Euskal Ligako finaletan jokatuko dute bertoko pelotariek asteburuan
Bihar eta etzi jokatuko dituzte bertoko pelotariek Euskal Ligako finalak. Zesta puntako, eskupelotako eta palako jokalariek edukiko dituzte partiduak, maila desberdinetan.
Eskupelotan bihar jokatuko dute Markinako Pelota Taldeko Berasaluzek eta Perosanzek ohorezko mailako eskuz binakako finala. Tolosan jokatuko dute Elorrioren kontra.
Finalaurrekoa errez irabazi zuten Berasaluzek eta Perosanzek, 22 eta 8. Finala irabaztea «gaitz» ikusten duten arren, aukerak badauzkatela uste dute Markinako Pelota Taldekoek. «Finalaurrekoan be sorpresa emon zuten, eta oraingoan be emon dezakete», diote.
Lehengo astean Euskal Ligako finalerdietan Markinako Eskupelota Taldeko kadeteek, Urizar eta Arrizabalaga Txirloik egindako beharra azpimarratu nahi izan dute, horraino heltzea «itzela» delako. «Horrek esan nahi du Euskal Herri mailan onenetakoak direla», diote entrenatzaileek.
Bihar bertan Lea Ibarra Motrolloko Urionabarrenetxeak be finala jokatuko du, senior mailan. Bergaran izango da hitzordua, 19:00etan.
Zapatuan izango dira Durangon zesta-puntako Euskal Ligako finalak, 16:00etatik aurrera.
Kadete mailan, Mutrikuk Zumaiaren kontra jokatuko du eta gazteen mailan, Markina-Xemeingoek Gasteizen kontra. Seniorretan, ostera Txirtuk eta Garate Donostiaren kontra arituko dira.
Ohorezko mailan eskualdeko talde bi heldu dira Euskal Ligako finalera: Markina-Xemein tea Berriatua. Markinako Eskupelota Taldetik Arbek eta Gandiagak jokatuko dute finala, eta Berriatuatik, Antxonek eta Garaldek.
Lea Ibarra Motrolloko jokalariek palako finalak jokatuko dituzte zapatuan. Gasteizen izango dira, 17:00etan.
Lehenengo partidua Olatzek eta Anek jokatuko dute Hernaniren kontra; bigarrena, Iera Agirrek eta Leire Etxanizek, Donostiaren kontra.
