Bederatzi hilabete iraungo dute Ondarroako Plaiko Zubia konpontzeko lanek

Mikel Santiso

2018/02/14

Bizkaiko Foru Aldundiak atzo [otsailak 13] eman zuen jakitera zubia birgaitzeko eta konpontzeko lizitazio epea zabalik dagoela. Guztira 449.000 euroko aurrekontua edukiko dute Plaiko Zubia konpontzeko lanek. Urrirako amaitzea espero dute. Lanak nola egingo dituzten ere argitu dute: lanen ardura hartzen duen enpresak azterketa sakona egingo dio zubiari, konponbidea duten zatiak konpondu eta aldatu beharra dutenen kasuan berriak ipintzeko. Zubiko zatiak hartu eta lantegi batera eramango dituzte, bertan sakonago aztertu, zein pieza behar dituen ikusi eta posible den heinean jatorrizkoaren itxura handiena emateko. Seguru asko zubiaren bi aldeak eta baita kontrapisuak ere lantegira eraman beharko dituzte, lan handia eskatzen baitu horien berregiteak. Horrela, Jose Gonzalez Langarikak egindako zubia eraberrituta baina jatorrizkoaren itxuragaz utzi nahi dute. Udalaren helburua eta nahia eta lanak egin baherko dituen enpresaren erronka, zubia zabaltzeko moduan lagatzea izango da; 2002an zabaldu zen zubia azken aldiz.

Ondarroako Plaiko Zubia, itxita dago 2016tik.

Gaineratu dute, lanak amaitzen dituztenean urtero jasoko duela zubiak Bizkaiko Foru Aldundiko adituen bisita, bere egorearen jarraipena egin asmoz. Plaiko Zubia Ondasun Kultural bezala izendatuta dago, zehatzago monumentu bezala. Horrez gain, mota horretako estatuko zubi bakarra eta Europan geratzen den bakarrenetakoa ere badela esan dute historialariek. Zubia 2016az geroztik dago itxita. Udalak hartu zuen erabaki hori herritarren segurtasuna bermatzeko asmoagaz. Bizkaiko Foru Aldundiak Ondarroako Udalari Plaiko Zubiko lanak 2018an egingo zituela esan zionean, Zunbeltz Bedialauneta alkateak “zubia konpondu eta berriro ere herritarrek erabiltzeko moduan” egotea herriarentzako “berri pozgarria” zela aitortu zuen. Aldundiko ordezkariekin bilera asko egin zituztela gogora ekarri zuen, “ahaleginak merezi” izan zuela”. HONEKIN LOTUTA

[Azaroak 13]: 2018an konponduko dute Ondarroako Plaiko Zubia
[Maiatzak 3]: 90 urte bete ditu Ondarroako Plaiko Zubiak