Eusko Jaurlaritzak eta Lekeitioko EAJko ordezkariek izandako jarrera salatu du Lekeitioko Udalak
Lekeitioko EAJ-PNVk antolatuta Eusko Jaurlaritzako ordezkariek Lazunarri moilaren inguruko obren aurkezpen publikoa egingo dute bihar, eta Eusko Jaurlaritzak garatuko duen obraren aurkezpen hitzaldia administrazio publikoak egin beharko lukeela dio udalak, ez EAJk.
Udalari ez zaio egokia iruditzen karguak emandako informazioaz baliatzea alderdi konkretu baten mesedetan. “Ordezkari publikoak herritar guztiekiko betebeharra daukate eta ez bakoitzaren alderdiarekikoa bakarrik. Alderdikeriaz jokatzen daude, informazioa EAJren interesetan erabiltzen ari dira”, azpimarratu du udalak. Modu horretan langile publikoak egindako lanaz jabetu nahi dira udalaren ustez, “administrazio publikoaren baliabideak alderdiaren mesedetara erabilita”.
Horrelako jarrerek administrazioen arteko kolaborazioa oztopatzen dutela dio udalak, eta modu horretan, orain arte elkarlanean egindako lan guztia zalantzan jartzen dela. Gainera, Lekeitioko herritar guztien ordezkari den udalarekiko desleiala dela deritzo. Era berean, Jaurlaritzaren partetik, informazioaren erabilera alderdikoia eta interesatua sumatzen dela adierazi dute, “oposizioan dagoen alderdiaren bidez, herritar guztiena den gai hau lantzerako orduan”. Lazunarriko obren aurkezpena Udalak eta Eusko Jaurlaritzak elkarrekin egin beharko lukete Lekeitioko Udalaren ustez, herritar guztientzako espazioa hori delako. “Zer dela eta plazaratu nahi da informazio hau EAJ alderdiaren bitartez?”, galdetzen dute.
Hori guztia kontuan hartuta, erantzukizunez jokatzea eskatu die udalak Lekeitioko EAJri eta Jaurlaritzako Garraio Azpiegituren zuzendariari hitzaldia bertan behera utzi, eta dagokionean, udalak eta jaurlaritzak elkarrekin deialdi orokorra egitea proposatuz.
“Gai honi buruz udalak hasiera hasieratik abiatu zuen elkarlana, kontu hau kudeatzeko ardura zuten erakunde guztiekin, bai EAE mailakoak zein estatu mailakoak. Proiektuarekiko iradokizunak eta ekarpenak ere egin ditu, besteak beste, moilaren konponketaren inguruko arkeologia beharrizanak txertatzera begirakoak, zein paisaian gerta daitezkeen inpaktuen gainekoak”, azaldu dute. Bestalde, obraren inguruan Jaurlaritzako ordezkariek argitu ez dituzten zalantzak dauzkatela azpimarratu dute, eta erantzuna hitzaldian emango duten galdetzen diete.
Lekeitioko Udalak jakitera eman duenez, lehendakaritzara gutun bat bidaltzea aztertzen dabiltza: “Gaiaren inguruko kudeaketaren desegokitasuna adierazteko eta udalarekiko zein herritarrei erakutsitako errespetu falta adierazteko”.
