainak taldearen kontzertuak biribildu du goizeko jarduna. Abanikoak dantzan eta gorputzak ere bai, Hertzainak taldearen abesti ezagunenak abesteko tartea hartu dute Kalekutz inguruan batu direnek.

Zapato Azule berezia bada, Dinamartxaren ailegaera are bereziagoa da herritar askorentzat. Dina Bilbao Barruetabeñaren omenez Tolosa eta Ondarroa elkartzen dituzte martxalariek oinez nahiz bizikletan, eta irrintzi, txalo, oihu eta musika artean egiten diete harrera ondarrutarrek. Oinez egin duten 77 martxalarientzat bart 01:00etan hasi ziren Zapato Azuleko ekintzak, eta gaur 09:00etan, ostera, bizikletaz etorri diren 223 partaideentzat. Iazko parte hartze kopurua gaindituta (iaz 259 partaide eduki zituen), poztasunez nahiz emozioz betetako malko eta irribarreen artean sartu dira herrira 300 martxalariak.

Martxalariak, Alde Zaharrera heltzen.

Dinamartxako kide denak heldu ostean, aurtengo pregoia irakurri dute Radixuko kideek balkoitik. Besteren artean, Palestina, Saharan, Iran Libano eta Kubagaz gogoratu dira, eta zelan ez, baita Venezuelako herriagaz ere. Jarraian, denborarik galdu barik, aurtengo omendua izendatu dute. “Omendu guztiak dira bereziak, baina aurtengoa, Zapato Azule antolatzen dugun guztiontzat, bereziena da. Zorionak Nekane Akarregi Amutxastegi, zeu zara aurtengo omendua!”. Hala, Akarregi ezustean harrapatu du omenaldiak, baina irribarrez jaso du Radixukoen aipamena.

Ostean, 11:00etan zabaldu duten Euskal Herriko Kamiseta Azoka eta Artisau Azoka itxi, eta aurtengo kamisetarik eta erakusleihorik onenak izendatu dituzte. Kamiseta Azokan Ondarroako hiru postu eta Euskal Herriko beste hamahiru egon dira, eta Torontilek (Artea) irabazi du Euskal Herriko kamisetarik onenaren saria. Ondarroako kamisetarik onenaren saria, aldiz, Saturrarango Haitzak irabazi du, eta erakusleiho onenarena, Lorak Estherrek.

[ARGAZKI GALERIA]

Txo! Antzerki Kolektiboak omenduari egindako sketchagaz amaitu dute eguerdiko jarduna, baina jai luzea geratzen da oraindik Ondarroan. Arratsaldean mota eta gustu guztietako musika entzuteko aukera egongo da herriko txoko guztietan, eta jaiak ez du etenik izango goizeko ordu txikiak arte.

"Begirunez egindako esperientzia sentikor bat" dauka gordeta Arretxinagako ermitak

Lea-Artibai eta Mutrikuko Hitza — 2026-06-26 15:37:21

Ereinotz bat Arretxinagako ermitari. Prozesu luze baten ostean, Markina-Xemeingo balio handiko gunearen zaharberritze lanak amaitu dituzte, hala, San Migel ermita eraberrituta ikusteko hainbat herritar batu ziren atzo arratsaldean. Herritarrez gain, Zerutxu Dantza Taldeak eman zion ongietorria gune berrituari.

Begibistakoak dira ermitaren kanpoaldean egin dituzten lanak. Ermitaren kanpoko hormak kareorez berritu dituzte, kolore eta ehundura bereizgarriak emanez. Eraikina bakarrik ez, alboan dagoen probalekua ere berritu dute eta ikusleentzako armailak jarri dituzte. Lanak amaituta daudela adierazteko, Alde Zaharrean egin zuten era berean lotu zioten ereinotza ermitari.

Kanpoaldekoaldekoak ikusita, barrualdean jarri zuten begirada. Honetarako, ermitara sartu baino lehen, Jon Astorkiza eta Joseba Beristain artistek hartu zuten hitza, erakinaren barnealdean egindako arte proiektu berritzaileari buruzko nondik norakoak azaltzeko. Astorkiza izan da proiektuaren grafiko zuzendaria, eta Arretxinagan egon zen lehen aldian sentitu zuen “konexio handia” aitortu zuen bere berbaldian. Horregatik, toki honetarako “begirunez egindako esperientzia sentikor bat” sortu du. Azalpenekin jarraitzeko, Beristainek hartu zuen hitza. “Tokiko natura elementuen soinuekin eta sintetizadoreekin jolastuz”, sortu du esperientzia bisualari balio gehigarri bat emango dion soinu paisaia. Sei bozgoragailuk osatutako instalazio bat sortu du, eta hala, “txikia den espazio bat handitu egiten du”.

Instalazioaz gain, ikus-entzunezko pieza bat eskaintzen digu San Migel ermitak. Bertaratzen direnek QR bat aurkitu eta horren bitartez helduko dira piezara. Eneritz Artetxe aktore gernika-lumotarrak gidatuko du ikuslea lau hizkuntzatan (euskeraz, gazteleraz, frantsesez eta ingelesez) entzun daitekeen piezan. Ermitari eta hau inguratzen duen artearen historiari buruz ari da Artetxe ikus-entzunezko horretan, “bisitaria leku honen magiarkein, unibertsoarekin, naturarekin eta bizitzarekin lotzeko”.

Aurkezpena amaituta, ermitako ateak zabaldu zitzaizkien herritarrei, eta orduan izan zuten instalazioa ezagutu eta tokiarekin konektatzeko aukera. Bertaratzen direnek ermita zabalik dagoen artean izango dute esperientzia bizitzeko aukera.

Auzo eta herriak alaitzera datoz San Pedro jaiak

Lea-Artibai eta Mutrikuko Hitza — 2026-06-25 16:27:24

San Joan jaiak igaro ondoren, San Pedroen txanda izango da datorren asteburuan, eta Berriatuan, Mutrikun, Artan (Ziortza-Bolibar) eta Barinagan (Markina-Xemein) ospatuko dituzte.

Berriatuko San Pedroak ekainaren 23an hasi baziren ere, gaurtik [eguena] martitzenera arte ere edukiko dute zer ospatu herritarrek; batez ere, kirola eta kultura uztartuko dituzte. Izan ere, gaur [eguena] Euskal Herri mailako gazteen bertso sariketa egongo da bideogelan: Berritxu saria. Bertan parte hartuko dute Kattin Madariaga Apaolaza, Adei Urbitarte Aiestaran, Kattalin Arabolaza Palono, Maia Ortiz De Zarate Idiakez, Iradi Barrenetxea Akesolo, Naroa Iturrioz Lauzirika, Jon Abasolo Sarralde eta Amaiur Betanzos Caminosek. Bihar [barikua] Euskal Herriko mutilen banakako zesra finalak jokatuko dira.

