Mutrikuko malenak kolorez zipristindu dituzte kuadrillek

2018/07/24

Etenaldirik gabe malenak ospatzen jarraitzen dute Mutrikun. Festen erdialdea gaindituta, Kuadrilla Eguna ospatu dute gaur [uztailak 24]. Urtero egin modura, kuadrilla bakoitza bestearengandik bereizten duen jantzi eta kamiseta koloredutsuekin ospatu dute eguna herritarrek. Zezenek protagonismo handia izaten dute malenetan, eta gaur ere hala izan da. Eguerdian ausartu diren kuadrillek zezen txikien aurrean futbito partiduak jokatzeko aukera izan dute Goiko Plazan. Partiduek emozio handia ekarri dute jendez beteta zegoen Goiko Plazara.

[zuzenean Kuadrilla eguneko ARGAZKI GALERIAra joan]

Arratsaldean, berriz, bestelako zezenak ikusteko aukera egon da. Alde zaharreko kale estuetatik zehar jaietako azken sokamuturra egin da, eta parte hartu duten herritarrek eta kanpotarrek Mutrikuko Arno ganadutegiko lau zezenen aurrean gozatu ederra hartzeko aukera eduki dute. Gaurkoan, gainera, Kuadrilla Eguneko bazkaritan batu dira 30 bat kuadrilla. Bapo bazkaldu eta gero, hainbat ekintzaz gozatzeko aukera egon da. Gogo-Gozo taldearen erromeria, Su Ta Gar talde ezagunaren kontzertua entzuteko aukera egongo da. Eta doinu mexikarrak atseginago dituztenek, beste alde batetik, Txapito Guzman eta Ibarrako langostinuek taldearen doinuekin batera gerriak astintzen amaituko dute Kuadrilla Eguna.

HONEKIN LOTUTA: argazkiak galeriak, egunez egun

Erlazionatutako edukiaARGAZKI GALERIA: Mutrikuko Kuadrilla eguna 2018