Umore onez eta lotsarik gabe ailegatu dira Inauteriak

Larraitz Ibaibarriaga Etxaburu

Lea-Artibai eta Mutriku

2018/02/10

Jai koloretsuetan koloretsuenak. Horrelakoak dira Inauteri festak, eta horrela ari dira ospatzen Lea-Artibai eta Mutrikun. Lotsak alboratu edo alboratzen saiatu, eta mozorroak jantzita atera dira gaur [otsailak 10] asko eta asko Inauteri zapatua ospatzera. Aulestin, Ondarroan, Lekeition eta Mutrikun, besteak beste, kalejiran aritu dira goiz partean, musika eta herritarrak lagun. Aulestin, Torrezelain batu dira herritarrak, eta plazaraino joan dira kalejira alaian. Ostean, kuadrillek antzezpena egin dute. Lau talde aritu dira zeukaten onena ematen, eta ikus-entzuleek ondo baino hobeto pasatu dute. Azkenean, hiru sari banatu dituzte: gazteentzako saria The Luckysek eskuratu du; Aimar eta Oier anaiak pozik azaldu dira irabazi ostean; “ilusio handia egin digu”, esan dute, beraien Inauterietako lehen saria jaso ostean.

Estatua janzteagatik saria irabazi du hirukoteak Aulestin

Nagusien saria Artaburu kuadrillarentzat izan da; beste behin, ikuskizun ederra eskaini dute, umore ona nagusi. Hirugarren sari bat ere banatu dute; jantzi originalarena. Azken hori Maialen, Janire eta Iratxek irabazi dute, estatua mozorroagatik.

[zuzenean ARGAZKI GALERIA ikusi]

Triki-pandero kalejiran atera dira Kresala kultur elkartekoak Ondarroan, eta Kantaize eta Metal Taldeak ere emanaldiak eskaini dituzte herriko hainbat lekutan. Lekeition, Aratuste Alai estudiantinagaz kalejiran aritu dira, eta Lekitto Musika Bandak kontzertua eman du Nautika aurrean. Mutrikun ere ez da falta izan gorputzak astintzeko aukerarik: mozorro festa egin dute Zabielen txikitxoenek, eta Gure Ametsa dantza taldea, txistulariak eta trikitilariak emanaldia egin dute Beheko Plazatik hasita.

EGITARAUA IKUSI

Arratsaldean ere izan dira ekintzak han-hemenka. Etxebarrian eta Markina-Xemeinen kalejira egin dute. Frontoian bildu, eta 17:10 orduko atera dira herrian zehar etxebarritarrak. Umore onean egin dute ibilbidea ume zein nagusiek trikiti doinuak lagun. Frontoira bueltan, sari banaketa egin dute. Markina-Xemeinen, Lantz inauerien kalejira egin dute Zerutxu dantza taldeak antolatuta. Xemeindik atera, eta giro politean aritu dira dantzan. Datozen ordu eta egunetan ez da faltako ondo baino hobeto pasatzeko aukerarik herriz herri.