Erdiko postuen lasaitasunaren bila
Traineru barriagaz eta egindako indarra hobeto aprobetxatuta, horrela hasiko du KAE1 denboraldia Ondarroa Arraun Elkarteak; Jon Lete entrenatzailea eta Ibon Burdiñi arraunean ariko dira.
Zierbenako estropadan zenbagarren egingo duten galdetuta, pentsakor geratu da Gorka Elordi Ondarroa Arraun Elkarteko presidentea. Hiru-lau segundoren ostean, «laugarren» esan du. Hori da bere desioa KAE1 denboraldiko lehen estropadarako, bosgarren izateko aukerak handiagoak direla pentsatzen badu be. «Laugarren ezusteko positiboa litzateke; seigarren ondo legoke, eta zazpitik atzera geratuz gero, beharbada helburu errealistagoak ipini beharko genituzte».
Liga hasi aurretik, baina, oso argi dauzkate helburuak. Lehen helburua eta garrantzitsuena mantentzea da; bigarrena, erdiko tandan ibiltzea. Hortik gorako guztia «ondo etorria» izango da.
Itxura polita hartzen dio taldeari Elordik. Iazko oinarri beragaz, eta aldaketa bat edo bestegaz dator Ondarroa. Azpimarratzekoa da mutrikuar biren etorrera. Aurreko urteetan Zumaian ibili izan dira biak. Bigarren gauza aitagarria bi beteranoren itzulera da: Jon Leterena –hirugarren urtez bera da entrenatzailea– eta Ibon Burdiñi-rena. Gazteek iaz hartutako esperientziari beterano bien esperientzia gehituko zaio uretan. «Ibon urte askoan egon da arrauna lagata, eta arraunera buelta egin du, jende gazteari laguntzeko gogoz». Gazteak gustura daude erabakiagaz. Gainera, «Ibonek izugarrizko saltsa ipintzen du», dio, irribarrez, Elordik.
Denboraldiaurrearen balantzea eginda, estropadetan esperotako erantzuna emon du traineruak. Traineru barriagaz dabiltza mutilak. Uretan igarri-igarria da hori. Lehengoak hamabi urte zuzekan, eta oraingoa gogorragoa da, eta egindako indarra hobeto aprobetxatzen da. Forma barriagaz, ziabogak errazago hartzen dituzte. Neguko estropadetan oso gustura geratu ziren, Orion eta San Pedron oso ondo egin zuten. Azkan hitzorduei begiratuz gero, Mutrikun ez ziren hain gustura gelditu, bai, baina, Lekeition. Eta azkan «proban», etxean, bosgarren postua eskuratu zuten.
Bateko eta besteko estropadak, ez da erraza domekatik aurrera ondoan zeintzuk edukiko dituzten jakitea. Zierbena eta Santurtzi goi-goian ibiliko direla emoten du. Isuntzak urtero emoten du maila ona, eta ligak aurrera egin ahala hobetzen joaten dira lekeitiarrak. Ondarroa euren ondoan ibili da denboraldiaurrean, batzuetan aurretik, besteetan atzetik, Ea lortzen dugun euren parean ibiltzea». Elantxobekoa be kontuan hartzeko trainerua izango da, bai eta Getaria eta Trintxerpe be. Taldeen maila ikusita, denboraldi parekatua espero daiteke eta maila altukoa. Multzoan egon daitezke asko eta asko, segundo gutxi batzurengatik nahikoa aurrean ala atzerago. Eta gauza bat argi dago: huts egiten duena ez da argazkian agertuko.
II. Antiguako Ama estropada.
Argazkilaria: Joseba Arrizabalaga
II. Antiguako Ama estropada
Argakilaria: Joseba Arrizabalaga
