Etxebarrian jokatuko da Bizkaiko Bertsolari Txapelketako lehenengo finalaurrekoa

Lea-Artibai eta Mutriku

2014/11/19

Bizkaiko bertsolari txapelketako hirugarren kanporaketa jokatu zuen Mungian Joseba Artzak; bigarren egin zuen. Argazkia: Bizkaiko Bertsolari Elkartea

Herriko frontoian izango da saioa, zapatuan, 17:30ean. Ander Elortegi Garatea, Eneko Abasolo Txabarri, Fredi Paia Ruiz, Miren Amuriza Plaza eta Lea-Artibaiko bertsolari bi igoko dira frontoiko oholtza gainera: Iratxe Ibarra Foruria markina-xemeindarra eta Etxebarriko Joseba Artza Zubillaga.

Saioko irabazlea zuzenean sailkatuko da abenduaren 20an Miribillan jokatuko den Bizkaiko Bertsolari Txapelketako finalera, eta besteak, puntuazioen arabera edukiko dute horretarako aukera.

Kantatuko duten bertsolarietatik, Fredi Paia, Iratxe Ibarra eta Miren Amuriza 2012ko finalista izateagatik zuzenean egon dira finalaurrekoetarako fasera sailkatuta. Beraz, zapatuan hasiko da eurentzako Bizkaiko Txapaelketa. Bestetik, Eneko Abasolo Abarkas Mungiako saioa irabazita sailkatu da Etxebarriko saiora. Ander Elortegi eta Joseba Artza puntuazioz sailkatu dira finalaurrekoetara.

Gai emaile beharretan Bernar Mandaluniz Plaza ariko da Etxebarrian. Epaimahaian hurrengoak egongo dira: Iñaki Aurrekoetxea Arkotxa, Mirari Azula Aurrekoetxea, Jurgi Fuentes Goikoetxea, Jon Jaio Aiartzaguena, Joseba Santxo Uriarte eta Ander Txakartegi Basterretxeak; idazkari beharretan, Itziar Basterretxea Olarreaga ariko da.

Finalaurrekoetan kanporaketetan baino ariketa bat gehiago egin beharko dute bertsolariek. Hurrengoak izango dira bertsolariek egin beharreko lanak:

Zortziko nagusian ofiziotan hiruna bertso
Zortziko txikian ofiziotan hiruna bertso
Hamarreko txikian ofiziotan hiruna bertso
Kartzelako lana: Puntua emanda bertso bi zortziko txikian, eta gai bati buruz bertso bi doinu eta neurri librean.

Sarrerak salgai daude www.bertsosarrerak.eu orrialdean, eta egunean bertan ere salduko dira txarteldegian. Kontzertuak Bizkaiko Bertsolari Txapelketako finalaurrekoa herrian izanik, kontzertuak antolatu ditu gauerako Etxebarriko Gazte Asanbladak. Hiru taldek joko dute 22:30etan hasita: Bi Bala taldeak, Arrakalak eta Ezten Girok. Frontoian bertan ogitartekoak afaltzeko aukera egongo dela jakitera eman dute gazte asanbladakoek, eta taberna zabalik egongo dela aurreratu dute.