Zerutxu dantza taldeak emanaldia eskainiko du domekan
19:30ean kalejira egingo dute Xemeingo lokaletik Uni frontoiraino. 20:00etan hasiko da ordu bete inguru iraungo duen emanaldia.
Zazpi dantza desbardin egingo dituzte Zerutxukoek.
Hasteko, agurra dantzatuko dute 20 lagun inguruk, aurreskuaren zati bat. Ostean, Oñate dantzatuko dute. Lehenengoz plazaratuko dute dantza hau Zerutxukoek. “Dantza hori da dantza barriak ataraten jarraitzen dogunaren adibide”, esan dute.
Jarraian, txikiek Irri dantzak dantzatuko dute, Baztango dantza. Hori eta gero Zuberoako maskarada egingo dute. “Berez 40 pertsonaje baino gehiago daude maskaradan, baina guk bost hartuko ditugu”, esan dute.
Ibarzabal dantza izango da hurrengoa. Arku dantza da, eibartar batek ataratakoa. Horren ostean, txikiek Bera Nafarroako dantza egingo dute. “Izatez hamar zati dauzka, baina sei dantzatuko ditugu larregi ez luzatzeko”, esan dute.
Azken dantza izango da barrikuntzarik handiena: Guridiren Amaia operako ezpata dantza. 18 lagunek egingo dute dantza hori. “Zortziko hori operarako asmatu zuten, eta guk ahalik eta bardinen egiten dugu”, diote.
Zerutxu dantza taldekoek herritar guztiak gonbidatu nahi dituzte emanaldia ikustera.
