Neguko herri ohituretan fin
Erlijiosoak edo paganoak, neguko ospakizun herrikoien sasoian murgiltzen dabiltza herritarrak, bete-betean, kandelak eskuan, santa eskean, basatozten edo sanblasetan.Hotza ez da oztopo izaten ari neguko jai eta ospakizunetan ibiltzeko. Usadio herritarr...
Erlijiosoak edo paganoak, neguko ospakizun herrikoien sasoian murgiltzen dabiltza herritarrak, bete-betean, kandelak eskuan, santa eskean, basatozten edo sanblasetan.
Hotza ez da oztopo izaten ari neguko jai eta ospakizunetan ibiltzeko. Usadio herritarrei jarraituta, Kandelario, Santa Ageda, San Blas eta Txitxiburduntzi ospatzeko prest agertu dira Busturialdeko, Lea-Artibaiko eta Mutrikuko herritarrak.Gernika-Lumon, herenegun atera ziren ume zein nagusiak Kandelario abesteko. Elai-Alai dantzari taldeak eta Segundo Olaeta Musika Eskolak antolatuta, doinuz bete zituzten herriko kaleak, sugar txikien argipean. Goizean, Bermeoko Demiku auzoan hasiera eman zieten Kandelaria jaiei, eta otsailaren 15era arte luzatuko da egitaraua. Etxebarrian, berriz, Gure Esku Dago dinamikaren ikurra irudikatuko dute herriko plazan barikuan.
Atzo San Blas eguna izan zen, eta bazkariagaz ospatu zuten Aulestiko erretiratuek. Goikaleko auzokoek, berriz, zapatuan egingo dituzte sanblasetako ospakizunak. Busturian, txigorki lehiaketa egin zuten domekan. Zortzi txigorki plater aurkeztu zituzten, eta lehenengo eta hirugarren sariak Pedro Pedrazarentzat izan ziren. Bigarren saria, berriz, Mari Tere Garaiazarrak hartu zuen. Eako Bedarona auzoan ere ospatzen dituzte sanblasak. Zapatuan egingo dute bazkaria, eta Esteibar eta Obietagaz dantzarako aukera edukiko dute.
Santa eskean, kalean
Gaur, berriz, santa eskean aterako dira han eta hemen. Goiz partean eta iluntzean, kaskabiloen, mailuen eta ahotsen doinuak izango dira nonahi. Hala ere, badago Santa Ageda asteburuan ospatuko duenik ere: besteak beste, Arratzu, Berriatua, Ereño, Mutriku, Muxika, Nabarniz, Ondarroa, Sukarrieta eta Ziortza-Bolibar.
Muruetako eta Ibarrangeluko bizilagunak, aldiz, aurreratu egin dira, eta joan den zapatuan ibili ziren auzoz auzo santa eskean. Ibarrangelun, esaterako, 30 bat lagun bildu ziren. Goizean eta arratsaldean aritu ziren kantuan, eta eguerdia eta gau partea txokoan bazkaltzeko eta afaltzeko aprobetxatu zuten.
Txitxiburduntzirako ordua
Hilaren 8a eta 15a, aldiz, basatoztea edo txitxiburduntzia egiteko egunak izango dira Busturialdean. Hala, zotzean txorizoak jarrita, erre egingo dituzte, ostean jateko. Helburu horregaz, Busturian, Gautegiz Arteagan, Gernika-Lumon eta Muruetan bilduko dira herritarrak domekan. Eta gauza bera egiteko elkartuko dira Ereñoko eta Nabarnizko bizilagunak ere hilaren 15ean. Eta herririk herri, eskoletako umeek ere izango dute txitxiburduntzia egiteko aukera egunotan.
