Eguneko Zentroa zabal dadin sinadura bilketa hasi du Ondarroako Udalak
Bi astez luzatuko da Ondarroako Eguneko Zentroa irekitzearen alde martxan ipinitako sinadura bilketa. Horixe jakin eragin du Ondarroako Udaleko Ongizate Batzordeak, herritarrei ekimenari euren babesa emoteko eskatuaz.
Izan be, Bizkaiko Foru Aldunditik eskutitz bat ailegatu zen Ondarroako udaletxera, irekiera azaro inguruan izango zela esanez. Halanda be, eskutitzean ez zen argitzen azaroan zein zerbitzu ipiniko den martxan. “Guk uste dugu goiko zerbitzuari buruz ari dela aldundia gutunean, eta eguneko zentroa zabaltzea atzerago etorriko dela”, adierazi du Rakel Elu ongizateko batzordeburuak.
Hartara, Eguneko Zentroaren irekierak atzerapen barri bat eduki dezakeela ikusita, “premiazkotzat” ikusi du Ongizate Batzordeak sinadura bilketa bat egitea.”Aldundiak ez du zehazten, eta nahiz eta esan irekiera laster izango dela, sinadura bilketa bat egitea premiazkoa dela adostu du ongizate batzordeak”.
Bizkaiko Foru Aldundiari eskutitzez jakin eragin dio Ondarroako Udalak sinadura bilketa bat hasi duela. Horregaz batera, udal ongizateko taldeei zein alderi politikoei emongo zaie eskaera orria sinatzeko. Bildutako sinadurak aldundira bidaliko dira kanpaina amaituaz batera.
Sinatzeko orria, hiru lekutan
Herritarrek oso ondo hartu dute udalak martxan ipinitako ekimena, eta eskertu egin dute, batzuek premia daukatelako eta beste batzuek “noiz edo noiz premia” eduki dezaketela iritzita. Sinatzeko orriak Antiguako Aman, udaleko gizarte zerbitzuen bulegoetan eta Artibai egoitzan daude eskura.
