Musika eta dantza artean ospatu dute Malen txiki eguna mutrikuarrek

2018/07/23

Mutrikun, asteburua pasa ondoren ere festa giroan jarraitzen dute. Jaien erdialdean sartuta, Malen Txiki edo Elkartasun eguna ospatu dute gaur [uztailak 23], giro ezinhobean. Eta jaietan ohitura den modura, musika eta dantza artean pasa dute gaurko eguna ere. Erraldoien eta Buruhandien Konpartsaren eta txistularien kalejirak alaitu ditu eguerdiko orduak. Eta ondoren, Gure Ametsa dantza taldeko gazteenek bateko zein besteko dantzak eskaini dituzte Zabiel Plazan, bertan batu diren ikusleen gozamenerako. Ikuskizuna Zazpi jauziak dantzarekin amaitu dute.

[zuzenean Malen Txiki eguneko ARGAZKI GALERIAra joan]

Batzuk dantzan ari ziren bitartean, berriz, herriko gaztetxoek euren neurrira egindako sokamututurrean parte hartzeko aukera izan zuten Goiko Plazan. Ausartu direnek Lasturko Saka baserriko zezentxoen aurrean ibiltzeko aukera izan dute. Txikienek, berriz, pottoken gainean plazari buelta-bueltaka ibili dira. Herritxaron Malen Jaien eskutik, aldiz, kantu poteoa egin dute eguerdian. Esku paperak aurrean hartuta, kantu herrikoiak abesten ibili dira tabernaz taberna. Gerokoan, Beheko Plazako arkupean Elkartasun bazkaria egin dute. Bapo bazkaldu ondoren, Andoni Ollokiegi bakarlaria entzuteko aukera eduki dute bertaratuek. Egunak beste hainbat ekintza ekarri ditu. Umeen danborrada, erromeria eta bertso musikatuekin amaituko dute eguna.

HONEKIN LOTUTA: Malen bezperako kronika

Erlazionatutako edukiaARGAKI GALERIA: Mutrikuko Malen Txiki eguna