Zapatuan ere kirolak protagonismo berezia izango du. 09:30ean Triatloi herrikoia hasiko da herriko plazatik, eta eguerdian, entsalada eta tortilla lehiaketa egingo dute. Bihar izango da izena emateko azkenengo eguna. Ondoren, Bola joko txapelketagaz jarraituko dute, eta azkenik, Kaletrik musika emanaldia egongo da herriko plazan. Domekan [ekainak 28] Zerbait sartu zait begian antzezlana egongo da bideogelan.

San Pedro egunean [ ekainak 29] eta San Pedro txiki [ekainak 30] egunean ere egun guztiko egitaraua izango dute. Lehenengoan, goizean, Open Bizkaia esku pilota partidak egongo dira, eta arratsaldean, Mus eta Briska txapelketak. Martitzenean umeak izango dira protagonista. Umeen parkea egongo da goiz zein arratsaldez, eta gero, bazkaltzeko batuk dira ume guztiak. Apar festagaz eta txokolateagaz emango diote amaiera egunari.

Mutrikun, ohi legez, omenaldi “xume bezain politarekin” ospatuko dute San Pedro eguna. Itsasoan desagertutako arrantzaleak omenduko dituzte, 12:00etan, Kofradia Zaharrean. “Udalak hartuko du hitza lehenengo, eta ondoren, abadearen txanda izango da. Dantzariek agurra dantzatuko dute, eta korua eta eskaintza egingo dira. Ondoren, bertsolariek bertsoak botako dituzte, eta udalaren agurra egin ondoren, jan-edana egongo da”. Horrez gain, Xabier Basterretxea Esnaola Txordori omenaldia egingo zaio.

Auzoetan ere, San Pedoen gosez daude. Barinaga auzoan bihar [ekainak 26] emango diote hasiera, eta gaztetxoen pilota partiden ondoren, hasiera ofiziala emango diote txupinagoagaz, 20:00etan. Ondoren, txikiteoa egingo dute auzoan, eta iluntzean, su artifizialak egongo dira. Zapatuan [ekainak 27] arratsaldean hasiko da jai giroa: zaldi probak, parrillada eta bolo txapelketa egongo dira. Domekan umeak izango dira protagonista Briska txapelketa eta jolasen artean, eta astelehenean, nagusiagoen txanda izango da. Mezaren ostean, jubilatuen bazkaria egongo da tabernan.

Ziortza-Bolibarko Arta auzoan ere asteburuan ospatuko dituzte San Pedro jaiak. Zapatuan, 17:00etan, XIII. Briska txapelketa egongo da. Antolatzaileek azaldu dutenez, momentuan bertan eman beharko da izena: “Gutxi gorabehera, 22 bikote inguruk ematen dute izena. Auzokoak eta herritarrak etortzen dira, baina baita inguruko jendea ere”.

Domekan [ekainak 28] egun guztiko jaia izango dute. “Eguerdi aldera batzen gara jende gehien, eta Zerutxu dantza taldeko dantzariek ere jendea erakartzen dute. Horrez gain, umeekin ere etortzen da jendea, eta bazkaritara bakoitza norbere etxera joaten da, antzinako erara”. Hala ere, bazkaldu aurretik Onintza Enbeita eta Miren Amuriza ariko dira bertsotan.

Bazkalostean, umeen jolasak egongo dira, eta Imanol Intxausti eta Iñaki Larrañaga trikitilariek alaituko dute auzoa: “Trikitilariak egun guztian egongo dira, eta umeen jolasak ere girotuko dituzte. Umeen jolasetan betikoak egiten ditugu: aulki jolasa, puxikak puskatu… Jolas bereziena patata dantza izaten da: patata bat begian jarri eta dantza egin patata erori gabe”.

Hamabost lagun inguru dabiltza antolakuntzan, eta “dena denen artean” egiten dutela zehaztu dute: “Bilerak egiten ditugu eta bakoitzak bere ardurak hartzen ditu. Gu momentuz jaiak mantentzen saiatzen gara, eta nahiko indartsu daudela esango nuke. Gogotsu gaude aurtengorako ere”.

EGITARAUA

BERRIATUA

Bihar, barikua
- 19:00. Euskal Herriko mutilen banakako zesta txapelketako finalak.
Etzi, zapatua
- 09:30. Triatloi herrikoia, herriko plazan.
- 14:30. Entsalada eta tortilla lehaiketa, herriko plazan.
- 17:00. Bola joko txapelketa.
- 18:00. Kaletrik musika emanaldia, herriko plazan.
Ekainak 28, domeka
- 19:00. Zerbait sartu zait begian, antzezlana, bideogelan.
Ekainak 29, San Pedro eguna
- 12:00. Meza San Pedro elizan.
- 12:30. Open BIzkaia esku pilota partidak emakumezko eta gizonezkoak. Kanpoko frontoian (euriagaz, barruko frontoian).
- 17:00. Mus eta Briska txapelketak.
Ekainak 30, San Pedrotxiki
- 11:00-13:00/15:00-17:00. Umeen parkea, herriko plazan.
- 13:30. Umeen bazkaria herriko plazan.
- 17:00. Apar festa herriko plazan.
- Ondoren. Txokolatea herriko plazan.
Uztailak 5 eta 12
- Zesta: Jai Alai League B, Mendibarren frontoian.

MUTRIKU

Ekainak 29, San Pedro eguna:
- 12:00. Itsasoan desagertutako arrantzaleei omenaldia, Kofradia Zaharrean.

BARINAGA AUZOA (MARKINA-XEMEIN)

Bihar, barikua
- 17:00. Gaztetxoen arteko pilota partidak.
- 20:00. Txupinazoa eta txikiteoa.
- Iluntzean. Su artifizialak.
Etzi, zapatua
- 18:00. Zaldi probak.
- Ostean. Parrillada.
- 21:00. Bolo txapelketa.
Ekainak 28, domeka
- 16:00. Umeen briska txapelketa.
- 17:00. Umeen jolasak.
Astelehena, ekainak 29
- 12:15. Meza.
- Ostean. Mezaostekoa.
- 14:00. Jubilatuen bazkaria tabernan.

