Abdelfettah Louajarik eta Samira Ahbouchek irabazi dute Markina-Xemeingo kros nagusia

Eider Mugartegi

2017/07/09

Guztira, 79 korrialarik hartu zuten parte atzo [uztailak 8] arratsaldean lehiatu zen 16 urtetik gorakoen kros herrikoian. Helmugara iristen lehen gizonezkoa Abdelfettah Louajari izan zen (24:46). Abantaila handiagaz sartu zen Louajari Zelaiko helmugan. Lasterketaren hasieratik jarri zen buruan eta aurrean, ia bakarrik egin zituen lasterketaren 7 kilometro eta 800 metroak.

XIX. Atletismo Eguneko kros nagusiko parte hartzaileak.

Lehen emakumea, berriz, Samira Ahbouche (29:11) izan zen. Ahbouchek ere abantaila handia atera zien bigarren eta hirugarren postuan gelditu ziren Saioa Elaso Delgado (30:46) eta Inmakulada Ruiz Teran (31:29) beteranoei. Gizonezkoen podiuma Othman Bougader (25:39) eta Gontzal Bilbao Perez bilbotarrak (28:29) osatu zuten. Herriko lehen emakume eta gizonezkoak ere eduki zuten saria. Lide Azkue Iruretagoiena eta Iñigo Perez Pazos izan ziren herriko lehenengoak. Bestalde, urtero modura, Fortunato Vencedor 87 urteko korrikalariak ere parte hartu zuen Markina-Xemeingo proban. Txalo artean eta herriko umeez lagunduta heldu zen helmugara. KROS NAGUSIA SAILKAPENA Atleta helduez gain, gazteak ere izan ziren atzo ospatu zen XIX. Atletismo Eguneko protagonistak. Denetara, txupete, aurrebenjamin, benjamin, alebin eta txikien mailetako 106 korrikalarik hartu zuten parte Zelaiaren beheko partean egin ziren abiadura probetan. 60, 80, 300 eta 600 metrotako lasterketak eta erreleboak egin zituzten hasteko, eta pisu jaurtiketa egon zen, ondoren, berdegunean. Abiadura probak amaituta lehiatu zen kros txikia, eta ondoren, helduen herri krosa. Izaro Aranburu aulestiarra eta Jonan Bilbao markina-Xemeindarra izan ziren kros txikiko irabazleak. ABIADURA PROBETAKO ETA KROS TXIKIKO EMAITZAK Omenaldia. Kros txiki eta nagusien sariak banatu orduko, urte askotan Markina-Xemeingo Atletismo Taldeko entrenatzaile izan diren Jose Luis Mugartegi eta Gabriel Telleria omendu zituzten. Egindako lana eta atletismoaren inguruan herrian sortu duten ilusio eta zaletasuna eskertu zieten. Bertso, opari eta txaloak jaso zituzten euren ikasle, guraso eta taldeko kideengandik.