Lekeitioko Udalak zine aretoa erabiltzeko hitzarmenarekin jarraituko du
Lekeitioko udalak, Fides Norte S.Coop eta Lekeitioko parrokiarekin zuen hitzarmenari jarraipena emango dio. Hitzarmenaren jarraipenarekin herrian zine zerbitzua mantendu eta beti ere, zine komertzialaren ordutegitik kanpo, aretoaren erabilera eskuratuko du udalak.
Urtarrilaren 23an egindako batzarrean orain arteko balorazioa egin dute hiru aldeek. Batzar horretan, Fides Norte S.Coop-ek 2012an izandako 14.306,46 euroko defizita aitortu dio udalari.
Herritarrentzat zinea galtzea suposatuko lukeenaz jabetuta, udalak, Ikusgarri zinema kudeatzen duen enpresari gehienez ere 15.000 euroko diru laguntza emango dio 2013an. Parrokiak bere aldetik, iaz jeitsitako lokalaren alokairuaren prezioa bere horretan mantenduko du aurten. Iaz hitzarmena urte erdirako izan zenez, 7.153 euroko diru laguntza jaso zuen zinea kudeatzen duen enpresak.
Ekainetik urtarrilera bitartean egindako erabileraren balorazioa egin ostean, pozik agertu da udala. Izan be, hitzarmenak iraun duen bitartean, bertso saioa, Lingua Nabarjorum antzerkia, Lekeitioko musika bandaren kontzertua, Euskal Zine eta Bideo Bilera eta Barrura begiratzeko leihoak eta Gazta zati bat filmak proiektatu dira.