ARTA AUZOA (ZIORTZA-BOLIBAR)

Etzi, zapatua
- 17:00. Artako XIII. Briska txapelketa.
Ekainak 28, domeka
- 11:00. Meza santua.
- 12:00. Zerutxu dantza taldea.
- Ondoren. Bertsolariak: Onintza Enbeita eta Miren Amuriza.
- 18:00. Umeen jolasak. Imanol Intxausti eta Iñaki Larrañaga.
- Trikitilariak egun guztian.

San Joan jaiak, termometroa lehertzeko zorian

Lea-Artibai eta Mutrikuko Hitza — 2026-06-24 17:45:26

San Joan jaiek Lea-Artibaiko herri zein auzoetako bazterrak berotu dituzte aurten ere. Aulestin, Ziortza-Bolibarren, Gorozikan eta Amallon jaiekin batera eman diote hasiera udari, gainera, jaiak goi-goitik ospatu dituzten bezala, tenperaturak ere maila berean ibili dira. Izan ere, beroak arreta bereganatu du aurten, azken egunotan erregistratutako tenperatura altuek udako giro bete-betea ekarri dute eskualdera, eta San Joan jaiak ohikoak baino beroagoak izan dira.

Aulestin egun garrantzitsua izan dute gaurkoan [ekainak 24]. 26. Sobra sariketa izan dute gaur, eta tenperatura altuengatik frontoira lekualdatu dute goizeko egitaraua. Hala, 12:15erako aurkeztu dituzte herritarrek sobrak, eta epaimahaiak irabazleak aukeratzeko tarte bat hartu bitartean, herritarren arteko herri kirol desafioa egin dute: “Giro oso ederra sortu du desafioak. Aulestiko lau talde elkarren kontra aritu dira, eta normalean baino jende gehiago etorri da sortu duen ikusminagatik. Horrez gain, Euskal Ardi Moztaileek ere hartu dute parte”. Hala, Unai Gorostola, Olatz Malatsetxebarria eta Iraiz Idoietak osatutako taldeak lortu du garaipena, 11.05eko denboragaz; bigarren postua lortu dute Nora Urizar, Itziar Salegi eta Iñaki Urberuagak [12.07]; Hirugarrena Ziara Kareaga, Onintza Galdos eta Xabi Malatsetxebariak eskuratu dute [12.40]; eta laugarrena Aitor Atxurra, Aimar Irigoien eta Irati Goitiak [12.25]. Hasierako ideia sobra sariketa egin bitartean herri kirol talde baten erakustaldia egitea bazen ere, herriko gazte talde batek euren arteko desafioa egiteko ideia izan zuen: “Herri giro polita sortu da”.

Ondoren, 26. Sobra sariketaren txanda izan da, eta antolatzaileek zehaztu dutenez 60 lagunek parte hartu dute aurten. “Parte hartze handia egon da aurten, eta gainera, jarritako helburuetako bat betetzen ari da: belaunaldi berriek parte hartzea. Oso pozik gaude”. Mertxe Gerenabarrena, Izar Uriarte eta Izaro Aranburu izan dira lehen saria irabazi dutenak, eta Noelia Arakistain, Nieves Unamuno eta Izei Arriagak lortu dute bigarren saria. Horrez gain, Eneko Willis izan da sari berezia jaso duena.

Leiho eta balkoietako III. Lore lehiaketari dagokionez, Leiho eta balkoirik onenaren lehen saria Aitor Ansotegik irabazi zuen; Iñaki Araunguenak bigarrena; eta Rosario Unamuno hirugarrena. Etxaurreetan Mertxe Gerenabarrena izan da lehena; Enkarna Anitua bigarrena; eta Ziortza Jaio hirugarrena. Arratsaldean pilota partidak egongo dira, eta pintxopotea egongo da herriko tabernetan.

Antolatzaileek jaien balorazio “oso ona” egin dute: “Dena ondo atera da eta giro ederra egon da herrian, barikutik hasi eta gaur arte”. Hala, bihar [ekainak 25] emango diote amaiera jaiei eta adin nagusiko herritarrak izango dira protagonista. 12:00etan mezagaz emango diote hasiera eguari, Murlan. Ondoren, Roberto eta Idoia trikitilariek alaituko dute herria, eta 14:30ean bazkaritan batuko dira Ilunzarren.

Ondarroako Gorozika auzoan ere gaur emango diote amaiera jaiei. Mezagaz hasi dute eguna, eta lore sorten bedeinkapenaren ostean, Xuhare eta Araia trikitilariek alaitu dituzte auzoko bazterrak. Domekan [ekainak 21] hasi zituzten San Joan jaiak Nerea Ibarzabal eta Angel Mari Peñagarikanoren bertso saioagaz. Arratsaldean, herri kirolek bete zuten auzoko plazan, aizkolari, harri jasotzaile eta ingude zein trontzako erakustaldia eginez. Umeek ere eduki zuten zertaz gozatu; izan ere, txokolatada egon zen guztientzat, eta baita umeei zuzendutako herri kirolak ere. Arratsaldea alaitzen ibili ziren Mirari eta Izarra trikitilariak.

Amallo. Auzolanean egindako “lan handiari” esker, aurten ere lau eguneko egitaraua atera dute aurrera auzotarrek. Hala, gaur [ekainak 24] San Joan egunagaz batera eman diote amaiera jaiei; goizean meza baino lehen tortilla txapelketa egin dute, eta 15 tortilla aurkeztu dira lehiaketara.

Irabazlea Olazar beheko baserriko Amets Arrizabalaga izan da, eta antolatzaileek tortilla patataren itxura, patataren egoera eta gustua saritu dituzte. Mezaren ostean, “giro ederrean” elkartu dira auzoko trikitilariak. 12:30ean, ostera, eguneko punturik gorena heldu da: Amalloko gazteek Ibekohondoren zaldi gaztearen kontra neurtu dituzte indarrak.

Bertan, auzoko zazpi gazte hiru urteko zaldi baten aurka lehiatu dira. Amalloko gazteek 28 metroko ibilbidea osatu behar izan dute–joan eta etorrian–, 440 kilogramoko harria arrastatuz, eta 20 minutuko denbora tarteagaz. Ondoren, Pipa zaldiaren txanda izan da: denbora tarte beragaz, gazteek egindako buelta kopurua 1,75 aldiz gehiago egin behar izan du, 650 kilogramoko harria arrastatuz. Gazteak hasi dira, eta 29 buelta eman dituzte. Halaber, Pipa zaldiak irabazteko gutxienez 51 buelta egin behar zituen, eta 52 buelta osatuta, lehia irabazi du.

