Ia lau milioi euroko aurrekontua izango du aurten Lea-Artibai Amankomunazgoak
Lea-Artibai Amankomunazgoko udal ordezkariek amankomunazkoak 2016rako izango duen aurrekontua onartu berri dute, gehiengoaren adostasunagaz. 3.859.627,18 euroko aurrekontua izango du erakundeak bere jardunerako.
“Gehiengoak oniritzia eman dio aurrekontuari, eta adostasun batera ailegatzea lorpena da”, zehaztu du Rakel Elu Lea-Artibai Amankomunazgoaren lehendakariak.
Azaldu duenez, kostatu zaie onartzea. Izan ere, alde batetik, Gizarte Kutxan jaitsiera nabarmena egon da laguntzetan, gizarte zerbitzuetako atalean, eta hori asko nabaritu dute. Beste alde batetik, Udal Kutxatik udal denek izan dute dirua bueltatu beharra.
Sarrera gutxiago izateak eragin zuzena izan du aurrekontuetan, eta ondorioz, udal guztiei zer edo zertan murriztu beharra ekarri die. “Argi dago diru gutxiago izanda ezin dela dena berdin mantendu”. Udal batzuek beste batzuek baino arazo gehiago izan dituzte, baina, gehienetan zerbitzu guztiak berdin mantentzea onartu dutela azpimarratu du.
Bestalde, langileek azken urteetan izoztuta izan dituzten soldatak %1 igotzea erabaki dute.
Sarrera eta laguntza gutxiago izan arren, helburua beti ere martxan dauden zerbitzuak eta programak aurrera eroatea izan dela gogora ekarri du Eluk.
Gainera, Gizarte Zerbitzuetan eman den Kartera Dekretu lege berriagaz 2017an egokitzapen batzuk egin beharko dituztela aurreratu du. Bertan zehazten diren zerbitzuak ematea derrigorrezkoa izango zaie udalei, eta horietako batzuk Lea-Artibai Amankomunazgoak eta Lea Ibarra Udal Mankomunazgoak elkarregaz eskainiko dituzte.
“Horiek emateko aurten ikusiko dugu eskaintzen ditugun zerbitzuetatik zeintzuk diren gure eskumenekoak. Martxan ditugun zerbitzuak eta dekretu horretan zehazten direnak batzordeetan aztertuko ditugu, eta zeintzuk eman ditzakegun edota noraino ailegatzen garen ikusiko dugu”.
5. edukiontzia. Bestalde, ingurumen arloan, zaborren kudeaketaren inguruan bestelako lanketa bat egiten ari dira batzordean. Zerbitzua zelan doan eta zertan hobetu daitekeen aztertzen dabiltza.
5. edukiontzia herri guztietan jartzea adostu dute dagoeneko, eta Gipuzkoan moduan, organiko denen bilketa egitea gailentzen dutela dio, herritarrei bilketa erraztu asmoz: “Herri batzuek badute autokonposta edo auzokonposta, baina herritar denei eman nahi diegu organikoa biltzeko aukera, eta horregatik 5. edukiontzia ezarri nahi dugu”.
Aurreko agintaldian Milloi auzoko Andonegin konpost planta egiteko proiektua diseinatu zuten Berriatuak, Lekeitiok, Markina-Xemeinek eta Ondarroak, eta, orain, Bizkaiko?Foru Aldundiagaz harremanetan daude proiektu hori eskualde osoan gauzatzeko: “Proiektu pilotua egin nahi dugu Andonegin, eta aurreko hilean aldundian aurkeztu genuen, eta haren erabakiari itxaroten gaude”.
Eskualdeko bi amankomunazgoak elkarregaz ari dira proiektu hori bultzatzen. Proiektua “ondo landuta eta garatuta” dutela kontatu du Eluk. Halaber, gogora ekarri du, gaur egun Lea-Artibaiko ia 1.300 familiak autokonposta edo auzokonposta egiten dutela. Horiek haien organiko guztia kudeatzen dute.
Gainera, auzokonpost bati egindako analisietan A motako konposta lortzen dela ikusi dute, kalitate gorenekoa: “Guretzat hori oso garrantzitsua da, eta beste auzokonpostak ere aztertuko ditugu”.
Bestalde, Gaztedi Programan eskualdeko hamabi udalerriak daude. Aldundiagaz duten hitzarmen horretan 18-26 urte bitarteko gazteei bideratutako ekimen desberdinak batzen dituzte, esaterako, Gababusa edota Hezkidetza programak.
Eluk esan duenez, gizarte zerbitzuetara zein hondakinen kudeaketara bideratzen den dirua optimizatzea lortu nahi dute. “Nabarmendu nahi nuke zein garrantzitsua den eskualdeko herriok elkarregaz joatea, eta zerbitzu hauek elkarregaz emotea; horrek aberastasun handia ematen digu, eta denok izan ditzakegu zerbitzu gehiago, bakarrik emanda baino”.
[ELKARRIZKETA] Rakel Elu Amankomunazgoko lehendakariari urtarrilean egindako elkarrizketa.
Erlazionatutako edukiaRakel Elu: "Akordioak lortzeko zabalik nago, baina azpi jokorik barik"
