Lekeitioko 21. triatloiak atletaz beteko du herria zapatu arratsaldean
Zapaturako antolatu du Garraitz Kirol Taldeak Lekeitioko 21. Triatloia. Isuntza hondartzan hasiko da proba, emakumezkoak 16:00etan hasiko dira; gizonezkoak, ostera, 16:15ean.
Boxak eta helmuga Independentzia plazan egongo dira, urtero legez.
Betiko modura, sprint distantziakoa izango da triatloia. Horrela, igerian 750 metro egingo dituzte atletek, bizikletan 21 kilometro, eta aringa-aringa 5 kilometro.
Bihar jokatuko den triatloia Euskal Herriko triatloi zirkuiturako puntuagarria izango da.
Igeriketa proban farora joan-etorria egin beharko dute atletek, lauki formako ibilbidea eginez. Horrela beteko dituzte 750 metroak.
Lehenengo trantsizioaren ostean, bizikleta buelta «gogorra» egitea tokatuko zaie: Plazakolara joan-etorria. Bide horretan %4,26ko eta %5,20ko igoera ertain eta maximoak edukiko dituzte ateletek. 21 kilometro egingo dituzte horrela.
Amaitzeko, Lekeitioko kaleetan aringa-aringa egingo dute atletek, 5 kilometro osatu arte.
Betiko modura bertoko atletek eta nazioartekoek parte hartuko dute proban.