Horrela, giro “ona eta ederra” nagusitu da jaien azken egunean, eta antolakuntzatik adierazi dute “oso pozik” daudela hainbeste auzokide bertaratzeagatik. Eskerrak eman diete gazteei izan duten parte hartzagatik, batez ere, sekulako bero egin duen arren lehiaketan parte hartu dutelako.

Ziortza-Bolibarren. Surik ez piztea erabaki zuten herrietako bat izan zen atzo. Surik barik bazen ere, egitarauak bere horretan jarritu zuen herrian. Sorginen eta pertsonaia mitologikoen etorrera eta antzezpenak beste urte batez mantendu du egun horretan herria batzeko ohitura. Jan eta edana ere izan zuten bertaratu zirenek; Idoia eta Roberto Etxebarria trikitilariek girotuta, urdaia, txistorra, gazta eta irasagarra izan zituzten. Gauari amaiera emateko, suaren inguruan izan ez bazen ere, sorgin dantza ikusteko aukera izan zuten ziortza-bolibartarrek.

Tenperatura altuei aurre egiteko babesleku izan dute eliza gaur. Ohiturak agintzen duen modura, San Joan eguneko mezarako hitzordua izan dute herritarrek, eta bertan bedeinkatu dituzte aurten egindako sobrak. Meza amaitu denerako, herriko umeek prest izan dute sobren erakusketa eutsi duen egurrezko mahaia. Herriko andrak, sobrak eskuan, erakusketa osatzen joan dira elizatik irten ahala, eta haur eta helduen begiradapean, erakusketa lore eta kolorez bete da.

Lokaletan, plazan eta frontoian bizi dituze San Joan jaiak

Lea-Artibai eta Mutrikuko Hitza — 2026-06-20 17:51:55

San Joan jaietan murgilduta daude gaur [ekainak 20] Aulestin eta Ziortza-Bolibarren. San Joan bezperako suak biztu baino lehen, hainbat dira herritarrek astebururako antolatu dituzten ekintzak, eta horien artean, bazkari herrikoiak izan dira gaurkoan, herritarrak batzeko aitzakia.

Herriko plaza bezain bizirik egon dira Aulestin lokalen barrualdeak. Suaren inguruan eta errezetaren sekreturik argitaratu barik, paella prestaketan aritu dira kuadrillako adituenak. Lasaitasun osoz aritu dira batzuk, presaka beste batzuk, izan ere, 14:30erako aurkeztu behar izan dute euren paella, epaimahaiak dastatu ahal izateko. 23 paella aurkeztu dituzte orotara, eta bazkaldu baino lehen banatu dituzte sariak. Pozez hartu du Elena Guenetxeak laugarren saria, Alerta Gorria izeneko paella izan da hirugarrena eta Haize Boladi, bigarrena. Lehen sariduna ezagutzeko jakinmin handia izan du plazak, hala, segituan iragarri dute Bielsa paella izan dela aurtengo sanjoanetako onena. Bazkaria amaituta, zozketa eta jolasak izango dituzte plazan. Gau giroan sartuta, Jaire taldeak girotuko du festa. Aulestiarrek beste lau egun dituzte aurretik ospatzeko, eta San Joan sua, sobra sariketa, herri kirolak edo esku pilota partiduak antolatu dituzte horietarako.

Bigarren saridunak.

‘Bielsa’, irabazle.

Elena Guenetxea laugarren sariagaz.

Hirugarren saridunak.

Hi! Bizirik. Aulesti hikaz aritzeko plaza bihurtu da gaurkoan. Hika indartzeko bidea zabaldu nahi du Aulestiko Euskara Taldeak, eta hala aritzeko erronka hori proposatu die herritarrei; herri txikiek bizirik dirauten bezala, hikak ere bizirik iraun dezan.

Ziortza-Bolibarren ere, San Joanak elakarregaz batzeko festak izan ohi dira. Giro herrikoi, alai eta koloretsu baten, frontoia bete dute bazkalorduan, eta Aulestin egin duten bezala, herriko taldeek prestatutako paella jateko batu dira mahai inguruetan ziortza-bolibartarrak. Txupinazo eguna izan da gaurkoa, eta goizean bezala, festa giroa izango dute arratsaldean Txerokiak taldearen eskutik. Umeen eguna dute bihar [ekainak 21], Zeargoi Dantza Taldearen emanaldiagaz; Sorgin Gaba martitzenean [ekainak 21], sorgin eta pertsonaia mitologikoen antzezpenagaz eta San Juan suagaz; eta San Juan eguna eguaztenean [ekainak 24], sobre erakusketagaz.

Auzolanak eraiki ditu aurten ere sanjoanak

Lea-Artibai eta Mutrikuko Hitza — 2026-06-19 12:45:50

Uda giroa nabaritzen hasia da Ziortza-Bolibarren. San Joan jaiak hasita dituzte jada, eta oraingo, festa giroan murgilduta daude herritar guztiak. Joan den domekan izan zuten jaien lehen eguna, eta Gollebar Jai Alai Taldeak eskainitako zesta-punta partidak ikusteko, frontoian batu ziren herritarrak. Partida hauek ez ziren norgehiagoko hutsak izan, izan ere, ziortza-bolibartarrek elkartasun ekitaldi bategaz eman die hasiera uda iragartzen duten San Joan jaiei. Kamisetak eta jertseak saltzen dituzte ohiko bihurtu diren partida solidario horietan, hala, eskualdeko elkarteekin bat egin eta diruz ekarpena eginez, euren aletxoa jarri ahal izaten dute ziortza-bolibartar guztiek. Gollebar Jai Alai taldeak Ondarroako Karenka edo Markina-Xemeingo Izarbidean elkarteekin bat egin izan du aurretik, eta oraingoan ere, dirua batu dute erabakitzeko dagoen elkarte bati laguntzeko.

“Herriaren parte hartzeari esker” egin ahal izaten ditu zesta-punta taldeak elkartasun partidak, eta parte hartze hori izango da datozen egunen oinarri. Txupinazo eguna izango dute biharkoa ziortza-bolibartarrek. Janariak beti izaten du lekua jai giroan, horregatik, txistularien musikak girotuta, herriko taldeek paella prestaketari ekingo diote, urtero bezala, herritar guztiei jan eta edana eskaintzeko. Aurreratu dutenez, “200 lagun inguru batuko ditu bazkariak”.

