Ondarroako Udalak 9.019.850 euroko aurrekontua edukiko du 2013rako. Iazko aurrekontu orokorragaz alderatuz gero, %13 jaitsi da, bataz beste. Aurrekontua Bilduko zinegotzien aldeko botoagaz atera da aurrera. EAJk, barriz, ezezko botoa emon du, herriko arazorik nabarmenentak kontuan ez dituela hartzen iritzita.
Udalak 437.475 euro bideratuko ditu inbertsioetara. Atal horretan, besteak beste, Alfa eraikinaren konponketari egingo diote kolpe. Horretarako, 105.000 euro aurreikusi dituzte danetara, eta horietatik 63.000 euro Itsaspen egitasmotik jasoko du udalak. Artibai egoitzan konponketak egiteko –margo lanak eta dutxa platoak ipini– 10.500 euro aurreikusi dituzte. Liburutegian 15.870 euroko inbertsioa egingo da: 11.870 euro udalak ipiniko ditu eta gainerako 4.000 euroak Eusko Jaurlaritzak. Aurrekontu horregaz bibliografia barrituko da. Berdura Plazan hobetze lanak egiteko 33.000 euro egongo dira, eta Alleri, Guzur Etxea eta Zaldupe kiroldegia hobetzeko hasitako lanei jarraipena emongo diete.
Inbertsioek behera egin duten bitartean, Gizarte Ongizateko partidak mantendu egingo dira.
Udalak jakitera emon duenez, Udalkutxatik 4.800.000 euro agindu dituzte, baina aurreko urteengatik (2009tik 2012ra arte) itzuli behar duenagatik 2013rako benetan 4.240.000 euro edukiko dituzte. Bigarren sarrera nagusia herritarrek ordaintzen dituzten tasak eta zergak dira. Udalak aurreikusi du 2013an 2012an beste jasoko duela. «Aurten ez da beste sarrerarik aurreikusten».
