Ur isuri batek kalteak eragin ditu Pasealekuko arkupeetan
Eskola zaharrean iturgintzako hainbat pieza ostu zituzten bariku goizaldean, eta horren ondorioz sortutako ur isuriak urez bete zuen lehen gaztetxea zenaBariku goizaldean, iturgintzako hainbat pieza ostu zituzten lehen gaztetxea zen Pasealekuko eskolet...
Eskola zaharrean iturgintzako hainbat pieza ostu zituzten bariku goizaldean, eta horren ondorioz sortutako ur isuriak urez bete zuen lehen gaztetxea zena
Bariku goizaldean, iturgintzako hainbat pieza ostu zituzten lehen gaztetxea zen Pasealekuko eskoletatik. Iturriak, hodiak eta beste hainbat pieza eta gauza eraman zituzten. Udal arduradunek jakitera eman dutenez, pieza horiek kentzearen ondorioz ura ateratzen hasi zen, eta Seber Altube auditoriora ematen duen eskolako beheko solairua urez bete zen.Goizean jakin zuten udaletxeko zerbitzuetako beharginek gertatutakoa, eta hara joan ziren; baita Pasealekuko arkupeetan entseatzeko lokala duen Elai-Alai dantzari taldeko kideak ere. Azaldu dutenez, beraien lokalean ere kalteak eragin ditu gaztetxean sortutako ur isuriak: «Goiko solairuan ditugun arropa batzuk busti egin dira, mutilen harizko prakak eta alkandorak, batez ere. Haiez gain, liburuak eta artxiboko hainbat gauza ere busti egin dira, berreskuratu ezin ditugun kartel zaharrak, esate baterako». Ordenagailuak plastikoekin babestu dituzte, eta ez dakite oraindik urak kaltetu dituen ala ez.
Armairuetara ere ura iragazi dela esan dute dantzari taldekoek, eta hezetasunaren beldur ez ezik, egurra ustelduko den beldur ere badira.
Teknikarien txostena
Jubilatuek ere erabiltzen dute Pasealekuko arkupeetan dagoen lokala, eta ariketak egiteko erabiltzen duten zorua ere urez bete zen. Udaletxeko langileek zoru horretako zein gaztetxeko beheko solairuko ura kentzen eman zuten bariku goiza.
Gernika-Lumoko alkate Jose Mari Gorroñok azaldu legez, udal teknikariek egin beharreko txostenari itxaron behar diote kalteen balorazioa egiteko. Txostena egina dutenean, aseguru etxeari aurkeztuko diotela zehaztu du Gorroñok.