Txerokiak taldearen aldeko apustua egin du aurten herriak, hala, herriz herri jaiak alaitzen ari den taldea izango da biharko egunari musika jarriko diona. “Taberna izkineko musikariak izeneko formatu baten datoz”, Ziortza-Bolibar trikitixa, gitarra, txistua, akordeoia, pandero eta tronpeta hotsez betetzera.

Umeen Eguna antolatu dute domekarako. Mezagaz hasiko dute eguna, eta horren ostean, urte batzuk aurrerago berpiztea lortu zuten Zeargoi Dantza Taldeak eskainiko du eguneko momenturik hunkigarriena: “Herriko umeak dira. Zapatuetan Markina-Xemeingo Zerutxu Dantza Taldetik etortzen dira dantzak irakastera, eta euren erakustalditxoa egingo dute herriko hamabost gaztek”.

Umeentzako ekintzak denen gustukoak izango dira etzi, “gazteentzako abentura eta umeentzako jolas parkea” jarriko baitituzte frontoian. Gazteek bakarrik ez, helduek ere izango dute bertaratzeko arrazoia, izan ere, tenperatura altuei aurre egiteko, izozkiak banatuko dituzte. Herritarrek Kaitin Allende kezatari eta komediantea hartuko dute udaletxean, eta bera izango da bakarrizketa eskaintzeko arduraduna.

Ekainaren 23a briska txapelketagaz hasiko dute, eta 17:00etan hasiko denez, jokoan arituko direnek 16:30ean eman beharko dute izena, hirukoteak osatuz. Ohitura zaharrak mantentzen direnaren erakusle izango da martitzena. Sobrek esanahi berezia dute herrian, eta urtero sortzen duten hori erretzeko garaia heldu zaie: “Iazko sobra San Joan bezperan botako dugu sutara, eta aurten egindakoen erakusketa egingo dugu San Joan egunean”. Sorgin Gaba izenez da ezaguna, izan ere, iluntzean sorginen eta pertsonaia mitologikoen etorrera eta antzezpena hartuko du herriak: “Sorgin dantzan sorginek sobra emango diote Mariri, eta txar guztiekin batera, berak botako du sutara“.

Iazkoak erreta, bedarrak, ortuariak, laboreak, frutak eta loreak batzen dituen sobrak aurkeztuko dituzte herritarrek eguaztenean. San Joan egunean ohitura den bezala, herritar bakoitzak bere lana erakusteko aukera izango du, urte bete pasata, sutan erreta amaituko duena. Elizpean txistulariak hartu eta gero, antzerkia ikusteko aukera izango dute herritarrek zein ingurutik datozenek. Kale antzerkiaren aldeko apustua egin du antolakuntzak. Barsanti konpainiaren eskutik, eta LJ75 proiektua aurkeztuko dute.

Antzerkian 80 pertsona inguruk parte hartzen dute urtero. Kopauan, antzerkia egiten edo bestelakoetan, herritarrak lanean aritzen dira jaien aurretik eta dirauten artean. Elkarlan gabe, ezinezkoa baita jairik izatea: “Auzolanari eta herritarrei esker antolatu ahal izan ditugu jaiak; eurek barik, ezingo genuke hau guztia egin”».

Hala, Ziortza-Bolibarko Udala esker oneko agertu da Kanpape Jubilatuen Elkartegaz briska txapelketa antolatzeagatik, Aranbaltz kultur elkarteagaz Sorgin Gaba eta sobren erakusketa antolatzegatik, Markola guraso elkarteagaz Umeen Eguna antolatu eta eskaintza prestatzeagatik eta baita lanean aritu diren eta San Joan jaietara bertaratuko diren herritar guztiekin ere.

Elkartasunez betetako zesta punta partidak jokatu ditu Gollebar Jai Alai taldeak

Lea-Artibai eta Mutrikuko Hitza — 2026-06-16 13:09:51

San Joan jaiak ate joka dituzte Ziortza-Bolibarren, eta jai giroan murgiltzen hasi dira joan den domekan [ekinainak 16] ospatu zituzten zesta punta partidekin. Gollebar Jai Alai taldeko jokalarien partidan ikusteko batu ziren herriko frontoian ziortza-bolibartarrak. Ohitura bihurtu den bezala, partida solidarioak izan ziren domekakoak. Ondarroako Karenka elkarteagaz edo Markina-Xemeingo Izarbidean elkarteagaz bat egin zuten aurreko aldietan, eta oraingoan ere, saldutako kamiseta eta jertseekin batutako dirua eskualdeko elkarteei laguntzeko izango da.

"Luzaroan egindako eskaerak" berretsi ditu Ziortza-Bolibarko Udalak

Lea-Artibai eta Mutrikuko Hitza — 2026-06-15 18:29:18

Busturialdean, Arratian eta Mungialdean arrakasta handia izan ondoren, Lea-Artibaira heldu da Bizkaiko Foru Aldundiak abiatutako Herri txiki aukera handi programa. “Programaren lehenengo helburua eskualdeko udal-zerbitzu publikoen egoeraren diagnostikoa egitea” izango dela azaldu du Bizkaiko Foru Aldundiak, tokiko eragile publiko zein pribatuek emandako informaziotik abiatuta. Eskualdean udal-zerbitzu publikoen gabeziak identifikatuko ditu programak, eta hortik abiatuta, herrien beharrak asetzeko proiektuak abiaraziko dituzte.

Etxebarria, Amoroto, Mendexa, Ziortza-Bolibar eta Ispasterko udal ordezkariak batu ziren joan den astean Ispasterren egindako bilkuran. Programaren berri eman zuen bilkuran Imanol Landa Bizkiko Foru Aldundiko ordezkariak, eta baita eskakizunak entzun ere.

Herriari aukerak emateko. Ziortza-Bolibarko Udalak aldundiari “luzaroan egindako eskaerak” gogorarazteko baliatu zuen bilkura: Zubibarrin markesinen beharra dute ziortza-bolibartarrek. Hala ere, Bizkaiko foru aldundiak “BI-633 errepide ondoko lur partzela lautu” behar dela adeirazi zien gutun bidez. Udalak gaia aztertu eta lur zati horren lautzea foru aldundiari dagokiola ondorioztatu du. Hala, bilkuran “egoera hau aztertzea eta obra hau aurrera eramateko ardura hartzea” eskatu zioten foru aldundiari.

