6. Literatur Amuak jaialdia egingo da Ondarroan
Ondarroako zein Euskal Herriko literaturan erreferenteak diren artistak eta ikuskizunak bilduko ditu azaroaren 1etik 5era egingo den jaialdiak. Literatura izango da oinarri nagusia, eta horren inguruan adin guztietako pertsonentzako eskaintza egongo da. Horrez gain, herritarrek euren sormena garatzeko lekua ere edukiko du Literatur Amuak jaialdiak.
Ohikoa den modura ikastetxeetako ikasleek egiten dute ipuin rallya, Augustin Zubikarai nobela sariak eta nanoipuin lehiaketako sari banaketak emango diote hasiera jaialdiari. Nobela sariaren irabazlea nor izango den azaroaren 1ean emango du jakitera Ondarroako Udalak. Leire Bilbaok, Ana Urkizak eta Xabier Mendigurenek osatu dute epaimahaia. Leire Beitia euskara zinegotziaren esanetan “plazerra” da halako epaimahai bat edukitzea, tartean Haur eta Gazte Literaturako Euskadi Saria jaso berri duen Bilbao. Gainera, Leire Bilbaok Maite Mutuberriagaz batera egindako Xomorropoemak eta Piztipoemak lanetan oinarrituta txikienei literaturarako zaletasuna sortzeko eta sormena lantzeko tailerra eskainiko dute. Bestalde, iazko garailea izan zen Katixa Agirrek idatzitako ‘Amek ez dute idazten’ ere aurkeztuko dute. Liburu honek amatasunaren eta arte sorkuntzaren arteko harremanaz gogoeta egiten du.
Nanoipuin lehiaketari dagokionez aurtengo sariketara 57 lan aurkeztu dituzte. Azaroaren 1ean banatuko dituzte sariak, eta irabazleek euren 140 karaktereko ipuintxoak irakurriko dituzte.
Herritarrek eta eskualdeko artistek ere edukiko dute eurentzako tartea Literatur Amuak jaialdian. Esaterako Keu Agirretxea ondarrutarra Jon Gurrutxagagaz batera arituko da zapatu gauean. Nerea Ibarzabal markina-xemeindarra kide den Txakur Gorria kolektiboak berriz burutik jota zegoela esaten zioten emakume baten histeria errezitaldia aurkeztuko dute.
Baina aurkezpen ekitaldian Txomin L. Aramaiok azpimarratu zuenez, “Literatur Amuak Euskal Herri osoko artistengan ari da ezaguna bihurtzen”. Horren harira, geroz eta aurpegi ezagunagoak etortzen dira Ondarroara eta aurtengo jaialdian Harkaitz Cano idazlea, Uxue Alberdi idazle eta bertsolaria, Gorka Urbizu musikari eta Berri Txarrak taldeko kidea, Gotzon Barandiaran idazlea eta Pello Añorga idazle eta irakaslea egongo dira, besteak beste. Azken honek azaroaren 4an egingo duen 8 urte arteko haurren gurasoei eta hezitzaileei zuzendutako tailerrean parte hartzeko izena eman behar da 94 683 36 68 telefonoan edo mrey@ondarroa.eus helbidean.
Antolatzaileek zehaztu dutenez, ekitaldi guztiak Kofradia Zaharrean egingo dira, bai lehen pisuan eta baita bigarrenean ere. Nabarmendu nahi izan dute ikuskizun guztiak doakoak izango direla.
Liburuen Amuak. Irakurle taldeak hitzordua dauka zapatuan Txomin Agirre udal liburutegian, 10:00etatik 12:00etara. Oraingoan, Anjel Lertxundiren ‘Zu’ liburuaz hitz egingo dute Joxe Mari Urteagarekin batera. Parte hartu nahi dutenek, udal euskara zerbitzuko 94 683 36 68 telefonoan edo liburutegiko 94 683 33 43 telefonoan eman dezakete izena; baita mrey@ondarroa.eus edota liburutegia@ondarroa.eus helbideetan ere.
EGITARAUA
Eguaztena [Azaroak 1]
Literatur Amuak jaialdiaren antolatzaileak, Kofradia Zaharrean egindako aurkezpenean.
Txakur Gorria kolektiboaren ikuskizuna. Argazkia: Txakur Gorria
- 12:00. Xomorropoemak eta piztipoemak, Leire Bilbao eta Maite Mutuberriaren eskutik.
- 17:00. Nerea Ariznabarretaren eta Mariano Hurtadoren ‘Ezberdin bezain eder’.
- 18:30. Zubikarai sariak eta nanoipuin lehiaketa.
- 10:00. Ipuin rallya ikastetxeetan.
- 19:30. Txakur Gorria kolektiboaren ‘Xixili’ ikuskizuna.
- 20:00. Harkaitz Cano eta Maite Arroitajauregi (Mursego).
- 10:30. Pello Añorgaren tailerra.
- 22:30. Kontzertua: Keu Agirretxea eta Jon Gurrutxaga.
- 11:30. Gosari literarioa: Uxue Alberdik ‘Jenisjoplin’ liburua aurkeztuko du.
- 19:00. ‘Galbahe’: Gorka Urbizu musikaria eta Gotzon Barandiaran idazlea..
