Bost ondarrutar epaituko dituzte otsailean Madrilgo eta Parisko auzitegiek
Datorren martitzenean hasita, bost ondarrutarren kontrako bistak eta epaiketak egingo dira Espainiako eta Parisko Auzitegi Nazionalean.
Hilaren 5ean, Urtza Alkortaren, Ibon Iparragirreren eta Asier Badiolaren bista egingo da Madrilen; Espainiako hiriburuan egingo dira, baita be, Zunbeltz Larrearen epaiketa –otsailak 11– eta Ibon Iparragirre eta Asier Badiolarena –otsailaren 18tik 20ra–. Otsailaren 18an hasiko da baita be Aitzol Etxaburu eta beste bederatzi lagunen epaiketa Parisen, eta hilabetez luzatuko da.
Parisera joateko autobusak
Etxabururen kontrako epaiketak iraun bitartean, elkarretaratzeak egingo dira eguaztenero Alamedan. Gainera, martxoaren 3an, Pariserako autobusa aterako da Ondarroatik. Norbaitek Parisera beste egunen baten joan nahiko balu, auzipetuen herrietatik astero aterako da autobusa.
Bestalde, Kemen Urangaren estradizio errekurtso epaiketa martxoaren 27an egingo da Londresen (Ingalaterra). Epaiketa eta bisten aurrean, Ondarroako Udalari mozioa aurkeztuko dio ezker abertzaleak.
EKIMENAK
- Otsailak 8, 18:30ean. Ezker abertzalearen agerraldia Alamedan.
- Otsailak 11. Elkarretaratzea Alamedan.
- Otsailak 16. Manifestazioa Alamedatik.
- Otsailak 18. Elkarretaratzea Alamedan.
- Otsailak 18-martxoak 18. Etxabururen epaiketak iraun bitartean, elkarretaratzeak eguaztenero.
- Otsailak 20. Elkarretaratzea Alamedan.
- Martxoak 3-4. Ondarroatik autobusa aterako da Parisera.
- Martxoak 27. Elkarretaratzea Alamedan.