Aitxubalko bidegurutzea ere aipatu zuten. Lekuan lanak egin zituztenetik, herriko bidera sartzeko bidegurutzean etenbako lerro bat zeharkatu behar izaten dute Bilbotik datozen autoek, eta horrek ez du bidera legalki sartzeko aukerarik ematen. Gainera, bide horretatik irteten direnek ezin dute Markina-Xemeinera doan errepidea marra hori zapaldu barik hartu, “alderantziz geratzen baita ibilgailuz egin beharreko maniobra”.

Iruzubieta pareko bidegurutzean, Aitxubalgo sarrera.Ziortza-Bolibarko Udala

Azkenik, ziortza-bolibartarrek “zuntzaren hedapen planaren inguruko informazio ahalik eta zehatzena” jasotzeko beharra adierazi zuten. Hala, foru aldundiari eskatu die “ardura guztia Telefonikaren gain utzi beharrean, bere ardura hartu eta herriko eskariak Telefonikari exijitzeko”.

Udalak adierazi du “programak eskualdeko kohesiorako zerbitzuen hobetzea” bilatzen duela. Hala, programan parte hartzeko asmoa erakutsi dute, eta baita “helburuekin bat” egiten dutela argitu ere. Gai hori argitzeko, foru aldundiko teknikari batekin elkartzeko eskaera ere egin zuten.

Bertoko basoa berreskuratzen jarraitzen dute Ziortza-Bolibarren

Lea-Artibai eta Mutrikuko Hitza — 2026-05-30 20:22:16

Sergio Gallego Mazarias Lurgaia Fundazioko kidearen gidaritzapean, landare inbaditzaileak zelan kendu ikasteko tailerrean batu dira gaur [maiatzak 30], Ziortza-Bolibarren. 09:30ak puntu-puntuan plazan elkartuta, Urasandira lehenengo eta Landadi basora joan dira ondoren.

Errekaren bestaldean geldialdia eginda, lehen panpa belarra kentzeari ekin diote. Zauririk ez egiteko eskularruak jantzita, aitzurra eta pala baliatu dituzte Euskal Herrian urterik urte gehitzen doan Amerikako espezie inbaditzailea kentzeko. Ezin izan dute guztia kendu, eta, horrenbestez, hemendik aurrera mozten jarraitu beharko dute. “Txikiagoa izan balitz, lortuko genuen indarrez kentzea, lurrari oso errotuta egoten den espeziea da-eta panpa belarra”.

Panpa belarra kentzen aritu dira Urasandin.

Autoz Landadira joan dira ondoren, Ziortza-Bolibarko Udala eta Lurgaia elkarlanean berreskuratzen ari diren basora. Pinudiaren bestaldean, Arimen Gaztañadia, orain dela hogei urte Bizkaiko Foru Aldundiagaz batera udalak berreskuratu zuen zoru publikoa. “Guk daukagu plana Markola erreka babesteko korridore ekologiko bat osatzen joatea, bertoko zuhaitzekin. Dinamika horretan sartzea gurako genuke jabe pribatuak ere”, azaldu du Andoni Lariz udalerriko alkateak.

Gallegok, bide beretik, beharrezkotzat jo du erakundeen inplikazioa basoak bertokotzen joateko. Eta Ziortza-Bolibarko Udalagaz egindako elkarlana eskertu du. “Lauzpabost urte daramatzagu elkarlanean. Honetan sinisten duten pertsonak aurkitzea garrantzitsua da”. Ildo beretik, “ezinbestekotzat” jo du bide horretan ingurumenarekiko sentsibilitatea daukaten politikariak eta teknikariak aurkitzea.

Landare inbasoreak kentzeko tailerra abiatu du Ziortza-Bolibarko Udalak

Lea-Artibai eta Mutrikuko Hitza — 2026-05-27 13:32:32

Ziortza-Bolibarko Udalak landare inbasoreak kentzeko tailerra antolatu du zapaturako [maiatzak 30]. 09:30ean Bolibarko plazan batuko dira herritarrak Ziortza-Bolibarko Landadi basora elkarrekin abiatzeko. Ingurumenarekin lotura duten gaiekiko kezka adierazi du Ziortza-Bolibarko Udalak behin baino gehiagotan. Landare inbasoreak izan dituzte hizpide azken aldian, eta horri jarraiki, panpa landare inbasoreari buruz kontzientzia sortzeko eta hori kentzen ikasteko ekimena izango da.

Udalak Lurgaia Fundazioarekin elkarlanean antolatutako ekimena da asteburukoa. Akazia inbaditzailea erretiratzen aritu ziren martxoan, eta bertaratu ziren herritarrek fundazioko teknikari bat izan zuten lagun. Oraingoan ere, teknikari bat izango da azalpenak ematen eta landare hauek nola kendu behar diren esaten. Udalak adierazi duenez, garrantzitsua da tailerrera bertaratzeko izena aurretik ematea; tailer parte-hartzailea izango da, beraz, Lurgaiako tenikariak herritarrentzat beharrezko materiala ekarri ahal izango du. Izen ematea info@lurgaia.org helbidera idatzita egin daiteke.

Ekimenaren helburua norbanakoek panpa landarea kentzen ikastea da, hala, bakoitzak bere partzeletatik kendu ahal izango du espezie inbaditzaile hau. Udalak antolatzen dituen ekintzen bidez, “bertoko zuhaitz autoktonoei biziberritzen lagunduko diegu eta bai biodibertsitateari eta bai trantsizio ekosozialari bultzada bat emango diegu”. Ikasketa prozesuaz gain, Udala Landadi basoan egiten ari den berreskurapen lana ezagutzeko bisita ibiltaria ere izango dute herritarrek.

Herriko eta inguruetako ingurumena zaintzeko egiten diren ekintzetako bat da zapatukoa. Ingurumen asteburua antolatuko dute laster, eta horren “aurrekaria” izango dela adierazi du udalak.

Klima larrialdiari begira. Landadi Munitxei gainean kokatzen den basoa da, Muniozgurenera joateko bide ondoan dagoena eta 44.200 metro karratuko azalera duena. Arimen Gaztainadia izenaz ezaguna den baso publikoa baino pixka bat beherago dago. Udalak 2024an erosi zien jabe pribatuei aurretik zeukaten pinudia bota zutenean, eta 2025ean proiektu bat aurkeztu zuen Udalak Eusko Jaurlaritzako Ihobe programara hori berreskuratzeko.
52.000€ko proiektu bat. Ihobek 41.000€ “eskas” ematea onartu duela adierazi du udalak, hala, 11.214€ ipini beharko dituela aurreikusten du, programaren %21,48 izanik. Honekin “basoaren hazkuntza prozesua azkartu eta klima larrialdiari aurre egiteko baldintzak hobetuko ditugu Ziortza-Bolibarren”.

