Abuztuaren azken asteburuan eman zuten Lekeition azken pelikula,
Llanero solitario. Egun hartan zinera joan ziren guztiek takilako andrearen ahotik jakin zuten pelikula gehiagorik ez zegoela. Azkenengo pelikula bai, baina udaletxeak hartu du kargua ezta? galdetzen zuten guztiek. «Bai udaletxeak hartu du aretoa eta ikuskizunak eskainiko dira, baina hau da azken pelikula», azaldu zien takilakoak.
Horrela geratu zen. Pelikulak ematen zituen zine enpresak, Fides Nortek, utzi egin zuen. Digitalizazio era datorrela-eta makina berri bat erosi behar zuten, hiru soldata ordaindu eta Lekeitioko zinean zenbat jende zebilen ikusita ez zien merezi jarraitzea. Udaletxeak enpresari ematen zion diru-laguntza ez zen nahikoa izan zabalik mantentzeko.
Azken pelikula amaitu zenean, ia astebururo zinera joaten ziren ikusleak hori horrela ezin zela geratu pentsatu zuten. Horrela, Lekeitioko jaiak eta gero, WhatsApp bidez geratu eta elkartzea erabaki zuten zinezaleek. Ehundik gora lagun elkartu ziren.
Hortik aurrera zer edo zer egin behar zutela erabaki zuten: proiektu txiki bat.
Lehengo enpresagaz berba egitea izan zen lehenengo pausua. Zenbat kostatzen da makina digital bat, zenbat kostatzen da Lekeitiora pelikulak ekartzea, zenbat diru behar dugu… Datu batzuk lortu zituzten eta datu horiek oinarri hartuta, dirua aurreratzeko asmoz, enpresa bateri eman beharrean eurak autogestionatzea erabaki zuten.
Interneten begiratu zuten ea horrelako eredurik zegoen, eta Mallorcan (Herrialde Katalanak) Cineciutat plataforma dagoela ikusi zuten. Eurekin hartu emonetan jarri ziren. «Zeueri pasatu zaizuen arazo berdina daukagu, zarratu egin digute zinea». Makina digital batek 60.000 euro balio zituela jakin zuten euren bidez. Zelan lortuko ditugu? Gaur egun erdi prezioan ere makinaren bat aurkitu ahal zutela izan zen albiste ona.
Optimismo horrek lagunduta galdetzen hasi ziren eta Euskal Herri mailan Cinematograficas Doca enpresa aurkitu zuten. 43.000 euroko makinaria daukate. Orduan, eskuorri bat atera zuten Lekeition zinea zabaltzeak zer kostu duen adieraziz. Egin dituzten azterketen arabera ze kopurutara ailegatu behar den hori lortzeko. Gutxienez 250 lagun batu behar dira 100 euroko kuota bategaz. Horrela makina erostea eta pelikula batzuk ekartzea lortu al dute.
Asmo hori kalera atera zuten, eta urriaren erditik eta azaro erdialdera asteburuero ateratzen zuten mahaitxoa Eskolapera sinadurak batzeko. Sinatzen zuenak bazkidetza bat sinatzen zuen, hori argi uzten ahalegindu ziren. Deitu egingo zitzaiela eta aportazioa 100 eurokoa zela jakitera eman zuten. Azaro erdialdea ailegatu zenean, 450 bazkide birtual lortu zituztela ikusi zuten.
Herriaren borondate ona ikusita, hurrengo pausua talde modura ofizialtasuna lortzea izan zen. Eusko Jaurlaritzara joan ziren, eta irabazi asmorik gabeko elkarte bat eratu zuten.
Herriaren erantzuna jasota, bazkidetzak, udaletxean aurkeztu zituzten eta laguntasuna eskatu. Abenduaren 20an batzartu ziren udaletxean eta urtarrilaren 17an erantzun zuen udalak. 23.000 euroko laguntasuna emango dute, baina proiektua egi bihurtzea falta da.
Elkarteko batzarra egin zuten urtarrilaren 18an eta kontu zenbaki bat zabaldu dute. Orain bazkideen momentua da.
Funtzionamendua
Oinarrizko makina bat aukeratu zuten hasieran, baina herriaren erantzuna ikusita, eta makina saltzailearen gomendioz makina normaltxoago bat erostea erabaki dute. Lehenengo makinak 43.000 euro balio zituen, eta azkenean erosiko dutena 49.500 eurokoa da.
