'Zerua Berun' aurkeztu dute Markina-Xemeinen
https://www.youtube.com/watch?v=IhwTVEoudVQ Zerua Berun, Peru Abarka Narrazio laburren IX. Lehiaketako album irabazlea kalean dago. Joan den barikuan aurkeztu zuten Castillo Suarez eta Maite Mutuberria, bi emakume nafarren uzta, Markina-Xemeingo udaletxean.
Peru Abarka Narrazio laburren IX. Lehiaketa irabazi duen lana esku artean hartu dute estreinako udaletxeko osoko bilkura gelan batutako herritarrek. Album irabazlearen nondik norakoak jakiteko aukera izan dute, gainera, zuzenean, lanaren idazlearen eta ilustratzailearen eskutik.
Castillo Suarezek prosa poetikoa dei daitekeen zerbait idatzi duela azaldu du, testu iradokitzaile bategaz. “Ez dago kontakizun bat. Giro atmosferiko bat azaldu dut, giro elurtsu bat”, zehaztu du. Errefuxatuta bizi diren haurrak izan zituen buruan idazleak lana idatzi zuenean: “Gauza gehienak ezin dituztela kontatu, gehiago direla kontatu ezin dituztenak kontatu al dituztenak baino”.
Barrutik idatzita zegoela iruditu zitzaion Maite Mutuberriari Castillo Suarezen testua, eta idazleak irekitzen zizkion ateak ezin zituela itxi erabaki zuen. Horrela, natura eta emakume baten gorputza oinarritzat hartuz giroa sortzen saiatu da. “Bakardadea, noraeza… sentimenduak islatzen saiatu naiz”, azaldu du.
`Zerua Berun` albuma irakurleen esku jarri aurretik, lanaren pasarte bat irakurri du idazleak ilustratzaileak margotzen zuen bitartean. Pantaila handian ikusi dute ilustratzailearen lana udaletxean batutakoek, Suarezen kontakizunaz gozatzen zuten bitartean.
Aurkezpenaren amaieran album berria sinatu dute egileek.
ARGAZKI GALERIA: [nggallery ID=205]
