Giro ederrean alkartu dira herritarrak parte hartze handiko Okela egunean
Goiz goizetik, jendetza batu zen Plazabarripean nekazarien postuetara. Ortuariak, okela, gazta, eztia… danetik erosteko aukera eduki zuten hara joan ziren herritarrek, eta danak, «bertoko produktuak eta kalitatezkoak».
Goiz erdian, Gorka Ostolaza eta Iratxe Ibarra bertsolariek errepaso edarra emon zioten bertsotan, librean, Plazabarripean gertatzen ari zenari.
Ostean, ume eta nagusi hurreratu ziren eszenatoki albora ardien ile mozte erakustaldia ikustera. Makinagaz alde batetik eta artaziekin bestetik, ardiak biluzten ikusteko ikastaldi ederra eskaini zuten.
Eguerdi bueltan batu zen jenderik gehien Plazabarripera, goiz guztian erretzen egondako 20 bildotsen dastaketara. Ilara luzea itxaron behar izan zuten herritarrek bildotsa dastatzeko, jendetza batu zen-eta bertara.
Eguna biribiltzeko erromeria eskaini zuen Kupela taldeak Kontzekupean. Trikitixa eta pandero doinuei jarraituz, jendea hasieratik animatu zen dantzara be, eta giro edarrean emon zioten amaiera egunari.
Oraindino balorazio ofizialik egin ez badute be, Okela Egunaren antolatzaileek lehenengo inpresioa «oso oso ona» izan dela azaldu dute. «Egun biribila izan da», diote.
Nekazari gehienek asko saldu zutela adierazi dute. Nabarmentzekoena, jendearen parte hartzea izan dela diote antolatzaileek. «Pentsatu baino jende gehiago ibili zen», diote. Horregatik, espero baino jende gehiago joan zelako, motz be geratu zirela azaldu dute. «Datorren urterako hobetzekotzat daukagu hori», diote.
Jendearen erantzuna «itzela» izan zela diote, eta Okela Egunak «egun berezi» itxura hartu zuela. «Jendea gogoagaz ikusten zen eguna ospatzeko», diote.
