Sexu askatasunari eta sexu dibertsitateari buruzko manifestua onartu du Lekeitioko Udalak
Gaur, maiatzaren 17a, homofobia, transfobia eta lesbofobiaren kontrako eguna dela eta, Lekeitioko udalak sexu askatasunari eta dibertsitateari buruzko manifestua onartu du. Emakumea eta Berdintasuna batzordetik bideratu du manifestua.
Udalak dei egin die hezkuntzako erakundeei, eskola kontseiluei, guraso-elkarteei eta gizarte osoari manifestuaren alde agertu eta konpromisoak hartzeko. Hurrengoak dira konpromezuak:
1. Herritar danak errespetatzea, haien orientazio sexuala eta genero-identitatea edozein dela be.
2. Pertsonen duintasuna eta osotasun fisikoa -estatuetako gobernuen legeen bidez bermatu beharrekoak biak- errespetatzea. Espazio pubikoan eta, bereziki, hezkuntzaren arloan emoten diren adierazpen homofobo, lesbofobo, transfobo eta bifoboak irmotasunez kondenatzea.
3. Mundu osoan erabat despenalizatzeko eskatzea, hori da-eta herritar danen artean benetako sexu askatasuna eta berdintasuna egotearen seinale. Bereziki kondenatzea LGTB taldeko pertsonen kontrako heriotza zigorra oraindino be sexu-askatasuna despenalizatu ez duten herrialdeetan, eta zigor horren kontra egitea.
4. Transexualitatea despatologizatzeko eta DSM eta CIE psikiatriako eskuliburuetatik kentzeko eskatzea.
5. Espazio publikoan eta bereziki hezkuntzaren arloan egindako adierazpen afektibo-sexualen eta genero-identitateen ikusgaitasuna errespetatzea.
6. Beharrerako, hezkuntzarako eta aisialdirako guneak erabiltzeko eskubidea bermatzea, sexuaren edo genero-identitatearen ondoriozko inolako diskriminaziorik barik.
7. Aukera sexual eta genero-identitate bakoitzaren irudi duina sustatzea komunikabideetan, baita agerraldi kulturaletan, sozialetan eta artistikoetan be, eta bereziki, hezkuntzaren arlokoetan.
8. Gizarte anitzago, ireki eta integratzaileago baten alde beharra egiteko esperientziak eta jarrerak sustatzea, orientazio afektibo-sexuala eta genero-identitatea inorentzat oztopo izango ez diren gizarte bat.
9. Sexualitate anitzerako bidea egitea, mitorik barik, konparaziorik barik, inposiziorik barik eta sexualitate askearen -aukera eta orientazio sexualerako eta genero-identitaterako askatasuna barne- kontrako jokabide danen kontra egitea.
