Ondarroako osasun zentroa, artxiboko irudia.
Lau orduko lanuztea deitu dute gaurko sindikatuek, goizeko eta arratsaldeko txandetan. 11:00etan hasi da goizeko lanuztea, eta eragina izaten ari da Lekeitioko eta Ondarroako osasun zentroetan. Lekeition zerbitzu minimoak ari dira lanean, eta arratsaldean ere, kontsultarik ez dagoenez, hala izango dela jakinarazi dute, “larrialdi zerbitzuek berez minimoekin funtzionatzen dutelako”.
Ondarroako osasun zentroak jakinarazi duenez, langileen %35ak egin du bat lanuztearekin; eta arratsaldean, Lekeition legez, zerbitzu minimoak izango direla lanean Larrialdi zerbitzuetan.
Markina-Xemeingo osasun zentroaren daturik ez dute eman oraindik. Mutrikun, esan dutenez, lanuztearen deialdiak eraginik ez du izan.
LAB eta SATSE sindikatuek lehen balorazioa egin dute. Biek ala biek kritikatu dute Osakidetzak zerbitzu minimoen kopurua errespetatu ez duela. SATSEren ordezkari Amaia Mayorrek azaldu duenez, “Osakidetzak ez ditu errespetatu zerbitzu minimoetarako berak zehaztutako kopuruak”. Zerbitzu kirurjikoak aipatu ditu, “programatutako ebakuntzak egiten ari dira, eta arratsaldean ere lan egingo dute, egun normaletan egiten ez badute ere”. Horretarako, Mayorrek dioenez, lan ordu estrak eskaintzen ari da Osakidetza langileei: “Beste batzuk langileen eskubideen eta lan baldintza hoben aldeko lanuztea egiten ari diren bitartean, Osakidetzak lan orduetatik kanpoko lana eskaintzen ari da”.
Lehen mailako arreta ematen duten zerbitzuei dagokienez, bai Mayorrek zein Galdakaoko ESI Barrualdeko LABeko delegatu Latxe Urangak esan dute zarratuta beharko luketen zenbait zerbitzu ireki dituela Osakidetzak, eta horretarako kontratazioak ere egin dituela.
Gaurko deitu duten lanuzteak izan duen eraginaren datu ofizialik ez dute oraindik sindikatuek. Hala ere, Osakidetzako langileek izan duten jarrerarekin poizk dira sindikaatuak. Ez dute gauza bera esaten Osakidetzari buruz. Urangak azaldu duenez, lan baldintzak okerrera doazen arren, lan karga haditu gura du Osakidetzak, eta langileak haserre daude.
Hurrengo asteetarako ere
mobilizazioak iragarri dituzte sindikatuek.