'Argia eta indarra Kubarentzat' kanpaina aurkeztu dute Ziortza-Bolibarren

Lea-Artibai eta Mutrikuko Hitza — 2026-04-27 16:43:52

‘Argia eta indarra Kubarentzat’ kanpainaren aurkezpena egin zuten joan den zapatuan [apirilak 25] Ziortza-Bolibarko Simon Bolivar museoan. Udalak eta museoak deituta, Lea-Artibaiko herri eragileei zuzendutako aurkezpena izan zen.

Endika Guarrotxena Euskadi-Kuba elkarteko kidea eta Dana Moya euskaldun kubatarrak izan zuten berbaldian hitza hartzeko ardura. Kubaren egoeraren berri eman zuten bilkuran: Kubatar herria “muturreko egoera” bat jasaten ari dela entzun zuten bertaratu zirenek. Ospitaletan eta eskoletan argirik gabe daudela aderazi zuten, baita gasolina faltagatik, mugikortasuna erabat murriztua dagoela ere.

Euskal Herritik, egoera hori hobetzen laguntzeko egindako ekimenei buruz ere aritu ziren. Bide honetatik jarraitzeko, museoan batutako eragileek “kolektiboki hau indartzea eta elkarteetara informazioa eramateko konpromisoa” hartu zuten. Honi lotuta, zapatuko kanpaina honen baitan, ospital batean eguzki plaka instalazio bat jartzeko diru bilketa egingo dute. Beraz, herri eragileei informazioa hedatzeaz gain, kontu korronte bat zabalduko dute, laguntza jaso ahal izateko.

Honako elkarte hauek batu ziren zapatuan:

Bolibarko Kanpape jubilatuen Elkartea
Bolintxu EBK Energia Berriztagarrien Komunitatea
Leargi EBK Lea Ibarrako Energia Berriztagarrien Komunitatea
Bolibarko Aranbaltz kultur elkartea
Markina-Xemeingo EH Bildu
Lekeitioko EH Bildu
Ispasterko EH Bildu
Etxebarriko Ezker Abertzalea
Ziortza-Bolibarko EH Bildu
Babesa eman zuen Markina-Xemeingo Amaiur elkartea

'Argia eta indarra Kubarentzat' kanpaina aurkeztuko dute Ziortza-Bolibarren

Lea-Artibai eta Mutrikuko Hitza — 2026-04-23 17:29:52

Ziortza-Bolibarko Udalak eta Simon Bolivar museoak antolatuta, Argia eta indarra Kubarentzat kanpainaren aurkezpena egingo dute, zapatuan, 11:00etan hasita, Simon Bolivar museoan. Agerraldian “Kubako egungo egoera” azalduko dute Euskadi Kuba elkarteko Endika Guarrotxenaa eta Dana Moyak. Udalak adierazi duenez, Lea-Artibaiko EBK eta herri eragileentzat antolatu duten ekimena da, eta hitzaldiaren ostean, bertan adierazitako informazioa eta adostutako guztia “eskualdeko taldeetara eramateko proposamena landuko dugu”.

Pintxo Bidea: ostalaritzari bultzada txiki bat

Lea-Artibai eta Mutrikuko Hitza — 2026-04-17 09:00:12

Bide bera jarraitzeko asmoarekin antolatu dute Pintxo Bidea aurten ere, pintxoak dastatzeko, tabernarien lana bultzatzeko eta gastronomiaren bitartez jendea herrira erakartzeko. Markina-Xemein bizirik mantentzen duten ostalarientzat erakusleiho entzutetsu bihurtu da Pintxo Bidea. Hamalau taberna dira aurten pintxoz pintxo aritzeko bidea eraiki dutenak

Apirilaren 23an hasi eta 26ra arte egongo da pintxoak dastatzeko aukera. Lau egun horietan, Markina-Xemeinen, Etxebarrian eta Ziortza-Bolibarren egongo da pintxoen eskaintza, 12:30etik 14:30era eta 18:30etik 21:30era. Pintxo bakoitzak 2 euroko kostua izango du, eta tabernek izango dute mokadu bakoitzaren alergenoak adierazteko ardura.

Fantasia, Baserriko Mokadua, Urxenpintx, Lur Kurruskaria edo Itsas Eztanda bezalako izenek ondo ordezkartzen dute pintxoek eskaintzeko daukaten guztia. Markina-Xemeingo Ilunpe, Irurok, iruzubi, Kindal, Melo’s, Mendibil, Mugarri, Vega, Noa, Sakris, Toldope eta Naroki tabernak izan dira saretzeko pausoa eman dutenak. Etxebarriko Antsotegi jatetxeko sukaldariek ere, iazko txapelketako garaipena errepikatzea dute helburu, eta aurten ere erakustaldia egiteko asmoekin datoz. Azkenik, Ziortza-Bolibarren ere egingo dute geldialdia pintxo zaleek, bidea egiten lagunduko baitu aurten Arkupe tabernak.

Dastaketa egin ondoren, gehien gustatu zaien pintxoaren aldeko botoa emango dute bezeroek. Tabernetan bertan aukituko dute botoa emateko Pintxo Bidearen orria. Tabernari bakoitzak bere zigilua jarriko du bezeroaren orrian, bertako pintxoa dastatu duenaren adierazle. Bezeroak, orri horretan bertan, bere datuak eta pintxo onenaren izena jartzeko aukera izango du. Botoa emateko, Hemen Be Bai elkartearen lokaleko postontzian sartu beharko du, Artibai kaleko 4. zenbakian.

Antsotegi jatetxeko SantaKroke Festa izan zen iazko irabazlea.Antsotegi Jatetxea

Aurrerapauso nabarmenak ematen ari da ekimena urtez urte, eta maila gero eta altuagoa ari da izaten. Horregatik, beste herri batzuetatik gero eta jede gehiago antzeman izan da azken aldietan, eta aurten ere, bide horietatik hobetzen jarraitzeko asmoa du Hemen Be Baik. Berritzailetik badu kanpainak, baita tradiziotik ere. Bertako produktuak erabiltzeak balio gehigarri bat ematen die pintxoei, eta bezero zein ostalariek hurbiltasun horren alde egiten dute.

