Ondarroan galdutako arrantzalearen bila jarraitzen dute
Larrialdi zerbitzuek domeka [azaroak 19] goizaldean Ondarroako barra musturrean desagertutako arrantzalearen bilaketari ekin diote gaur [azaroak 19], eguna argitu orduko. 08:00ak bueltan hasi dira itsasoz, airez zein lurrez bilaketa egiten Ertzaintzaren uretako unitatea, Itsas Salbamenduko helikopteroa eta Gurutze Gorriko ontziak. Ertzaintzak azaldu duenez, Guardia Zibilaren ontzi batek ere bilaketan lagundu du gaur.
Larrialdi zerbitzuek, gainera, bilaketa eremua zabaldu egin dute; Mutrikutik hasi eta Lekeitioraino. “Ordu asko pasa dira, eta pixka bat zabaldu egin behar izan dugu bilaketa eremua. 08:00etan eguna egitearekin batera, eta marea behean zegoela irten dugu aprobetxatzera ea zorterik bazegoen, baina oraindik ez dugu ezer aurkitu, eta segi egiten dugu bilaketan”, aitortu du Migel Angel Anakabe Ondarroako Gurutze Gorriko kideak.
18:00etan, berriz, bilaketa bertan behera utzi behar izan dute, argi faltagatik. Ez dute arrakastarik eduki, eta bihar [azaroak 20] 08:00etan ekingo diote bilaketa lanei, hirugarren egunez jarraian.
44 urteko arrasatearra domeka goizaldean desagertu zen arrantzan ari zela. Herrizaingo Sailak jakitera eman duenez, arrantzalearen lagun batek eman zuen abisua, domekan 02:30ak aldera. “Norbanako batek abisua eman digu, Ondarroako portu musturrean zegoen arrantzale batekin hitzordua zuela, baina ez zuela aurkitzen. Portu musturrean kainabera aurkitu du, baina arrantzalea ez zegoen bertan”.
Urpekariak Ondarroan desagertu den arrantzalearen bila. Argazkia: UVR Ertzaintza
Abisua jaso orduko gizonezkoaren bilaketa hasi zuten Ertzaintzaren urpekari talde batek eta Ondarroako Gurutze Gorriko itsas salbamenduko ontzi batek. Aldi berean, larrialdi zerbitzuetako teknikari bat eta suhiltzaileak portu musturrera joan ziren. Eguna argitu orduko, gainera, bilaketa areagotu egin zuten.
Ondarroan desagertutako gizonezkoaren bilaketa lanak, gaur goizean. Argazkia: SOS Deiak
- [2018-11-22] Bilaketa eremua zabaldu dute
- [2018-11-20] Martitzeneko bilaketa lanen gorabeherak
- [2018-11-18] Desagerpenaren lehenengo albistea