Bazkidetzen kopuru nahikoa egonez gero hurrengoko pausua funtzionatzeko era zehaztea izango litzateke. Zine munduan hiru mekanismo daude: produktorak, banatzaileak eta programatzaileak. Era bi daude, edo programatzaile bategaz behar egin eta berak antolatzen du guztia edo zuzenean produktorekin behar egiten duen pertsona bat hartu soldata ordainduta . Lekeitioko zinezaleak programadoreekin berbetan dabiltza. Euskal Herrian hiru-lau daude, bat Lekeition egon zena Fides Norte, Areto, Barton eta orain bederatzi areto eroaten dituen Uxue Urbietagaz daude berbetan.
Bestalde, Zinema mailan bi erakunde daude, Zine Euskadi eta Zine Europa, ematen den programazioaren arabera diru laguntzak ematen dituztenak. Ematen diren europear pelikula, euskal pelikula edo euskerara ekoiztutako pelikulen arabera urte bukaeran programazioa aurkeztu eta laguntzak ematen dituzte.
Udalak, bestalde, diru laguntza ematen duenez, euskerazko zinea bultzatu nahi duela esan die, eta zinezaleak ere ados daude. Ez dute nahi dena zine komertziala izatea.
Hasierako proposamena izan zen hogei pelikula ematea bazkide egiten direneri. Orain makina dela eta, 400 bazkide behar dira makina erdi ordaintzeko eta hogei pelikulak balio dutena ordaintzeko.
400 bazkidera ailegatuta, kalera begira egin zuten proposamena beteko dute. 400 bazkidera ez badira ailegatzen hogei pelikula ezingo dira izan. 350 bazkide badira hamabost edo hamazazpi pelikula izango dira.
Lehenengo urtean, makinari lotuta daude, ahalegin berezia egin behar dute proiektuak aurrera egiteko. Hurrengo urtean, aldiz, bazkidetza erdi berdina balitz, 300 edo 400 bazkide, 40.000 euro izango lituzteke eta guztia pelikulak ekartzeko erabiliko litzateke.
Bestalde, udaletxearen benetako laguntasuna 23.000 euro baino gehiagokoa da. Zine aretoa elizarena da, eta alokairua udalak ordaintzen du, baita zine horrek dituen gastuak ere: ura, argi indarra, garbitasuna, segurua. Lehenengo urtean gastu horien kargu ere egingo da udala, urte beteko hitzarmena amaituta, dena ondo badoa, udalak laguntza eman dezake,baina esate baterako garbitasuna euren esku geratuko litzateke.
Gauza aurrera badoa, bazkidetza gehitu nahi dute. Kuotak jaitsi, eta lanpostuak sortu takillan eta proiekzioan.
Sarreretan ere desberdintasuna egongo da bazkideen eta ez direnen artean. Prezioak lehengo berdinak izango dira baina bazkideentzako merkeago. Bazkide txartelak aterako dira, eta hogei pelikulak nahi dituen bezela kudeatu ahalko ditu bazkideak. Hau da, nahi badu egun batean hogei lagunegaz joan, egin dezake. Behin horrek hogei bonoak gastatuta, bazkide denak merkeago ordainduko luke pelikula. 6 eurokoa izango litzateke sarrera, 4 euro bazkideentzako.
Makina digitalak erabilera mila ematen dio zineari, beraz zineaz aparte gehiago eman ahalko dute, bertso txapelketa edo kontzertuak esate baterako.
Udaletxeak bere zatia bete du orain herritarren txanda da. Otsailaren 28an ikusiko da herriaren borondatea.
Kontu korrontea zabaldu dute Lekeitioko La Caixa-n bazkideek ordainketa egiteko
Lekeitioko zineko bazkide egiteko
100 euroko kuota ordaindu behar da
La Caixa-n eta izen abizenak eman. Kudeaketa egin zuten Lekeitioko Zinemazale Elkartekoak Lekeitioko banku guztietan eta La Caixa aukeratu zuten komisiorik ez zutelako kobratzen eta gainera 600 euroko laguntasuna eskaintzen zutelako.
Kontu korrontea hau da: 2100 3938 21 0100220545. Otsailaren 28ra arte egongo da aukera dirua kontuan sartu eta bazkide egiteko. 400 bazkide edo gehiago lortzea da helburua.
