Kirmen Uriberen 'Mussche' aukeratu dute Japoniako liburu onenen artean

2016/01/04

Azaroan japonieraz argitaratu berri den Mussche (Susa, 2012) eleberria bere bidea egiten ari da Japonian. Aste gutxian Kirmen Uriberen bigarren eleberriak kritika oso onak jaso ditu eta arrakasta handia izan du Asiako herrialdian. Hon no Zasshi literatura aldizkariaren iritziz, urteko bost liburu onenen artean dago ondarrutarraren liburua. Aldizkariak urtero Japoniako eta atzerriko idazleek argitaratutako hamar liburu onenen zerrenda egiten du, eta, hain zuzen ere, hirugarren jarri dute zerrendan Uriberen bigarren eleberria.

Kirmen Uribe Asian egindako errezitaldi batean. Argazkia: Kirmen Uribe

Honakoa da bost liburu onenen zerrenda:

The magician on the Footbridge (Wu Ming-yi, taiwandarra)
The Thousand Autumns of Jacob De Zoet (David Mitchell, ingelesa)
Mussche (Kirmen Uribe)
The Buried Giant (Kazuo Ishiguro)
Soumission (Michel Houellebecq)

Mussche zuzenean itzuli du euskaratik Nami Kaneko itzultzaileak, eta Tokioko Hakusuisha argitaletxe ezagunak kaleratu du Japonian; abenduaren hasieran aurkeztu zuen autoreak berak Japonian eta Txinan Etxepare Euskal Institutuaren laguntzagaz.