Martxoaren 19an ekingo dio bideari XIX. Korrikak, Urepeletik abiatuta
Euskal Herria zeharkatzeko, 2.100 kilometro baino gehiago egingo ditu Korrikaren hemeretzigarren edizioak. Urepeletik abiatuko da martxoaren 19an eta Bilbon amaituko da martxoaren 29an. Tartean, gelditu gabeko 11 egun egingo ditu Korrikak. Atzo egin zuten AEK-k antolatzen duen lasterketaren aurkezpena Bilbon, eta Korrika 19aren omendua Durangoko Azoka izango dela jakinarazi zuten.
Euskahaldun aukeratu du AEK-k Korrika 19ren lelorako, euskararen aldeko «ahulduntzean» jarri nahi baitute indarra. Euskal Herria euskalduntzeko norberaren eta taldearen ahalmenean sinetsi behar dela azaldu zuten atzoko aurkezpen ekitaldian: «beraz, erabil dezagun ahalmen hori».
Urepeletik abiatuta, Bilbon amaituko da 2.100 kilometro baino gehiago egin ondorenAuzolanaren garrantzia. Euskal Herriak «auzolanean eta elkarlanean» lorpen handiak egin dituela aipatu du Korrika-ko koordinatzaile berri Asier Amondok, Korrika bera, esaterako: «Iraganean bezala, gaur egun ere, eskuzabala eta ahaltsua dela frogatuko du». Korrika 19k «ahalmen metaketa» izan nahi du: «Bide berrien abiapuntu». Gutako bakoitzaren eta gu guztion nahiak eta ahalak, auzolanak eta elkarlanak eragingo baitu Euskal Herria, benetan, Euskararen Herria izatea». Hemeretzigarren Korrikaren omendua, bestalde, Durangoko Azoka izango dela jakinarazi dute, datorren urtean 50 urte betetzen baititu. Durangoko Azoka euskal kultur eragileen topagune eta auzolanean lortutako lorpen handien adibidea dela iritzita, urteurrena baliatu nahi izan dute omenaldia egiteko. Korrika 19k jasotako dirua Euskal Herri osoko gau eskolak eta euskaltegiak laguntzeko erabiliko dutela azaldu zuen atzo Mertxe Mujika AEK-ko koordinatzaile nagusiak. Bestalde, aurreko edizioetan egin modura, Korrikaren baitan, hainbat jaialdi eta kultur ekitaldi antolatuko dituztela jakinarazi dute.