Esker bereziak eman nahi izan dizkie Hemen Be Bai elkarteak elkarlanean aritu diren Markina-Xemeingo Udalari eta Etxebarriko Udalari. Hala, aintzat hartu dituzte Euskitze Likor Ardoak, Olasagasti Kontserbak, Ateun eta Guenaga harategiak, Onkaia arraindegia, Uronza, Mari eta Hipolita janari dendak, Larruz Gaztak, Xuri Burdindegia, Itziar optika, Tate gozotegia eta Ulemotx ileapaindegia, eskainitako laguntzagatik.

Sari banaketa. Joan diren urteetako ereduari jarraiki, lau izango dira banatuko dituzten sariak. Herriak emandakoa herriari bueltatzea helburu, merkataritza elkarteko establezimenduetan gastatzeko txekeak izango dira sariak.

Pintxo onenaren bi sari banatuko dira; lehena, 200 eurokoa, hainbat gastronomia sari jaso dituzten sukaldariek osatutako epaimahai profesional batek erabakiko du. Eguenean, apirilaren 23an, arituko dira Markina-Xemeingo bazter eta tabernak ezagutzen, eta sukaldariek euren pintxoa nola sortu duten entzuten. Bigarren saria herritarren esku utzi du markatari elkarteak: herritarren euren irizpide pertsonalen eta gustuen arabera emango dute botoa, eta horren arabera erabakiko da 100 euroko sariaren irabazlea.

Ostalari eta merkataritza elkarteak euren esker ona erakutsi nahi die bezeroei, horregatik, herritarrak ere saridun suertatu daitezke. Baina, nola funtzionatzen du honek? Bi zozketa abiaraziko dituzte antolatzaileek; lehenengoa, pintxo guztiak probatu eta zigilu guztiak batu dituztenen artean; bigarrena, pintxo onena asmatzen dutenen artean, gainerakoak probatu ez badituzte ere. Sariak eta zozketetako irabazleak maiatzaren 1erako argitaratuko dituzte.

Geuretik Sortuak egitasmoak bi hitzordu eskainiko ditu Lea-Artibain

Lea-Artibai eta Mutrikuko Hitza — 2026-04-16 13:24:26

Asteburuan kultur eskaintzaz bustiko da Lea-Artibai; izan ere, Geuretik Sortuak egitasmoaren baitan bi ekitaldi egongo dira Aulestin eta Ziortza-Bolibarren.

Alde batetik, Ziortza-Bolibarren Bi baso bat ur antzezlana eskainiko du Metrokoadroka Sormen Lantegiak bihar [apirilak 17], 20:00etan, frontoian. Piezak tratu txarren eta traumaren ondorengo pozean jartzen du arreta. Antzezlanean lau aktore ageri dira oholtza gainera, geldi baina dantzan, bakoitzak eskuan ur baso bana dutela, eta mina gainditzeari buruzko ikuspegi sakona, errespetuzkoa eta alaia eskainiz.

Bestalde, Aulestin Lau haizetara izeneko film laburren proiekzioa egongo da domekan [apirilak 19], 18:30ean, udal areto nagusian. Euskaraz sortutako lau film laburren bilduma da, lau zinegileren lanek osatutakoa: Aitor eta Izaro Arruti, Alba Lozano, Olatz Overejo eta Raul Barreras.

Gollebar Jai Alai taldeak Karenka elkartearekin bat egin du

Lea-Artibai eta Mutrikuko Hitza — 2026-04-13 10:11:37

Gollebar Jai Alai Taldeak 800 euroko dohaintza egin dio Karenka elkarteari, dibertsitate funtzional fisiko eta sentsoriala duten, seme-alabak dituzten familien jardunari laguntza eskainiz. Herritar asko bertaratu ziren elkartasuna erakusteko, eta norbanako bakoitzak bere ekarpena egin zuen kamisetak, jertseak erosiz eta zozketan parte hartuz.

Eguzkia lagun, inauteriak ospatu dituzte Ziortza-Bolibarren

Lea-Artibai eta Mutrikuko Hitza — 2026-02-23 11:51:49

Joan den asteburuan ikusi ahal izan ziren inauterietako azken printzak eskualdean. Ziortza-Bolibarren egun berezia izan zuten zapatukoa [otsailak 21], herritarrek armairuan gordeta zituzten mozorroak atera eta kolorez bete zuten herria. Tamaina guztietako bizikletak eta adin guztietako txirrindulariak atera ziren herriko plazara, zaletasunak agerian utzi zituzten, denek gai bera oinarri izanik aukeratu baitzuten mozorroa. Eguzkia lagun izan zuten egun guztian zehar, joan den astean eskualdeko herrietako ospakizunetan izandako euriak atzean utziz.

Eskuak zikintzeko ordua iritsi zitzaien herritarrei. Txikienek ez zuten bi aldiz pentsatu eskuak irin artean sartu baino lehen. Gurasoek ere izan zuten zeregina, ez baitzen lan gutxi izan herritar guztietantzako taloak egitea. Sukaldaritza lanek bere saria izan zuten, denentzako taloak egon baitziren goseak arindu eta jaiarekin jarraitu ahal izateko.

Frontoia zirku bihurtu eta bertan aritu ziren haurrak, gora eta behera. Tranpolina, malabarak egiteko tresnak, oreka lantzeko jolasak eta zirkuituak izan zituzten. Bertan aritu ziren olgetan eguna ilundu arte, eta “egun biribila” izan zutela argi azpimarratu dute.

Baso jabeentzako aholkularitza eskainiko dute Ziortza-Bolibarren

Lea-Artibai eta Mutrikuko Hitza — 2026-02-02 11:50:58

Ziortza-Bolibarko Udalak baso jabeentzako aholkularitza saioak iragarri ditu. Herritarrek otsailaren 3tik apirilaren 24ra bitarteko martitzenetan izango dute saioetara joateko aukera. Tantai kooperatibako baso teknikarien eskutik jasoko dute jabeek aholkularitza, udaletxean bertan. Honen bitartez, baso jabeek Bizkaiko Foru Aldundiak eta Ziortza-Bolibarko Udalak ematen dituzten diru-languntzei buruzko informazioa jasoko dute. Gainera, Tantai kooperatibari buruzko informazioa ere eskuragarri egongo da.

Aurrez hartu beharko da hitzordua hurrengo ordutegietan aholkularitza jaso ahal izateko:

Goizez: 9:30etatik 14:00etara.
Arratsaldez: 15:00etatik 17:00etara.

Izena emateko, 621 627 164 telefono zenbakira deitu edo xanti@tantai.eus helbidera idatzi.