Jose Mari Argoitia, kultura eta musika maitale
Bada Ondarroan kulturari eta musikari ekarpenik egin dion jenderik, eta baita gure artean egon ez arren aztarna lagatzen jarraitzen duenik. Horietako bat da Jose Mari Argoitia San Martin
2016ko apirilaren 27a zen Jose Mari Argoitiaren bizitzako binilozko diskoak bere azken soinua atera zuenean. Beharbada, Marea gora igo zenean Lo egin zuen betirako. Altxor handia laga zuen herrian Itoizen abesti ezagunenetako batzuk sortu zituen lagunak. Agur esan zuen, betiko! Marabilli Sormen Festibala herriko txokoak alaitzen dagoen egun hauetan, bere hutsunea somatzen dute Manuelistek: «Asko ikasi genuen berarengandik». Irrikaz itxaroten zuen hitzordua izaten zen, berak atsegin zituen diziplinak uztartzen zituen festibala herrian bertan egiten baitzen. 2015eko Marabilli festibalean Montxo Armendariz eta Asier Altunagaz batera igo zen Goiko Zineko oholtzara, hainbeste maite zuen zinema munduaz solasteko. Jende gutxik sakontzen zuen Argoitiak beste.
Argoitia, Montxo Armendariz eta Asier Altuna zinegileekin.
Ez zen geldirik egotekoa, normalean isilik, baina lanean aritzen zenBere gertukoek ordutegirik gabeko gizon bat zela esaten dute: «Zerbaitetan sakontzen bazebilen edo lanean ari bazen ez zeukan ordutegirik. Orduek baino gehiago pisatzen zion gogoak». Kazetaria izatez, Zuzenbide ikasketak ere hasi eta ia amaitu zituen Donostian, eta herriko politikagintzan ere bere sartu-irtenak egin zituen; «ez zen geldirik egotekoa, normalean isilik, baina lanean aritzen zen». Euskal Telebistako saioetako zuzendari eta gidoilaria izan zen. 1987an ETBko programen zuzendaria zen Mikel Lejarzaren taldeko kidea zen Argoitia, telebistako programak Miramongo estudioetan egiten hasi zirenean, bi plato baino ez zituen estudio haietan Argoitia izendatu zuten musika saioen arduradun, jakitun hori zela berak atsegin zuen mundua. Handik abiatuta, Atrila (1988), Jazz eta aurten (1988), Ikuskaria (1993), Klasikoen txokoa (1995) porgramen buru izan zen, eta geroago baita Eklipsea eta EITB Kultura gaua saioena ere.
Etxekoek Derioko Euskal Bibliotekara, Labayru Fundaziora eraman zituzten bere ondasunak, artxibatu eta erabiltzeko. Behar duenak hartu, gozatu eta sakontzeko, berak atsegin zuen legezOrduan berrikuntza izugarria suposatu zuen Katukale programa ere bere eskutik etorri zen. Euskal Herriko musika taldeak zuzenean aritzen ziren saio hartan, eta ikaragarrizko laguntza izan zen musika talde asko ezagutzera emateko: «Berea izan zen ideia, saioari zein forma emango zioten ere berak erabaki zuen. Dekoratua zein izan behar zen ere berak erabaki zuen», gogoratu zuen bere lagun eta musikari Jean Marie Ecayk. Utzi duena Argoitia egin zuenarengatik bezain garrantzitsua da herritarrentzat utzi duenarengatik. Bere kulturzaletasun handia zela eta, Artabide kaleko seigarren solairuko etxe hartan utzi zituen hainbat liburu eta diska, dokumentu asko, hausnarketa ugari eta lan pila. Etxekoek Derioko Euskal Bibliotekara, Labayru Fundaziora eraman zituzten bere ondasunak, artxibatu eta erabiltzeko. Behar duenak hartu, gozatu eta sakontzeko, berak atsegin zuen legez. Sumatu dute bere hutsunea etxeko, kuadrillako, laneko eta Marabilliko lagunek. Urte eta erdi igaro da gure artean egotea laga zuenetik, Artabideko seigarren solairu horretan argirik pizten ez denetik, baina bere izateari eta lanari esker beti egongo da bere zati bat euskal kulturan txertaturik.
Argoitia, hainbeste maite zuen Marabilli Sormen Festibalean.
