HITZAren 20 urte + Errigoraren 10 urte = ospakizun bete-betea
Gaur [azaroak 11] Lekeition ospatu dute LEA-ARTIBAI ETA MUTRIKUKO HITZAren 20. urteurrena eta Errigoraren 10. urteurrena. “Berezia da hamarkada bi bete ditugulako, berezia Errigorako lagunekin batera ospatu dugulako”.
2003ko azaroaren 11. Ondarroako Kafe Antzokia. Gaur [azaroak 11] 20 urte aurkeztu zen LEA-ARTIBAI ETA MUTRIKUKO HITZA egunkariaren lehen zenbakia. Horrenbestez, ez zegoen egun hoberik urteurrena ospatzeko. Errigoragaz batera egin du, egitasmoak hamar urte bete dituen honetan. Horregatik eta beste askogatik, “berezia” izan da gaur Lekeition egin den ospakizun jaia.
Hori bera nabarmendu du Larraitz Ibaibarriaga Etxaburu HITZAren zuzendariak: “Berezia da hamarkada bi bete ditugulako, berezia Errigorako lagunekin batera ospatu dugulako. Errigora orain 10 urte sortu zenetik, bidelagun izan gara bi egitasmoak, eta gaurkoan, ezin zen modu hoberik egon bi urteurren borobilak ospatzeko”. Euskararen normalizazio biderako lagungarri izateko jaio zen HITZA, Mutrikuk eta Lea-Artibaiko herriek elkar ezagutzeko, herritarrak zein talde eta elkarteak hartu-emanetan jartzeko, eta Ibaibarriagak nabarmendu du “biak ala biak” lortu dituztela: “Oso harro gaude horretaz”.
Bi hamarkadatan, milaka albiste, onak eta ez hain onak, gozoak eta gaziak eman ditu HITZAk, “ehunka banako, talde, elkarte eta erakunderen bozgorailu” izan da. Eta aurrera begira, komunikazio proiektu erreferente izaten jarraitu nahi du, “euskaraz, euskaratik eta euskaragatik”. Horretarako, baina, erakunde, talde, elkarte eta banakoen babesa “ezinbestekoa” izango dela azpimarratu du. “Zutabe finkoak dauzka HITZAk, baina oinarri sendoagoak behar ditu, euskal prentsa benetan sostengatuko duten politika aktiboak, eraginkorrak eta iraunkorrak”.
Peru Aranburu Errigorako kideak HITZAk eta Errigorak “hasieratik” izandako “hartu-emana eta erreztasunak” goraipatu ditu. 10 urte betetzen dituzte aurten, eta aitortu du aurrera begira baino atzera begira daudela oraindik, eta batez ere bizitakoak ekarri ditu gogora: “Errigora osatzen dutenak dira garrantzitsuenak, herritarrak, parte hartzaileak, kideak eta guztiak, haiek barik ez dago Errigora. Kaxekin gora eta behera ibiltzen gara, baina beti gozatzen”.
IKUSI ARGAZKI GALERIA ZUZENEAN
Zer egina. Eguraldiak lagundu ez duen arren, ospakizunak ez du etenik izan. Elizapean elkartu dira bertaratutakoak. Tartean eskualdeko hainbat ordezkarik ere HITZAri babesa erakutsi nahi izan diete, besteak beste, eskualdeko hainbat herritako alkateek. Denek ala denek HITZAk egiten duen lana goraipatu dute. Udaletako ordezkariez gain, modu batera edo bestera egunkariaren parte izan diren lagunek ere ez dute hutsik egin nahi izan. Naia Quincoces, EIKA eta AEK-ko ordezkariek, esate baterako.
Ekoizleentzako ere plaza “berezia” izan da. Larruz gaztandegiko Gorka Muniozgurenek bertan izateagatik “esker ona” adierazi du. “Pentsa baino salmenta hobeak egin ditugu. Gainera, asko izan dira Euskal Herriko gazta onena irabazteagatik. Hau izan da saria jaso ostean egon garen lehenengo azoka”. Herritarrek ez dute eduki beste aukerarik, behin dastatuta ezin daiteke ezetz esan. Baskaran, El Buscador, Arentza, Bakikureta, Eskuola, Txikiñenak eta Larruzek parte hartu dute ekoizleen azokan.
Musika, jokoak, jatekoa, denetarik egon da ospakizun jaian, eta denentzako. Nerea Gartziak hartu du goiza gidatzeko ardura. Txikienek eta ez hain txikienek gogotik gozatu dute globoak apurtuta Errigorako eta HITZAko opariak lortzen. Ilarak egin dira baita ere Errigorako produktuekin Oier Biritxinaga sukaldariak egindako pintxoak dastatzeko. Iñigito Txapelpunkek eta DJ Koolek musikatu dute urteurren ospakizuna. Ikuskizun ederra eskaini dute.
Errigorako eta HITZAko kideek esker oneko hitzak izan dituzte jaia posible egin duten guztientzat, gaurko egunean babesa ematera etorri diren guztientzat, eguna are bereziagoa egin duten guztientzat: “Eskerrik asko egun hau posible egin duzuen denei”.
