Merkatu Plazaren aro berriari hasiera emango diote jai giroan
10:30ean hasiko dira ospakizunak, talo ikastaro bategaz. Musika, antzinako jolasak eta txokolatada egongo dira arratsaldean, umeentzakoMusikaz, ikastaroz, eta jan-edanaz lagunduta egongo da zapatuan, Lekeitioko Merkatu Plaza. Izan ere, plazaren aro ber...
10:30ean hasiko dira ospakizunak, talo ikastaro bategaz. Musika, antzinako jolasak eta txokolatada egongo dira arratsaldean, umeentzako
Musikaz, ikastaroz, eta jan-edanaz lagunduta egongo da zapatuan, Lekeitioko Merkatu Plaza. Izan ere, plazaren aro berriari hasiera emateko jaialdia ospatuko dute bertan. Jaialdiaren helburua herritarrak Merkatu Plazara gerturatzea da, horrela salerosketa gunea indartzeaz gain, merkatu plaza herritarren topaleku bihurtu nahi du Lekeitioko Udalak.Talo ikastaro bategaz hasiko dira ospakizunak, 10:30ean. Lekitto Bedarraren eskutik, herritarrek taloak egiten ikasi ahalko dute. Horrez gain, taloen eta edarien txosna bat ere jarriko dute, musikaz lagunduta.
Ondoren, Merkatu Plaza indartzeko, berregituratzeko eta modernizatzeko eramandako lanak azalduko ditu Maitane Larrauri alkateak. «Udalak garapen ekonomikoko gune garrantzitsutzat dauka Merkatu Plaza, komunitatean eta herri honen garapen sozial eta ekonomikoan zuzenean eragiten duelako», esan dute. Alkatearen hitzen ondoren, Xabat Galletebeitiak bertso batzuk botako ditu.
Arratsaldean, berriz, 17:00etatik aurrera, Lekeitioko Aisialdi Taldearen eskutik, umeentzako antzinako jolasetan ibiltzeko aukera egongo da, eta ondoren, txokolatada.
Zapatukoa ez da, baina, Merkatu Plaza herritarrei zabalik egongo den egun bakarra. Otsailaren 6az geroztik, goiko solairua herritar guztientzat zabalik dago, 09:00etatik 21:00etara.
«Jaialdi honegaz Merkatu Plazaren aro barri bati hasiera eman nahi diogu. Hazkundea ulertzeko beste erarik badagoela sinisten dugulako jarri dugu martxan eraberritze programa hau», azaldu du udalak. 31.000 euroko inbertsioagaz eraman dituzte aurrera eraberritze lanak.
