Castro epaileak etxe kartzela ukatu dio Ibon Iparragirre larriki gaixo dagoen preso ondarrutarrari
Iparra Galdu Baik plataformak eta oro har, herritarrek behin eta berriro eskatu badute ere, Espainiako Auzitegi Nazionaleko espetxe zaintzarako epaile Jose Luis de Castro Antoniok etxe kartzela egiteko aukera ukatu dio larriki gaixo dagoen preso politiko ondarrutarrari.
Ane Ituño Iparragirreren abokatuak ere albiestea baieztatu dio HITZAri. “Iparragirreri ukatu egin diote lehengo espetxealdi arindura bueltatzea”. De Castrok sinatutako epaiaren arabera, Iparragirrek ez ditu etxe kartzela betetzeko baldintzak betetzen. Egoera horren aurrean, larriki gaixo dagoen preso politikoaren abokatuak ondokoa adierazi du:”HIESA duela egia da eta ukaezina da. Mediku ezberdinek egindako diagnosien arabera, gaixotasun oso larria eta sendaezina da. Horren arabera, medikuek diote, presoaren osasun egoera egonkorra dela eta espetxean bizitza normal bat egiteko gai izango zela. Argudio horregatik ez diote onartu 100.2 artikulua. Dena dela, De Castrok onartutako txostenaren azken ahapaldian, Ibon Iparragirreren egoerak okerrera egingo balu, egoera berriro aztertuko dute”.
Angelita Burgoa Ibon Iparragirreren ama “oso kezkatuta” dago. “Ez gaude bat ere ados De Castrok hartutako erabakiagaz. Batez ere, ez medikuek ez abokatuek, ez dute hartu kontuan nire semeak duen arazo neurologikoa. Ibonek duen gaitz neurologikoa oso handia da eta nik, ama modura, uste dut errekurtsoa horren inguruan egin beharko litzatekeela”. Burgoaren arabera, Ibon Iparragirreri egindako “erresonantzia magnetikoa ez dute kontuan ere eduki”.
De Castroren erabakiaren arabera, Ibon Iparragirrek ez ditu etxe kartzela betetzeko baldintzak betetzen; presoaren osasun egoerak okerrera egiten badu, haren egoera berriro aztertuko dutela dio txostenakAlbistearen harira, helegitea jartzea aztertzen ari dira preso politiko ondarrutarraren abokatuak. “Helegite ezberdinen arabera emaitza bat edo beste lortu ahal dira eta ondorioz, helegite eraginkorrena jartzeko ari gara egoera aztertzen”. Helegitea jartzeko hiru egun dute abokatuek.
Larriki gaixo dauden presoen etxeratzea eskatzeko ekainean Ondarroan egindako manifestazio nazionala
Angelita Burgoa Ibon Iparragirreren amak esan du erabakia hartzeko presoari egindako erresonantzia magnetikoa ez dutela aintzat hartuIparra Galdu Baik plataformak jakitera eman duenez, zapatu honetarako [urriak 4] Navalcarnerora joateko deiak bere horretan jarraitzen du, “hara joateko inoiz baino arrazoi gehiago” daudelako. Beste alde betetik, Etxeratek gai honen inguruko irakurketa bihar kaleratuko duela iragarri du; 13:00etarako zabalduko dute irakurketa. Elkarteak gogora ekarri du, 100.2 artikuluak espetxealdi arindua aurreikusten duela larriki gaixo dauden presoentzat. Bai eta, Iparragirre espetxealdi arinduan zegoela berriro espetxeratua izan zen arte. Joan den astean Ibon Iparragirreren amak oraindik ez zuen inolako erantzunik. Horrenbestez, ez zekiten Iparragirreri 100.2 artikulua ezarriko zioten ala ez. Egoera gehiegi luzatzen ari zenez, aurreko barikuan [irailak 19] kartzelan semeagaz bisita zuela aprobetxatuta, Ibon Iparragirreren amak Espetxe Zaintzako bulegoan bertan agertzea erabaki zuen, atzerapenaren zergatia jakitera. De Castroren idazkariak epailea “oso lanpetuta” zegoela eta, ezin izango zuela atenditu esan zion Angelita Burgoari, Ibon Iparragirreren amari. Horrenbestez, datuak hartu, eta erabakiren bat zutenean, deituko ziotela esan zioten Ibon Iparragirreren amari. Egunak pasa ziren, baina ez zuten telefono deirik ere jaso. Horrela ba, zer edo zer jakin arte, Iparragirreren amak Castrogaz batzartzeko jarrera irmoa hartu zuen joan de astean. Barikuan De Castroren bulegoan aurkeztu zen Burgoa. Eta harek gaur, 13:30etik aurrera, erabakiaren berri jakingo zuela esan zion.
